मत्ति 18
18
स्वरग राज्यतिगा हजोर बोर मन्तोर?
(मर ९:३३-३७; लूका ९:४६-४८)
1ओदे बेरा चेलालोर येसुना हेरे वास, “स्वरग राज्यतिगा हजोर बोर मन्तोर?” इन्जोर पुच्चेमायिला लागतुरक#लूका २२:२४। 2असके ओर वरोर नोनान हेरे केयस ओरा नडुम निपिहतुर, 3“निमाट बदले मास बालक लेहका आयवि आयकिट ते निमाट स्वरग राज्यतिगा बसकेय हन्दिला परवि आयकिट इन्जोर नना मिकुन खरोय इन्तोना#मर १०:१५; लूका १८:१७। 4इन्जोर बोरायि आपुनतुन येर बालकिन लेहका हुडलोर कियानुर ओर स्वरग राज्यतिगा सबोयताल हजोर आयनुर। 5अनि इदाम वरोर बालकिन बोरायि नावा पोरोयते स्विकार किन्तोर ओर नाकुन स्विकार किन्तोर।”
पाप कियानाता परिक्षा
(मर ९:४२-४८; लूका १७:१-२)
6अनि येसु असा इतुर, “नावागा विस्वास किन्तोर येर हुडलोरकनिगाडाल बोरे वरोन पाप किहान साटि बोरे कारण आयनुर ते ओना गुळंगातिगा जतातुन दोहचुन ओन समुद्रतिगा दुरसानाताल पकाय हजोर दन्ड ओन पुटार। 7लोकुरक नावा विस्वास तासिलाय कारण मन्ता सन्सारता ओद पोल्लोनुंग हाय! कोदोर लागाना जरुरि मन्ता मति कोदोर लागान्ता ओर मानेयतुन हाय। 8निया कय या निया काल निकुन पाप कियाना कारण आयार ते अदेन कदियस हरचिम; रन्ड कयक अनि रन्ड काल्क मन्ज वने अनन्त काळता किसतिगा वाटिर इदेनताल ठुटवाल या लंगळाल आस अनन्त काळता जिवनतिगा हन्दाना निया साटि भलायिता मन्ता#मत्ति ५:३० । 9निया कोन्डा निया पाप कियाना कारण आयार ते अदेन टन्डस हरचिम, रन्ड कोन्डांग मन्ज वने निकुन नरकता किसतिगा वाटिर इदेनताल आन्दराल आस जिवनतिगा हन्दाना निया साटि सोबायि मन्ता#मत्ति ५:२९।”
मायताह बेळांगना पिटो
(लूका १५:३-७)
10येसु असा ओरकुन इतुर, “निमाट येर हुडलोरनिगाडाल बोने तुच्च समजेमायमाट इन्जोर सावदान मन्ट, बाक्याकि स्वरगतिगा ओरा दूतक नावोर स्वरगतोर बाबोना चेहरा दरोज हुळान्तोर इन्जोर नना मिकुन इन्तोना#लूका १९:१०। 11(बाक्याकि मानेयतोर मरि लेस्तोरकुन पिसहान साटि वातोर।)”
12येसु असा इतुर, “नना मिकुन उन्दि प्रश्न पुच्चेमान्तोना! वरोर मानेयना उन्दिनुर बेळांग मन्तांग इदाम विचार किम्ट, अनि अगडाल उन्दि मायितु ते ओर निन्यानव बेळाहकुन हरचिस बाताल मायता बेळातुन मटा पोरो हन्जुन पळकोर आयनुर? निमाट बाताल विचार किन्तोरिट? 13अनि ओर अदेन पुटहानुर ते ओर अव मायो आस मतांग निन्यानव बेळांगताल जास्ति गिरदा ओद मायसुन असा पुटता ओद बेळाता बारेते गिरदा कियानुर इन्जोर नना मिकुन खरोय इन्तोना। 14इदामे इव हुडलाताल हुडला वरोर वने नाश आयाना मिवोर स्वरगतोर बाबोना इच्चा हिले।”
गुन्हेगार लोकुरासंग बदाम व्यवहार कियाला पहाजे
15येसु असा ओरकुन इतुर, “नियोर तमो निया विरुद गुन्हा केविर ते हन अनि ओर वरोरे मन्दानपा ओनासंग वळकस ओन समजेहकिम; ओर निया केन्जानुर ते निमा असा ओन आपुनोर तमोन मलस ततोन#लूका १७:३। 16मति ओर निया केन्जोर आयनुर ते रन्ड मून्ड लोकुरा गवाहिते सबोय पोल्लोंग पका आयपरान्ता इन्जोर असा इवुरजन नियासंग ओम#व्यव १९:१५। 17ओर ओरा वने केन्जोर आयनुर ते मसि विस्वासि लोकुरा दलतुन वेहा, मति ओर मसि विस्वासि लोकुरा सभातुन वने मानेमायोर आयनुर ते निमा ओन यहुदि आयोर लोकुरक अनि टाक्स येतवाल लेहका व्यवहार किम।”
18येसु असा इतुर, “निमाट दरतितिगा बाताले दोहकिट ओद स्वरगतिगा दोहका, अनि निमाट बाताले दरतितिगा तरियकिट ओद स्वरगतिगा तरियका” इन्जोर नना मिकुन खरोय इन्तोना#मत्ति १६:१९; युह २०:२३ । 19असा नना इन्तोना “दरतितिगा बोदायि पोल्लोसाटि मियागडाल इवुरजन उन्दि मन आस अदेन तलकिर ते ओद नावोर स्वरगतोर बाबोनिकेडाल ओरा साटि आयार। 20इवुर या मुवुरजन बगा नावा पोरोयते जमा आन्तोर ओद सबोय जागातिगा नना ओरा नडुम मन्तोना इन्जोर नना मिकुन इन्तोना।”
मापि केवोर ओर दासना पिटो
21असके पतरस येसुना हेरे वास, “हे प्रबु, नावोर तमो गुन्हा किन्तोर ते नना ओन बचोक बेरा मापि कियाका? बाताल सातबेरा वनाह?” इन्जोर पुच्चेमातुर#लूका १७:३-४। 22येसु ओन इतुर, “सातबेरा वनाह आयो सातबेराता सतरपट वनाह इन्जोर नना निकुन इदाम इनोन#उत्प ४:२४।”
23स्वरग राज्यता बारेते करिहलाय येसु इदाम उन्दि पिटो असा वेहतुर, “स्वरग राज्य आपुनोर दासनिकेडाल हिसाब येताना इच्चा कितुर वरोर राजाल लेहका मन्ता। 24ओर हिसाब येतिला लागतुर असके वरोर मानेयतुन ओना मुने ततुर ओर दहा करोळ रुपियाता करजदार मतोर। 25करजा हियान साटि ओना हेरे बाराय हिले आसि इन्जोर ‘येन अनि येना मुत्ते अनि येनोर बालक अनि ओना सबोय चिज मोमस करजा हियाला पहाजे’ इन्जोर ओनोर मालकाल आग्या हितुर। 26असके ओर दास मालकाना काल्कनिगा अरस विनन्ति किस, ‘हे स्वामि दया किम, नना निया सबोय करजा हियाका’ इन्जोर इतुर। 27असके ओर दासनोर मालकान ओना दया वातु, ओन तासितुर अनि ओना करजा वने मापि कितुर।”
28“मति ओर दास बाहरो पसियतुर असके हजारता जास्ति करजा येनिगा हियाना मता ओनोर संगवारि दास येन मिलेमातुर; ‘बचोन करजा नियागा मन्ता ओद हिम’ इदाम इन्जुन येर ओना गुळंगातुन पयतुर। 29असके ओनोर संगवारि दास ओनांग काल्कनिगा अरसुन ‘नाकुन मापि किम नना निया सबोय करजा हियाका’ इन्जोर विनन्ति किया लागतुर। 30येर ओर दासता पोल्लो मानेमायोर आस सान्डे हन्जुन करजा हेवोर अचोनवनाह ओन जेहलदिगा वाटसितुर। 31इद घटनातुन हुळसुन ओनोर दुसरो संगवारि दास पकाय दुःखि आतुर अनि हन्जुन आपुनोर मालकान सबोय वेहतुर। 32असके ओनोर मालकाल ओन केयस ‘हे दुष्ट दास, निमा नाकुन विनन्ति किति असके नना निया ओद पुरा करजा माप कितान बहे। 33इन्जोर नना निकुन दया कितान अदामे निमा वने आपुनोर संगवाले दासतुन दया बाक्या केवि आति?’ 34अदाम ओनोर मालकान होंगवास ओर सबोय करजा निहोर अचोनवनाह ओरा कयदे मनिर इन्जोर ओन दन्ड हेवालोरा कयदे सोपे कितुर। 35इदाम लेहका मियागडाल वरोर वरोर मानेय आपुनोर तमोन मन्दे खरोय मापि केवोर आयनुर ते स्वरगतिगा मन्तोर नावोर बाबो अदामे मिकुन वने मापि केवोर आयनुर।”
Actualmente seleccionado:
मत्ति 18: fmu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active) Wycliffe Bible Translators, Inc. All rights reserved.