परेरित 6
6
सात झन सेवेखिया कुकू चुनो तेडा
1हेना तोलोग चेलाकू अखीर कू बढ़होः दोहो एनु, तहाँ उनानी भासा ते टेबोः कू एहूदिकू, इबरानी भासा ते टेबोः कुकू सिकायित तेडा। अवुर कू कहनी तेडा, “रोज दिन राः खान पान रे अले रेनकू एकल केनकू कोड़िकू राः धियान मेने कू एमियाडा।” 2हेना वरी हेंकू बारहो झन सींड़ चेलाकू राःकेड कुते कू कहनी वडकू दोहो एनु, “नआँ बढ़ियाँ कोवाआ, अले भगवान राः बचन ललाय बगी वते, खियो पियो कुराः काम रेले दोहोनू। 3हेनाते एगा भाईकू! अपे मेंडे सात झन ईमानदार होड़कू पे चुनो, नेकू पवितर आत्मा ते भरो केनकू, अवुर बुधमानकू दोहोनू, अबू नेकू नआँ काम बू जिमा वकू। 4लेकिन अले दो बिनतीः अवुर भगवान राः बचन लाय राः सेवा रेले डटो कोआ।” 5नआँ टेबोः मंडली रेनकू सींड़कू बढ़ियाँ वडकू, अवुर हेंकू ईसतेफनुस मेनते ञुमूत दोहो एनय होड़ कू चुनो तेडा, हेंय बिसवास रे अवुर पवितर आत्मा तेय भरपूर तना। नेय सुदा फिलिपुस, अवुर परखुरुस, अवुर निकानोर, अवुर तीमोन, अवुर परमिनास, अवुर अन्ताकिया रे दोहोनय नीकुलाऊस नेय एहूदी धरम वरी बिसवास रेय मेजेना, नेकू नेकू कू चुनो तेडा। 6नेकू परेरितकू थरे कू अगतेड कुआ, अवुर परेरितकू, नेकू काम रे लगो यडकुआ मेनाः तिब लगड कू बिनती एना, अवुर तीत कुते भोःतू कुकू छुवों केडकुते आसीर्वाद कू ओवड कुआ।
7अवुर भगवान राः बचन मिरीज चलो एना, अवुर एरुसलेम सहर रे चेला कुराः गिनती अखीर बड़हो एना। अवुर आजक कुहो अखीर कू बिसवास तेडा।
ईसतेफनुस कू पकड़ो तेडा
8ईसतेफनुस भगवान राः किरपा ते अवुर सक्ति ते भरपूर केनते होड़कू राः मँझर ते बडे बडेआ अहचरज राः काम अवुर चीन्हिय तिब दोहो एनु। 9हेना वरी एहूदी आराधना ओड़ाः रेनकू कुछ होड़कू जोकि लिबरतीन मेनते कू कहनी वकुआ, ईसतेफनुस कू बिरोध तेडा, हेंकू न-न तेनकू दोहो एना, कुरेनी अवुर सिकन्दरिया, अवुर किलिकिया अवुर आसिया रेनकू दोहो एना, नेनकू ईसतेफनुस सुदा कू अड़ा चवकी एना। 10लेकिन ईसतेफनुस भगवान राः गियान अवुर पवितर आत्मा राः अगुवाय तेय टेबोः दोहो एनु। हेनाते हेंकू मेने कू टेबोः मिड़ाः सकोः दोहो एनु। 11हेना वरी हेंकू केय झनकू बढ़ो चढ़ो तेडा, अवुर हेंकू कहनी तेडा, “अले नेय मूसा अवुर भगवान राः बारे ते निंदा टेबोईय टेबोः तोलोग ले अँजोम केडिया।” 12अवुर नेन घयते हेंकू, होड़कू अवुर सपायँड़कू अवुर एहूदी नियम चेचेडकू कू भड़को तेडा, अवुर हेंकू ईसतेफनुस कू पकड़ो केडते महासभा रेकू इदी तेडिया। 13हेंकू झूठ मुठ ते गोवाही एम कुकू चड़ाँ तेडा, अवुर हेंकू कहनी तेडा, “नेय होड़ पवितर मँडिल अवुर मूसा राः नियम राः बिरोध रे टेटेबोः मेनेय बगी यडा। 14अले नेय नआँ घयतेय कहनिय तोलोग ले अँजोम केडिया कि ईसु नासरी न मँडिलिय धसगों वेआ, अवुर अबू ती रे मूसा जिमा केडा हेना रिति रिवाजिय बदलो वेआ।” 15हेना वरी एहूदिकू राः महासभा रे दुड़ूब तनकू सींड़ होड़कू, ईसतेफनुस कू ञेंलहँड़ी वडा, अवुर होड़कू हेंय राः चेहरा सरगदूत राः चेहरा घयतेकू ञेंलवाडा।
Actualmente seleccionado:
परेरित 6: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.