परेरित 27
27
पवलुस जहाज ते रोमिय सेनुआँ
1अले जहाज ते इटली ले सेनुआँ मेनते तय होया एना, तहाँ हेंकू पवलुस अवुर एटाः कयदिकू हो अवगुस्तुस रेनकू पलटनकू रेनिय अधिकारी थरे कू जिमा तेडकुआ, हेंय ञुमू एलियुस मेनते दोहो एना। 2अले अरदमुतियुम राः मियाँटंग जहाज रेले रकब एना, हेना आसिया परदेस बँदे तआ छेतर ते सेनेनुः मेनते सँबह तना। अले जहाज राः लंगर#27:2 नआँ दाः भीतर रे जहाज होबाः टेकोआ हवे समुन्धर रेले लड़ा वडू। अवुर थिस्सलुनी रेनिय मकिदूनी हो अले सुदाय दोहो एना। हेंय ञुमू अरिस्तरखुस मेनते दोहो एना। 3हेना ञींदा वतू अले सयदा रेले अगड़ू एना। अवुर एलियुस पवलुस थरे दया केनते हेंय गतितकू एचे रे सेवा सत्कारिय लगाडिय इकम गोडवाडियू। 4हेना जघा वरी फेर जहाज रेले रकब एना, होय अनाले हनते होयोवा दोहो एनु, हेनाते अले साइपरास टापू राः आड़े आड़ तेले हलका चलो एना। 5अवुर किलिकिया अवुर पंफूलिया तआ समुन्धर तेले खँडा चलो एना, लुसिया परदेस राः मूरा सहर रेले अगड़ू एना। 6हेना रे पलटनकू रेनिय अधिकारी, सिकन्दरिया राः मियाँटंग जहाज इटली हनते चलोः दोहो एनु, हेनाय ञँमतेडा। अवुर हेंय अले हेना जहाज रेय रकब गोत्तेड ले दोहो एनु। 7केय दिन अले सुबिसतह तेले बढ़ो चलो एना। अवुर बड़ी मुसकिल ते कनिदुस बँदे ले तयाः तेडा, कहेकि होय मड़ंग हनते मेने इकम बढ़ो वले, अले सलमोने बँदे केरेत टापू राः आड़ तेले चलो एना। 8अवुर हेना धरी धरी ते बड़ी मुसकिल ते लसया सहर बँदे “बढ़ियाँः बन्दरगाह”#27:8 लसया सहर वरी बन्दरगाह लगभग तीन कोस रे इदाना मेनते कू ञुमू केडा, हेना जघा ले तयाः तेडा।
9नगदे दिन बितो यन दोहो एनु, अवुर अले जहाज मड़ंग हनते बढ़ोवे लगड हो मुसकिल यनु, उपास#27:9 लेवी 16:23-32, गिनती 29:7-11 लगभग कुँवार राः महिना रे होयाआ राः दिन हो हनी यनु। हेनाते पवलुस न याःते कहनी केतेय चेतवन तेडकुआ, 10“एगा होड़कू, इंञ ञेंलियाडाञूँ अबू राः नआँ होर रे जहाज अवुर कहीं जहीं माल भर मेने, अबू राः जीव हो नोकसान होयाआ।” 11लेकिन पलटनकू रेनिय अधिकारी पवलुस राः टेबोः वरी हो जहाज चलोअय अवुर जहाज मुँवर राः टेबोईय मनो तेडा। 12हेना बंदरगाह रे लेयेड़ बितो लगड बढ़ियाँ मेने दोहो गना, हेनाते अखीर होड़कू कनर न कनर याःते ढुरोः रेदो फीनिक्स तयाः केते हें-डे लेयेड़ बितो लगड कू बिचार तेडा। नआँ दो केरेते टापू राः बन्दरगाह हवे, नआँ रे देखिन पछु अवुर उतर पछु हनवरी होय मेजुआ।
समुन्धर रे गरा घटा
13होय देखिन हनवरी धीरे धीरे ते होयो बोंहड़ी तेडा तहाँ अबू राः सोच पूरा यना मेनते पसींद केते जहाज कू लड़ा तेडा, अवुर धरी धरी ते केरेते टापू बँदे तेकू चलो एना। 14लेकिन मियाँ घड़ी रे केरेते हनवरी उरकुलीन मेनते कू कहनी वआँ हेना गरा घटा मेजेना, 15जहाज गरा घटा तिल तेडा, तहाँ मड़ंग हनते मेने बढ़ोऊ, हेना वरी हेना ले एने वडू, अवुर नेन याःते होयो गोःतेड लेआ। 16हेना वरी कवदा मेनते कू ञुमू केडा होडिञाँ टापू राः आड़ ते तयाः केते कनर याःते जहाज राः डोंगा#27:16 मुसीबत राः समय रे जहाज डुबोः तोलोग होड़कू बंचो उडूंगुः लगड, जहाज सुदा मियाँ मियाँ ते होडिंञ होडिञाँ डोंगा हो तोल केतेकू गोः बेड़ाय दोहो एनु ले सम्भरो तेडा। 17फेर जहाज रे बुताकू डोंगा ओरके ते, फेर जहाज राः पेंदी हँडे पघा तेकू तोल तेडा, सुरतिस राः बितील रे फसोआ बोर ते परदा कू तनो तडा, हेना कू अगड़ू तेडा, अवुर जहाज कू एनेम तुवाडा। 18गरा घटा अखीर ते जहाज रे टकरो एना, तहाँ हेना ञींदा वतू जहाज राः कहीं जहीं कू अटड़ बोंहड़ी तेडा। 19तीसरा दिन हेंकू अपन हाँथ ते जहाज राः कहीं जहीं समान होकू अटड़ गोतेडू। 20बेसे दिन मेनते बेर अवुर इपिलकू मेने कू ञेंलगाना, अवुर गरा घटा हो मेनेन थबदो गना, तहाँ बंचोः राः असरा तकू हो टोवीजुः दोहो एनु।
21बेसे दिन कनय कनर मेने कू जोम बेड़ा गडा, तहाँ पवलुस हेंकू बीच रे चड़ाँ केनतेय कहनी तेडा, “ए होड़कू, अगर अपे ईञाः टेबोःपे मनो तेड रेदो ठिके दोहोएन मेनू, केरेते वरी मेने बू उडूंग गन रेदो, न संकट अवुर नोकसान एरो होयाएन मेनू। 22ईञाः अपे थरे अरजी हवे कि अपे हिम्मातेपे, कहेकि कनय राः जीव एरो नोकसान एना, लेकिन जहाज भर उजाड़ुआ। 23कहेकि जे भगवान रेनिय इंञ हवे, अवुर जेंञ सेवा यडिया, हेनी रेनिय सरगदूत, तेसींञ ञींद इंञ थरे मेजकेन तेय कहनी तेडा, 24‘ए पवलुस, अलोम बो-रू! अम कयसर मड़ंग रे चड़ाँः जरूरी इदाना। अँजोमेमू, अम सुदा सेनुः तन हेंकू सींड़कू भगवान आँमिय ओवाडा।’ 25हेनाते, ए भाईकू, हिम्मातेपे; कहेकि भगवान थरे ईञाः बिसवास इदाना, जेयसे इंञ थरेय कहनी केडा, हेन घयते होयाआ। 26लेकिन अबू कनर न कनर टापू रे जरूर बू अड उडूंगुआ।”
जहाज टोविज एना
27हेना वरी चेवदाहवाँ रात होया एना, अवुर अले अदरिया समुन्धर रेले ढन ढुनोः तनू। तहाँ अदहा रात जहाज चलोकू अटकर तेडा कि कनर देस बँदे बू तयाः यडा मेनते। 28हेंकू थहो तेड रे बीस पोरसा गहीर दोहो एना, दमभर अवुर मड़ंग हनते बढ़ो केनतेकू थहो तेड दो, पन्दरह पोरसा कू ञँमतेडा। 29तहाँ हेंकू दिरी घियाः रे टकरोआ बोर ते, जहाज तयोम तू हँडे चार गोटंग लंगर कू डालो तेडा, अवुर अँगाः लगड कू मनमनोवे दोहो एनु। 30जहाज चलोकू जहाज वरी ञींर मेनते कू सँबह तना, अवुर जहाज राः मड़ंग तू हनवरी लंगर डलो राः बहाना ते डोंगा समुन्धर रेकू अगड़ू तेडा। 31तहाँ पवलुस अधिकारी अवुर सिपाहिकू थरेय कहनी तेडा, “अगर नेकू जहाज रे मेने कू दोहोन रेदो, अपे एरो पे बंचो एना।” 32तहाँ सिपाहिकू लुड़ूम गेडकेड ते, डोंगा कू एनेम तुवाडा।
33अँगा बंचो तना, तहाँ पवलुस न याःतेय कहनी केते जोमुः लगाडिय समझो तेडकुआ, “पसींद पसींद ते अवुर रँगेज ते अपे तेसींञ चेवदाह रोज पुरो यना, अवुर कनर बेगर पे जोम बेड़ाआ। 34हेनाते इंञ समझो यडपेआ कि जीवत ते दोहोन लगड कनारा पे जोमके, कहेकि अपे मेंडे कनय भोः राः ऊबू, मियाँटंग हो एरो झड़ो एना।” 35नेन याःते कहनी केते पवलुस रोटिय सबतेडा, अवुर सींड़कू राः मड़ंग रे भगवानिय धन्यवाद वडा, अवुरिय जोम तेडा। 36तहाँ सींड़कू हिम्मत केतेकू जोमेना। 37अले सींड़कू लगय ते जहाज रे दूय सव छेहत्तर झन ले दोहो एना। 38जोम पिटो केन राः बाद रे, गोहोम समुन्धर रेकू अटड़ तेडा, अवुर जहाज हलुक एना।
39जब अँगा एना, तहाँ हेंकू हेना देस मेने कू चिन्हों सको गना, अवुर पलेन बितील कू ञेंल ञँमतेडा, अवुर कू पसींद तेडा कि अगर ढुरोः रेदो में-डे जहाज बू चड़ाँयू। 40तहाँ हेंकू लंगर लड़ा केते, समुन्धर रेकू अड़ाः गोडवाडू, अवुर गजराही राः लुड़ूम होकू लड़ा तेडा, अवुर मड़ंग हँडाः परदा तनो केते, अड़ी हनतेकू चलो एना। 41बनर गतर हनवरी हिलकोस जुमोः हेना जघा रे जहाज बितील रे सेन टकरो यनु। अवुर जहाज राः मड़ंग गतर हेना रे फसो केनते अटको यनु। अवुर जहाज राः तयोम गतर हिलकोस तुराः बल ते टोवीजुः दोहो एनु। 42तहाँ सिपाहिकू कयदी कुकू ञेंड गोज लगड कू सलाह एना, ताकि कनय अलो पँवरो उडूंग कोःतेकू ञींरू। 43लेकिन अधिकारी, पवलुसिय बंचो मेनतेय चहोः दोहो एनु, हेनाते हेंय न याःते मेनेय एनेम गडकुआ, अवुरिय कहनी तेडा कि जे जे कू पँवरो सकोआ, हेंकू मड़ंग ते पँवरो कोःते अड़ी हँडे कू उडूंगुऊ। 44अवुराःकू पटरा ते, कोई कोई जहाज राः एटाः एटाः चीज राः सहारा तेकू उडूंगुऊ। नेन याःते सींड़कू अड़ी हँडे कू बंचो उडूंग एना।
Actualmente seleccionado:
परेरित 27: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.