MATIUS 5
5
Kurtaga nen wene yirige wene
1Eta paga, Yesus akuni pakalok il dalok, Ar kurtaga dagi lagage. Ar obok kotatuk werekma, awurumi Ar oba koktari wagugwama, 2nen Ar arar wene ebe emeriraga dogolir:
Adeknggen mondok dogorak wene
(Luk. 6:20-23)
3“Kir akuni Ar Allah ilka paga kininggi dek mende eti kinakla adeknggen mondok dogoni o;
Nenaluk ir eti Ar Allah akburi mende arar onde arugun o!
4 #
Yes. 61:2
Kir akuni kumbimo welagwi mende eti kinakla adeknggen mondok dogoni o;
Nenaluk ir inile mbalogo yonggoninabigin o!
5 #
Mzm. 37:11
Kir akuni kinoba tagin welagwi mendek eti kinakla adeknggen mondok dogoni o;
Nenaluk ir o agar paga yoma onde arugun o!
6Kir akuni Ar Allah Ane mbalek abu kugwi mende eti kinakla adeknggen mondok dogoni o;
Nenaluk Ar Allah nen kir ndonggorogon arar ekbinagagin o!
7Kir akuni ir akuni ambetak kiniliti kunik paga inakba erinakwi mendek eti, kinaklah adeknggen mondok dogoni o
Nenaluk kir Ar Allah nen kinakba erigin o!
8Ir akuni iniliti maduk dek pano mondok werek eti, inakla adeknggen mondok dogowak o
Nenaluk ir akuni eti Ar Allah inil kugun o.
9Ir akuni maga wene wolok nugwi mendek, inakla adeknggen mondok dogowak o;
Nenaluk ir akuni eti Ar Allah nen ir An nakburi arar yiluk yoragin o!
10 #
1Ptr. 3:14
Ir akuni Ar Allah akla andaktaga ndak-ndak ekwi kalok, ir akuni ambetak nen inoba anggin panggin erinabir tagwi eti, inakla adeknggen arar dogowak o;
Nenaluk ir inebe Ar Allah akburi arar etarugun o!
11 #
1Ptr. 4:14
Akuni An nake paga, akuni nen inane maduk yokiragwi, ndugi kinakwi, yiduk maduk ekinakwi mendek, kinakla adeknggen dogoni o. 12#2Taw. 36:16; Kis. 7:52Kir auwan kinagik, pagane ir ap nabi-nabi etegerogon ar, yiduk maduk erinaku lagugwa ar o. Etegerogon ekinakwi dagik, kir kinakla adeknggen ar dogoni o, nenaluk Ar Tuhan nen ye mendek nde mendek kinake kuwak erogo bege mendek wokiragin o.”
Mayu o nen o akbinak imbirak oba lirogo yirige wene
(Mrk. 9:50; Luk. 14:34-35)
13 #
Mrk. 9:50; Luk. 14:34-35 “Kir kinebe agar paga yoma mayu ndak-ndak o. Mayu aik dek agatek kalok, aik werek eru ndak a? Aik werek eru ndak dek kalok mbo lakbugwi nen iniyok paga mburalogo bugwi erir taga mende o.
14 #
Yoh. 8:12, 9:5 Kir kinebe o akbinak ndak-ndak o. O ado paga palek eti, kiragago bu ndak dek o. 15#Mrk. 4:21; Luk. 8:16, 11:33Akuni indu akda kalok, walu abura tebelogo bi tagodek o. Ar indu ebe waganogo akdikmu lektogo yibadogo bugwi, nen ir uma welagwi mendek indu akbinak paga welagwi o. 16Kir akuni inilka paga kinakbinak eti yibadek dogorak o, kir kinobabur pano ekwi mendek, ir inil kugun paga, Kinombae mbogor paga mendek, endaga pogorarugun o.”
Wene edo agama Yahudi paga emedek wene
17“An nen Musa wene mbalek inom, nabi-nabi wene mbalek inom, dek erogo bik nen yiluk wagagi kinakla andagup o. An nen wene mbalek ebe korogo dek erik yiluk wagagi dek ogwe, wene enggen ebebar mendek kwak telekma togo bik nen yigiluk wagagi o. 18#Luk. 16:17Wene yi kir kinakla eberek mondok dogono o! Mbogor o agar o werek kigik ya paga, hukum eti akla diru mbalek wene ambi ar inom, titik erek ambi ar inom, wene yirugwa etoma mende, ambi auwan etari wagikdek kigik, korigin mondok dek o! #5:18: Obogar ertagikdek kalok: Arte wene hukum mbalek etoma ertagikdek kigik. 19Wene mbalek ambi bugudak kigik ar, ta nen tebelka dogolir, akuni ambetak eti ndak-ndak ar emeriragin kalok, akuni eti Ar Allah akburi inanggedokla, ar ebe bugudagar etarigin o. Etegerogon ar, ta nen wene mbalek eti ndak-ndak wokbiluk eka dogolir, akuni ambetak etegerogon ar eruwak nen yiluk emeriraga kalok, akuni eti Ar Allah akburi inanggedokla, ar ebe nggok ar etarigin o. 20Etegerogon ma, kir ap guru-guru agama inom, ir Farisi mendek inom, Ar Allah akla anda taga ndak-ndak eritagwi enogo ir ekwi kwak dagik, kir nen ekbiluk ogona paga yadek togo pano mondok erugun kalok perak, Allah akburi arugun ma, kinakla eberek togon dogoni o!”
Wenemuk yugwi ake inaruk wakige wene
(Luk. 12:57-59)
21 #
Kel. 20:13; Ul. 5:17 “Ninumbui nen eku dogolir, yugu lagugwa yegerogo: Ap warugup; ta nen ap waka kalok, wene uwak dolir tagama dolinaburak yiluk yugu lagugwa. 22Yogondak An ambi yokirak o, ta nen wenemuk yega#5:22: Ta nen wenemuk yega kalok: Wene pagane mendek diru mbalek paga: wenemuk edo dek kigik yugwi eti ake nen. akuni puduk padak erinaka, eka kalok, ap Mahkamah Agama wene uwak dolir tagama etoma, uwak dolurak o. Ap ta nen wene agama wene onggokdek mende yiluk akuni yoraga kalok, ar ebe indu kunikmu etoma mbo onggol durak mende arar o. 23Eti kalok, kir kinogar ambi kinom werek mendek nen, Ar Allah ake bik o, yiluk bigin ogwe, akuni ambi an noba iliti wata taga yiluk, akla ebe biluk kalok, 24Ar Allah ake bu yiluk wolok waga enogo, Ar Allah ake birtagama ika paga dambe kalok, ogarak eti ndak imbirak dambulik laurak o. Imbirak dambul diluk kalok, Ar Allah ake enogo iyok paga yabongga bi laurak o. 25Akuni ambi nen, ap mahkamah inoba aredo waru kinayonggo bega kalok, auwan wene mbali lagikdek kigik, o telek ambi werek kalok, ibar-ibar kimbirak kinane pak-pak yurak o. Yugun dek kalok, ap eti nen kir arar wokinarek wene mbali tagama, hakim inoba binagi lalok, nen kir polisi ininggimo binagagun o. Nen ir polisi nen wokinarek, kede warek batagama onggol binagagun o. 26Kir kede warek batagama etoma nen, kir onggo burak kudi wakeragun enogo, onggo bigikdek kigik, wundi lani o, yiluk yokiragun mondok dek o,” yiluk yorarige.
Kwe ap inilmodo maduk erurak maga yirige wene
27 #
Kel. 20:14; Ul. 5:18 “Kwe ap maduk erurak mondok maga yirige. Wene yi emeku lagugwa kir kinilu etnogore. 28Ogwe yogondak, An wene yi yokerak o: kwe ap pano kalok, kakla paga nen owadok kegen kalok, eti ebe obok kilmodo maduk eken arar o. 29#Mat. 18:9; Mrk. 9:47Kar kil ebemangge nen maduk ekaka kalok, kil ebe ma nggwe eti kidilogo mbo lak burak o! Pano kwak eti koba kunik mende mbalogo mbo lakbumo nen mbogor taga unggurak kwak pano o, ogwe nenaluk koba mende kunik obogar kigik ar ogwe inom pudugu indumo lakbagu kwak eti ar maduk o. 30#Mat. 18:8; Mrk. 9:43Kar kinggi ebema nggwe nen maduk ekaka kalok, kinggi eti mbalogo mbo lakbino o! Kebe apirar wokarek indumo unggu nogo, yiluk ake nen, kinggi penak etoma dek erogo bu eti pano ar o.”
Kwe ap dambe dau maga yirige wene
(Mat. 19:9; Mrk. 10:11-12; Luk. 16:18)
31 #
Ul. 24:1-4; Mat. 19:7; Mrk. 10:4 “Wene mbalek ambi yegerogon werek: Ap nen kwe togokdega kalok, an kwe yi togo digi o, yiluk kumi damber baktaga mendek diru mbalogo, kwe eti wogorurak o. 32#Mat. 19:9; Mrk. 10:11-12; Luk. 16:18; 1Kor. 7:10-11Ogwe An wene ambi yokirak o: ar kwe eti ap ambi inom maduk ekidek kigik, monogo dambe kega kalok, kwe eti ap ambi adik mendek waganigin kalok, ap eti oba maduk erogo bigin o. Ta nen, kwe monek dambe kege mendek eti waganigin kalok, ir eti maduk ar inimudu waganek dogogun o,” yiluk yorarige.
Inane amburu wedek ar yurak maga yirige wene
33 #
Im. 19:12; Bil. 30:2; Ul. 23:21 “Nir ninumbui wene yegerogon emeku lagugwa kinilu o, kinane amburu yugun mendek tagalogo bugup o. Kar nen kane amburu Allah ilka paga yegen mendek kalok, mondok erurak o. 34#Yak. 5:12; Yes. 66:1; Mat. 23:22Ogwe, yogondak an wene ambi yokirak o: kinane ugunar mbogor endaga mbalogo kumbuk mbalugup o, nenaluk mbogor eti Ar Allah mende takhta, 35#Yes. 66:1; Mzm. 48:3nen agar endaga mbalogo yurak dek ar o, nenaluk, agar paga eti, Ar Allah iyok yago dogir taga mendek. Nen o Yerusalem endaga paga yurak maga ar o, nenaluk kota etoma Raja endaga nggok werekma. 36Nen ambi kinalep endaga mbalogo yugup ar o, nenaluk kar kiri ambi mudi wunduwak, nen ambi moda wunduwak yiluk kar nen erurak ndak dek eti paga nen o. 37Iblis nen wene maduk mendek pakalok inakla nggagali taga mendek ma, kir nen kinane amburu yuwok nen yiluk kalok ‘Ebebar o, dek o,’ yiluk eta imbirak ar yugu dogorak o.”
Onggo-onggo eku dogorak maga yirige wene
(Luk. 6:29-30)
38 #
Kel. 21:24; Im. 24:20; Ul. 19:21 “Wene mbalek edo ambi, Kir kinil ndagalkwi kalok, onggo ar il ar ndagalurak o, nen kir kinaik danggulkwi kalok, onggo ir inaik ar danggulurak o, yiluk kir kinilu welagop o. 39Ogwe yogondak An wene edo ambi kir yokirak taga o: Akuni nen kar maduk ekakwi kalok, konggo kodagup o. Ebe kwak kar nen erurak eti, kendowak ebemangge etoma kaka kalok, kar kendowak penaknggwe etoma inom ar narin o, yiluk yorurak o. 40Nen ir akuni ambetak nen, ap Hakim wene mbali tagama yemenogo inoba wokinarek lalok, kar kiyom baju yugu mendek yi wornirin yega kalok, kiyom jas inom ar wogorno. 41Ar ap nggok ambi nen, kir an niyom yagadek yi wolok lok ar satu kilo meter ndak-ndak lani o, yiluk ane obarne togon ar yega kalok, kir nen dua kilo meter ndak-ndak wolok lano o. 42Ir akuni kinoba ngginongge watuk yokiragwi kalok, wogorano o. Akuni ambi nen, kar kamende an yabongga akdikmo bik nen, ya paga wornirin yiluk yega kalok, kina'ir andau maga, wogorano ar o.”
Kinom agorek mendek inakba daurak wene
(Luk. 6:27-28,32-36)
43 #
Im. 19:18
“Wene emekira tagwi yi, kir kinilu o, kinogari kinom kiniliti mende eti kinom kunik mondok ar dogolir, nen kir kinogari kinom agorek mendek kalok, agorek ar dogoni o. 44Ogwe, An wene ambi yogondak kir yokirak o: kinogari kinom agorek welagwi mendek kiniliti kunik eginaku dogoni o, nen akuni kir anggin panggin ekinakwi mendek inake, tamban ekudogoni o, 45eti ekwi paga, kir kinombae mbogor paga mendek akburi arar etarugun o. Nenaluk, Ar Allah nen, mo il eti, akuni pano ekwi mendek inom, maduk ekwi mendek inom, obogar inake walkarige o. Etegerogon ar o, Ar nen miyo wurabi wari taga ernogo, akuni pano ekwi inom, maduk ekwi inom, inake wurabi wari taga o. 46Nenaluk, Akuni kir kinom kunik welagwi mendek ar, kir kiniliti kunik erinakwi kalok, Ar Allah nen kir ekwi eti onggo nenaluk wokiraurak? Ir akuni penagih pajak nen, ir ekwi mendek etegerogon ar enogore? 47Kir kinogari kinom kunik welagwi mendek mban, kinane paginakwi kalok, kir kwak nenggedek ma? Nenaluk ir akuni Allah inom kunik dek mendek, ir ogwe, etegerogon ar ekwi nogo re! 48#Im. 19:2; Ul. 18:13Kinombae mbogor paga mendek nen, kir obok ndak-ndak kinakba kertaga mendekma, kir etegerogon ar eku dogoni o.”
Actualmente seleccionado:
MATIUS 5: WLW
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión