Luke 1
1
Kilekithi tsa
1Timi kutomo no ningu gholo thime shikupuve keqo kihikülai yèpeqhi nikeu shiju ke. 2Inahuu thebei shi ithulu kemi eno asütsa pe veküpha kemi no kiu ningu vilo pi keno tipaqo panongu no yeluve. 3Akiqheu Theophilus, hipau amlo lo qhi no ni ghí O ghenguno kithikiyi shi kiu shive keno yè nikeu shi xathaluvae, kughengu ni ampi no tsaqütsalei abothu lono kümtsü phujukhavea ke, 4tishianguno O vilo pive keu thimeqo ye kuchou kepi ithi peniye ke.
John Baptiz Kishiu Punú nikeu Ghili Azüu no Pi
5Herod no Judea ghakhu lo akükau shi ake ghuloki lo achinemi lakhi Zechariah ipikeu ache, pa ye achinemi kikijé lo Abijah mqo lo ke; pa nipu Elizabeth ghí Aaron#1:5 Aaron ye Moses pamu ke. tikughuko lono ighi kemi ke.#1:5 1Yeki 24:1-19 6Pama kinikujo Alhou zülo amikucho shi xüche eno Ampeu zakütsü ngò ayeza kümtsü kupukülai shi pape chekemi ke. 7Pama ye anu küha kughengu Elizabeth ye anuhami eno pama kinikujo ighono kitemi shive.
8Ghuthu lakhi Zachariah mqo no pano kikiphi tsalani kümlapu shia akelo Zechariah no Alhou zülo achine kümlà shiae, 9pa ye achinemi kukhuaye kiqi lono Ampeu chineki lo ilo no müsüghüta piti penike asaqhi ke lono kishelu ke. 10Eno kughou müsüghüta piti kepu do ighi keno, kumqo pesü mülá akemiqo kümtsü khalau akighini shia.
11Tilehi Ampeu’w kungumi lakhi no müsüghüta kümlá-khache ajeu küdau puthugho no pa lau ipeghi. 12Kughou Zechariah no pa ithulu keno pa ye akümsa no thüghüive. 13Ikemu kungumi hu no pa vilo pi: “Zechariah, msà kevilo; Alhou no O kighini chiluve tsüae. O nipu Elizabeth ye anu lakhi punú nani eno no ye pa je John kütsü nani. 14Pa ye O ghenguno alokivi eno alokiqipu shi nani, eno pa punú keu ghenguno timi kutomo no alovishe nani, 15kughengu pa ye Ampeu zülo kijè shi nani. Pa ye khilemu atsaizü jeli momu atsaizü kümkaqo peithamo nani, eno pa ye punú mphi züu no Aghungu Kimthe no chhitoive nani. 16Pa no Israelmi kutomo panongu Mpeu Lhou lau saideghi nani. 17Pa no Ampeu ghenguno paw timi kutò pe qhini ke Elijah gholo achekeu küká eno ghungu vechewo apùnoqo pelo panongu nuliqo lau amlotsüqhiyilu eno agholumo kemiqo pelo achipiu lokütsü lo ighilu penike Ampeu züu no wu nani.”
18Zechariah no kungumi vilo iniju, “Ni ye kíshi no hiye kuchou kepi ithini kea? Ni ye kichimi shivea eno I nipu ghí ampe kutomo shivae.”
19Kungumi no pa vilo pi, “Ni ye Gabriel ke. Ni ye Alhou phivilo puthugho acheni eno I pelo O pütsa eno asütsa kivi hipau O vilo pipe nike I puwu ke. 20Eno itehi ye no ye hipau shikupumo ke tsalà kutólo atsa pimlave no inaqhoive nani, kughengu nono I tsa khikhi ado achipi lono shikupu niye ani keno tipau hu pülümo ke.”
21Tishi ake dolo timiqo ye achineki khalau Zechariah khea eno pa ye kushiye achineki lo ado kushuwa ngo auvea kepi akümza ae. 22Kughou pa no khalau ipeghi keno, pa ye panongu pütsa mülave. Panongu no pa ye achineki lo kungunhetsü ithulu kepi vethaluve, kughengu pa no pa u kulo pesü panongu pìye-a ikemu atsa pimla no ae.
23Kughou pa kümlà kishekhave keno pa ye aki lo idewove. 24Hipathiu pa nipu Elizabeth ye mishiluve eno li ye aqhi pungu kutó aki lo akulhoqhi auve. 25Li no pi: “Ampeu no I ghenguno mülave tsüae. Kughou pa no kimiyeqhiyi keu I shou jupuku keno tipau tsalà lono timi zülo no I kukujo ikhipeve tsüe.”
Jisü Kupunú Ghili Azüu no pi
26Elizabeth no mishí keu aqhi tsügho shi akelo Alhou no Galilee lo mishiphu Nazareth lo, 27totimi athathe lakhi lau paw kungumi Gabriel puwu. Li ye David laghami Joseph ipikeu no küsükha püa. Ayiliu je ye Mary ke. 28Kungumi hu no li lau wu no pi, “Alovilo, no ye shishe müghavae! Ampeu no O gholo anie.”
29Mary ye kungumi tsa chilu püzü shishe amlo save eno kiutoi keu lokivi sütsa shi aghí nani kea ipi akümza ae. 30Ikemu kungumi no li vilo pi: “Mary, msà kevilo. No ye Alhou mlokiqi shiluvae. 31No ye mishiluve no anu lakhi punú nani, eno no ye pa je Jisü kutsü nani. 32Pa ye kijè shi nani eno Alhou Akiqheu Nu ipi ku nani. Ampeu Alhou no papù David küká lakhü pesü pa tsü nani, 33eno pa no lhokta kutólo Jacob tikughukomiqo shou ka nani; pa kükaphu ye khilemu ashekha shivemo nani.”
34Mary no kungumi vilo iniju, “Ni ye ilimi lakhi shi aphike kíshi no hi shilu nani kea?”
35Kungumi no khochile: “Aghungu Kimthe no O shou ikughi nani eno Alhou Akiqheu küká no O küzüluve nani. Eno akimthe ngá punú niye shi akeu ye Alhou Nu ipi ku#1:35 Momu Anu lakhi punú niye akeu ye Akimtheu ipi ku nani nani. 36No sholokumi Elizabeth ghí kitemi shivemu anu lakhi punú niye ani. Timiqo no li ye anuhau ipi cheni ikemu li ye mishí keu hi aqhi akütsüghou lo cheni. 37Kughengu Alhou lau no ighi keu tsa ye khilemu tomla keu shimo nani.”
38Mary no khochile, “Ni ye Ampeu qeliu ke, nono I lau piqhi keu tsa shikupulu peniu.” Tisheno kungumi hu no li qhive no wuve.
Mary no Elizabeth Xuju
39Tipathiu Mary no aghili kutove püzü akìmighi shi Judea ghakhu lo naghuto küdau mishiphu lakhi lo chesü wu. 40Eno li no Zechariah ki lo ilo no Elizabeth sasü petha shi. 41Kughou Elizabeth no Mary sasü petha shi keno li po lo angá no pakütashi ithae, eno Elizabeth ye Aghungu Kimthe no chhitoive. 42Li no asütsa müghachhoi keu lono pi: “No ye totimiqo dolo akümghau ke, eno O po lo angá mishí niye akeu ye akümghapue! 43Ikemu ni ye khuu kepi I mpeu pazá pelo I lau ighi pe kea? 44Nono petha shikeu sütsa I kini tove kemtsa I po lo angá no alokivi lau no pakütashi itha ke. 45Totimi khuu no Alhou no paw tushokiqhiqo li lau shikupu tsüní ipikeu lo pülü keno li ye müghae!”
Mary le
46Mary no pi:
“I ngulho no Ampeu sheqhe ani,
47eno I ghungu no I Xakulu Lhou lau alovishe ani,
48Kughengu pa no
paw aqhokigheu qeliu kümsülue.
Hinguno hilau ye tiqhelimi kümtsü no I vilo akümghau ipi kuniae,
49kughengu akumto Lhou no I ghenguno akümlà kijè mülave tsüae,
pa je ye akimthe ke.
50Pa sümsa kemi kümtsü shou
tiqheli no tiqheli kutó kimiye keu pìye cheni.
51Pa no Pa kumto u chhopuwo no akümzapu kümlà mülae;
pa no akükümsü lo qheza chekemiqo apanaghave tsüe,
52pa no ayekipemiqo panongu küká lakhü lono ikhiqhive,
ikemu aqhokighemi sünheqhepuku ke.
53Pa no thime kivi pesü müzüthi kemi aghapiqi tsü,
ikemu kiními au kümsá puwuve.
54Pa no küpüqhiyi nikeu kümsülu no
pa qeu Israel kuphu ke
55Pa no nipù-asü vilo tushoqhi püakeu toi
Abraham eno pa tikughukomi lau pülhapuju küpüqhiyi ke.”
56Mary ye Elizabeth gholo aqhi küthüa toi keu ngoa eno tithiu aki lo idewove.
John Baptiz Kishiu Punu
57Elizabeth no angá punú kepu do tove kelo, li no anu lakhi punú. 58Li kisüghümi eno abolomiqo no Ampeu no akümzapu li lau mülà keu chilu no panongu kümtsü li gholo alovi küqhae.
59Atsala tache thiu panongu no aphighüyiko-küghá ghenguno anu sasü ighi, eno panongu ye papù je paphi shi pa je Zechariah kutsü niye shiae, 60ikemu pazá no pi: “Moe! Pa je ye John ipi kunie.”
61Panongu no li vilo pi: “No sholokumi dolo aje titoi keu lakhimu küha aphie.”
62Tithiu panongu no au kukulo lono papù vilo anu je khuu kutsü penishi ani kea ipi iniju. 63Zachariah no yèpuku kepu atupha lakhi khu, eno pa no ishi yè, “Pa je ye John.” Ikelo panongu kümtsü no akümzave. 64Tipa mtsa Zachariah kichí eno amili xukho kitheluve eno pa no Alhou sheqhe ghi atsa pithuve. 65Tipa qhalo akemi kümtsü no akümzave eno Judea yeghi lo naghuto lo aphu akeqo kümtsü lo timiqo no hipau ghili kügha wove. 66Hi chilu kemi kümtsü no akümzave eno panongu no ishi iniju ghi pi, “Tishiaye anu hipau ye kiu shi nani kela?” Kughengu Ampeu küká no pa gholo ae.
Zachariah le
67John papù Zechariah ye Aghungu Kimthe no chhitoive no tungkupu tsa hitoi pi:
68“Israel Lhou Ampeu sheqhelo,
kughengu pa no paw timiqo lau ighino panoqo xachilelu ke.
69Pa no pa qeu David lagha lono
ningu ghenguno xakulu kükau kijè süqhe tsüke
70(pa no püzüu paw akimthe tungkupumi vechewo pipüa ke),
71pa no ni ghümi eno
ni mithi chekemi kümtsü lau no xaphelu nani—
72tiye nipù-asü lau küpüqhiyi keu pìye niye ke,
eno pa kimthe shoqhi kümsüchilelu niye ke,
73ashoqhi tiye pa no ningu papù Abraham lau shikeu ke.
74ni ghümi lau no ni xaphelu niye,
eno ningu pelo msàmo no
75aküxü kupuju akimthe eno amikucho shi pa qe peniye ke.
76“Eno I nu, no ye Alhou Akiqheu wu tungkupu lakhi ipi ku nani;
kughengu no ye Ampeu züu no pa laghi ghepe qhini ke wu nani,
77tiye paw timiqo lau axiné qhikütsü vechewo
xakulu kighithi tsü niye ke.
78Kughengu Alhou’w kimiyeqhiyi keu vechewo
kungugha lono khetsünhe ningu lau ighi nani
79tiye àküzǘ yeghi lo xü akemi
eno akithí yekükhü lo akemi,
ni pukhu nepa kichesü aloino keu là lo sawu nikeu ghenguno ke.”
80John ye mutotoi thuwuve eno aghungu küxü lo mutotoive; eno pa ye Israelmi aqha zülo pephe-piyemo ke tsalà kutólo küghünamokeu-a lo xüache.
Actualmente seleccionado:
Luke 1: STB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.