Luka 16
16
Isisinio yɨ mombi ʉ kuu ɔɔ mbɨmbanakɛ
1Kija Yeso a꞉sigio ɓakpataka ngiɓangɔ ɓɔ: « Mombi ʉ lɨkyɛmɛ mʉngana i꞉nye nʉ kapita angɔ mʉngana, iya i꞉nye kanga kumbo ngiangɔ. Ɓombi ɓambʉka nayɔ kʉɓɨa ɓɔ kapita wangɔ ngiinanɨ i꞉nye kyɨa kʉgabaka kumbo ngiangɔ kʉ gbaɨ. 2Kija makʉangɔ a꞉musoko, ambumuɓukuo ɓɔ: ‹ Moni kɔɔ ɓɨɓɨ ngika makʉkɔ aka ekoo asɔɔ akɛ, ka‑zʉ tanɨ? Ɨka‑zʉ nʉ lɨtaɓʉ lʉ falanga, wambʉna'ʉtakɨa falanga ngia a꞉ɓʉa nʉ iya utukuoo, jʉ wambʉkʉkwanana ɓata kuɓio kapita asɛmɛ gʉkʉ ɗɛkɛkɛ. › 3Kapita ngiinanɨ ambuɓukono akʉ 'ʉtʉma ɓɔ: ‹ Makʉasɛmɛ a tiga nɛmɛ kukpinyo akʉ kuu ngia maakyɨa‑ɔɔ. Ma꞊kyɨa tiga tanɨ? Mambʉkɔmʉ nʉ angu ʉ matɨnɨ nʉ maɓio tiga kʉ nʉ soni kuchochonoko. 4Oyi, mʉmbɨa ɨkyɛmɛ ngia ma꞊kyɨa mbɨaa. Ambʉ iɗo ɓɔ makʉasɛmɛ ʉnakpinyeni akʉ kuu, ɓombi ɓunawuliso ɓisi akʉ lizi ngilʉndaɓʉ kʉ wulisoo. › 5Kija kapita ngiinanɨ a꞉soko ɓombi kʉ nangana nangana iɓa ɓi꞉nye nʉ mabɨngɨa yɨ makʉangɔ. Ambuɓukuo iya wʉ pɛɛ ɓɔ: ‹ Wʉkwanana kutuisio makʉasɛmɛ kumbo 'ʉpɨtanɨ? › 6Ambumutisio ɓɔ: ‹ Ɓangbongboli ɓʉ umbundo mɨa mʉngana. › Kija a꞉musigio ɓɔ: ‹ Chɨka ɨtaɓʉ yɨ mabɨngɨa ngiisɔɔ. Wulo gagaa, wambʉtɨndakɨa ɓɔ ɓangbongboli makumi ɓɔkɔ. › 7Tiga nanɨ, ambuɓukuo mombi nga kɔmɔ ɓɔ: ‹ Ɔwɛ wʉkwanana kutuiso kumbo 'ʉpɨtanɨ? › Iinanɨ ambumutisio ɓɔ: ‹ Ɓabaga ɓʉ nganʉ mɨa mʉngana. › Kija a꞉musigio ɓɔ: ‹ Chɨka ɨtaɓʉ yɨ mabɨngɨa ngiisɔɔ, wambʉtɨndakɨa ɓɔ makumi ʉɓagɨna. › 8Mambɨnyɨ ʉ kumbo ambʉbɨba kapita ɔɔ ʉpɨtanakɛ ngiinanɨ, jʉ i꞉nye ɓɔ ʉkyananakeni nʉ mbɨmbanaka. Jʉ ɓombi ɓʉ ɨtaka ngia ɓanʉ mbɨmbanaka nadɨndɨ ati ʉndaɓʉ, kʉɓaa ɓombi ngiɓa ɓa amati ʉ wanga. »
9Kija Yeso a꞉matɨa kusigo ɓɔ: « Ɛmɛ maninu kusigio ɓɔ: Tumieni kumbo ɔɔ ɨsʉkʉɓwanɨ wʉ ɨtaka ngia kʉchwana nayɔ ɓayo nʉ ɓombi, ambʉ ati ngia kumbo ngiinanɨ ambukuɓio ɓata‑ɔɔ, Asʉɓɨɨ a꞊nɨjananɨa akʉ mʉa ngua ɓombi ɓaakyɨa‑ɛɛ akʉ mɨtʉ yɨ ɨpá nʉ mɨtʉ yɨ ɨpá. 10Mombi ngia a ngbingbii akʉ kumbo ngia ɔɔ ɗɛ ɗɛ ɗɛ, aɓio kʉ ngbingbii akʉ kumbo ngia ɔɔ 'ʉkpɔkpɔ. Mombi ngia ambʉkɔmʉ ngbingbii akʉ kumbo ngia ɔɔ ɗɛ ɗɛ ɗɛ, ambukuɓio ngbingbii akʉ kumbo ngia ɔɔ 'ʉkpɔkpɔ kʉ ɓwanɨ. 11Ndʉ nambukuɓio ngbingbii amati ʉ kyananakɨa kumbo ɔɔ ɨsʉkʉɓwanɨ wʉ ɨtaka ngiakɛ, anɨ tiga a꞊nɨsɨa kʉkanga ɨngama pɛpɛ tiga gbagba? 12Ndʉ nambukuɓio ngbingbii akʉ kumbo ngia ambʉkɔmʉ wʉndɛnʉ, anɨ a꞊ninzo tiga kumbo ngia ɓa꞉niɓusio? Mombi ɔngɔ ambʉkɔmʉ.
13Mombi ʉ kuu gʉkʉ mʉngana ambʉkʉkwanana kʉkyananakɨa ɓangama ɓapɨnɨ. Yɛmɔ a꞊yaa mʉngana ambʉkʉnda iya kɔmɔ. Yɛmɔ a꞊baya kyananakɨa ngama mʉngana, ambuɓio kʉna iya kɔmɔ ɨsʉkʉɓwanɨ. Nambʉkʉkwanana kʉkyananakɨa Asʉɓɨɨ, nʉ kʉkyananakɨa falanga wati mungono. »
Yeso akʉngaka moni kʉ di di di ekoo ʉ Ɓafalisayɔ
(Mat 11:12-13; 5:31-32; Mak 10:11-12)
14Iya Ɓafalisayɔ ɓa꞉kɔ nayɔ moni ngikʉnanɨ kʉ muɓomu, ɓambufaniso nʉa Yeso jʉ ɓi꞉nye kʉnda falanga ɓʉkaɨ. 15Kija Yeso a꞉ɓusigio ɓɔ: « Inu naakʉnda pana ɓungbingbii ngiɓʉndɛnʉ akʉ mesu kʉ ɓombi, ɨkyɛmɨngana Asʉɓɨɨ akʉmbɨa mɨtʉma ngiindɛnʉ tʉkʉ iɗo, jʉ ɨkyɛmɛ ngia ya ndʉ moni kɔɔ maja akʉ mesu kʉ mombi, ya ɨkyɛmɛ yɛɛ ɓɨɓɨ nadɨndɨ akʉ mesu kʉ Asʉɓɨɨ.
16Ɓa꞉panɨa mapanʉ kʉ Mʉsa nʉ ika kʉ lɨgbɛ kʉɓʉya tʉkʉ aka Yʉanɨ ngia i꞉nye ɓatiso ɓombi a꞉faniso‑ɔɔ panɨa. Kʉʉngwa tii tʉkʉ ananɨ ɓakʉɓɨakɨa Ɨsaʉ yɛɛ Iɗo yɨ Ɓʉngama ɓʉ Asʉɓɨɨ. Nʉ mombi kʉ 'uɓomu akʉkyɨa angu kukumunio‑ɛɛ. 17Ya gagaa ekoo ʉ ɓisi nʉ ɨtaka kimunio, ɨkyɛmɨngana ya ɓʉkaɨ mwanʉ ʉ ibio mʉngana wʉ mapanʉ kʉʉngwa.
18Mombi kʉ 'uɓomu ngia a꞊tʉiso moi angɔ ambʉchɨka wɔmɔ a mombi ʉ ɨndambʉ, abana mombi ngia achɨka moi swaɨ umutuiseni, a kʉ mombi ʉ ɨndambʉ. »
Isisinio yɨ mombi ʉ ɓanangyɨa Lajalɔ nʉ mombi ʉ lɨkyɛmɛ
19Kija Yeso a꞉ɓusigio ɓata ɓɔ: « Mombi ʉ lɨkyɛmɛ mʉngana ɓɔmʉ i꞉nye pɨnya tʉkʉ lɨpʉkʉ lʉ ɨgabʉ lɔɔ ngbo ngbo ngbo, nʉ lɔɔ wʉlʉ wʉlʉ. Nʉ makwaa kʉ muɓomu i꞉nye dyakaka iɗo nadɨndɨ nʉ kʉkwa ɨgyagya. 20Mombi ʉ ɓanangyɨa mʉngana ino ɓɔ Lajalɔ i꞉nye kyɨa ɓʉkwaɨ apɛɛ ʉ umongu wʉ ɨkáa ngia yɨ mombi ngiinanɨ. Lɨpɨ li꞉nye lʉmʉkwieni ndʉtʉ kʉ iɓomu tʉkʉ ɓʉ kpa. 21I꞉nye kyɨa kʉtananɨa ɓɔ ʉdya gɔ ɓadudu ɓʉ idyo ngiɓa ɓi꞉nye ɓwanaka ɛsɨ ʉ mɛza ngia ʉ mombi ʉ lɨkyɛmɛ. Tiga ɓata, ɓɨmva ɓi꞉nye ɨka kuɗioko lɨpɨ ngilangɔ. 22Yambʉka tiga nanɨ Lajalɔ ambuwo, ɓamalaika ɓʉ Asʉɓɨɨ ɓambumufuɓuo ɓambʉsa nayɔ anambamba ʉ Abalama. Mombi ʉ lɨkyɛmɛ ambuwo kʉ woo, ɓambʉmʉhʉna. 23Tiga akʉ a꞉sa‑ɛɛ ɓabɨa, ati ngia i꞉nye‑ɔɔ kʉdya ikoko yɛɛ ɨja, ambʉtɨna waja, ambʉna danga ɓɔ Abalama, Lajalɔ tiga kʉ anambamba angɔ. 24Tiga nanɨ ambʉtʉɓɨa kusigo ɓɔ: ‹ Tidoo Abalama, nanɨa‑zʉ tʉkʉ ikoko. Ambʉ́ wʉnatʉmɨa‑zʉ Lajalɔ kuno 'ʉtʉ wʉ kpɛngbɛ nguangɔ amati ʉ mepo, ambʉka nɛmɛ kʉkatakiso ʉɗaɗa, jʉ yeni akʉ ma‑ɛɛ amati ʉ dyaa ngia, ma tʉkʉ kʉkɨnganaka. › 25Kija Abalama a꞉mutisio ɓɔ: ‹ Mwana asɛmɛ, tunguo‑zʉ ɓɔ ɔwɛ akʉ ʉɓɨɨ nguʉsɔɔ wa꞉nyɨa nʉ kumbo ɔɔ manzanza kingono. Ati ngiinanɨ, Lajalɔ i꞉nye kʉdya ikoko igue. Ʉna tɔ, tiga ɨtakɨ‑takɨ ngia ɛyɔ a yangɔ amati ʉ ɨgyagya, ɔwɛ tiga amati ʉ ɓʉka‑ɓʉkaɨ. › 26Nʉ ɓata, ʉpɨa wɔɔ ɗu nadɨndɨ wa ati ʉndɛsʉ ninu, ikanzi ngia ɓɔ, ɓombi ngiɓa ɓaɓio kʉkʉnda kʉɓaa na akʉ inu na‑ɛɛ ɓɔɔɓaakɔmʉ. Yambʉkʉkwanana kʉ ɓwanɨ mombi kʉʉngwa na akʉ na‑ɛɛ kʉɓaa ya akʉ isu ka‑ɛɛ. 27Mombi ʉ lɨkyɛmɛ ambumusigio ɓɔ: ‹ Tidoo, mʉ꞉nata ɓaka tii tʉkʉ ɓɔ tʉma Lajalɔ akʉ ɨkáa ngia yɨ tidoo ngiasɛmɛ; 28jʉ manʉ ɓana ɓʉ inoo ɓɔkɔ. Ambʉ ʉsa naɓɔ kʉɓɨa kʉpɛɛ, ambʉ ɓɔɔka tii ɓata yeni akʉ mʉa wʉ ɓʉka‑ɓʉkaɨ ngua. › 29Abalama ambumutisio ɓɔ: ‹ Chʉkɔɔ, ɓanʉ mubio kʉ mapanʉ ngika kʉ Mʉsa nʉ ika kʉ lɨgbɛ kʉtaa. Ɓʉɓʉkɔ tʉkʉ ɛɓɔ. › 30Mombi ʉ lɨkyɛmɛ ambumusigio ɓɔ: ‹ Tidoo Abalama, yɨkwananakɔmʉ tʉkʉ ɓwanɨ, jʉ ndʉ mombi aʉngwa pɛpɛ tʉkʉ yeni ati ʉ ɓombi ngiɓa ɓa꞉sio kʉsa naɓɔ kʉɓɨa, ɓa꞊nicho mɨtʉma tʉkʉ nichoo. › 31Abalama ambumusigio tiga ɓɔ: ‹ Ɓʉkenikɔmʉ mubio ngika kʉ Mʉsa, gʉkʉ ika kʉ lɨgbɛ, abana tʉkʉ mombi ʉngweni ati ʉ ɓombi ngiɓa ɓa꞉sio ambʉsa naɓɔ kʉngakɨa, ɓambʉkʉmʉbaya. › »
Actualmente seleccionado:
Luka 16: BudKoya
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2021, Wycliffe Bible Translators, Inc.