Matius 11
11
1Mangkai umparunduk sapulo dua rasulna mengkalaomi Puang Yesus ullelean tondok illalan lembangna Galilea ma'pa'tudu anna umpalanda' Kareba Kadoresan.
Pesuanna Yohanes to simantedok lako Puang Yesus
Luk. 7:18-35
2Attu iatoo illalan tarungkun Yohanes to simantedok. Sapo umpekareba duka' pengkaranganna Kristus, napolalan ussua pira-pira passikolana lao mekutana lako Puang Yesus nakua: 3“Ikomoka to nadandi Puang Allata'alla la sae, dengampika tau senga' la kiampai?”#11:3 to nadandi Puang Allata'ala la sae:Battu dikua:To dibassei bayu-bayu la ma'pasalama'.
4Natimba' Puang Yesus nakua: “Sulemokoa' ammu tulasanni Yohanes angga murangnginna, sola muitanna, 5susinna to buta mala paita, to balimbingan mala menono', to dolengan monda dolengna, to taru mala parangngi, to mate tuo sule, anna Kareba Kadoresan dipalanda' lako to mase-mase.#11:5 Yes. 35:5-6, 61:1. 6Kerongko' angganna to tae' tikanna penawanna ummitana'.”
7Le'bai passikolana Yohanes, mantula'mi Puang Yesus lako tau buda untetteran Yohanes nakua: “Aka lao mutungkaa' lako padang alla'? Laorokoka umpetua' tille napalurekke lu sau' bara? 8Akara lao mutungka lakoa'i? Laorokoka umpetua' to ma'pakean maleke? Sapo dio ia banuanna tomaraya to ma'pakean maleke. 9Dadi akara lao mutungka lakoa'? Laorokoka umpetua' nabi? Tonganna. Anna nasanga Kao kadangku tanda langnganna nabi. 10Annu Yohanesmo napatu battakadanna Puang Allata'alla nakua:
‘Indemi pesuangkue, kusuami uyyoloanangko
annu la napatokangko lalan la muola.’#11:10 Mal. 3:1.
11Kutulasangkoa' sitonganna, tae' dengan tau illalan lino la untondon Yohanes to simantedok. Sapo marru natondon to randan barinni' illalan kaparentaanna Puang Allata'alla. 12Mengkalao dio mane naparanduk Yohanes to simantedok umpalanda' Kareba Kadoresan sae lako temo, dengan liumi to kadake gau' umbali kaparentaanna Puang Allata'alla anna umpeang liu lalan Ia naola urrappai. 13Mengkalao dio sura'na Musa anna angganna nabi sae lako Yohanes untetteran asan kara-kara la dadi. 14Ianna moraikoa' la ummorean tula'ku, kupokadangkoa' kumua Yohanesmo napatu battakadanna nabi yolona kumua la sae sule Elia.#11:14 Mal. 4:5-6. 15La napatananni manappa talinga ma'rupa tau inde tula'kue.
16Akamo la kupasirapanan inde ma'rupa tau lapik temoe? La kupasirapan anak sipa'loko-lokoan lako pasa' anna ummalo'-alo' solana nakua:
17‘Kipa'tulaliangkoa' sapo mokakoa' sumayo.
Kioyongangkoa' penanian pa'barataan sapo mokakoa' umbating.’
18Annu sae Yohanes sima'puasa anna tae' siummiru' anggur, sapo nakua tau: ‘To natamai setang.’ 19Tapakala sae duka' Anak Mentolino, siummande anna ummiru' anggur, nakuaomo tau: ‘Petua'ria' to poppokan, pangngiru', solana tuang passima anna to kadake.’ Sapo moika anna susi too, kakeakasannaria Puang Allata'alla napakawanan illalan angganna pa'palakona.”
Puang Yesus ussassai pira-pira tondok
Luk. 10:13-15
20Mangkai too, naparandukmi Puang Yesus ussassai issinna tondok randan pembuda nangei umpadadi tanda memangnga-mangnga annu moka mengkatoba', nakua: 21“La sanggangkoa' to Khorazim anna kota Betsaida annu kela dadi dioi Tirus anna Sidon tanda memangnga-mangnga mangka dadi illalan alla'-alla'mua' masaemo anna mengkatoba' tau dio, lambisan ma'pakean barata annu umpenassanni gau'na. 22Dadikupokadangkoa' tema: ianna nalambi'mo allo la dingei umbisara ma'rupa tau, la maringngan ia perambinna Puang Alata'alla lako issinna kota Tirus sola Sidon anna la ikoa'. 23Anna ikoa' to dio Kapernaum, musangarika la diangka'koa' langngan suruga? Tae', sapo la ditibe tamakoa' naraka. Annu kela dadi dioi Sodom#11:23 Sodom:Kej. 19:24-29. tanda memangnga-mangnga kupadadi illalan alla'-alla'mua', tae' la natallanni Puang Allata'alla. 24Dadi kupokadangkoa' temo: ianna nalambi'mo alla dingei umbisara ma'rupa tau, la maringngan ia perambinna Puang Allata'alla lako issinna kota Sodom anna la ikoa'.”
Petambana Puang Yesus
Luk. 10:21-22
25Anu iatoo ma'sambayang Puang Yesus nakua: “O Ambe', Dewatanna langi' anna lino. Ma'kurru' sumanga'na' matin, annu angganna tula' dibuni mengkalao dio mai mupakawanami lako to naangga' barinni' ma'rupa tau, sapo tontong mbuni lako to naangga' manarang anna tp nagente' keaka' ma'rupa tau. 26O Ambeku iamo te pa'kuammpe.”
27Mangkai ma'sambayang, nakuamo: “Angganna kara-kara mangka asammi napalessu' rokko lisu pala'ku Ambeku. Tae' dengan moi mesamo ma'rupa tau ummissanan Anakna Puang Allata'alla salianna Ambeku, tae' toi dengan moi mesamo ma'rupa tau la ummissanan Ambeku salianna Anakna, anna to naporai Anakna napaissanni.
28Maikoa' umpellambi'ina anggammu to malupu' anna to mabanda' passanammu angku patialangkoa' penawammu.#11:28 to malupu' anna to mabanda' passanammu:Kalembasanna: to ussa'ding kalena kasalaan anna nakabandasan umpalako angganna parenta illalan sura'na Musa. 29Turu'i parentaku ammu melaya' lako kaleku annu malennna' penawana' anna marampan penawa napolalan tiala penawammua'. 30Annu mentu'na parentaku mepomasannang, anna bawaan kupapassanniangkoa' maringngan.”
Actualmente seleccionado:
Matius 11: MQJ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
@LAI 2011 Indonesian Bible Society (Lembaga Alkitab Indonesia)