Jẹnẹsisi 1
1
Isi Nke Ohu
Kẹ Chuku Dọn Ke Elu-igwere Lẹ Ụwa
1Isi mbidọn, kẹ Chuku ke elu-igwere lẹ elu-ụwa, 2ụwa enwọnni k'ọ nọ; ụwa gbachanrịn okpokoro; elu-ụwa ile gba ishi kitikpọ. Mmọn Chuku hụ a ghahunmẹ elu mirin hụn jun ụzọ ile.
Ụhụọhịn Ibuzọ
Ukpẹ
3Ya kẹ Chuku nọ sị, “Ukpẹ ya rị.” Ukpẹ nọ rị. 4Chuku e lee ukpẹ ahụn, ọ hụn a nị ukpẹ ahụn hụ mma. Chuku nọ kebepụ ukpẹ ahụn lẹ ishi. 5Chuku nọ kpọ ukpẹ ahụn “efinaị”, kpọ ishi ahụn “uhinhin”.
Uhinhin a gharị, efinaị a gharị: ọhụn wụ ụhụọhịn ibuzọ.
Nke Akpọhịn Ẹbụọ
Igwere
6Chuku nọzị sị, “Oghe ya rị mirinni n'ọ hụn ụzọ kebe ẹ ẹbụọ”. 7Chuku e mẹmẹ oghe hụ, gi ẹ kebe mirin ahụn ụzọ ẹbụọ: hụn rị okpuru oghe lẹ hụn rị elu oghe. Ọ nọ rị ẹrịra. 8Ya Chuku nọ kpọ oghe ahụn “elu-igwere”.
Uhinhin a gharị, efinaị a gharị: ọhụn mẹ ẹ akpọhịn ẹbụọ.
Nke Akpọhịn Ẹtọ
Ohimin Lẹ Akpakalị
9Chuku nọzị sị, “Mirin ile rị okpuru ogheni ya kụrụ ụzọ ohu; akpakalị ya pụha.” Ọ nọ rị ẹrịra. 10Chuku nọ kpọ alị kọrọnị “akpakalị”, kpọ mirin ahụn ile kụrụnị, “ohimin”. Chuku e lee wẹ, ọ nọ hụn a nị ọ hụ mma.
Ihiẹn E Pu Alị
11Chuku nọzị sị, “Akpakalị ya pu ihiẹn: kẹ ndị a mị mkpụrụ kẹ osisi ndị a mị ogbe nwọn mkpụrụ, onyẹ lẹ ụdị a onyẹ lẹ ụdị a; ya pu ẹrịra akpakalị ile.” Ọ nọ rị ẹrịra: 12akpakalị nọ pupụha ihiẹn ile rị ichẹn-ichẹn, kẹ ndị a mị mkpụrụ kẹ osisi ndị a mị ogbe nwọn mkpụrụ, onyẹ-lẹ-ụdị-a, onyẹ-lẹ-ụdị-a. Osolobuẹ e lee ẹ, ọ nọ hụn a n'ọ hụ mma.
13Uhinhin a gharị, efinaị a gharị: ọhụn mẹ ẹ akpọhịn ẹtọ.
Nke Akpọhịn Ẹnọ
Ẹnyanwụn Lẹ Ifọn Lẹ Kokisẹ
14Chuku nịzị sị, “Ukpẹ ya rị oghe ahụn wụ igwere kẹni wẹ hụn ụzọ a kebe efinnaị lẹ uhinhin, lẹzi ni wẹ e gi wẹ a gụn ogẹn lẹ ụhụọhịn lẹ ahụa; 15ukpẹ ndịnị wẹ nọdịsọnmẹ oghe ahụn wụ igwere, e nwunye imẹ ụwa.” Ọ nọ mẹ — 16Chuku e mẹmẹ ukpẹ ẹbụọ hi ogbe: ukpẹ hụn kanị hụn k'a rị e nwun efinnaị lẹ ukpẹ hụn nta hụn k'a rị e nwun imẹ uhinhin lẹzi kokisẹ. 17Chuku bu ukpẹ ndịnị che imẹ oghe ahụn wụ igwere kẹni wẹ gha ebẹhụ e nwunye elu ụwa, 18e nwun efinaị lẹ uhinhin, e kebe ukpẹ lẹ ishi. Chuku e lee wẹ, ọ nọ hụn a nị wẹ hụ mma.
19Uhinhin a gharị, efinaị a gharị: ọhụn mẹ ẹ akpọhịn ẹnọ.
Nke Akpọhịn Isẹn
Azụn Lẹ Anụ Rị Imẹ Mirin
20Chuku nọzị sị, “Ihiẹn rị ichẹn-ichẹn rị ndụn ya jun imẹ mirin; nnụnụ ya junzikwọ elu, e fehunmẹ.” 21Chuku nọ ke anụ ndị higbu enwẹn ẹ ogbe rị imẹ ohimin lẹ ihiẹn ile rị ndụn jun imẹ mirin, onyẹ-lẹ-ụdị-a, onyẹ-lẹ-ụdị-a; o kezikwọ ụdị nnụnụ ile rị ichẹn-ichẹn. Chuku e lee wẹ, ọ nọ hụn nị wẹ hụ mma. 22Chuku nị gọzi wẹ, sị wẹ, “Mụ nị ụmụ; mụba nị; jun ni ohimin ile. Nnụnụ ya junzikwọ imẹ ụwa ile.” 23Uhinhin a gharị, efinaị a gharị: ọhụn mẹ ẹ akpọhịn isẹn.
Nke Akpọhịn Isin
Anụ A Kpa Alị
24Chuku nọzị sị, “Akpakalị ya mụpụha ụdị anụmanụ rị ichẹn-ichẹn — kẹ anụ-ụlọ#1.24 Ihiẹn-uriri. kẹ ihiẹn ndị hụn a rịhumẹni kẹ ụdị anụ-ọfịa rịsọnmẹ ichẹn-ichẹn.” Ọ nọ rị ẹrịra — 25Chuku nọ ke ụdị anụ-ọfịa ile a kpa alị lẹ ụdị anụ-ụlọ ile kezikwọ ụdị ihiẹn ile a rịhunmẹ alị. Chuku e lee wẹ, ọ nọ hụn a n'ọ hụ mma.
Ịhịan
26Ya kẹ Chuku nọ sị, “Nị ẹnyi mẹmẹ ịhịan, mẹmẹ ẹ n'ọ rị kẹ ẹnyi, n'o yi ẹnyi. Okpuru ẹ kẹ azụn rị imẹ mirin lẹ nnụnụ ile rị elu lẹ anụ-ụlọ ile lẹ anụ-ọfịa ile lẹ elu-ụwa ile lẹ anụ ile a rịhunmẹni jẹnkọ d'a rị.” 27Chuku nọ nwan ke ịhịan, o yi ẹ; Chuku leri enwẹn ẹ ke ẹ — okẹn lẹ onyẹnnyẹ k'o ke wẹ.
28Chuku nọ gọzi wẹ: ọ sị wẹ, “Mụ nị ụmụ; mụba nị; jun ni elu-ụwa, ụnụ e bu elu-ụwa che okpuru ụnụ. We ni azụn rị imẹ mirin lẹ nnụnụ rị elu lẹ ihiẹn ile rị ndụn a kpa elu-ụwa che okpuru ụnụ.” 29Chuku nọzị sị, “Lee ẹ, e yegụọ m ụnụ ihiẹn ile rị elu-ụwa hụn e pu alị a mị mkpụrụ, ya lẹ osisi ndị a mị ogbe nwọn mkpụrụ: e ri ni wẹ. 30Nke anụmanụ ile rị ọfịa lẹ nnụnụ ile lẹ ihiẹn ile a rịhunmẹni lẹ ihiẹn ile rị ndụn, e yegụọ m wẹ ihiẹn ile e nwun ẹhụhụọ-oyiyi ẹhụhụọ-oyiyi hụn e pu alị n'ọ wụrụ ihiẹn-oriri wẹ.” Ọ nọ rị ẹrịra.
31Chuku e lee ihiẹn ile o ke, ọ nọ hụn a nị wẹ ile a rịka mma.
Uhinhin a gharị, efinaị a gharị: ọhụn mẹ ẹ akpọhịn isin.
Actualmente seleccionado:
Jẹnẹsisi 1: ikkBI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.