Jn 8

Əbvii wɛ ɛ́ nè koon nɛ əb shik kenjaŋ

1Jesus me lòò è kok ɛ kfən Olif. 2Əbtəke yio əb kase gwiy ɛ ndaa-ɛykokse. Wel əbjim kaame ɛ wen ɛybee, əb me diom è kɛɛte se dinte əbnəə se ghene. 3Ghɛ́ ɛydinte tesake gese nɛ̀ ghele kenone Falisee lii è gwiy nɛ̀ əbvii nɛ ɛ́ koo nɛ əb liɛ lum wel. Ghene tiyse əbvii vi ɛ wel əbjim ɛyshiɛ; 4è suuy se Jesus ge: Ndinte, ɛ́ kè koo əbvii vin nɛ əb liɛ kenjaŋ. 5Lu ɛ nchil nɛ Moses nè suuymen ge ɛ́ lu se təmle əbvii ka vin nɛ̀ ɛtiye se yuy. Wɛ̀ suuy kiɛ gee ghɛ? 6Ghene nè súùy dì se yiote əbchio ə Jesus ka ghene kiile kenəə kɛ ɛ́ toy wen so è koo. Əb ngvəkte è se nyake kenəə ɛ ntiɛ nɛ̀ wan-keghoo. 7Ghene ko se tiy fo bifte əbnəə se Jesus. Əb nɛy lose ketuu ə wen è suuy se ghene ge: Loo lu nɛ wel lu ɛ ghɛne məm wɛ əb nè bɛɛy ghàà nɛɛy mbee, əb təm ɛytiye yɛ mbiye ɛ wen əbghun.

8Əb suuy dì è me gese ngvəkte è se nyake kenəə ɛ ntiɛ. 9Ghene yio kii nɛ̂ kine è me se lóò femok femok, nɛ kɛɛte ngɛyse ghel. Jesus me gok fo kɛn wen nyiŋ, nɛ əbvii vi ko bo tiy ɛ wen ɛyshiɛ, 10è nɛy se lose ketuu se ɛyyio è bif se əbvii vi ge: No-wan, ghel ghi ghááy? Wele báà gok se suuy ge wɛ̀ lu se kuo-a? 11Əb fise ge: Wel wiye babɛy! Əb me suuy se wen ge: Mɛɛ mɛ sɛye jia suuy ge wɛ̀ kuo! Yɛɛ nduu, nɛ ghàà gese yî nɛɛy mbee.]

Jesus lu kekaakene mbi

12Jesus gese suŋnen se ghele ge: Mɛ lu kekaakene mbi. Naa ndɛ wɛ əb jumten mɛ nɛ̂y kiile kekaaken kɛ ke fóon ɛychii, è jia bo yɛ jɛl ɛ nfiine.

13Ghene me suuy se wen ge: Wɛ̀ bene nsake yiɛ kɛn se wɛ̀ ngeŋ, nɛ kenəə kɛ wɛ̀ suuyen báà se lu kenəə.

14Jesus fise ge: Chèmè lu ge mɛ suŋnene kum ngeŋ ə yom, fene əbluuye lu ɛ kenəə kɛ mɛ suuyen, bek ge mɛ ke ghaa mɛ nè lòòn, nɛ mɛ ke ghaa mɛ nduun. Ghɛne báà se ke ghaa mɛ nè lòòn, gese ke wiy ghaa mɛ nduun. 15Ghɛne sake ghel ɛ jii nə wele-mesoŋ, nɛ mɛ sake wiy wel. 16Kè lu ge mɛ yɛ sake wel, é mɛ yɛ sak nɛ̀ əbluuye bek ge mɛ báà se lu mɛ nyiŋ. Bay wɛ əb nè tumen mɛ lu ghɛse wen. 17Ɛ́ nyak ɛ ghɛne nchil ge: Ghele teem ɛbaa è suŋnen se əbchio əbmok, fene kenəə kɛ ghene suuyen lu əbluuy. 18Mɛ suŋnene kum ngeŋ ə yom, nɛ̀ Bay wɛ əb nɛ̀ tumen mɛ suŋnene sɛy kum mɛ.

19Ghene bif se wen ge: Ba ə viɛ lu ghááy? Jesus fise ge: Ghɛne báà se ke mɛ, kene ba ə wom. Ghɛn kè ke mɛ é ghɛn yɛ ke ba ə wom.

20Jesus nè suuy əbnəə vin ɛ ndaa-ɛykokse əbliy wɛ əb nè dinten əbnəə se ghele ɛybuu ə ndaa bene fɛ ɛ́ nè sɛɛ lɛme nkufse ɛyfô. Wel jia koo wen bek ka əbliy wɛ Feyine nè lɛmen nè bɛɛy ghàà kwɛn.

Ghel ghɛ ɛ́ tunsen Jesus lòó ɛ́ jia ndu ghaa əb nduun

21Jesus gese suuy se ghene ge: Mɛ se lóò, nɛ ghɛne yese è yɛ kɛŋe mɛ, dî è yɛ lu se kuo ɛ ghɛne mbeese. Lòó ghɛn jia ndu se ghaa mɛ nduun.

22Ghɛ́ mbiye nə ghele Juuse me se kante ge, əb lɛ suuye ge lòó ghɛsen jia ndu ghaa əb nduun fene ke dine ge əb kɛŋe se yuye ngeŋ ə wen moo?

23Jesus fise ge: Ghɛn lòò ɛ ntiɛ fɛn, dî nɛ mɛ lòò nɛ lu ɛyyio. Ghɛn lu ghele ghɛ́ mbi fɛne, dî nɛ mɛ wiy wele wɛ̂ mbi fɛn. 24Ghɛy kenəə kɛ mɛ kè suuyen ge ghɛne nɛ̂y kuo ɛ ghɛne mbeese, nɛ ghɛne nɛ̂y kuo ɛ ghɛne mbeese ɛ lefɛ ghɛne báà beeme ge mɛ lu wel wɛ mɛ luun əbghen.

25Ghene bif se wen ge: Wɛ̀ lu ndɛ? Jesus fise ge: Mɛ lu wel wɛ mɛ nè suuyen se ghɛn ge mɛ lu əbghen se kenkɛɛte. 26Mɛ ki əbnəə se ɛydio wɛ kè lòó mɛ suuy kum ghɛn se sake ghɛn. Mɛ dì fekte se ghele ghɛ mbi fɛn nɛ lu kɛn kenəə kɛ mɛ nè yion se vi wɛ əb nè tumen mɛ, nɛ əbnəə ə wene ko sɛɛ lu kɛn wɛ əbluuye.

27Əb suuy dì, ghene jia keele ge əb suŋnen se ghene kum Bay Feyin. 28Jesus me suuy se ghene ge: Ɛ náà lóó lu əbliy wɛ ghɛn losenmen Wanwel, é ghɛn me keele ge mɛ lu wel wɛ mɛ luun əbghen, è gese keele ge kenəə wiy kɛ mɛ nɛɛyen ɛ mɛ əbtaawe, dî nɛ mɛ suuy nɛ lu kɛn kenəə kɛ Bay dinen ge mɛ suuy. 29Wel wɛ əb nè tumen mɛ lu ghɛse wen, nɛ əb báà vəse mɛ, bek ge mɛ lóó mɛ yɛ nɛɛy əbnəə wɛ əb koŋen.

30Jesus suuy əbnəə vin dì, ghel se ɛydio ghɛ ɛ́ nè yioten wen fó ɛytem se wen.

Kekos ghene wel wɛ báà se lu kekos

31Jesus me suuy se ghele Juuse ghɛ ɛ́ nè foon ɛytem se wen ge: Ghɛn gòk è yɛ nɛɛy kenəə kɛ mɛ suuyen se ghɛn fene ghɛn loote lu ghon-ɛyfɛl nə mɛ; 32é ghɛn me yɛ ke əbluuy, é əbluuye tene me boyse ghɛn se kekos. 33Ghene suuy ge: Ghɛs lu ghon ɛykfəə nə Ablaham, nɛ ghɛs nè bɛɛy ghàà yi yɛ lu kekos se wel. Wɛ̀ ghan lɛɛy se yɛ suuy ge: Ghɛne náà boy se kekos.

34Jesus suuy se ghene ge: Mɛ suuy əbluuy se ghɛn ge naa ndɛ wɛ əb nɛɛyen mbee, lu kekos se mbee. 35Kekose sɛ́ɛ̀ jia lu wel ə ɛyshaa ndaa əbliy əbjim; sɛ́ɛ̀ lu kɛn wan wel ə ɛyshaa ndaa. 36Loo lu Wane boyse ghɛn se kekos, fene ghɛn lootemen boy. 37Mɛ ke ge ghɛn lu ghon ɛykfəə nə Ablaham. Dî nɛ ghɛn kɛŋe se yuye mɛ bek ka əbnəə wɛ me dintene báà se ki kelik ɛ ghɛne tetem. 38Mɛ suŋnen kum əbnəə wɛ ba ə wom dinenmen se mɛ, nɛ ghɛn nɛɛye əbnəə wɛ ba ə wɛn suuyen se ghɛn.

39Ghene fise ge: Ba ə wɛs lu Ablaham.

Jesus suuy se ghene ge: Ghɛn kè boy se yɛ loote lu ghone Ablaham, fene ghɛn kè nɛɛye nɛ lu əbnəə wɛ əb nè nɛɛyen. 40Leenen ghɛne sɛy se kɛŋe se yuye mɛ, nɛ mɛ suuy nɛ lu əbluuy wɛ mɛ nè yion se Feyine. Ablaham dì nè báà nɛɛy kenəə dì. 41Ghɛne nɛɛy kenəə kɛ ba ə wɛn nè nɛɛyen.

Ghene fise ge: Feyine se wene ngeŋ lu kɛn Bay wɛ ghɛs kiin, nɛ ghɛs loote lu ghone wen. Ɛ́ nè báà bii ghɛs se kenjaŋ.

42Jesus suuy se ghene ge: Feyine kè loote lu Ba ə wɛn, fene ghɛn kè koŋe mɛ, bek ge mɛ nè lòò se Feyine è se lu fɛn ɛ leenen. Mɛ nè báà gwiy ɛ əbtaawe nə mɛ. Nè tum wen mɛ. 43Se lu bek ghɛ wɛ ghɛne báà se keele kenəə kɛ mɛ suuyen? Ke lu bek ge ghɛne báà se koŋe se yio kenəə kɛ mɛ suuyen. 44Ghɛn lu ghone Ba ə wɛn wɛ Satan. Ghɛne koŋe se yɛ nɛɛy əbnəə wɛ ba ə wɛn kɛŋen. Əb nè yuyte ghel se əmməən, nɛ əb nè bɛɛy ghàà yî yɛ suuy əbluuy bek ge əbluuye báà se lu ɛ wene məm. Əb yia əbbuam fene lu nchiine ə wen bek ge əb lu wel əbbuam, gese lu ba əbbuam əbjim. 45Dî nɛ mɛ suuy əbluuy, nɛ ghɛy kenəə kɛ ghɛne báà se beeme mɛ. 46Wel se ghɛn lɛ lòó əb din mbee ge nɛɛy mɛ-a? Mɛ se suuy əbluuy nɛ ghɛn beeme wiy kenəə kɛ mɛ suuyen bek ghɛ? 47Wel wɛ luun wele Feyine yióté giɛse Feyin. Ghɛne báà se lu ghel ə Feyine. Ghɛy kenəə kɛ ke nɛɛyen ghɛne jia se yiotee.

Jesus ghene Ablaham

48Ghele Juus ghii me bif se Jesus ge: Ghɛs lɛ kè báà se lu ɛ titiy se suuy ge wɛ̀ lu wele Samalia, gese ki ɛyfim-a?

49Jesus fise ge: Mɛ ki wiy ɛyfim. Mɛ ngvəmle Ba ə Wom, dî nɛ ghɛn ngvəmle wiy mɛ. 50Mɛ se mɛ ngeŋ báà se kɛŋe ge ghele yɛ ngvəmle mɛ. Wel lu wɛ əb kɛŋen ge ghele yɛ ngvəmle mɛ nɛ lu wen wɛ əb tenen nsak. 51Mɛ suuye əbluuy se ghɛn ge naa ndɛ wɛ əb nɛɛyen kenəə kɛ mɛ suuyen lu nɛ əb jia yî kuo.

52Ghele Juus ghii suuy ge: Ghɛs lootemen keele ɛ leenen ge wɛ̀ ki ɛyfim. Ablaham nè lô kuo, ghele ntum nə Feyine kuo, wɛ̀ se suuye kiɛ ge naa ndɛ wɛ əb nɛɛyen kenəə kɛ wɛ̀ suuyen jia yî kuo lɛɛy? 53Ke chèmè dine ge wɛ̀ chia ba ə wɛs Ablaham wɛ əb nè kuon, nɛ̀ ghele ntum nə Feyine ghɛ ɛ́ nè kuon-a? Wɛ̀ kwaate ge wɛ̀ lu ndɛ?

54Jesus fise ge: Mɛ lòò è yɛ lose ngeŋ ə yom, fene lu kenəə lólò. Wel wɛ əb losen mɛ lu Ba ə wom, nɛ lu wen wɛ ghɛne suuyen ge lu Feyine fɛn. 55Ghɛne bɛɛy ghàà yɛ ke wen, nɛ mɛ ke wen. Mɛ kè lòò è yɛ suuy ge mɛ ke wiy wen, fene mɛ lu wel əbbuam ka ghɛn. Mɛ ke wen gese nɛɛye kenəə kɛ əb suuyen. 56Ba ə wɛne Ablaham nè saŋle se yɛn əbliy wɛ mɛ gwiy ɛ ten. Əb nè lô yɛn, è se saŋlee.

57Ghele Juus ghii suuy se wen ge: Wɛ̀ chèmè bɛɛy ghàà chin nguk əmmtan, wɛ̀ se suuye ge wɛ̀ yɛnmen Ablaham lɛɛy?

58Jesus me suuy se ghene ge: Mɛ suuy əbluuy se ghɛn ge, nɛ ɛ́ gee se bii Ablaham, lu nɛ Mɛ Lu#8.58 Giɛ yɛ ge Mɛ Lu, lu ɛyghel ə Feyin. Jesus suuy lɛ se din ge yi lu Feyin..

59Ghene biŋte ɛtiy ge ɛ́ təmle Jesus sô, əb saame ɛ ghene məm, è fəy se ndaa-ɛykokse fɛy.

Actualmente seleccionado:

Jn 8: oku

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

©CABTAL, 2012

Aprende más sobre Ŋwaale Feyin; Kelek Kefɛɛ

Jn 8

Versículos bíblicos populares de
Jn 8

Escucha a Jn 8

Biblia:

Oku

Versión: Ŋwaale Feyin; Kelek Kefɛɛ - oku

Jn 8

Jn 8

Versículos bíblicos populares de Jn 8

Escucha a Jn 8

Biblia:

Oku

Versión: Ŋwaale Feyin; Kelek Kefɛɛ - oku

Jn 8

Versículos bíblicos populares de
Jn 8