Yʉanɨ 12
12
Malɨa u꞉tioko Yeso mɨtɨndɨ nʉ malazi
(Mat 26:6-13; Mak 14:3-9)
1Yi꞉nye yitukueni makwaa ʉmalɨa kʉɓʉya akʉ ɓisi ɓʉ ʉmbɔ wʉ Pasɨka. Yeso ambʉsa anʉ Betania andaɓʉ ʉ Lajalɔ ngia Yeso a꞉mʉjʉkaniso akʉ ingyo. 2Nani, ɓambumuzuukio, Malata ambuɓunapiikio idyo. Lajalɔ i꞉nye kʉ mʉngana ʉ ɓombi ngiɓa ɓi꞉nye kʉdyakaka ɨzɔ nʉ‑ɔɔ Yeso. 3Kija Malɨa a꞉chɨka igbiti yɨ lɨtɛlɛ mʉngana wʉ malazi wɔɔ uɗo wʉ ɨgabʉ ɓʉmʉ uwa ɓa꞉ʉtambanaka nʉ mɨsanga yɛɛ mve tɨpɨ tɨpɨ yɨ ɨwʉa mɨngana ɓɔ. Kija a꞉tioko nawɔ Yeso mɨtɨndɨ, ambʉmʉbɨaka nʉ ndii ngiangɔ. Ɨkáa kʉ iɓomu yambʉchɨka tii tʉkʉ imbo yɛɛ tɨpɨ yɨ malazi nguʉnanɨ.
4Ɨkyɛmɨngana, Yuda Ɨsɨkalɨɔta, mʉngana ʉ ɓakpataka ngiɓa ɓʉ Yeso, iya i꞉nye kʉsa nayɔ kʉgaba ambusigo ɓɔ: 5Jʉtanɨ‑zʉ ɓʉ꞉gabakɔmʉ malazi wʉ igabʉ ngua akʉ mikpekpe yɨ falanga mɨa ɓeetu, ɓambʉsalɨa piɛ nayɔ ɓombi ɓʉ ɓanangyɨa? 6A꞉sigokɔmʉ ɓwanɨ jʉ i꞉nye kʉdyɨa ɓombi ɓʉ ɓanangyɨa ikoko, ɨkyɛmɨngana jʉ ɛyɔ i꞉nye mombi ʉ ndiɓo. Ɛyɔ kʉ i꞉nye ɓotoko ikpoko yɨ falanga, ambuɓio ɓata kʉ kuisukuo engo. 7Ɨkyɛmɨngana, Yeso ambutisio ɓɔ: « Sɨeni ɓaka moi ngiinanɨ nani, ʉkyɨa ɓwanɨ tʉkʉ aka ekoo ɓisi ngiɓa ɓʉ hʉnanɨa ngiisɛmɛ. 8Inu naakyɨa ɨzɔ nʉ ɓombi ɓʉ ɓanangyɨa wati kʉ uɓomu, ɨkyɛmɨngana kambukuɓio ɨzɔ ninu makwaa kʉ muɓomu. »
Ɓuwulio ididi kʉwa Lajalɔ
9Ndiba ɔɔ ʉja wʉ Ɓayuda ɓambʉkɔ ɓɔ Yeso anʉ Betania. Kʉ ɓwanɨ, ɓambʉsa nani, chʉkɔmʉ tʉkʉ aka ekoo Yeso, ɨkyɛmɨngana ɓa꞉sa kʉ ɓɔ ɓʉna Lajalɔ ngia Yeso a꞉mʉjʉkaniso akʉ ingyo. 10Kija ɓangama ɓʉ ɓakumu‑kumu ɓa꞉maiso ʉpanʉ ɓɔ ɓa꞊wa Lajalɔ tʉkʉ wanɨ. 11Jʉ Ɓayuda ɓaja ɓi꞉nye naɓɔ kʉsɨa ɓambuɓio tii kʉbaya tʉkʉ Yeso aka ekoo ʉ moni kʉ Lajalɔ.
Yeso ukumunio anʉ Yelusalɛma
(Mat 21:1-11; Mak 11:1-11; Luk 19:28-40)
12Kʉɓa ɔngɔ, ungbutu wʉ ɓombi wɔɔ 'ʉja ngua wa꞉ka akʉ ʉmbɔ wʉ Pasɨka wambʉkɔ kusigo ɓɔ Yeso a anɨngbaa kʉka anʉ Yelusalɛma. 13Kija ɓa꞉chɨka mambá kʉ ɓadɨda ɓambʉsa nayɔ kʉjananɨa ɓinyeni kʉtʉɓɨa nʉ iyo yɛɛ ɓʉmʉ ɓɔ:
« Asʉɓɨɨ ʉchɨka ɨbɨba!
Asʉɓɨɨ umbuiso mombi ngia akʉka akʉ ino yɨ Makʉʉɓɨɨ!
Asʉɓɨɨ umbuiso ngama ʉ Ɓaɨsalaɛlɛ kʉ mbuisoo! »
14Yeso ambʉgbʉka 'ʉndambʉ wʉ punda, ambuɗito ekoo ɔngɔ, kʉndʉ aka ɓa꞉tɨndakɨa‑ɔɔ ɓɔ:
15« Wɔɔkwakɔmʉ ʉɓa ɔwɛ ɨkʉmbʉ yɨ Siona!
Ʉna tɔ, ngama ngiasɔɔ a nɨngbaa,
a ɓuwei ekoo 'ʉndambʉ wʉ punda. »
16Ɓakpataka ngiɓangɔ ɓa꞉pimisokɔmʉ‑zʉ inyi yɨ moni ngiinanɨ. Ɨkyɛmɨngana, iya Yeso i꞉nye tiga‑ɔɔ ʉchɨkeni ɨbɨba, ɓambutunguo tiga ɓɔ ɓa꞉tɨndakɨa moni ngikʉnanɨ ekoo angɔ, ika ka꞉mʉkyɨa ngbanga tʉkʉ ndʉ ananɨ. 17Ɓombi kʉ ɓuɓomu ngiɓa ɓi꞉nye ɨzɔ nʉ ɔɔ Yeso ati ngia a꞉soko‑ɔɔ Lajalɔ ɓɔ ʉɓʉa amati ʉ ɓʉnzaʉ nʉ jʉkana akʉ ingyo, ɓi꞉nye tʉkʉ kʉyaka moni aka ekoo ɨkyɛmɛ ngia ya꞉kyanɨa akʉ mesu kʉndaɓʉ. 18Ya aka ekoo moni ngikʉnanɨ iya ɓombi ɓaja ɓa꞉ka‑ɔɔ nayɔ kʉjananɨa, jʉ ɓa꞉kɔ ɨsaʉ yɨ moni kɔɔ mʉmbangɛ ngikʉnanɨ a꞉kyɨa. 19Ɓafalisayɔ ɓambʉyakanaka ati ʉndaɓʉ ɓɔ: « Isu kambʉkɔmʉ nʉ ɨkyɛmɛ ngia kakwanana kʉkyɨa engo. Ʉna‑zʉ ɓombi kʉ ɓuɓomu ɓanayɔ tii tʉkʉ kʉkpata. »
Ɓagiliki ɓakʉkʉnda kʉna Yeso
20Ɓagiliki ɓi꞉nye kʉ ati ʉ ɓombi ngiɓa ɓa꞉ka anʉ Yelusalɛma kubibiso Asʉɓɨɨ akʉ ʉmbɔ wʉ Pasɨka. 21Ɓambʉsa ɔɔ Filipo ngia i꞉nye mombi ʉ ɨkʉmbʉ yɨ Betesaida amati ʉ gɨpa ʉ Galilaya, ɓambʉmʉta ɓɔ: « Makʉʉndɛsʉ, kakʉkʉnda kʉna Yeso. » 22Filipo ambʉsa kʉɓɨa Andelea, kija ɛɓɔ ɓapɨnɨ kʉ ɓuɓomu ɓa꞉sa tiga kʉɓɨa Yeso. 23Yeso ambuɓutisio ɓɔ: « Wati wʉndana tiga ndananɨ, uwa Mwana ngia ʉ Mombi ʉkwanana‑ɔɔ kʉchɨka ɨbɨba. » 24Maninu kusigio tʉkʉ kingono ɓɔ: ndʉ 'ukpekpe wʉ nganʉ waaɓwana akʉ ɨtaka chʉkɔmʉ wambuwo, waatukuo tʉkʉ 'ukpekpe wɔngɔ mungono. Ɨkyɛmɨngana, ndʉ waawo, waanʉta tiga mikpekpe ɨja. 25Mombi ngia akʉnda ʉɓɨɨ nguangɔ makʉɔngɔ, a꞊uyangiso yangisoo. Ɨkyɛmɨngana, mombi ngia ambʉkʉchɨka ʉɓɨɨ nguangɔ ndʉ ɨkyɛmɛ akʉ ɨtaka ngiakɛ, a꞊ʉpɨmakɨa pɨmakɨaa akʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. 26Ndʉ mombi akʉnda nɛmɛ kʉkyananakɨa, ʉkwanana nɛmɛ kʉkpata, nʉ mombi ʉ kuu ngiasɛmɛ ʉkwanana kʉ kuɓio izi kʉ iɓomu akʉ maɓio‑ɛɛ. Ndʉ mombi anakyananakɨa ɛmɛ, Tidoo a꞊mʉbɨba bɨbaa.
Yeso akʉɓɨanɨa ɨsaʉ yɨ ingyo ngiangɔ
27« Ɨtakɨ‑takɨ ngiakɛ, 'ʉtʉma nguʉsɛmɛ wakumbambania. Mambʉkɔmʉ tii kʉmbɨa ɓɔ masigo tanɨ. Makusigo ɓɔ: Tidoo, nahiiso ɓaka akʉ ɓʉka‑ɓʉkaɨ ngiɓa ɓanɛmɛ kʉɨkyɨa ɨtakɨ‑takɨ ngiakɛ! Chʉkɔɔ, ɛmɛ ma꞉ka ɓɔ mʉɓaa amati ʉ moni ngikʉnanɨ wati nguakɛ. 28Tidoo, nziso ino ngiisɔɔ ɨbɨba! » Iyo mɨngana yambʉkɔnɨɔ ekoo ʉ ɓisi kusigo ɓɔ: « Ma꞉ibibiso bibisoo, nʉ ma꞊ibibiso ɓata tʉkʉ ɓwanɨ. » 29Ungbutu wʉ ɓombi ngiɓa ɓi꞉nye ɓʉmaɨ ananɨ nʉ iɓa ɓa꞉kɔ iyo ngiinanɨ ɓambusigo ɓɔ: « Tʉkʉ ʉgbaa uʉnanɨ wugbusunioo! » Ɓombi nga ɓɔmɔ ɓambusigo ɓɔ: « Malaika uʉnanɨ wʉ꞉ka nayɔ kʉɓɨa moni. »
30Ɨkyɛmɨngana, Yeso ambʉɓʉɓɨa ɓɔ: « Iyo ngiinanɨ yɨ꞉yakakɔmʉ aka ekoo asɛmɛ, ɨkyɛmɨngana aka ekoo ʉndɛnʉ. 31Ɨtakɨ‑takɨ ngiakɛ Asʉɓɨɨ a tiga kʉsa kʉtɨna 'ʉkɔmbɔ wʉ ɓombi ɓʉ ɨtaka ngiakɛ. Nʉ ɨtakɨ‑takɨ ngiakɛ Asʉɓɨɨ a tiga kʉsa kʉkpʉngbʉa ngama ʉ ɨtaka ngiakɛ. 32Ɨkyɛmɨngana, ati ngia ɓa꞊nazono‑ɔɔ nɨkʉʉ kʉʉngwa akʉ ɨtaka, maɓio tiga kito ɓombi kʉ ɓuɓomu kʉka ya andɛmɛ. » 33Yeso a꞉sigo ɓwanɨ tʉkʉ kʉpana ʉgbʉ wʉ ingyo tɨmanɨ uwa i꞉nye kʉsa kuwo.
34Kija ungbutu wʉ ɓombi nguʉnanɨ wambutisio ɓɔ: « Isu kaambɨa amati ʉ mubio kʉ Mapanʉ ngikʉndɛsʉ kusigo ɓɔ ʉɓɨɨ ngua wʉ Klisito wa wʉ mɨtʉ yɨ ɨpá nʉ mɨtʉ yɨ ɨpá. Jʉtanɨ wa ɓata kusigo ɓɔ yɨkwanana ɓuzono Mwana ngia ʉ Mombi nɨkʉʉ? Nʉ Mwana ngia ʉ Mombi ngiinanɨ a tiga anɨ? » 35Yeso ambʉɓʉɓɨa ɓɔ: « Wanga wa‑zʉ kʉ ati ʉndɛnʉ akʉ wati ɗɛkɛkɛ. Kɨndakeni kʉ ati ngia na zʉ‑ɔɔ nʉ wanga kʉtaa, aka ekoo ngia ɓɔ umomo wɔɔnikutokɔmʉ. Jʉ mombi ngia aakɨndaka amati ʉ umomo, ambakapimiso ɓɔ akʉsa gbanɨ. 36Kʉ ɓwanɨ, bayeni wanga kʉ ati ngia wa‑zʉ‑ɔɔ kʉ ɨzɔ ninu, ambʉ ɓieni tiga kʉ ɓombi ɓʉ wanga. »
Ɓayuda ɓʉyaa baya Yeso
Iya Yeso a꞉pipo nayɔ kʉyaka moni ngikʉnanɨ ɓʉ gba, ambʉʉngwa, ambʉsa kʉɓatanɨa danga naɓɔ. 37Abana ndʉ a꞉kyɨa ɓakɔkɔ ɓaja akʉ mesu kʉndaɓʉ kititi, ɨkyɛmɨngana ɓambikinye nayɔ kʉbaya. 38Moni ngikʉnanɨ ka꞉kyananakɨa tʉkʉ ndʉ aka ɨgbɛ Ɨsaya a꞉sigo jɛnɛ‑ɔɔ ɓɔ:
« Makʉʉɓɨɨ, mombi tɨmanɨ iya a꞉baya ɨsaʉ ngia ka꞉ɓɨakɨa?
Nʉ mombi tɨmanɨ iya Makʉʉɓɨɨ a꞉mʉpananiso ɨkɔndɔ yɨ angu ngiangɔ? »
39Abana ɓwanɨ kititi, ambʉ́ ɓa꞉kʉbayakɔmʉ kʉ ɓwanɨ, kʉkpatanakɨa nʉ moni ngika Asʉɓɨɨ a꞉sigio jɛnɛ Ɨsaya ɓɔ:
40« Asʉɓɨɨ a꞉ɓukuto mesu,
ambuɓukyiiso kuɓio mɨtʉma ɓʉmʉ,
ambʉ mesu ngikʉndaɓʉ kɔɔɓiokɔmʉ kʉna,
nʉ ambʉ ɓɔɔpimisokɔmʉ ɨngbaa yɨ moni nʉ mɨtʉma ngiindaɓʉ kʉ ɓwanɨ.
Iiya ɓɔ ɓa꞉nichokɔmʉ mɨtʉma ngiindaɓʉ,
ambʉ Asʉɓɨɨ ɔɔɓuhiisokɔmʉ. »
41Ɨsaya a꞉sigo moni ngikʉnanɨ jʉ a꞉na ɨbɨba ngia yɨ Yeso kʉpɛɛ, ambʉyaka ɨsaʉ ekoo ɔngɔ kʉ yakaa. 42Abana ɓwanɨ kititi, ɓangama ɓʉ Ɓayuda ɓaja ɓambʉbaya Yeso. Ɨkyɛmɨngana, aka ekoo kumo Ɓafalisayɔ, chʉkɔmʉ ɓambupananiso akʉ ɓʉmba ɓɔ ɓa꞉baya Yeso bayaa, ambʉ ɓɔɔɓisokɔmʉ akʉ ɨkáa yɨ nɨta. 43Ɛɓɔ ɓi꞉nye kʉkʉnda kʉnyɨa nʉ ɨbɨba akʉ mesu kʉ ɓombi, kʉɓaa ɨbɨba ngia yaaʉngwa ɔɔ Asʉɓɨɨ.
Ɓombi ngiɓa ɓa꞉yaa baya ɓa꞊dya ɓʉka‑ɓʉkaɨ
44Kija Yeso a꞉sigo nʉ iyo yɛɛ ɓʉmʉ ɓɔ: « Mombi ngia anɛmɛ kʉbaya, ambʉkɔmʉ nɛmɛ kʉbaya tʉkʉ ɛmɛ, ɨkyɛmɨngana a kʉ kʉbaya mombi ngia a꞉natʉma. 45Mombi ngia anɛmɛ kʉna, a kʉ kʉna mombi ngia a꞉natʉma. 46Ɛmɛ ma꞉ka akʉ ɨtaka ndʉ wanga, aka ekoo ngia ɓɔ mombi kʉ uɓomu ngia a꞊nabaya, ɔɔɓiokɔmʉ ɓata amati ʉ umomo. 47Ndʉ mombi akɔ mapanʉ ngikʉsɛmɛ chʉkɔmʉ ambʉkʉkyananakɨa, chʉkɔmʉ ɛmɛ kʉ ma꞊tɨna 'ʉkɔmbɔ nguangɔ. Jʉ ɛmɛ ma꞉kakɔmʉ kʉnapɨa ɓombi ɓʉ ɨtaka nʉ 'ʉkɔmbɔ. Ɨkyɛmɨngana, ma꞉ka naɓɔ kuhiiso. 48Mombi ngia anɛmɛ kʉyaa, iya ambakakʉnda moni ngikʉsɛmɛ, ɓa꞊tɨna 'ʉkɔmbɔ nguangɔ kʉkpatanakɨa nʉ moni ngikʉnanɨ. Tʉkʉ ʉpanʉ ngua ma꞉nzo ati ʉndɛnʉ kʉ wa꞊tɨna sina 'ʉkɔmbɔ wʉ mombi ngiinanɨ akʉ ɓisi ɓʉ 'upipio. 49Jʉ ɛmɛ ma꞉yakakɔmʉ moni nʉ 'ʉtʉ wʉsɛmɛ makʉɔngɔ. Ɨkyɛmɨngana, kʉ Tidoo ngia a꞉natʉma kʉ a꞉nanzo ʉpanʉ wʉ moni ngika makusigo nʉ ika makʉpanɨa engo. 50Nʉ ɛmɛ maapimiso kusigo ɓɔ ʉpanʉ nguangɔ waanzo ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. Kʉ ɓwanɨ, moni ngika maayaka, maakʉyaka ngbanga tʉkʉ ndʉ aka Tidoo a꞉natitio‑ɔɔ. »
Actualmente seleccionado:
Yʉanɨ 12: BudKoya
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2021, Wycliffe Bible Translators, Inc.