Matius 11
11
Yohanes Bure Koumi Kiyae Naeise Yesus Yae Huwewoumi
(Luk. 7:18-35)
1Yesus na moisa orowate yo me bee oro nen bee bele a weumikoke baeufokera, nebei anuwaufa aloungekoke Galilea kanina yo yoni-yoni honatere kelemmiyenderene ewole.
2Yesus Wali Ondofolo na kalia ma mokowolebe a eungeyoboukoke Yohanes bure kowoumi kiyae kawa eisa boroke. Nebeinye Yohanes na moisa orowate yore ukeumi 3Yesusre are enainyehinensindere, “Mendere nulainyekoke Wali Ondofolo Weyae niyae, benen meyae ro hire rakemandere?”
4Are ukeumi yore Yesus weumi, “Embe mo, mayae ijokore eraukoke, angkaeise boraukoke hului yae Yohanesre huwennekombe. 5Ro miyae ijoko kumba nekayeke mana ijoko erate, oro rebeisi-rebeisi rebaeyeke yo mana ele mele kate, u bauwaufe kayeke yo onomi yarowate, ro miyae angkaei kokun nekayeke yo mana angkaei borate, herewate yo walaeiboke, a foi faeu foi hun ban wai ban yore ekehuweumi. 6Ro miyae Rare hakoyaise aerene ehekaei hubayainyebe Rare moi ebulei yo onomi foka hubanainyende.”
7Yohanes yae ukeumi mekate yo ewate mo, Yesus huba raweuboke ro miyae helen hebatere Yohanesle ane weumi, “Rahere erembomberene mayae a kala-kalare eyewaube, nebeinya kena u wauwaufe koyate holona ro mbai naei u mekai o mbai alu yae ndire ndare kuseunge wanende erembombere? 8Rahere erembombere eyewaube, ro mbai malo maye-maye hireukokere erennebombere? Niyae ban! Ro miyae malo maye-mayere hirate yo bae naei anuwau ondofolo yoni-yoni naei imaena. 9Nebeise banna, rahere mayae eyewaube? Yenjo kayaayo mbaise erennebombere? Na hele. Reyae mare wamale, neyae Allahle yenjo kayaayo holore moi wokeumi. 10Nane merau naei naeise Allahle homofaene homo molaikoke. Neyae Raei burelen boi-boi rore yeuboke naeise Allah yae Rare ukeufe are Maleakhi moloukoke,
‘Nda niyae Raei burelen boi-boi ro.
Neyae Weyae mele nibi a mokoisaise
nare bere holo yae ufende ende.’#11:10 Maleakhi 3:1
11Reyae nda a na helebe mare wamale, Miyae naei kou ei yahi eisa honowate yoni-yoni nolora Yohanes bure kowoumi kiyae na bumane hele. Nebeibe ro ban sele ro miyae Raei me kelee u keleene nekate holo yo Yohanesre moi wokainye. 12Yohanes bure koumi kiyae yeuyakauboke a kelewoumi heera meke nda heene Yahudi yun-jun kena okoi hororebe Allahle holona ro miyae Raei me kele u keleene menayorulembonde are huweimeyate, nane merau nebei yun-jun huwaimi a asasi konate hororebe ro miyae nenaeijae uwa mayoruleuboke. 13Rabuhine ban Allahle yenjo kayaayo nemene naei a bele Musa yae wali heere foloukokene a bele Wali Ondofolole naeise nulewainye meke Yohanes meuyakauboke heene. 14Nebei aerene, naei a borom, ‘Allahle yendo kayaalo Elia benen mende.’ Nebei a huluinye Eliale u mekai wanen ma Yohanes meke. 15Raei a elalere u bene nekenayembe!
16“Rahe rambun mae nda holona ro miyaere ahundebonde elerekonde? Nebei yo fa-fa rambun nai hei-sei anuwaunge roiboyate naei hokolo uneyaufe kaenaimi wanen waimi,
17‘Mai naeise meyae suling ranandebokebe,
nebeibe mayae bae okoi mo.
Meyae here rime wanenjekebe,
nebeibe mayae rime erimei mo.’
18Rabuhine ban Yohanes bure koumi kiyae meke bae raman bele bu bele nendon ban aneinye, nebeinye ro miyae yae elate, ‘Nda ro alo yae aungeboke.’ 19Nebeisa Reyae Allahle bokora mekale ro miyae uware yeubokale Kiyae raman bele bu bele nendon mae analene, ro miyae elate, ‘Ndi ro erenne, raman mali bu mali ro, pajakre u bulu-bulu buleyate yo bele ro miyae beko nebande mokoyate holona yo bele kahili awaikoke.’
“Allahle isaei hebaen bele ro miyae me foi u foi mokoyatene, erenate ro miyae yae naei foi naeise elenate.”
Allah Naei A Elewolere Ehakoyei Yo Yan Beko Hubanainyende
(Luk. 10:13-15)
20Na bere Yesus rambun emere-emere helende mokowole yo yoni-yonina nekate ro miyae nulu ekeiboi mo katene, Yesus huba raweuboke a elae hele naei naeise uwoumi, 21“Mayae Khorazim yona ro miyae bele Betsaida yona ro miyae bele beko bele hubanembe. Rabuhine ban rambun emere-emere mai yo yan nolone mokowale bewate ma na bere hele Tirus yone bele Sidon yone belene mokole yae, nendahina nda yo rime a kaikoube nane merau nulu kaimiboube. 22Nebeinye Reyae mare wamale, Allah ro miyaere me nommiyonde yane Tirus bele Sidon bele naei ehee bukulu fomammibonde, mayae ehee bukulu kaban sele kaembombe. 23Nane merau mayae Kapernaum yo ei bele molonayembe buma bele kolonayembere kaube! Nebei mekai ebei sele! Mayae nulu yo mahe yore omembombe. Rabuhine ban mai nolone rambun emere-emere mokowale ma na bere hele Sodom yone yaeikoube yae, nebei yo yoni-yoni nda ya bele na hebaen foi nekaimeube. 24Nebeibe Reyae mare wamale, Allah ro miyaere me nommiyonde yane Sodom yo naei ehee bukulu fomannebonde mare ehee bukulu kaban sele inyembe.”
Yesus Wali No Yeiboi Wali Nibi Yeumi
(Luk. 10:21-22)
25A weumikoke baeufoke heera Yesus nda mekai yae Naekore weunge, “Arai, bumana anare ikileubokae Ako, Ware mbaibe buma kaewale. Helen foi wawale, rabuhine ban Waei ako faeuko no nanemene isaei bele hebaen bele ro miyae naeisa nunne raufikae, nebeibe fa-fa wanen ro miyae isaei ban hebaen ban yore keleumibokae. 26Ako nebei mekai Wa kenare foi yae hubanae.”
27Yesus a weumi, “Raei Ako Allah nemene fomene Raei me einye kinyewoufe. Ro miyae hi yae ha yae Rare oroiboi Ako Allah nembai mo roufeboke. Nane merau hi yae ha yae Raei Ako Allahre oroiboi. Reyae na kelu nane merau Reyae elerebonde Akore yakaremibonde ro miyae bele mo Ako Allah royanne.
28“Mayae Musale walora wali heere foloukoke huluinye hakombombere relaunge aerene uwa yambi koloukembe ro miyae nanemene Raei bokore men. Reyae mare wali no yeiboi wali nibi isembe. 29Reyae wamale a hakombo, nane merau Raeisa meme isaeyengko. Rabuhine ban Reyae nime haba nane merau kena u ane nekeyale. Mai beko bakore faeinyerembombera kena foi u foi isembe. 30Raei a wamale hakombombere nime haba, mai baka ranna ransikamale na foma-foma hele.”
Actualmente seleccionado:
Matius 11: setDBL
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2020, Wycliffe Bible Translators, Inc. All rights reserved.