लूका 19
19
मामला नेणे बाड़ा जक्कई
1यीशु यरीहो शेहर अन्तर घेण लगो थिआ। 2तठि जक्कई नओएं यक मेह्णु थिआ, जे तेस इलाके अन्तर मामला नेणे बाड़ी के मुखिया थिआ त सुआ अमीर बि थिआ। 3से यीशु हेरण चहन्ताथ कि यीशु कोउं भो। पर किस कि से कलजुग थिआ, त हुसुड़े बझई जुए तेस ना हेर बटताथ। 4तिखेईं से तस हेरण जे अगर घेई कइ गुलेरे#19:4 गुलेरे बुटा यक थणे बुटे ईं बोडा भुन्ता (15 मिटर)। त तसे पन्ने बोडे बोडे भुन्ता। हियुंत अन्तर एसे पन्ने झड़ते। एसे फल खाणे भुन्ते। बुटे पुठ चढ़ि गा, किस कि यीशु तेन बते बइ घेण बाड़ा थिआ। 5जिखेईं यीशु तेस जगाई पुजा त तेन खड़िया हेर कइ तस जे बोलु, “ए जक्कईए, झट भीं आई! किस कि आज मोउं तें गी बिशुण असु।” 6से झट भीं एई कइ बड़े खुशी जुए तस अपु गी घिन गा। 7ईं हेर कइ सोब मेह्णु घुश-घुशात कर कइ बोलुण लगे, “हेरे, हेरे एस, ए कीं पापी मेह्णु गी जे गो असा।”
8पर गी पूज कइ जक्कई सोबी के साम्हाणि खड़ भुआ त प्रभु जे बोलु, “ए प्रभु, हेर! अउं अपु आधी संपत्ति कंगाली कें धे देन्ता, त अगर केसेरी कुछ बि जब्बरदस्ती कर कइ नीओ असु त तसे धे अउं चोउ गुणु वापस दी छता।” 9तिखेईं यीशु तस जे बोलु, “आज एस टब्बरे मेह्णु बच गे। किस कि एन बि अपु कमे बेलि हरालो असु कि ए अब्राहमे कुआ#19:9 यीशु इठि हुसुड़ा त अपु चेली जे बोलुण लगो असा कि जक्कई बि अब्राहमे कुआ भो, किस कि तेन अपु विश्वासे कमे बइ हरालो असा, जीं अब्राहम हरालो थिउ। से ना सद खानदान केईआं, बल्कि आत्मा अन्तर बि अब्राहमे कुआ भो। भो।#शुरुवात 15:5-6; 12:1-4; 22:1-18; याकूब 2:18-24 10किस कि मनखे कुआ जे गड़ो असे, तेन्हि तोपुण जे त बचाण जे अओ असा।”#मत्ती 18:11; लूका 5:32
सुन्ने सिक्के कथा
मत्ती 25:14-30
11जपल हुसुड़े मेह्णु एस बोक शुणु लगो थिए त यीशु यक कथा तेन्हि शुणाई। किस कि मेह्णु सोचतेथ, जिखेईं यीशु यरुशलेम शेहर पुजियेल त से राजा बणि घेन्ता। तेस टेम यीशु यरुशलेम शेहरे भेएड़ पुजी गो थिआ। 12त तेन तेन्हि जे बोलु, “यक राजे खानदाने मेह्णु राजा बणुण जे यक सम्राट केईं गा। 13तेन घेण केआं पेहले अपु नौखरी अन्तरा दस नौखर भिए त तेन्के धे दस सिक्के#19:13 मूल भाषा अन्तर “मिना” लिखो असु, जे कि चोउर मेहने मजूरी मुले बराबर असा। दिते त बोलु, ‘में एण तकर तुस लेण देण करे।’ 14पर कुछ मेह्णु तस अपु राजा ना बणण देण चहन्तेथ। त तसे पिठ पतूं दूत लंघाई कइ सम्राट जे बोलु कि अस ना चहन्ते कि ए असी पुठ राज करियेल।”
15“जपल से राजा बण कइ वापस आ त ईं भु कि तेन जेन्हि नौखरी कें धे सिक्के दुतो थिए, से नौखर भिए त तेन्के कमाई बारे पुछु। 16यक नौखरे एई कइ बोलु, ‘ए मालिका! तें सिक्के बइ दस सिक्के होरे कमाओ असे।’ 17तेन तस जे बोलु, ‘खरी, तु खरा नौखर असा! तु सुआ घट चीज पुठ यकीन लेएक निसा, त अब दस शेहरी के हाकिम बण’। 18दोके नौखरे बोलु, ‘ए मालिका! तुं सिक्के बइ पंज सिक्के होरे कमाओ असे’। 19त तेन तस जे बि बोलु, ‘गा त तु बि पंज शेहरी के हाकिम बण’। 20टेका नौखरे एई कइ बोलु, ‘ए मालिका! हेर तुं सिक्का इठि असा। मेईं ए बन्हि कइ रखो थिआ। 21किस कि अउं तोउ हेर डरताथ। तु बोडा सक्त मेह्णु असा : जे तेईं नेईं छोओ तेस तु घिन घेन्ता। त जे तेईं नेईं बोओ तस तु काट छता।’ 22ईं शुण कइ राजे तस जे बोलु, ‘ए दुष्ट नौखरा, अउं तेन्धेरी मुंहे बइ तें पंची कता। तोउ पता थिआ कि अउं यक सक्त मेह्णु असा त जे मेईं नेईं छोओ तस अउं घिन घेन्ता त जे मेईं नेईं बोओ तस अउं काट छता।#19:22 तु होरे मेह्णु कम लान्ता, पर तेन्के धे रुपेई ना देन्ता। 23त तेईं में सिक्के सहुंकार केईं किस ना छड़े, ताकि अउं एई कइ ब्याज जुएई नी बटुं?’ 24त राजे भेएड़ जे नौखर खड़ खड़ थिए तेन तेन्हि जे बोलु, ‘एस केआं एस सिक्के छुड़कइ कइ नीए, त जेस केईं दस सिक्के असे तसे धे दी छड़े।’ 25होरे मेह्णु तस जे बोलु, ‘मालिका! पर एस केईं दस सिक्के त असे।’ 26त राजे बोलु, ‘अउं तुसी जे बोता कि जेस केईं असु, तसे धे हउ बि दीइन्तु। जेस केईआं नेईं तेस केआं जे बि असु, से बि नीइन्तु।’#मत्ती 13:12; मरकुस 4:25; लूका 8:18 27अपु इन्हि नौखरी जुए हिसाब निपटाई कइ तेन बोलु, ‘में दुश्माण, जे ना चहन्तेथ कि अउं तेन्हि पुठ राज करुं, तेन्हि इठि अण्हे त मार छड़े।’”#मत्ती 25:14-30
यरुशलेम शेहर अन्तर यीशु
(19:28—21:38)
यीशु यरुशलेम शेहर घेण
मत्ती 21:1-11; मरकुस 11:1-11; यूहन्ना 12:12-19
28ई सोब बोक कर कइ यीशु यरुशलेम शेहरे कना जे अपु चेले त हुसुड़ा के अगर अगर हंटा। 29जिखेईं से जैतुन नओएं यक फाट पुठ बैतफगे त बैतनिया ग्रां भेएड़ पुजा त तेन अपु चेली बुचा दुई जेईं ईं बोल कइ लंघा, 30“सामणि ग्रां घिए। तठि तुसी यक खोतुड़ु बच्चा बन्हो मेता, जेस पुठ आज तकर कोई नेईं चढ़ो।#19:30 तेन्हि दिनि मेह्णु, खोतुड़ु बच्चे सद राजा त कोई खास मेह्णु पेहले सवारी करण जे रखतेथ। तस खोल कइ घिन एईए। 31अगर कोई तुसी केआं पुछियाल कि किस खोलुण लगो असे, त तुस बोले ‘प्रभु एसे जरूरत असी।’”
32जे चेले लंघो थिए, तेन्हि घेई कइ जीं तेन्हि जे बोलो थिउ, तिहांणि मेउ। 33जपल से खोतुड़ु बच्चे खोलुण लगो थिए त खोतुड़ु मालिके तेन्हि केआं पुछु, “एस बच्चे किस खोलुण लगो असे?” 34त तेन्हि बोलु, “प्रभु असे जरूरत असी।” 35त तेन्हि से यीशु केईं अण्ह छोउ त अपु अपु फुलो टलिड़ तेस खोतुड़ु बच्चा पुठ छइ कइ यीशु तस पुठ बिशाण छड़ा। 36जपल से घेण लगा त तसे अगर अगर मेह्णु अपु अपु फुलो टलिड़ बथ टड कइ तसे अग्रोईए।#19:36 मेह्णु ए सोब, राजा यीशु जे इज्जत त कदर करण जे किउ।
37यरुशलेमे भेएड़ एन्ते एन्ते जिखेईं से जैतुन नओएं फाटे रैहि पुठ पुजा त तसे चेली के सुआ बोडा हुसुड़ा यीशु सोब कमे बझई जुए जे तेन्हि अपु टीरे बइ काओ थिए याद कइ कइ जोरी जोरी परमेश्वरे गुणगान करण लगे।
38“हें परमेश्वरे जे राजा असी जे लंघो असा
से राजा बोडा महान असा!#छुआंरी 118:26
मेह्णु बचाणे ताकत सिर्फ तसेरी भो त अम्बर पुठ तसेरी महिमा भो!”
39ईं शुण कइ तिखेईं हुसुड़े अन्तरा कुछ फरीसी तस जे बोलुण लगे, “ए गुरु, अपु चेली जड़काण दिए।”#19:39 फरीसी यीशु हुसुड़े हेर जड़तेथ त इस मौके पुठ तेन्हि ईं बि डर थिआ कि रोमी सेना तेन्के विरोध कम ना करे किस कि रोमी अधिकारी ना चहतेथ कि सम्राट कैसर छड़ कइ कोई होरा राजा बणे। तोउं त फरीसी यीशु अपु चेले चुप कराण जे बोलु। 40त तेन बोलु, “अउं तुसी जे बोता अगर ए चुप बिशियेल त घोड़ लियार दी दी कइ परमेश्वरे गुणगान कते।”
यरुशलेम जे रोलुण
41जिखेईं यीशु यरुशलेमे भेएड़ आ त शेहर हेर कइ रोलु 42त बोलु, “तुस, ए यरुशलेम शेहरे मेह्णुओ! काश कि इस रोज अन्तर तुस समझ घेन्तेथ, कि तुसी केस बोके बइ शान्ति मेती। पर से अभेईं तुं टीरी केआं नियको असा। 43किस कि ईं बि रोज एन्ते जिखेईं तुं दुश्माण तुसी बटेरते। 44त तुसी त तुं गभुर जे यरुशलेम शेहर अन्तर असे, तेन्हि मार छते त तुं शेहरे घोड़ी पुठ घोड़े बि बिशुण ना देन्ते; किस कि तुसी इस टेम जिखेईं तुसी पुठ परमेश्वरे कृपा भो थी से ना पिछाणी।”
देहेर केआं दुकानदार बाहर लाण
मत्ती 21:12-13; मरकुस 11:15-17; यूहन्ना 2:13-22
45तोउं, यीशु देहेर अन्तर घेई कइ जे तठि भकत चढ़ाण जे जानवरी बेचतेथ त होरे सामान बेचतेथ, तेन्हि सोबी बाहर किढ़ण लगा, 46त तेन्हि जे बोलु, “परमेश्वर जे नियम मूसा धे दुतो थिआ तठि लिखो असु, ‘में गी#19:46 इठि “गी” मतलब यरुशलेम देहेर असा। होरे जगाई अन्तर, इस देहेर जे “परमेश्वरे गी” बि बोते। सद प्रार्थना करणे गी भो’#यशायाह 56:7 पर तुसी ए डाकु के कुड बणाई छओ असी।”#यिर्मयाह 7:8-11
47तढ़ेया पता, से हर रोज देहेर अन्तर शिचालताथ; त मुख्य पुजारे, धर्मशास्त्री त टजे स्याणे तस खतम करणे मौका तोपुण लगे।#लूका 21:37 48पर तेन्हि कुछ ना बुझु कि तेन्हि की करुं। किस कि जे से बोलुण लगो थिआ, सोब मेह्णु बोडे चह जुए तसे शुणतेथ।
Actualmente seleccionado:
लूका 19: pgg
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 (Active) Wycliffe Bible Translators, Inc. All rights reserved.