Kejadian Uram 8
8
Weik me kwan dingiamwe ani, cebmou deyok
8:1-22
1Er Iya Erebdobnyi biryi Nuh ab, er ai ninyi ab, kamyoa lulungnande dinyi nirya ab a me kwan deici yiban ai doamwa umbura wekamnyi yubwa nirya asi luba kimna kum kuamwe. Eda, tuba kalikamwe deyok aryi Er Imtamnyi biryi yeinya karebmou ba, ilila yeinya dobmouci, ilila me kwan nirya cebdobmou. 2Ani, Er Imtamnyi biryi tukwe amwetam aryi ilila me botoboka anaramwe me ab, imtam botoboka mo sangnamwe bisik ab nirya asi tunibdongobmou. Ura, me yibaramwe dinyi ab, mo cemnamwe dinyi ab nirya cebdobmou. 3Ba, me dingiramwa dinyi asi cebde baramwe talak ara uki yubwa 150 baryi#8:3 Nuh mabsilib me deici yiban aia umbura kuramnyi uki ara yubwa 150 baryi kuamnyi. Ara, wala amubaryi kuamnyi. kuamwe. 4Ba, ta wala dobmouci, tanggal 17 berekmou tum ara a me deici yiban aia mutuk kon si Ararat kon yandoka darabmou. 5Ba, me ara tuba cebde yurbaramwe ani, wala takwe wala, tanggal 1 dobmou tum ara mutuk konkon lak ton kibmou.
6Uki 40 baryi tum sirya berekmou ura, Nuh biryi ai botona kiknibdeiamwe aryi bublan kukmou. 7Ura, Nuh biryi maka si gagak#8:7 Nuh biryi yuma dobkwetebmou maka ara nun mutuk ton kum kurur. A maka bol ara kol telebdob maka nun uca, tub yirande maka nun dobkwetebmou. tentok me deici yiban aia umbura dam aryi dobkwetebmou. Uca, a maka gagak ara me cebmou ababyi tamuboka Nuh dam bana kum kubmou. Eda, iya da bindobmou. 8Ani, Nuh biryi, “Me sirya cebmar do?” tenen maka emnanyi dobkwetebmou. 9Uca, a maka emnanyi ara tukwetam a nirya me kwan tuba dingiamwe tok aryi er burbinmanto co dub ton kum eibmou. Ura, a maka tamuboka Nuh bisi me deici yiban ai dam binmou. Ba, Nuh er taruk lakeibmou ura, a maka emnanyi er taruk deici burbinmou ba, doboka ai dongobdeibmou. 10Ani, uki tabaryi sirya mabmou ura, a maka emnanyi tubto dobkwetebmou. 11Ba, a maka emnanyi a me deici yiban aia aryi sakoka binmou. Ani, kiting wekdobkoua dam kuabwe bok, a maka emnanyi co si zaitun dub dakoka si tobmouci, Nuh bisi bobinmou. Ura, Nuh er kanya aryi, “Ura, me cebde banmar,” tenebmou. 12Ura, Nuh biryi, “Me cebci ba, dobkwetebkwan,” tenebmou ura, uki tabaryi tubto mabmou. Ani, tubto a me deici yiban aia dam aryi maka emnanyi dobkwetebmou. Uca, a maka emnanyi tamuboka Nuh bisi kum kubmou. 13Ba, a talak ara Nuh er kam kuramwe kwalina yubwa ara 601 baryi kibmou. Ba, a wala ara yuma dorande wala dobmou. Ani, tanggal ababyi yuma tanggal tum berekmou ura, tukwetam nirya me iya cebdobmou. Ura, Nuh akai aruma botoboka, dirderamwe uca, a me kwan tukwetam nirya sirya cebdoro banmou asi eibmou. 14Ura, bitinyi wala asi tanggal 27 tum berekmou ura, tukwetam nirya sirya ilim biribmou.
15Ura, Er Iya Erebdobnyi biryi Nuh bisi ato ebmou, 16“Kan ab, kan ner ab, kan mabwe ab, kan mabwe sun nerabwe ab ur tukwetam sakwetebdarur,” ebmou. 17Ani, ton ato ebmou, “Maka imtam langlang eryibarande yala babyi, tukwe kib yibarande dinyi babyi, yuk-yuk kamyoa nirya babyi, weika-mitika nirya bublan kukeibdum. Ba, sakweteboka tukwetam nirya yaldakde binkwaming,” ebmou. 18Ura, Nuh ab, er ner ab er mabwe ab, er mabwe nerabwe ab tukwe kib sakwetebmai. 19Ani, imtam langlang eryibarande maka yala nirya, tukwe kib bai kurande kamyoa yala nirya ab, mundu tang deib yibarande yala nirya akai umbura dam aryi anaboka yibinmai. 20Ura, Nuh biryi kamyoa yala yuk-yuk nirya asi ninyi yina kikiman dinyi akwe wiboka mikbaryi obmou. Ura, Er Iya Erebdobnyi biti, dama deirin keil dungna labmouci, er dama deiboka uk dabmou. 21Ura, Nuh biryi a dama deiboka uk dabmou dinyi asi siltong Er Iya Erebdobnyi yubmou. Ura, ato ebmou, “Ninyi ara sun yuma kiknibmase talak aryi malyito dinyi akwe minob ukuramnyi to aryi ukununga. Ati, Niryi tukwetam ninyi ab yuk-yuk kamyoa nirya ab asi a obminikmanto aminda tubto kum ukubkwan. 22A deyok aryi tukwetam li dobde binkwande ara tuba a kuanci talak ara wa in li ab wa kin li ab, mouryi li ab co keta li ab, mo li ab dou li ab, kitingtam ab lukunda ab iya o berekde-o berekde binkwande,” ebmou.
Actualmente seleccionado:
Kejadian Uram 8: MTG
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
@LAI 2007 (New Testament), @LAI2022 (Old and New Testament)