Ruuka 18
18
Ëkërëngyö ikya omotono ughwa okosaasaama Waryobha
1Yëësu yaarëngëëyi abheegha abhaaye ëkërëngyö keno, ököbhöörökya igha, ni-igha bhabhenga bharasaasaama Waryobha sinsikö syonswe igho, bhatakaakwa emetwe. 2Akabharëngërya igha, “Yaare-ho umwahokania uwa ibhiina mu-mughi nyabhorebhe. Umwahokania uyö, tiyaaighweranga Waryobha hë, kora tiyaatöniibhwi na ömöntö hë. 3Mu-mughi ghuyö umwahokania yaarë, yaare-mo na umusinö ömwë. Umusinö uyö, yaatasherranga umwahokania uyö, na okomosaasaama aramötëëbhya igha, ‘Ndakosaasaama, otangʼaana ehaaki iyaane ukurwa ku umubhisa uwaane.’
4“Umwahokania uyö akaruta sinsikö sinsharu, atakwahokania ikiina kiyö. Kasi ekahika-ho enkaagha, eno umwene yaaitëghërrëëyë mo-motwe ughwaye igha, ‘Nokaanyoora igha tenkosooka Waryobha hë, kora tëntöniibhwi na ömöntö wowonswe igho hë, 5kasi tigha mmwahokani ikiina ikyaye bhuuya, okore atakaannyora.’ ”
6Ho bhoono Omonene Yëësu yaabhatëëbhëri igha, “Mwighwe kya bhono yaaghambirë umwahokania uyö ataarë uwa heene! 7Mbe, ku bhuyö momanye igha, Waryobha naraabhakorre ubhwa heene abhaahorwa abhaaye, bhano bhakomosaasaama ubhutikö na omobhasö. Taateghete okobhatöörrya hë 8Ndabhatëëbhya igha, naraangohe okobhahaana obhoheene ubhwabho! Kasi öni Omoona uwa Ömöntö hano ndikyora, ndinyoora abhantö bhakeena umukumo ko-kebhara kono?”
Amasabhi agha ukwibhaaka agha Omofarisaayo
9Yëësu akarëngya ëkërëngyö keno ko-bhantö bhano bhaimaahanga igha, m-bantö abha heene ku-Waryobha, na eno bharasera abhandë. Akabharëngërya ëkërëngyö igha, 10“Bhaare-ho abhantö bhabhërë, Omofarisaayo, na ömöghööti uwa righööti. Abhantö bhayö, bhaaghëëyë okosaasaama mo-bhogho ubhwa risengerro irya Waryobha.
11“Hano bhaahikirë, Omofarisaayo uyö, akaimerra, akasaasaama Waryobha ko-mangʼana aghaaye umwene. Akasaasaama igha, ‘Ndakukumya Waryobha, ko bhoora te-moghogho ndë kya abhantö abhandë hë. Abhantö abhandë, m-basaki, bharangʼaina, m-basooraare, kora tintuubhaini na ömöghööti uwa righööti ono aahano. 12Nkwisasa ndë ibhyakorya kabhërë ku-wiiki, nkuruusya ndë ikitweno ikya ikömi kö-bhëntö ibhyane bhyonswe igho, nkohaana.’
13“Kasi ömöghööti uwa righööti uyö, umwene akaimerra hare, kora tiyagharamera mu-ryobha hë. Kasi akabha araitematema ku-kikubha ikyaye, ku ukwörökya igha abhaabhayëëyë. Akaghamba igha, ‘Waryobha, otanyabhera öni n-wa ëbhëbhë ndë.’ ”
14Ho Yëësu yëëngëëyi-ko igha, “Ndabhatëëbhya igha, ömöghööti uwa righööti uyö, yaakyörrë ka waaye abhëëywë na Waryobha. Kasi uwöndë uyö, tiyaabhëëywë hë. Ömöntö wowonswe ono akwinënëhya, Waryobha nkumusuuhya arë. Kasi ömöntö ono akwisuuhya, Waryobha nkömönënëhya arë.”
Yëësu arangʼoora ebhengʼerre
(Mataayo 19:13-15; Maariko 10:13-16)
15Mbe, abhantö bhakareetera Yëësu ebhengʼerre, okore abhesambekere amabhoko, abhengʼoore. Hano abheegha abha Yëësu bhaarööshë amangʼana ghayö, bhakahamera abhaibhöri bhayö igha, bhatakaanyankya Yëësu. 16Kasi Yëësu akabherekera abhaana kö ökötëëbhya abheegha abhaaye igha, “Mutighe abhaana abhake bhaashenga ku-öni. Motakaabhakaanianga, ko bhoora Obhokama ubhwa Waryobha, nu-bhwa abhantö kya bhano. 17No-bhoheene nkobhatëëbhya igha, ömöntö ono atakwikërrya Öbhötöngi ubhwa Waryobha kya omoona omoke bhono akukumya, taatore okosoha mo-Bhokama ubhwa Waryobha hë.”
Ömötöngi umwamë aratuna öbhöhöruubhwa amakora ghonswe igho
(Mataayo 19:16-30; Maariko 10:17-31)
18Ömötöngi uwöndë yaabhöörri Yëësu igha, “Umwëghya uwa heene, iyakë nkaakora ndaaghere umwandö ughwa öbhöhöru ubhwa amakora ghonswe igho?”
19Yëësu akamohonshora igha, “N-kwakë okomberekera igha uwa heene? Ömöntö uwa heene taaho hë, kasi n-Waryobha umwene igho. 20Nda nomanyirë bhuuya imighiro ighya Waryobha igha, ‘Otakaabha omosooraare, otakaita ömöntö, otakaibha, otakaimererra amangʼana agha obhorongo, osooke suwëënyu na nyakuwëënyu. ’#18:20 Maaha mo-ketabho ikya Ukurishoka 20:12-16; Eheetoko iya Etoraati 5:16-20.”
21Ömötöngi uyö akamohonshora igha, “Imighiro ghiyö ghyonswe igho, nkoghesooka ndë ukurwa nkërëngë omoke.”
22Hano Yëësu yaaighuurë amangʼana ghayö, akamötëëbhya igha, “Eeho engʼana ëmwë, eno ukutunwa okore. Kaghi öghöri ëbhëntö bhyonswe igho bheno onabhyo, seehera syonswe igho seno oraanyoore-mo, utwenani abhatöbhu. Hayö ho oraabhe na emongo iyaaho mu-ryobha. Hano oraamare, uushe onsoorane.” 23Hano ömötöngi uyö yaaighuurë amangʼana ghayö, akabhaabhayera, ko bhoora m-mwamë bhököngʼu yaarë. 24Hano Yëësu yaarööshë umwamë uyö bhono yaabhaabhayëëyë, akaghamba igha, “Ne-ngʼana nköngʼu bhököngʼu, ko-bhaamë okosoha mo-Bhokama ubhwa Waryobha. 25Ne-ngʼana ëntöbhu, engamia okoheta mu-ribhanga irya insindani, okokera umwamë okosoha mo-Bhokama ubhwa Waryobha!”
26Hano abheegha bhaaighuurë amangʼana ghayö, bhakamöbhöörya igha, “Bhoono nyoore amangʼana ni-igho gharë, nawë araatore ökötööribhwa?”
27Yëësu akabhahonshora igha, “Amangʼana ghano abhantö bhatakotora okokora, Waryobha nkoghatora arë.”
28Ho Peetero yaatëëbhëri Yëësu igha, “Maaha mbe bhëëtö, tutighirë ëbhëntö ibhyëtö bhyonswe igho, tokosooraini.”
29Yëësu akabhahonshora igha, “No-bhoheene nkobhatëëbhya igha, abhantö bhonswe igho bhano bhaatigha imighi ighyabho, handë bhakaabho, bhamura abhaabho, handë abhaibhöri abhaabho, kora na abhaana abhaabho ko okoghera iya Obhokama ubhwa Waryobha, 30mbaraanyoore ëbhëntö ibhyaru, okokera bheera bhaatigha, bhakëërëngë ko-kebhara kono. Ghwiki mbarinyoora öbhöhöru ubhwa amakora ghonswe igho ko-kebhara kiyö kiriisha.”
Yëësu arashumaashera urwa katatö engʼana iya ukukwa na ukuryoka ukwaye
(Mataayo 20:17-19; Maariko 10:32-34)
31Yëësu akaghegha abheegha abhaaye ikömi na abhabhërë, bhakaiyahora mbareka. Akabhatëëbhya igha, “Mwighwe mbe, nkutiira törë ukughya Yërusarëëmu. Na Yërusarëëmu hayö, ho gharaahekerane amangʼana aghaane ghonswe igho agha öni Omoona uwa Ömöntö, ghano abharööti bhaandeka. 32Nendaahirwe ko-Bhakyaro, bhanshabhure, bhantoke na ukuntwera amate. 33Mbaraanteme na imishariti kora bhanyite. Kasi urusikö urwa katatö, nindiryoka.”
34Abheegha abha Yëësu, tebhaamanyërrëëyi ensonga iya amangʼana ghayö Yëësu yaabhatëëbhëri hë, ko bhoora n-kibhisirë kyaarë ko-obho. Tebhaamanyirë keno Yëësu yaashumaasheranga hë.
Yëësu arahwënia umuhukuru
(Mataayo 20:29-34; Maariko 10:46-52)
35Yëësu akahika haangʼë na umughi ughwa Yërikö. Akanyoora-ho umuhukuru ömwë, aikaayë mbareka iya enshera arasabherra. 36Hano umuhukuru uyö yaaighuurë rikomo irya abhantö reraheta hayö, akabhöörya igha, “N-kë kërëngë iyö?”
37Bhakamohonshora igha, “Yëësu uwa Nazarëëti we akoheta.”
38Umuhukuru uyö akakonga bhököngʼu igha, “Yëësu, umwebhorwa Daudi,#18:38 Umwebhorwa Daudi. Bhamöbhërëkëëyë igho ko bhoora nu-uwa eka iya Daudi yaarë, na bhaaitengʼeranga igha we Mesiya ono araabhahwëni amarööyë aghaabho. Maaha mo-faharaasa. otanyabhera.” 39Abhantö bhano bhaarenga bhatangatirë, bhakamohoronyokera, okore akire. Kasi umwene akabherekera bhököngʼu igha, “Umwebhorwa Daudi, otanyabhera.”
40Yëësu akemerra, akaraghërrya igha, “Momondeetere hano.” Hano umuhukuru yaahikirë haangʼë, Yëësu akamöbhöörya igha, 41“N-kë ukutuna nkokorre?”
Akamohonshora igha, “Omonene, ndasabha igha, mmaahe.”
42Yëësu akamötëëbhya igha, “Nikërëëyi igha omaahe. Keno këghërrë uhwënirë, nu-mukumo ughwaho.” 43Umuhukuru akamaaha ko-nkaagha iyöiyö. Akasoorana Yëësu na eno aratöönia Waryobha. Abhantö bhonswe igho hano bhaarööshë ghayö, bhonswe bhakakumya Waryobha.
Actualmente seleccionado:
Ruuka 18: ssc
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2021, Wycliffe Bible Translators, Inc. All rights reserved.