परेरित 24
24
फेलिक्स मड़ंग रे पवलुस
1पाँच दिन राः बाद रे सींड़ वरी बडेअय आजक हनन्याह, कुछ सपायँड़ अघुवाकू अवुर तिरतुल्लुस मेनते ञुमूत दोहो एनय उकील सुदा, कयसिरया रेय मेजेना। हेंकू फेलिक्स राजपाल मड़ंग रे, पवलुस राः बिरोध रे दोस कू लगो तेडा। 2पवलुस कू राःतेडा, तहाँ तिरतुल्लुस न याःते दोस केडिय तेय कहनी तेडा,
“हे अदारनिय फेलिक्स राजपाल, अम चलो यडा राज रे अले अखीर सान्ति ले ञँमकेडा, अवुर अमाआँ बढ़ियाँः बेवस्था राः चलते ते नआँ देस रे केय्यो गोटंग सुधार राः काम होया केना। 3अवुर नआँ अले सींड़ जघा ते अवुर हर प्रकार ते धन्यवाद राः साथ तेले मनो यडा। 4इंञ अमाआँ समय बगरा एरोंञ तिला तेडा, इंञ अम थरेंञ अरजीः तना कि दया कोःते ईञाः टेबोः मियाँ बार अखर मी अँजोम के। 5नेय होड़कू उऊजड़ाय अवुर दुनिया रेनकू सींड़ एहूदिकू रे फूटिय डलोः हेंय हवे। अवुर नेय नसरेत रेनकू दल रेनिय मुखिया हवे। 6मेय मँडिलिय असुद्ध मेनतेय सँबह तना, अवुर अले पकड़ो केडिया। [अले मेय अनाले राः नियम राः अनुसार ते सजा ले ओवाडिय मेनू; 7लेकिन पलटनकू रेनिय मुखिया लूसियास मेय जबर जस्ती ते अले वरिय गोःतेडिया, 8अवुर दोस लगो कू अम थरेय कुलकेड कुआ।] अले सीरित ते किदो जलिया ते नेय थरे दोस ले लगो यडा, हेना अम सींड़ टेबोः होंबोरिय रे खुदेम पताया।” 9एहूदिकू हो उकील हन गतर केनतेकू कहनी तेडा कि नआँ सींड़ टेबोः सही मेते सीरित गिआ मेनते।
पवलुस राः जबाब
10राजपाल पवलुस टेबोः लगाडिय इसारा वडिया, तहाँ पवलुस राजपालिय जबाब वडा,
“इंञ पपाड़ी तना, अम नेकू एहूदिकू राः बीच रे अखीर साल वरिम न्याय अगियाडा; हेनाते इंञ खुसी तेंञ लाय यडा। 11अम पता सकोअमू, इंञ एरुसलेम रे सेसेवा लगाडिंञ मेजेना, हेना बारह दिन वरी बगरा बेगर बितोआ। 12अवुर मेकू इंञ न दो मँडिल रे, अवुर न दो आराधना ओड़ाः ते, अवुर न दो सहर रे, कनय सुदा अड़ा चवकीः तोलोग कू ञेंलवाडिञाँ, चहे होड़कू भड़को तोलोगू। 13मेकू जे टेबोः रेकू दोस यडिञाँ, हेना अम मड़ंग रे सत राः सबूत एरो कू तिब सको एना। 14हेंडे रेहो इंञ अम मड़ंग रे नअँञ मनो यडा, जेयसे ईञाःकू दादी पुरखाकू मनो तेडिया, हेन घयते इंञ होंञ मनो यडिया, लेकिन नेकू कहनी यडा नआँ गलत होर हवे मेनते। इंञ धरम नियम रे अवुर भविस्यवक्ताकू राः कागद रे लिखल इदाना, हेना सींड़ टेबोः रेंञ बिसवास यडा। 15अवुर ईञाः भगवान थरे असरा इदाना, हेन घयते नेकू राः असरा हो इदाना कि धरमिकू अवुर अधरमिकू बनार मेल कू गोजुः वरी कू जियो रिमुआ। 16हेनाते इंञ होंञ कोसीस यडा कि भगवान अवुर होड़कू राः मड़ंग रे ईञाः मन रे कनर अलत गलत अलो दोहोनू। 17#परेरित 21:17-28अखीर साल बितो केन रे इंञ अपन होड़कू लगड दान इईदी अवुर मँडिल रे भेंट रकब लगड एरुसलेम रेंञ मेजेना। 18एहूदिकू मँडिल रे इंञ नअँञ करो तोलोग कू ञँमतेडिञाँ, दो इंञ रिती बिधी राः अनुसार ते सूधिंञ दोहो एना। इंञ सुदा भीड़ भड़ाका मेने दोहो गना, अवुर इंञ कनर मेनेंञ उजड़ गडा। 19आसिया वरी कुछ एहूदिकू मेजताना, अगर हेंकू ईञाः बिरोध रे कनारा इदान रेदो, हेंकू अम मड़ंग रे मेजकेन ते इंञ थरे दोस कू लगो सकोएन मेनू। 20नहीं तदो नआँ रे नेनकू इदान कुआ हेंकू लाये, इंञ एहूदिकू राः महासभा रेंञ चड़ाँ तन दो, मेकू इंञ थरे ची गलती कू ञँमतेडा? 21#परेरित 23:6मिनियेटंग टेबोः इंञ हेंकू मँझर रे चड़ाँ केनतेंञ कहनी तेडा कि ‘गोजकोःकू जियो रिमुः राः बिसेय ते तेसिंञ ईञाआँ अपे राः मड़ंग रे बात चीत चलोः तना’।#परेरित 23:6”
22फेलिक्स ईसु राः होर राः बारे ते बढ़ियाँ तेय पपाड़ी दोहो एनु, तहाँ हेंय नआँ घयते कहनी केतेय बेंहड़ो तेडा कि “पलटनकू रेनिय मुखिया लूसियास मेजुः रे अमाः टेबोईंञ फरी फटाया।” 23अवुर सिपाहिकू रेनिय अधिकारी हुकूम तेडा कि “पवलुस जेहेल रे छुट तेपे एनेंवायू, अवुर ञेंलयाय पे, अवुर हेंय रेनकू गतितकू हो कनारा कू अगवाय रे अलोपे रोको कू।”
फेलिक्स अवुर इंगत कू दुरसिल्ला मड़ंग रे पवलुस
24कुछ दिन राः बाद रे फेलिक्स अनेज इंगत कू दुरसिल्ला सुदा कींञ मेजेना। दुरसिल्ला एहूदी कोड़ीहोन दोहो एना। अवुर फेलिक्स पवलुसिय एर राःकेड ते, ईसु मसीह थरे इदाना बिसवास राः बिसेय तेकींञ अँजोम तेडा। 25पवलुस, धरम अवुर अपन मन कब्जा रे रखोवे अवुर मेजुः तना न्याय राः बारे तेय लाय तेडा, तहाँ फेलिक्स बोरो यनतेय कहनी तेडा, “निहों दो चलोःमी, मोका ञँमुः रे फेरिंञ एर राःमिआँ।” 26फेलिक्स, पवलुस वरी कुछ रूपयांञ ञाँमा मेनतेय असरा तना; हेनाते हेंय घड़िन घड़ीय एर राःकेयते हेंय सुदाय टेबोः दोहो एनु।
27लेकिन दूय साल बितो यनु, तहाँ फेलिक्स राः जघा रे पुरकियुस फेस्तुस राजपाल बनो एना। अवुर फेलिक्स एहूदिकू खुस मेनतेय चहोः दोहो एनु, हेनाते हेंय पवलुस जेनेहेल रेय बगी वडियू।
Actualmente seleccionado:
परेरित 24: ksz
Destacar
Compartir
Copiar

¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.