परेरित 25
25
फेलिक्स राजपाल मड़ंग रे पवलुस
1फेस्तुस हेना परदेस रेय सेनेना, अवुर तीन दिन राः बाद रे कयसेरिया वरी एरूसलेमिय सेनेन दोहो एनु। 2तहाँ बड बडे आजककू अवुर एहूदिकू रेनकू मुख मुखकू हेंय मड़ंग रे पवलुस कू दोस तेडा। 3अवुर पवलुस एरुसलेम रेकू एर रागेय लगड फेस्तुस थरे कू अरजी एना, कहेकि हेंकू होनोर रे ञेंड गोजेय राः तक तक रेकू दोहो एना। 4हेना वरी फेस्तुस जबाब तेडा, “पवलुस कयसेरिया रेकू पहरा यडिया, अवुर खुदे इंञ हेनारे हलीतेंञ सेनुः मेनते।” 5हेना वरी फे-रिय कहनी तेडा, “अपे मेंडे जे जे मुख मुखकू इदाना, हेंकू इंञ सुदा कू मेजुऊ, अवुर नेय होड़ कनर गलती कामिय काम केड रेदो, हेंय थरे दोस कू लगो।”
6हेंकू बीच रे आठ दस दिन दोहो केनते फेस्तुस, कयसेरिया हनतेय चलो यनु; हेना ञींदा वतू न्याय राः गद्दी रे दुड़ूब केनते, पवलुस अगेय लगाडिय हुकूम वडकू दोहो एनु। 7पवलुस हेना रेय मेजेना, तहाँ एरुसलेम वरी कू मेजताना, हेंकू एहूदिकू चड़ाँ मँझर केडिय ते एनेक धँधेह कू दोस तेडिया, अवुर हेंकू हेना राः घुठा मेने कू पुरो सकोः दोहो एनु। 8लेकिन पवलुस जबाब तेडा, “इंञ न दो एहूदिकू राः धरम नियम अवुर न मँडिल अवुर न दो कयसर राः बिरूध रे कनारांञ कसूर केडा।” 9तहाँ फेस्तुस एहूदी कुय खुस मेनतेय चहोः दोहो एनु, हेनाते पवलुस थरेय कहनी तेडा, “एरुसलेम मी सेनुः किदो एरोआ, हें-डे नआँ सींड़ टेबोः इंञ मड़ंग रे फरी फटा होयाआ?” 10हेना वरी पवलुस कहनी तेडा, “इंञ कयसर न्यायेआ हेना गद्दी बँदे रेंञ चड़ाँ केना; ईञाः ने-डेम फरी फटायू। एहूदिकू राः कनर बेगारिंञ कसूरा, हेना अम बढ़ियाँ तेम पपाड़ी तना। 11अगर इंञ कसूर केड रेदो, अवुर मिरतू दंड ञँम लायिक कनारांञ गलती केड रेदो, इंञ गोजुः लगड मेनेंञ बोर तना; लेकिन जे जे टेबोः रे इंञ कू दोस यडा, हेना मेंडे मियाँटंग हो सही कोवाः रेदो, कनय हो नेकू हाँथ रे एरो कू जिमा तेडिञाँ। इंञ कयसर सम्राट थरेंञ अरजिआ।” 12तहाँ फेस्तुस सभा रेनकू सुदा सलाह केनतेय जबाब तेडा, “अम कयसर थरेम अरजी केना, हेनाते अम केनेयसर थरे कू इदी मिआँ।”
अगरिपा राजा मड़ंग रे पवलुस
13कुछ दिन बितो केन राः बाद रे अगरिपा राजा, मीसित बिरनीके सुदा, कयसेरिया रे मेजकेन ते फेस्तुस सुदा कींञ जुमो एना। 14हेंकींञ हेना रे नगदे दिन दोहो केन राः बाद रे फेस्तुस पवलुस राः बारे ते राजाय लाय वडा, “ना रे मियाँहोड़ होड़ इदाना, हेंय फेलिक्स जेहेल रेय तोल अटुडिया। 15इंञ एरुसलेम रेंञ दोहोएन तोलोग, बड बडे आजककू अवुर एहूदिकू रेनकू सपायँड़कू, हेंय कू दोस तेडिया अवुर सजा ओवाय लगड कू अरजी एना। 16हेना वरी इंञ हेंकुंञ जबाब वडा कि कनय मुदेय होड़ जब तक दोदोसकू राः मड़ंग रे चड़ाँ कोःते, दोस केडिया, हेना राः बारे ते जबाब एम राः मोका ञँमुः बिगर सजा ओवाय लगड मेने कू जिमाया, न याःते रोमिकू राः रीति कोवाआ। 17हेंकू न रेकू जवर एन तहाँ, मेनेंञ देरी बेड़ा गडा, अवुर हेना ञींदावा न्यायेआ गद्दी रे दुड़ूब केनते, हेंय होड़ अगेय लगाडिंञ कहनी वडकू। 18हेंय कू दोस हेंकू चड़ाँ एना, तहाँ जेयसे इंञ पसींदे दोहो एनु, हेना घयते हेंकू कनर मेने कू दोस गडिया। 19लेकिन हेंकू अकू राः धरम राः बारे ते, अवुर ईसु मेनते कनय होड़ ञुमू दोहो एना, हेंय गोजियान दोहो एनु, अवुर पवलुस हें-नी जीवत गिआयू मेनतेय लाये दोहो एनु। ने-ना राः बारे तेकू अड़ा चवकीः दोहो एनु। 20नआँ टेबोः काःतेंञ पताया मेनतेंञ अकबको तना? हेनाते इंञ हेंय नआँ टेबोः राः फरी फटा होयाः लगड एरुसलेम मी सेनुआँ किदो एरोआ मेनतेंञ होंबोर तेडिया? 21लेकिन पवलुस अनेज राः ममला सींड़कू वरी बडेअय राजा एचे रे फरी फटाः लगाडिय अरजी एना। तहाँ इंञ हुकूम तेडा कि जब तक कयसर थरे अनायीनिंञ कुलेय मेन दिन हेंय पहरा तय पे।” 22हेना वरी अगरिपा फेस्तुस थरेय कहनी तेडा, “इंञ हो हेंय होड़ राः टेबोः अँजोम गिसन यडिञाँ।” हेना वरी हेंय कहनी तेडा, “अम गपाम अँजोमेआँ।”
23हेना ञींदा वतू अगरिपा अवुर मीसित बिरनीके, एकदम सड़े सपड़े केनते दरबार जघा रेकींञ मेजेना, अवुर पलटनकू रेनकू अधिकारिकू अवुर सहर रेनकू मुख मुख होड़कू हेंकींञ सुदा कू दोहो एना, तहाँ फेस्तुस पवलुस अग लगाडिय हुकूम तेडा। 24फेर फेस्तुस कहनी तेडा, “ओ अगरिपा राजा, अवुर न रे जवर केन हेंकू सींड़कू, अपे नेय होड़ पे ञेंलियाडिया, नेय राः बारे ते सींड़ एहूदिकू एरुसलेम रे अवुर न रेहो हल्लाय तींग ते नेय जीवत ते दोहोन बढ़ियाँ कोवाआ मेनते इंञ थरे कू कहनी केडा। 25लेकिन इंञ पपाड़ियानञूँ कि नेय मिरतू दंड ओवाय लायिक कनर बेगारिय चीआ। कहेकि नेय खुद सम्राट थरेय अरजी केना, हेनाते इंञ कुलेय लगाडिंञ निरलेय केडा। 26इंञ नेय राः बारे ते सम्राट थरे लिखो केते भेजोय लगड इंञ थरे कनर निसचित टेबोः कोवाआ। हेनाते नेय अपे मड़ंग रे अवुर खासकर अगरिपा राजा अम मड़ंग रेंञ अगकेडिया। ताकि छानबीन होया कोः राः बाद रे लिखोवे लगड कनारांञ ञाँमू। 27कहेकि कयदी होड़ कूलु अवुर हेंय कू दोस केडा, हेना उऊकू इंञ फलतू गिआ घयतेंञ बुझहो यडा।”
Actualmente seleccionado:
परेरित 25: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.