लूका 22
22
यीशु खिलाफ मेझर त यीशु मारण
(22:1—23:56)
यीशु खिलाफ मेझर
1रौठि त्योहार जेसे “बचणे त्योहार”#22:1 “रौठि त्योहार” त “बचणे त्योहार” सच्चे बि दुई अलग अलग त्योहार असे। पर किस कि एन्हि दुई यक होरी पता मनान्ते, त एस मेह्णु यके त्योहार मानते। पुजारोठि 23:5-6; निसुणे 12:6,11; 15-18 बि बोते एणे बाड़ा थिआ; 2त मुख्य पुजारे त धर्मशास्त्री यीशु मारुण जे मौका तोपुण लगोरे थिए। पर से जे मेह्णु तस शुणुण जे किठिए थिए तेन्हि हेर डरतेथ।
3तिखेईं शैतान यहूदे जेसे जे इस्कारियती बि बोतेथ, तस अन्तर घेई गा। से बाराह चेली अन्तरा यक थिआ। 4तेन घेई कइ मुख्य पुजारे त देहरे पेहरा देण बाड़ी के सरदार जुए बोक की कि यीशु तेन्हि केआं कीं टोवाण। 5त से सोब खुश भुए त तसे धे रुपेई देणे जुबान दिती। 6से मान गा त ईं मौका तोपुण लगा जपल यीशु हुसुड़े केईआं अकेला भुन्ता, तिखेईं तेन्हि केआं तस टोवाई छता।
अखिर फेरि चेली जुए बचणे त्योहारे रौठि खाण
मत्ती 26:17-19; मरकुस 14:12-16
7तोउं, रौठि त्योहारे रोज एई गा, जपल बचणे त्योहारे छिएड़ु भकत देण जरूरी थी। 8त यीशु पतरस त यूहन्ना जे ई बोल कइ लंघा, “घेई कइ हें खाण जे बचणे त्योहारे रौठि बणाण दिए।” 9त तेन्हि तस केआं पुछु, “ए गुरु, तुस कि चहन्ता ए असी कोठि बणाए?” 10तेन तेन्हि जे बोलु, “हेरे, ग्रां अन्तर घेन्ते ईं तुसी यक मेह्णु मेता जे पाणि घाड़ु नेण लगो भुन्ता, से जेस बि गी अन्तर घियेल तुस बि तसे पतोती घेई घिए। 11त तेस गीहे मालिक जे बोलुण, ‘गुरु तोउ जे ईं बोता कि से भखेरी कोठि असी, जेठि अउं अपु चेली जुए बचणे त्योहारे रौठि खांता?’ 12से तुसी यक आटी हरालता; तठि तुसी त्योहारे रौठि बणाणि।” 13तेन्हि घेई कइ जीं यीशु बोलो थी तिहांणि मेउ त से तठि रौठि बणाई।
प्रभु अखिर बेह्लु
मत्ती 26:26-30; मरकुस 14:22-26; 1 कुरिन्थ 11:23-25
14त जिखेईं बचणे त्योहारे रौठि खाणे टेम भुआ त से अपु प्रतिनिधि जुए रौठि खाण जे बिशा। 15त तेन तेन्हि जे बोलु, “मोउं बोडी चह थी कि दुख सेहणे केआं पेहले इस बचणे त्योहारे रौठि तुसी जुए खाउं। 16किस कि अउं तुसी जे बोता कि जपल तकर में बारे परमेश्वरे योजना पूरी ना भोल, तोउं तकर अउं एस ना खांता।” 17तोउं तेन कटोरा टा त परमेश्वरे धन्यवाद दी कइ बोलु, “इस नीए त अपफ बुच बांटिण दिए। 18किस कि अउं तुसी जे बोता जपल तकर परमेश्वरे राज्य पूरी ताकत त शान जुए ना एईयाल, तपल तकर अउं दाखरस कदी ना पीन्ता।” 19तोउं तेन रौठि टाती त परमेश्वर धन्यवाद कइ कइ तसे टुकुड़ किए। होर तेन्के धे ई बोते बोते दिते कि “ए में जिसम भो#22:19 इठि यीशु रौठि जे अपु जिसम जोई बराबरी किओ असी।, जे तुसी लिए भकत चढ़ो असा : में याद अन्तर इहांणि कते रिहे।” #22:19 “में याद अन्तर” मतलब तुसी बचाण जे अउं जे अपु प्राणे मुल देण लगो असा, तसे याद अन्तर। मरकुस 10:45; मत्ती 20:28 20इहांणि तेन रौठि खाण केआं पता होरा कटोरा बि ईं बोते बोते दिता कि “ए कटोरा बि में तेस लहुए ईं असा, जे में बेलि तुसी जे बहिन्तु। ए परमेश्वरे नोई जुबान असी, जेसे बेलि सम्हाई विश्वासी परमेश्वरे जुए रिश्ता जोड़ते।#यिर्मयाह 31:31 21पर हेरे, जे मोउं में दुश्माणी केआं टोवान्ता से इठि मोउं जुए रौठि खाण लगो असा। 22किस कि मनखे कुआ जुए जीं ठीक किओ असु, तीं भुण असु। पर जे तस तसे दुश्माणी केआं टोवान्ता तसे खेया खाट भोई घेन्तु।” 23त से अपफ बुच बोक विचार करण लगे कि तेन्हि बुचा कोउं असा जे तस टोवान्ता।
सोबी केआं बोडा कोउं?
24पता तेन्हि चेली बुच ई झगड़ा भुण लगा कि तेन्हि अन्तर कोउं सोबी केआं बोडा असा।#मत्ती 18:1; मरकुस 9:34; लूका 9:46 25त तेन तेन्हि जे बोलु, “होर जाति मेह्णु के राजे, तेन्हि पुठ राज कते त तेन्हि केआं अपफ सुआ बोडे बणान्ते। फि बि से मेह्णु के मितर बोलिन्ते। 26पर तुस तेन्केरी ईं ना बणे, बल्कि जे तुसी बुच बोडा बणुण चहन्ता, से मठड़ी त जे खास बणुण चहन्ता, से तुं सोबी के सेवा करे।#मत्ती 20:25-27; मरकुस 10:42-44; मत्ती 23:11; मरकुस 9:35 27किस कि बोडा कोउं असा जे खाण जे बिश्ता या से जे सेवा कता? कि से नेईं ना, जे रौठि खाण जे बिशो असा? पर अउं तुसी बुच यक नौखरे ईं असा। त तुस बि में ईं बणे।”#यूहन्ना 13:12-15
28तोउं तेन तेन्हि जे बोलु, “तुस से भीन्थ, जे में परीक्षा अन्तर हमेशा मोउं जुए साते थिए। 29त जीं में बोउए मेन्धे यक राज्य पुठ हक दुतो असा, तीं अउं बि तुं धे यक राज्य पुठ हक देण लगो असा। 30ताकि तुस में राज्य अन्तर मोउं जुए खाल पियेल, होर सिंहासन पुठ बिश कइ इस्राएले बाराह ऊड़ी के न्याय करियेल।”#22:30 एन्हि सोब मेह्णु पुठ न्याय तपल कते, जपल परमेश्वरे राज्य एन्ता। यीशु चेले एस कम “नौखर” ईं कते, ना कि “राजे” ईं। प्रतिनिधि 2:36#मत्ती 19:28
पतरसे मुकरणे भविष्य वाणि
मत्ती 26:31-35; मरकुस 14:27-31; यूहन्ना 13:36-38
31फिर तेन बोलु, “शमौना, ओ शमौना, हेर! जीं गिहुं पुण कइ साफ कते तिहांणि शैताने तुस मोउं केआं अलग करुं जे परमेश्वर केआं पुछो असु। 32पर मेईं तोउ जे प्रार्थना की कि तें विश्वास कमजोर ना लौता भुओ। होर जिखेईं तु अपु मन बदलाई कइ मोउं जे वापिस एईयाल त अपु साथी के सुआ कमजोर विश्वास ताकतवर करुं।” 33त तेन तस जे बोलु, “ए प्रभु, अउं तोउ जुए जेहेल अन्तर एण जे त मरण जे बि तेयार असा।” 34तेन बोलु, “पतरसा, अउं तोउं जे बोता कि जोउं तकर तुं टाई फेरि मोउं पिछाणण केईआं ना मुकरियाल, तोउं तकर आज कुकड़े बांग ना देन्ता।”
बटुआ, झोड़ा त तलवार
35तोउं तेन तेन्हि जे बोलु, “जिखेईं मेईं तुस बटुए, झोड़ा त होरे यक जोड़े बूटे बगैर लंघो थिआ#मत्ती 10:9,10; मरकुस 6:8,9; लूका 9:3; 10:4 त की तुसी केसे चीजे कमी भुओ थी ना?” त तेन्हि बोलु, “केसे चीजे ना”। 36तेन तेन्हि जे बोलु, “पर अब जेस केईं बटुआ असा, से तस नेण दिए, त तिहांणि झोड़ा बि घिन घिए, त जेस केईं तलवार नेईं से अपु झिणे बेच कइ यक खरीदिण दिए।#22:36 यीशु इठि सच्चे बि तलवार खरीदणे जे, बटुआ, त होरे चीजे नेण जे बोलुण नेईं लगो। पर से इठि मजाक कर कइ बोलुण लगो असा कि “किस कि मेह्णु मोउं कुछ देर पता, यक डाकु ईं बरतते, त की करुं, चले तलवार, रुपेई बगैरा अपफ जुए रखते, ताकि अउं सच्चे बि डाकु लगियेल त तुस सम्हाई में साथी लगियेल।” सुसुर समझणे लिए लूका 22:53 बि हेरे। 37किस कि अउं तुसी जे बोता कि ए जे बि में बारे लिखो असु कि ‘मेह्णु तस अपराधी मानते’,#यशायाह 53:12 तस मोउं अन्तर पूरु भुण जरूरी असु।#22:37 यीशु इठि बोलुण लगो असा कि “में दुश्माण, मोउं जे यक डाकु के सरदारे ईं बरतते, जे डाकु के दल चलाण लगो असा।” किस कि में बारे लिखो बोके पूरी भुणे बाड़ी असी।” 38तेन्हि यीशु जे बोलु, “ए प्रभु, हेर इठि दुई तलवार असी।” त तेन तेन्हि जे बोलु, “बस! सुआ भोई गोउ। कपल तकर तुस में बारे परमेश्वरे योजना ना समझते?”
जैतुने फाट पुठ यीशु प्रार्थना करीण
मत्ती 26:36-46; मरकुस 14:32-42
39तोउं यीशु बाहर निस कइ रोजेरीं ब्यादि टेम जैतुन फाट पुठ गा। त चेले बि तस जुए गे। 40तेस जगाई पूज कइ तेन तेन्हि जे बोलु, “प्रार्थना करे कि तुस परीक्षा अन्तर ना पड़ेल त मोउं छड़ दियेल।” 41त से अपफ तेन्हि केईआं बखरे धिखुभई दूर गा त जिआणु के बल बिश कइ प्रार्थना करण लगा, 42“बोउआ! अगर तें इच्छा असी त छने इस कटोरा मोउं केआं दूर कइ छड़। तोउं बि में ना बल्कि तें इच्छा पूरी भुओ लौती।” 43तपल परमेश्वरे यक स्वर्गेदूत तस केईं लंघा जेन तसे धे ताकत त हिम्मत दिती। 44पर से अपफ पुठ एणे बाड़े कष्टे बारे सोच कइ तसे गण बाहर निसुण लगो थिआ। तोउं त से हउ बि जोरी जोई प्रार्थना करण लगा, त तसे धुप निचणण लगी त लहुए तोफु बण कइ भीं झड़ण लगे। 45तोउं से प्रार्थना केआं खड़ भुआ त अपु चेली केईं गा। पर से उदास भोई कइ उंघो मिए#22:45 चेले यीशु प्रार्थना शुण शुण कइ दुख जुए उदास भोई गो थिए। किस कि यीशु बोडी दुख त कष्ट जुए प्रार्थना करण लगो थिआ। । 46त तेन तेन्हि जे बोलु, “किस उंघो असे, खड़ भुए त प्रार्थना करे कि परीक्षा अन्तर ना पड़ेल।”
यीशु धोखे जुए टोवाण
मत्ती 26:47-56; मरकुस 14:43-50; यूहन्ना 18:3-11
47से ईं बोलुण लगो थिआ कि यक हुसुड़ा तठि पुजा, त तेन्हि बारोही बिचा यक जेस नओं यहूदा थिउ, तेन्के अगर अगर एण लगो थिआ। से यीशु भेएड़ आ त गड़ामेड़ा कर कइ फोकड़िआ। 48त यीशु तस जे बोलु, “ए यहूदा, कि तु फोकड़ियाई कइ मनखे कुआ टोवान्ता ना?”#22:48 फोकड़ियाई कइ यहूदी मेह्णु यकी होरी मीते। (लूका 7:46 हेरे) यहूदा पेहले ईं सपाही जे बुलो थिआ कि चेली बुच कोउं यीशु असा, से तेस फोकड़ियाई कइ तेन्हि जे भाश कता। त से अराम जुए यीशु टाइ छड़ियेल। 49तसे साथी जिखेईं हेरु कि की भुणे बाड़ु असु त बोलु “ए प्रभु, कि असी मडीण ना?” 50यीशु कुछ बोलुण केआं पेहले ईं चेली बिचा यक जेईं छूरि चलाई कइ बोडा पुजारे नौखरे देहणा कन छोलि फटा। 51त यीशु बोलु, “अब बस करे” त तसे कन नी कइ वापस जोड़ छड़ा। 52तपल यीशु मुख्य पुजारे, देहरे पेहरा देण बाड़े के सरदारे त टजे स्याणे जे, जे हुसुड़ा जुए थिए बोलु, “कि तुस मोउं डाकु समझ कइ लठि त तलवार घिन ओ असे ना? 53जिखेईं अउं देहेर अन्तर हर रोज तुसी जुए साते थिआ त तुसी मोउं पुठ हथ बि ना लाई बटा। पर, चले! अभेईं तुं टेम असा, त शैताने राज असु।”#लूका 19:47; 21:37
पतरसे मुकरुण
मत्ती 26:57-75; मरकुस 14:53-54; 14:66-72; यूहन्ना 18:12-18; 18:25-27
54तोउं तेन्हि यीशु टाइ कइ नी छड़ा, त बोडा पुजारे गी आणता। पतरस दूर केआं तेन्के पता पता अओ थिआ; 55त जपल से बराने अन्तर आग जाई कइ साते बिशे त पतरस बि तेन्हि मेह्णु जुए तठि बिश गा कि यीशु जोई कि भुणे बाड़ु असु तस हेरण जे बिशो थिए। 56त यक नौखराणि तस आगी भेएड़ बिशो हेर कइ तस जे बोलुण लगी, “ए बि त तस जुए साते थिआ।” 57पर पतरसे ई बोल कइ ना कइ छड़ा “ओ भिलिआ, अउं तस ना जाणता।” 58धिक ठेहर कइ केनि तसे धे हेर कइ बोलु, “तु बि त तेन्हि बुचा यक असा।” पतरसे बोलु, “ओ यारा, अउं ना भो।” 59कोई यक घंटे पता यक मेह्णु जोर दी कइ बोलु, “पक्का, ए बि त तस जुए साते थिआ, किस कि ए बि गलीले भो!” 60पतरसे तस जे बोलु, “ए मनखा, मोउं नेईं पता तु की बोलुण लगो असा।” से ई बोलुण लगो थिआ कि यकदम कुकड़े बांग दी छइ। 61तोउं प्रभु मुड़ कइ पतरसे धे हेरु। तिखेईं पतरस से बोक याद आई जे तेन बोलो थी कि आज कुकड़े बांग देण केईआं पेहला तु मोउं पिछाणणे केआं टाई लिंगि मुकीर घेन्ता। 62त से बाहर निस कइ जोरी जोरी रोलुण लगा।
यीशु बेज्जती भुण
मत्ती 26:67-68; मरकुस 14:65
63जेन्हि मेह्णु यीशु टातो थिआ से तसे मखोल बणाई कइ मडण लगे; 64त तसे टीर बन्हि कइ तस केआं पुछुण लगे, “भविष्य वाणि कर कइ बोल कि तु केन मडा!” 65त तेन्हि हउ बि सुआ बेज्जती बेज्जती बोके तस जे बोली।
यहूदी मेह्णु के टजोटे सम्हाणि यीशु
मत्ती 26:59-66; मरकुस 14:55-64; यूहन्ना 18:19-24
66जिखेईं भ्यागे भुई त टजे स्याणे, मुख्य पुजारे त धर्मशास्त्री किठा भुए, त यीशु अपु टजोट#22:66 ए हें टजोट ईं असा, जेठि नेते कानुन बणान्ते। लूका 20:1 पाद टिप्पणी बि हेरे। अन्तर अण्ह कइ तस केआं पुछुण लगे, 67“अगर तु समझता की तु मसीह भो त असी जे बोल छड़!” त तेन तेन्हि जे बोलु, “अगर अउं तुसी जे बोता कि ‘अउं भो’, त तुस विश्वास ना कते; 68होर अगर अउं पुछुण कि तुस कि समझते ‘मसीह’ कोउं भो त तुस कुछ जवाब ना देन्ते। 69पर अब मनखे कुआ सर्व शक्तिमान परमेश्वरे सुमले कना बिश कइ राज कता।” 70एस पुठ सोबी बोलु, “त कि तु परमेश्वरे कुआ भो ना?” 71तेन तेन्हि जे बोलु, “कि तुस ए तोउं बोते ना, किस कि तुसी पता असा कि अउं भो।” त तेन्हि बोलु, “अब असी होर कोई उगाही के जरूरत नेईं, किस कि असी अपु कनि बइ तसे मुंह केआं शुणो असु।”
Actualmente seleccionado:
लूका 22: pgg
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 (Active) Wycliffe Bible Translators, Inc. All rights reserved.