Jn 4

Jesus ghene əbvii Samalia

1Jesus nɛy me keele ge ghele kenone Falisee yiomen ge yi kiile ghon-ɛyfɛl gese foo moo se ghene chia Joon; 2(Jesus se wene ngeŋ nè báà se foo moo se ghele, nè foo ghon-ɛyfɛl nə wen.) 3Əb keele dì è me lòò se ɛybee ɛylak yɛ ɛ́ toŋten ge Judea, è fiile se yɛ ɛ́ toŋten ge Galilee. 4Əb loo ndu, è se lu se tosen ɛ ɛylake Samalia.

5Əb ndu è chin ɛ ntɛke Samalia ɛylee nɛ ɛ́ toŋte ge Sika. Ɛy nè baksen se ɛylem yɛ Jakob wɛ ba ə ghone Islael nè foon se wan ə wene Josɛf. 6Ɛybee moo nə Jakob nè lu fo; se lu ka Jesus nè jɛlenmen è bol, əb nè lô diom ɛ əbghun ɛybee fo nɛ chuy se tiysee.

7Əbvii wɛ̂ Samalia əblee gwiy fo se tuu moo. Jesus suuy se wen ge: Fó mɛ nɛ̀ moo əmnəən. 8(Nè lu dì nɛ ghon-ɛyfɛl nə wene liimen è ndu ɛ ntɛk se yun əbfua-əbyíɛ́ne.)

9Əbvii vi fise ge: Wɛ̀ lu wele Juus, nɛ mɛ lu wele Samalia, ke ghan lɛɛy nɛ wɛ̀ yɛ lone moo əmnəən se mɛ? (Əb nè suuy dì bek ge ghele Juuse nɛ̀ ghele Samalia nè sɛɛ jia nɛɛy əbnəə konene.)

10Jesus fise ge: Wɛ̀ kè boy se yɛ ke kefaa kɛ Feyine foon, gese ke wel wɛ əb lonen moo se wɛ̀, fene wɛ̀ kè lô lon moo se wen, é əb fó nɛ lu moo mɛ əm lɛŋen se wɛ̀ əbliy əbjim.

11Əbvii vi me suuy ge: Babɛy, wɛ̀ báà se ki kefaa moo, nɛ ɛybee moo gese sooye, lòó wɛ̀ liɛ ghááy moo mɛ əm lɛŋen lɛŋen? 12Wɛ̀ chia ba ə wɛse Jakob-a? Nè Fo wen ɛybee moo yin se ghɛs. Əb nè lô se nəə moo mɛ əm fəyen ɛ ten, nɛ ghon ə wene ghene nyamse wene nəə.

13Jesus fise ge: Wel nəə moo min é kendoŋe moo ko yɛ yume wen, 14dî nɛ wel nəə moo mɛ foon mɛ, é kendoŋe moo jia bo yî yum wen. Mi nɛ̂ min mɛ foon mɛ nɛ̂y yɛ lu ntoŋe jio ɛ wen əbghun yɛ ɛy fóon moo mɛ luun ɛychii yɛ ɛy jia yî mɛy.

15Əbvii vi me suuy ge: Babɛy, fó mɛ nɛ̀ mòò nɛ̂ min ka kendoŋe moo jia bo nɛ̂y yum mɛ, é mɛ jia bo nɛ̂y yɛ gwiy fɛn se tuu moo.

16Jesus suuy se wen ge: Ndu, è jaŋ lum ə viɛ, é ghɛne wen gwiy.

17Əb fise ge: Mɛ báà se ki lum.

Jesus me suuy ge: Ke lu ɛ titiy ka wɛ̀ suuyen ge wɛ̀ báà se ki lum. 18Wɛ̀ nè ghalmen ɛlum ɛtan, nɛ wel wɛ ghɛne wen chiin ɛ leenen chèmè wiy lum ə viɛ. Kenəə kɛ wɛ̀ suuyen lu əbluuy.

19Əbvii vi me suuy ge: Babɛy, mɛ yɛne ge wɛ lu wele ntum nə Feyine. 20Ɛbaa ə ghɛse nè kokse Feyin ɛ kfən fɛn, se lu nɛ ghɛn ghɛ Juuse suuye ge kelik kɛ ɛ́ luun se yɛ kokse Feyin ɛ ten lu kɛn ɛ Jolesalem.

21Jesus me suuy se wen ge: No ə wom, mɛ suuy əbluuy se wɛ̀ ge: Əbliye gwiye wɛ ghele jia bo nɛ̂y yɛ kokse Bay ɛ kfən fɛn kene ɛ Jolesalem. 22Ghɛn ghɛ ghele Samalia báà se loote ke wel wɛ ghɛne koksen, dî nɛ ghɛs ke wel wɛ ghɛse koksen bek ge ɛyboye lòò nɛ lu se ghele Juus. 23Dî nɛ əbliye gwiye, nɛ əb kwɛnmen, wɛ ghel ghɛ ɛ́ loote koksen Baye nɛ̂y yɛ kokse wen se Keyioy gese kokse nɛ̀ əbluuye. Lɛɛ ɛynkii ghel ghɛ Baye kɛŋen ge ɛ́ yɛ kokse wen. 24Feyine lu Keyioy, nɛ ghel ghɛ ɛ́ koksen wen lu se yɛ kokse se Keyioy, gese kokse wen nɛ̀ əbluuye.

25Əbvii vi me suuy ge: Mɛ ke ge Vi wɛ Feyine nè Yiosene nɛ̂y gwiy nɛ lu wel wɛ ɛ́ toŋten ge Christ. Əb nɛ̂y gwiy è fekte əbnəə əbjim se ghɛs.

26Jesus suuy se wen ge: Mɛ wɛ mɛ suŋnen se wɛ̀ lu Christ nɛ̂ vi.

27Se lu kɛn ɛ əbliy fo ghon-ɛyfɛl nə Jesuse me se gwiye, è yɛn nɛ əb suŋnene ghene əbvii, əbchio yúm ghene, dî wel jia bif se əbvii ten ge əb sɛ kɛŋe ghɛ-a, kene se Jesus ge əb sɛ suŋnen ghene wen bek ghɛ-a?

28Əbvii vi me vəse fetɛme moo nə wen se fo, è fiile se ntɛk è suuy se ghele ge: 29Ghɛn gwiy è yɛn wel wɛ əb suuyen əbnəə əbjim wɛ mɛ nè yimen nɛɛy. Lɛ lòó yɛ lu wen Vi wɛ Feyine nè Yiosen-a? 30Ghene me lòò se ntɛk, è ndu se yɛne Jesus.

31Nè lu dî nɛ ghon-ɛyfɛl nə Jesuse kè se lone wen ge: Ndinte, kô yiɛ kefaa!

32Əb sɛ́y suuy se ghene ge: Mɛ ki əbfua-əbyíɛ́ne wɛ ghɛne báà se ke.

33Ghene me se kante ge: Lɛ lòó yɛ lu ge wel kè lô fo əbfua-əbyíɛ́ne se wen-a?

34Jesus suuy se ghene ge: Əbfua-əbyíɛ́ne nə mɛ lu se yɛ nɛɛy kenəə kɛ wel wɛ əb nè tumen mɛ kɛŋen, se gese se mɛyse ɛyfɛl yɛ əb nè foon se mɛ. 35Ghɛne lóó ɛ́ yɛ suuy ge: Bɛɛsemen njoŋ sekɛɛk é əbliy ɛydən ɛsaŋe kwɛn. Dî nɛ mɛ suuy se ghɛn ge ghɛn loote kiy è yɛn ka teleme keken. Ɛsaŋe biymen è kwɛn ɛydən. 36Wel wɛ əb kaan əbfua kiile əblaake wen, nɛ əb baate əbfua wɛ əb kiilen nɛ lu ɛychii yɛ ɛy jia yî mɛy. Ke me se lu ge wel wɛ əb lemen ghene wel wɛ əb kaan nɛ̂y yɛ saŋle ghel ɛjim. 37Ngan yɛ ge, wel əblee vii, nɛ wel əblee kaa, me se lu se əbluuy. 38Mɛ tume ghɛn ge ghɛn kaa əbfua ghaa ghɛn nè báà lem. Ghel ɛchine nè lem fô, ghɛne me se yio əbjuŋ ɛyfɛl nə ghen.

39Ghele Samalia se ɛydio ɛ ntɛk fô, fó ɛytem se Jesus bek ka əbvii vi nè suuyen ge: Əb kè fekte əbnəə əbjim wɛ mɛ nè yimen nɛɛy. 40Ghene gwiy se Jesus, è lon wen ge əb ko moote ghene ghene. Jesus me chii fo se əbchii əbbua.

41Ghel ɛlee se ɛydio fó ɛytem se Jesus bek sakghɛ wɛ əb nè fekten; 42è me suuy se əbvii vi ge: Ghɛs lu nɛ ɛ́ fó ɛytem ɛ leenen, nɛ wiy bek kenəə kɛ wɛ̀ kè suuyen. Ghɛs fo bek ka ghɛs se ghɛse ngeŋse yion wen, nɛ̀ ghɛs ke ge loote lu wen mboyse mbi.

Jesus chuk wán ə wel əbghaken ɛ Kabanaum

43Jesus chii fo se əbchii əbbua, è me ndu se Galilee. 44Nè lu dì nɛ Jesus suuymen ge: Ɛ́ sɛɛ jia vəme wele ntum nə Feyine ɛylak yɛ əb lòòn ɛ ten. 45Əb nɛy chin ɛ Galilee, ghele ghɛ fóò fiisen wen bek ge ghene nè lô ndu ɛ Jolesalem əbliy ɛyyiɛ Kechii Ɛyboyse, è yɛn əbnəə wɛ əb nè nɛɛyen fo ɛ keleŋ əbliy fo.

46Jesus nɛy fiile se Kana ɛ Galilee ghaa əb nè bensen moo se əmnduk. Nè lu dî nɛ chɛɛ ɛytaa ɛylee yɛ ɛy nè chiin ɛ Kabanaum ki wán ə wen nɛ əb yafe. 47Əb yio ge Jesus lòòmen se Judea, è gwiy ɛ Galilee, è me ndu è yɛn wen è se beŋte ge əb ko gwiy è chuk wán ə vi bek ka əb nè se kuon. 48Jesus me suuy se wen ge: Buu ge ghɛn yɛn əbchəyte əbchio əbyúméné ghene əbnəə əbkanene ka mɛ nɛɛyen, é ghɛn jia fo ɛytem se mɛ.

49Wel əbghaken vi fise kɛn ge: Babɛy, gwiy ɛ́ lóó buu dî, é wan ə wom kuo.

50Jesus me suuy ge: Yɛɛ nduu, wan ə viɛ bonenmen.

Əb fó ɛytem se kenəə kɛ Jesus suuyen è lòò. 51Əb loo ndu ghel ɛyfɛl nə wene báksén wen, è suuy se wen ge: Wan ə viɛ dì bonenmen!

52Əb bif se ghene ge: Əb kè kɛɛte se yio əbfiɛf ɛ leghɛ? Ghene fise ge: Chî se lu ɛyyionén ka chuy kasen wɛ kenchɛme ne vəsen wen. 53Əb me kuume ge lu kɛn ɛ əbliy nɛ̂ fo wɛ Jesus ne suuyen se yi ge: Wan ə viɛ bonen. Ghene ɛyshaa ndaa nə wene me fo ɛytem se Jesus ghel ɛjim.

54Kine nè lu kenkumtene kenəə əbchio əbyúméné kɛ Jesus nè nɛɛyen se ka əb nè lòòn se Judea è ndu ɛ Galilee.

Actualmente seleccionado:

Jn 4: oku

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

©CABTAL, 2012

Aprende más sobre Ŋwaale Feyin; Kelek Kefɛɛ

Jn 4

Versículos bíblicos populares de
Jn 4

Escucha a Jn 4

Biblia:

Oku

Versión: Ŋwaale Feyin; Kelek Kefɛɛ - oku

Jn 4

Jn 4

Versículos bíblicos populares de Jn 4

Escucha a Jn 4

Biblia:

Oku

Versión: Ŋwaale Feyin; Kelek Kefɛɛ - oku

Jn 4

Versículos bíblicos populares de
Jn 4