लूका 24
24
ईसु जियो रिमेनायू
(मत्ती 28:1-10; मरकुस 16:1-8; एहुन्ना 20:1-10)
1हपता राः सुरू दिन एतवार चेका एकदम ञींदाते कोड़िकू ईसु थरे सोंओं सुनूम लगोवे लगड कू तयार तडा, हेना कू सबकेते मरघटी रेकू सेनेना। 2हेंकू मरघटी दुवर दिरी तेकू सींञ अटु तडा, हेना अड़ी तन तोलोग कू सेन ञँमतेडा। 3हेना भीतर रे बोलो एन दो परभु ईसु राः लास मेने कू ञँमगाडा। 4तहाँ हेंकू न ञेंलके तेकू बोर दोहो एनु, अवुर अचाकते बा होड़#24:4 बा होड़ सरगदूत कींञ दोहो एना चमकोआ कपड़ा तुसींञ केते हेंकू मड़ंग रेकींञ चड़ाँ यनु। 5अवुर हेंकू बोरोयन ते आँख मुँह तुकू ओतेत हनतेकू केटुब गोत्तेडू, तहाँ हेंकींञ हेंकू थरे कींञ कहनी तेडा, “अपे गोजकोः कुराः जघा रे जियो रिमकेन हेनी ची लगड पे छपा बेड़ा यडिया? 6#मत्ती 16:21; 17:22,23; 20:18,19; मरकुस 8:31; 9:31; 10:33,34; लूका 9:22; 18:31-33हेंय ना रे कोवाया, हेंय दोय जियो रिमकेना। उहयारे पे, हेंय अपे थरे गलील जिला रेय दोहोएन तोलोगिय कहनी तेडा। 7‘नआँ जरूरी इदाना इंञ होड़ होपोन पापी होड़कू रेंञ एर पकड़ोआ, अवुर कुरूस रेकू ठोको गोजेञाँ, अवुर तीसरा दिन रेंञ जियो रिमुआँ।’” 8तहाँ हेंकू ईसु कहनी तडा टेबोः कू उहयर तेडा।
9हेना वरी मरघटी वरी हेंकू कोड़िकू मिड़ाः केनते, ग्यारह झन परेरितकू अवुर एटाःकू हो नआँ टेबोः कू लाय वडकू। 10मरियोम मगदल गाँव रेनिय, ओअन्ना, एकूब इंगत मरियोम नेकू सुदा अवुर कोड़िकू दोहो एना, नेकू परेरितकू थरे नआँ टेबोः कू लाय तेडा। 11लेकिन हेंकू राः टेबोः नेकू लँदा वडकू घयतेकू बुझो तेडा, अवुर हेंकू राः टेबोः मेने कू सरी गडा। 12तहाँ पतरस रिमकेन ते मरघटी हनतेय हुंको चलो एना, अवुर कुबूंग केनतेय कोटे तेड दो, कपड़ा ते गुरघेट तडिया, हेना भरिय ञेंल ञँमतेडा। अवुर जो कुछ होया तना, हेना ञेंलके तेय अकबको यनु, अवुरिय मिड़ाः चलो यनु। अवुर ची होयाः तना मेनतेय पसींदे दोहो एनु।
इम्माऊस हनते चलोः तोलोग चेला कींञ थरे ईसु देखर एना
(मरकुस 16:12-13)
13हेनेन चेका ईसु तयोम ते से-ने दोहोएन हेंकू मेंडे रे, बा होड़ इम्माऊस मेनते कू कहनी वआ, हेना गाँव हनते कींञ चलोः दोहो एनु, हेना गाँव एरुसलेम वरी लगभग ग्यारह किलो मीटर सँगिंञ रे दोहो एना। 14हेंकींञ नआँ होया तना हेना राः बिसेय तेकींञ बरता चलोः दोहो एनु, 15अवुर हेंकींञ बरताऊ अवुर होंबोर ओड़ेंग तोलोग ईसु हो हेंकींञ थरे मेजकेन ते हेंकींञ सुदाय सेनतेडा। 16लेकिन हेंकींञ ईसु अलो कींञ चिन्होंविय लगड भगवान हेंकींञ राः नँजेरीय बँद तडा। 17ईसु हेंकीञिंय होंबोर तेडा, “ची टेबोः सेनयड तींग तेबा बरताः तना?” तहाँ हेंकींञ मन उदास केनते कींञ चड़ाँ बगी यनु। 18नआँ अँजोम केते हेंकींञ मेंडे रे मियाँहोड़ क्लियोपास मेनते कू ञुमू तडिया हेनी कहनी तेडा, “एरुसलेम सहर रे मेजकेनते दोहोन तन हेंकू मेंडे रे अनाम भर दरवा दरवा बितो केना, हेना टेबोः मेनेम पपाड़ी तना जहानू।”
19हेना वरी ईसु हेंकीञिंय होंबोर तेडा, “ची ची टेबोः ख?” हेना वरी हेंकींञ ईसु थरे कींञ कहनी तेडा, “नसरेत सहर रेनिय ईसु राः टेबोः हवे, नेय एयसा होड़ दोहो एना, जो कुछिय करो तेडा, अवुरिय कहनिय दोहो एनु, हेना भगवान अवुर सींड़ होड़कू राः मड़ंग रे सींड़कू वरी बडेअय भगवान राः टेबोः लाय हेनी हवे, मेनाअय तीःवडकू दोहो एनु। 20बड बडे आजककू अवुर अबू रेनकू अधिकारिकू मिरतू दंड कू ओवय लगड एर पकड़ो केडिय ते रोमि सरकार थरे कू जिमा तेडिया, अवुर हेंकू कुरूस रेकू एर ठोको गोजतेडिया। 21अले इसराएल रेनकू ने-नी दुस्मनकू वरिय छडो लेआ मेनते ले असरा तना। नआँ सींड़ घटना बितो केनते तीसरा दिन हवे। 22अवुर तेसींञ एकदम ञींदाते अले मेंडे रे कुछ कोड़िकू मरघटी वरी सेन मिड़ाः केनतेकू लाय अकबको गोत्तेड लेआ; 23हेंकू लास मेने कू ञँमगड दो हाँःतेकू लाये दोहो एनु, अले सरगदूत कींञ ले ञेंलवाडा, हेंकू लाय तेडा ईसु जीवत गिआयू मेनते! 24हेना वरी अनाले गतिकू मेंडे रे कुछ होड़कू मरघटी ञेंञेंल कू सेनेना अवुर जेयसे कोड़िकू लाय तेडा हेनेन घयते हेंकू हो लास मेने कू ञँमगाडा।”
25हेना वरी ईसु हेंकींञ थरेय कहनी तेडा, “अपे तीमिन बोको होड़कू हवे! धरमग्रंथ रे भविस्यवक्ताकू जो कुछ कू लिखो केडा, हेना रे बिसवासे लगड अपे तीमिन कठीन लगोः तना! 26धरमग्रंथ रे हाँःते लिखो केना मसीहा दूखिय रीमा अवुर अखीर आदर इजेत राः साथ ते सरग रेय सेनुआँ।” 27हेना वरी ईसु मूसा अवुर भविस्यवक्ताकू राः कागद रे लिखल इदाना, हेना दुबीत जेड़ित वरी सींड़ भगवान राः कागद वरी अनेज राः बिसेय ते लिखल इदाना, हेना टेबोः राः मतलोब तुहो हेंकीञिंय समझो तेडा।
28हेनेन तोलोग हेंकू गाँव कू तयाः बंचोय दोहो एनु, तहाँ ईसु अवुर मड़ंग हनतेय चलोः तना मेनते कींञ अड़ींग एना। 29तहाँ हेंकींञ हाँःते कहनी केते कींञ टेको तेडिया, “अलिंञ सुदाम दोहोनू, निहों दो अंधराः तना, अवुर बेर हो मुलुक तेय डुबो यना।” हेना वरी हेंकींञ सुदा दोहोन लगड भीतर हनतेय बोलो एना। 30हेना वरी हेंय हेनेन कींञ सुदा जोमुः लगाडिय दुड़ूब एना, तहाँ हेंय रोटी सबके ते भगवान धन्यावादिय ओवाडिया, अवुर टोविज केते हेंकीञिंय ओवाड दोहो एनु। 31तहाँ हेंकींञ राः नँजेर जीजयानू, अवुर हेन तोलोग हेंकींञ ईसु कींञ चिन्हो गोत्तेडियू, अवुर हेंय हेंकींञ नँजेर वरी फे-रिय छपित यनु।
32हेंकींञ अनाकींञ अनाकींञ कहनी ओड़ेंग एना, “हेंय होर ते अलंग सुदाय बरता एना। धरमग्रंथ रे करे लिखल इदाना, हेना राः मतलोब तुहोय समझो लंग दोहो एनु, दो अलंग अपन मन रे मेने लंग खुसी गन किदो?” 33हेनेन तोलोग हेंकींञ रिमकेनते एरुसलेम हनते कींञ मिड़ाः सेनेना, अवुर हेंकू ग्यारह झन अवुर एटाःकू हो हेंकू सुदा जवर तन तोलोग कींञ सेन ञँमतेड कुआ। 34अवुर हेंकू हेंकींञ बा होड़ थरे कू लाय तेडा, “परभु सहियो मेतेय जियो रिमकेना, अवुर सिमोन थरेय देखर एना।” 35तहाँ हेंकींञ होर तेकू बरता एना हेना हेंकू कींञ लाय वडू, अवुर हेंकींञ रोटी टोविज तोलोग काःतेकींञ चिन्हो तेडिया, हेना होकींञ लाय तेडा।
ईसु चेलाकू थरेय देखर एना
(मत्ती 28:16-20; मरकुस 16:14-18; एहुन्ना 20:19-23; परेरित 1:6-8)
36नआँ घयते हेंकू कहनी यडु, हेनेन तोलोग परभु ईसु मसीह हेंकू बँदे रेय मेज चड़ाँ यनु अवुर हेंकू थरेय कहनी तेडा, “अपे सान्ति ञँमुऊ।” 37लेकिन हेंकू अकबको यनकू अवुर कू बोरो तेडा, अवुर भूत ले ञेंलियाडा मेनते कू अड़ींग एना।
38हेना वरी हेंय हेंकू थरेय कहनी तेडा, “ची लगड पे बोर तना? अपे अपन मन रे ची लगड मेने पे बिसवास यडा? 39इंञ ती कटा रे छेदा केडा पे ञें-लू, इंञ ईसु हवे। इंञ छुवों सोंञ पे, कहेकि जेयसे इंञ थरे पे ञेंलियाडा घयते भूतकू थरे जील अवुर जाँग मेने दोहोना।” 40नेन घयते कहनी केते अनेज तीत कटातिय तिःवड कुआ।
41तहाँ हेंकू खुसी राः मार ते मेने कू सरी गडा, अवुर हेंकू अकबको यन दोहो एनकू, तहाँ हेंकुय होंबोर तेडा, “अपे थरे ना रे जो-मेआँ कनारा चीज इदाना किदो कोवाआ?” 42हेना वरी हेंकू रपाः तडिया हकु टुटका कू ओवाडियू, 43अवुर हेंय तिला केते हेंकू मड़ंग रेय जोम तेडा। 44मियाँ घड़ी रे हेंय हेनेनकू थरेय कहनी तेडा, “इंञ अपे सुदा दोहोएन तोलोग नआँ घयतेंञ लाय तेडा, सही मेते जेतना टेबोः मूसा राः धरम नियम अवुर भविस्यवक्ताकू राः कागद अवुर सिरिंग कागद रे ईञाः बिसेय ते लिखल इदाना, हेना सींड़ उतरोआ।” 45हेना वरी हेंय धरमग्रंथ राः टेबोः जे-रे लगड हेंकू बुद्हिय ओवडकू दोहो एनु। 46अवुर हेनेनकू थरेय कहनी तेडा, “हाँःते लिखल इदाना, मसीहा दूखिय रीमा, अवुर तीसरा दिन गोजकेनकू मेंडे रेय जियो रिमुआँ, 47अवुर एरुसलेम वरी बोंहड़ी केते सींड़ जातकू थरे हे-नी ञुमू ते मन मिड़ाः राः अवुर पाप वरी माफी ञँमुः हेना राः परचार होयाआ। 48अपे नआँ सींड़ टेबोः राः गोवाहिकू हवे। 49#परेरित 1:4अवुर अँजोम पे, पवितर आत्मा एमेय लगड अपुंञ जबान केडा, हेना इंञ अपे हलीतेंञ ओवा पेआ, अवुर भगवान वरी सक्ति अनायिन ञँम मेन दिन नेन सहर रेपे दोहोनू।”
ईसु सरग हनतेय चलो एना
(मरकुस 16:19-20; परेरित 1:9-11)
50 #
परेरित 1:9-11
तहाँ हेंय एरुसलेम वरी बयतानियाह गाँव अँगामिय गोःतेड कुआ, अवुर हेंय अनेज ती सुहरू केते हेंकू आसीसिय ओवड कुआ, 51अवुर आसीसिय ओवडकू सी ईसु हेंकू वरिय अलग यनु, अवुर हेंकू राः देखते देखत्ते भगवान सरग हनतेय रिम गोःतेडिया। 52तहाँ कू धन्यावाद वडियू अवुर अखीर खुसी केनते एरुसलेम हनतेकू मिड़ाः मेजेना। 53अवुर हेंकू रोज दिन मँडिल रेकू जवर कोःते भगवान राःकू स्तुति महल रेकू दोहो एना।
Actualmente seleccionado:
लूका 24: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.