Yohana 3
3
Yëësu arashumaasha na Nikodeemo
1Yaarenga-ho omotangati ömwë uwa Abhayahudi, uwa mu-rikomo irya Abhafarisaayo, ono yaabherekerwanga igha, Nikodeemo. 2Nikodeemo uyö, akaghya ku-Yëësu ubhutikö, akamötëëbhya igha, “Raabhi, ntomanyirë igha uwe nu-mwëghya ono watomwa na Waryobha, ko bhoora taaho ömöntö ono akotora okokora ebhemanyërryö ibhya amakono bheno okokora, hano oraanyoore Waryobha atarëngë hamwë nawe.” 3Yëësu akamohonshora igha, “No-bhoheene nkökötëëbhya, taaho ömöntö ono akotora okosoha mo-Bhokama ubhwa Waryobha#3:3a Mo-Bhokama ubhwa Waryobha. Okobha mo-Bhokama ubhwa Waryobha, nu-kwighwera omokama ono yaahorwa, na igha, obhe mo-bhokama ubhwaye, Omonene uwëëtö Yëësu Kiristo, na okokora kya bhono akutuna, okore akotonge, obhe ömöntö uwaaye. hano ataibhööywë urwa kabhërë.”#3:3b Maaha mo-ketabho ikya Yohana 1:13. 4Nikodeemo akabhöörya Yëësu igha, “Iyakë ömöntö areebhorwe urwa kabhërë na eno mbe yaghota? Ömöntö natora ukukyora mo-nda iya nyakuwaabho, okore eebhorwe urwa kabhërë?” 5Yëësu akamohonshora igha, “No-bhoheene nkökötëëbhya igha, taaho ömöntö ono akotora okosoha mo-Bhokama ubhwa Waryobha, hano ataibhööywë okohetera ko-manshë, na okohetera Umwika Ömöhörëëru. 6Ömöntö nkwebhorwa arë na abhaibhöri abhaaye kinyamöbhërë, kasi ömöntö nkokorwa arë bhohya na Umwika uwa Waryobha. 7Otakaaroghoora ko bhono nkötëëbhëri igha, ‘Ni-igha mwebhorwe urwa kabhërë.’ 8Hano rikama ryaherra rebhata eno rikutuna, ömöntö nkuriighwa arë, kasi takomanya eno rikurwera, na eno rikughya hë. Ni-ighoigho ekobha kö-möntö ono aibhööywë na Umwika uwa Waryobha.” 9Nikodeemo akabhöörya Yëësu igha, “Iyakë ömöntö areebhorwe na Umwika uwa Waryobha?” 10Yëësu akamohonshora igha, “Uwe nu-mwëghya uwa Abhaisiraëri örë, ono ösöökirwë bhököngʼu, n-kwakë otamanyirë amangʼana ghano? 11No-bhoheene nkökötëëbhya igha, bhëëtö nkoghamba törë ghano tomanyirë, ghwiki nkwimererra törë ghano törööshë. Kasi bhëënyu timukukumya ubhwimërërri ubhwëtö hë. 12Mbe, ko bhono motakukumya amangʼana agha ko-kebhara kono ghano mbatëëbhëri, bhoono iyakë moraaghere mukumi hano ndaabhatëëbhi amangʼana agha mu-ryobha? 13Taaho ömöntö wowonswe igho ono yaahika mu-ryobha. Kasi öni Omoona uwa Ömöntö mmu-ryobha naarwera.
14“Mosa yaahanëkirë ritöndö irya inshoka iya ishabha kö-mötë kighörö, ku-riköngö haara.#3:14 Maaha mo-ketabho ikya Okobhara 21:8-9. Mbe, ni-ighoigho na öni Omoona uwa Ömöntö ni-igha nhanekwe kighörö, 15okore kera ömöntö ono akunkumya abhe na öbhöhöru ubhwa amakora ghonswe igho.”
16Waryobha yaahanshirë bhököngʼu abhantö bhonswe igho abha ko-kebhara kono. Righonshe riyö, ndyo ryaaghërrë akatoma Omoona uwaaye umumwëmwë, aashe ko-kebhara kono, okore ömöntö wowonswe igho ono akumukumya atakaasira, kasi abhe na öbhöhöru ubhwa amakora ghonswe igho. 17Waryobha tiyatömirë Omoona uwaaye ko-kebhara kono, okore abhotorre abhantö ikiina, kasi yaamötömirë, okore atööri abhantö okohetera ku-uyö. 18Ku bhuyö ömöntö ono araakumi Omoona uwa Waryobha, Waryobha tamobhotorre ikiina hë. Kasi ömöntö ono ataakumi, uyö yaamara okobhotorrwa ikiina, ko bhoora atakukumya Omoona umumwëmwë uwa Waryobha. 19Okobhotora ikiina nkörëngë igha, obhorabhu bhwaasha ko-kebhara kono,#3:19 Maaha mo-ketabho ikya Yohana 1:4-5. kasi abhantö bhakahansha ikisuntë okokera obhorabhu, ko bhoora amangʼana aghaabho m-maghogho. 20Abhantö bhonswe igho bhano bhakokora amangʼana amaghogho, nkoregha bharë obhorabhu. Tebhakutuna ukuusha ko-bhorabhu, okore amangʼana aghaabho amaghogho ghatakaamanywa. 21Kasi abhantö bhano bhakokora amangʼana agha heene, bho nkuusha bharë ko-bhorabhu, okore amangʼana aghaabho agha heene, ghamanyekane harabhu igho igha, Waryobha we akobhahaana obhotoro ubhwa okoghakora.
Yohana Omobhatiisya araghamba amangʼana agha Yëësu
22Mbe, hano ghayö ghaahööyë, Yëësu akabha arainaaranaara mo-mokowa ughwa Yudea hamwë na abheegha abhaaye. Akaikara nabho iyö, ku-ribhagha nyabhorebhe arabhatiisya. 23Yohana wonswe yaabhatiisiryanga abhantö ahasë hano haabherekerwanga igha Ainööni, haangʼë na ikishishi ikya Sarimu, ko bhoora amanshë m-maaru ghaare-ho. Ku bhuyö abhantö mbaashanga ku-Yohana abhabhatiisya. 24Ko-nkaagha iyö, waanyöörrë Yohana ataraatoorwa mo-kebhohe.
25Urusikö urwöndë, sekeebhoka senkaani ko abheegha abha Yohana na Umuyahudi nyabhorebhe ko amangʼana agha seteemo isya okosaabhuura. 26Ku bhuyö bhakaghya ku-Yohana, bhakamötëëbhya igha, “Raabhi, ömöntö ono yaarë na uwe humbu iya omooro ughwa Yorodani, ono waatötëëbhëri amangʼana aghaaye, nkobhatiisya arë abhantö. Abhantö bhonswe igho, bharahwera ku-uyö.” 27Yohana akabhahonshora igha, “Taaho ömöntö ono akotora ukunyoora ëkëntö kyokyonswe igho, hano atahaaywë na Waryobha. 28Bhëënyu abheene na-bhaimërërri abhaane mörë, ko ghano naaghambirë igha, ‘Öni tëndëngë Kiristo hë, kasi Waryobha yaantömirë igha, ntangatere Kiristo.’ 29Umwenga nu-uwa ömötëti. Kasi omosaani uwa ömötëti, ono akwimerra haangʼë na ömötëti, na ukwighwa bhono akoghamba, nkushomerwa arë bhököngʼu hano yaighwa engamba iya ömötëti. Ku bhuyö kono nko ukushomerwa ukwane, kono kwahekerana. 30Ni-igha Yëësu abhe na ubhwera bhököngʼu konkera, kasi öni nsuuhe.”
Amangʼana agha ono akurwa mu-ryobha
31Ono akurwa mu-ryobha naana ubhwera ku-bhyonswe igho. Kasi ono akurwa ko-kebhara, uyö n-wa ko-kebhara, kora engamba iyaaye ni-iya amangʼana agha ko-kebhara kono. Ono akurwa mu-ryobha, naana ubhwera ku-bhyonswe igho. 32Ömöntö uyö, nkwimererra arë ghano yaamaaha, na ghano yaaighwa, kasi taaho ömöntö ono akwikërrya amangʼana aghaaye ghayö. 33Ömöntö ono akwikërrya amangʼana agha Yëësu, nkwörökya arë igha, ghano Waryobha akoghamba na-agha obhoheene. 34Ko bhoora Waryobha yaamötömirë, okore aghambe amangʼana agha Waryobha. Waryobha amohaayë Umwika Ömöhörëëru ono ataana ekerengere. 35Taata Waryobha nahanshirë Omoona uwaaye, kora amohaayë ëbhëntö bhyonswe igho. 36Ömöntö ono akukumya Omoona uwa Waryobha, uyö naana öbhöhöru ubhwa amakora ghonswe igho. Kasi ono akumwanga, taana öbhöhöru ubhwa amakora ghonswe igho hë, kora okorerra ukwa Waryobha nkoraaghëndërri okobha kö-möntö uyö.
Actualmente seleccionado:
Yohana 3: ssc
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2021, Wycliffe Bible Translators, Inc. All rights reserved.