परेरित 2
2
पवितर आत्मा अगड़ू एना
1पेन्तिकुस्त#लेवी 23:15-21; बेवस्था 16:9-11 राः दिन मेजेना, तहाँ चेलाकू सींड़कू मियाँटंग ओड़ाः रेकू जवर तना। 2हेनारे अचाकते अगस वरी बँयडोड़ी रूह रूहो मेजुआ घयते एकधँधेह सडी एना, अवुर जे ओड़ाः रेकू दुड़ूब तना, हेना अँधोड़ चुवेर यनु। 3अवुर हेंकू सेंगेल दिलकोआ धाद घयते अलंग कू ञेंलवाडा, अवुर नआँ अलंग जतकत हनते मिरीज यनु, अवुर सींड़कू थरे मेज ठहरो यनु। 4हेंकू सींड़कू पवितर आत्मा तेकू भरो यनु, अवुर हेंकू जेयसे न पवितर आत्मा टेबोः लगड सक्ति ओवडकू, हेंकू एटाः एटाः भासा तेकू टेबोः एना।
5हेना तोलोग धरती राः सींड़ देस वरी मेजतान हेंकू भगवान रेनकू भक्त एहूदिकू एरुसलेम सहर रेकू दोहोन दोहो एनु। 6नआँ आवाज अँजोम ते भीड़ लगो यनु, अवुर होड़कू अकबको यनकू, कहेकि चेलाकू टेबोः दोहोएन हेना, ईञाः भासा तेकू टेबोः तना मेनते सींड़ कुकू अँजोमे दोहो एनु।
7हेंकू सींड़कू अहचरज यनते आपस रेकू कहनिय दोहो एनु, “नेंकू टेबोः तन हेंकू सींड़कू गलील रेनकू न लगे किदो? 8हेंडे दो काःतेखा अबू सींड़कू अपन अपन जनम करम एना, हेना जघा राः भासा बू अँजोम यडा? 9अबू मँझर रे पारथी अवुर मेदी अवुर एलामी अवुर मेसोपोटामिया अवुर अहूदिया अवुर कपदुकिया अवुर पुन्तुस अवुर आसिया, 10अवुर फुरूगिया अवुर पंफूलिया अवुर मिसरी अवुर कुरेने राः आस पास रे इदान हेना लीबिया देस, नआँ सींड़ देस रे दोहोनकू अवुर रोम वरी मेजतन हेंकू, एहूदिकू अवुर एहूदी धरम कू अपनो तड हेंकू, केरेती अवुर अरबिकू हो इदान कुआ, 11लेकिन अबू अपन अपन भासा ते नेकू वरी भगवान राः बडे बडे काम राः चरचा बू अँजोम यडा।” 12अवुर हेंकू सींड़कू अहचरज यनकू अवुर अकबको केनतेकू होंबोर ओड़ेंगू, “नआँ ची होयाः तना?” 13लेकिन अवुराःकू मजाक कू उड़ो केडकू तेकू कहनी वडकू, “नेकू दो नवाआँ अंगूर रस राः नसा तेकू बुलकेना।”
पतरस राः गोवाही
14तहाँ पतरस ग्यारह झन सुदाय चँड़ा एना, अवुर बडे बडे तेय कहनी यडु, “ए एहूदिकू अवुर एरुसलेम रे दोहोन हेंकू सींड़कू, नआँ पपाड़िकोःपे, अवुर ईञाः टेबोः धियान सेते पे अँजोमे। 15अपे बुलकेना कू मेनते पे अड़ींग तना, अले बेगर ले बूला, कहेकि निहों दो ञींदात बेला नवे बजो केना। 16नआँ राः बारे ते जोएल भविस्यवक्ता कहनी तड हेना हवे
17भगवान कहनिया,
‘कि अन्त राः दिन रे एयसा होयाआ कि ईञाआँ आत्मा सींड़ होड़कुंञ ओवा कुआ,
अवुर अपे रेनकू कोड़ा होपोन पेकू अवुर कोड़ी होपोन पेकू भविस्यवाड़ियाकू
अवुर अपे रेनकू ढिंगवाकू परभा कू ञें-ला,
अवुर अपे रेनकू सपायँड़कू सपना कू ञें-ला।
18तहाँ हेना चेका इंञ ईञाःकू सेवेखियाकू,
अवुर सेवेखहीन कू थरे, ईञाः आत्मांञ उझलोआ,
अवुर हेंकू भविस्यवाड़ियाकू।
19अगस रे इंञ बडे बडेआ काम अवुर पेंदी धरती रे चिन्ह,
लोहू अवुर सेंगेल अवुर सुकूल राः लिंबीरिंञ तीबा।
20परभु राः महान अवुर महिमामय दिन मेजुः वरी पहील ते, बेर अंधरा अयू अवुर बँगो लोहू घयतेय बदलोआ,
21अवुर कनय हो परभु राः ञुमूय ञुमूआँ, हें-नी बंचोआ।’”#जोए 2:28-32; एहुन्ना 7:37,38
22“ए इसराएलिकू, ईञाः टेबोः अँजोम पे! नसरेत रे दोहो एनय ईसु भगवान चुनो तडिय हेनी होड़ दोहो एना, अवुर भगवान नेय राः दोवारा ते अहचरज काम अवुर चमत्कार काम अवुर चीनिय तिब तेडा, नआँ सींड़ पे पपाड़िआ, कहेकि नआँ सींड़ काम ईसु अपे थरेय करो तेडा। 23ने-नी भगवान पसींद तडा घयते अवुर पहील कू टेबोः तड राः अनुसार तेय एर पकड़ो एना; अपे पापी होड़कू राः हाँथ रे कुरूस रेपे एर ठोको गोजतेडिया।#मत्ती 27:35; मरकुस 15:24; लूका 23:33; एहुन्ना 19:18 24लेकिन भगवान हेंय मिरतू राः बंधन वरी छडो केडिय तेय जियो तेडिया;#मत्ती 28:5,6; मरकुस 16:6; लूका 24:5 कहेकि हेंय मिरतू राः कब्जा रे दोहोन असम्भव गिआ। 25कहेकि दाऊद ईसु राः बारे तेय कहनियाँ, ‘इंञ परभु हमेसा मड़ागिंञ रेंञ ञेंलेया, कहेकि हेंय ईञाः जोम गतर रेया, ताकि इंञ अलोंञ डगमगोऊ।
26हेनाते ईञाः जीव बहल केना, ईञाः आत्मा खुस गिआ;
अवुर खुसी राः मार ते ईञाः अलंग ते भगवानिंञ ञुमू यडा,
ईञाः देंह लगड हो पक्का असरा इदाना कि हेना कनर एरो ची एना।
27कहेकि अम भगवान ईञाः जीव अधोलोक रे एरोम एने वडा;
न अमाअय पवितर होड़ मी एनेम सोया वया।
28अम जीवन राः होर मी लाय वडिञाँ;
अवुर अमाः दरसन राः दोवारा ते इंञ खुसी तेम भरपूरिञाँ।’”#सिरिंग 16:8-11
29पतरस अनावुरिय कहनी तेडा, “एगा भाईकू, इंञ खुटियारा दाऊद राः बारे ते बे-हिचक ते अपे थरेंञ कहनी सकोआ कि हेंय गोजे नयू अवुर कू जतन तेडिया। अवुर हेंय कू जतन तेड हेना मरघटी तेसींञ मेनते अबू मँझर रे इदाना। 30नेय भविस्यवक्ता, ‘इंञ अमाः पिढ़ी रे मियाँहोड़ होड़ अमाः राज गद्दी रेंञ दुड़ूबिया’, मेनते भगवान दाऊद थरेय कीरिया तना हेनाय पपाड़ी दोहो एनु।#सिरिंग 132:11; 2 समू 7:12,13 31हेंय भविस्य रे होयाः हेना घटना पनाहिल ते ञेंलकेते, मतलोब
मसीहा गोजेन वरिय जियो रिमुः राः बारे ते न याःतेय लाय तडा,
कि हेंय गोजतन हेंकू सुदा मेनेय बगी गडिया,
अवुर हेंय राः देंह मेनेय एनेम सोया गडा।
32ने-नी ईसु भगवान जियो तेडिया, नआँ टेबोः रेनकू अबू गोवाहिकू हवे। 33भगवान नेय अनेज राः जोम गतर हँडाः अधिकार राः जघाय ओवाडिया। अवुर जेयसे नेय अपा जबान वडिया, हेन घयते पवितर आत्माय ञँमतेडा। हें-ना पवितर आत्मा ते अलेय भरपूर केडलेआ। अवुर हेंय राः काम पे ञेंलियाडा अवुर पे अँजोम यडा। 34कहेकि दाऊद दो सरग बेगारिय से-ना, लेकिन हेंय खुदेय कहनियाँ,
‘परभु ईञाअय परभु थरेय कहनी तेडा,
35अमाःकू दुस्मनकू कटम पेंदी राः चवकी अनायिंञ बनो कू मेन दिन
ईञाः जोम गतर रेम दुड़ूबु।’#सिरिंग 110:1
36हेनाते समूचा इसराएलिकू जरूरी ते पपाड़िकोःपे जे अपे कुरूस रेपे रकब तेडिया हें-नी ईसु, भगवान परभु हो अवुर मसीहा होय बनो केडिया।”
37तहाँ अअँजोमकू राः दिल छेदा यनु, अवुर हेंकू पतरस अवुर परेरित कुकू होंबोर यडु, “एगा भाईकू, अले ची ले बनोआ?”
38हेना वरी पतरस हेंकू थरेय कहनी तेडा, “मन पे मिड़ाऊ, अवुर अपे मेंडे सगोरकू अपन अपन पाप राः माफि लगड ईसु मसीह राः ञुमू ते बतिस्मा पे तिला; तबे भगवान राः दान मतलोब पवितर आत्मा पे ञाँमा। 39कहेकि नआँ जबान, अपे अवुर अपे रेनकू होपोनकू लगड अवुर अबू रेनिय परभु भगवान अनेज थरेय राःकुआ, हेंकू सींड़कू सगींञ सगींञ तेनकू लगड हो हवे।”
40हेंय अखीर टेबोः गोवाही दे-दे तेय समझो तेडकुआ कि अपन आप नेकू अन टेड़हा पिढ़ी कू वरी पे बंचोऊ। 41जे जे हेंय राः टेबोः कू मनो तेडा, हेंकू बतिस्मा कू तिला तेडा; अवुर हेन चेका करीब करीब तीन हजार होड़कू चेलाकू सुदा कू मेड़वा एना। 42अवुर हेंकू परेरितकू वरी सिक्छा ञँम राः, अवुर संगतिः राः, अवुर रोटी टोवीज राः,#मत्ती 26:26; परेरित 20:7 अवुर बिनतीः राः रुवाँ धुवाँ रेकू दोहो एना।
बिसवासिकू राः संगति
43अवुर सींड़ होड़कू थरे बोर समसो यनु, अवुर अखीर अहचरज काम अवुर चिन्ह परेरितकू राः दोवारा ते होयाः दोहो एनु। 44अवुर बिसवास तेड हेंकू सींड़कू मियाँ मियाँ तेकू दोहोन दोहो एनु, अवुर हेंकू थरे जे-ना दोहो एना, हेना कू हटींग जोम दोहो एनु।#परेरित 4:32-35 45अवुर हेंकू अपन अपन राः अन धन अवुर समान केजा केजा ते जेयसे जे जे राः जरूरत दोहो एना, हेंय कू हटींग वय दोहो एनु। 46हेंकू रोज दिन मँडिल रे एक सूर तेकू जवारूः दोहो एनु, अवुर ओड़ाः गँड़ी ते रोटी टोवीज अवुर हँसी खुसी ते अवुर साफ मन तेकू जोमुः चरोः दोहो एनु। 47अवुर भगवान राः स्तुति कू करो दोहो एनु, अवुर सींड़ होड़कू हेंकू थरे खुस कू दोहो एना, अवुर जे जे कू उबारुः दोहो एनु, हेंकू परभु रोज दिन बिसवासिकू सुदाय मिलो गोत्तेकू दोहो एनु।
Actualmente seleccionado:
परेरित 2: ksz
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe India. All rights reserved.