Mataayi 22
22
Avaanhu vano vakemelilue kʉ vʉtolani
1ɄYesu akavavʉʉla kange avavaha va vatekesi na vagojo va Vayahudi ifihwanɨkɨsio ifingi akati, 2“ɄVʉtwa vwa kʉkyanya vʉhwaniine nʉ ntwa jʉmonga jʉno alyalɨngʼhanisie ʉvʉtolani vwa mwanaake. 3Ʉntwa jʉla akavasuungʼha avavombi vaake kʉkʉvakemeela vano alyakutile kuuti viise kʉ vʉtolani, neke aveene vakakaana kulʉta.
4“Ʉntwa jʉla akasuungʼha kange avavombi avange, akavavʉʉla akati, ‘Lʉtagha kʉ vano nɨkakutile ʉvʉtolani, mʉvavʉʉle kuuti, “Lolagha, nɨlɨngʼhanisie ifiinu fyoni ifya vʉtolani. Nɨbudile ingʼhambako ni ndama sango sino sineniipe fiijo. Mwise kʉ vʉtolani!” ’ 5Neke aveene navakavɨkɨla mwojo, vakalʉta kʉ mbombo saave: jʉmonga akalʉta kʉ mʉghʉnda ghwake, ʉjʉnge akalʉta kughʉsia ifiinu fyake. 6Avange vano valyakemelilue vakavakola avavombi vala, vakavatova kyongo na kʉkʉvabuda.
7“Ʉntwa jʉla ye apʉliike sino sivombiike kʉ vavombi vaake, akakalala fiijo, akasuungʼha avasikali vaake kulʉta kʉkʉvabuda avabudi vala na kunyaanya lwoni ɨlɨkaaja lyave. 8Pe akavavʉʉla avavombi vaake akati, ‘Ʉlʉlio lwa vʉtolani lʉlɨngʼhanɨsivue, neke vano nɨkakutile ʉvʉtolani, navanoghiile kange kukwisa kʉ vʉtolani. 9Lɨno, lʉtagha mʉ mapuulo, mʉvavʉʉle avaanhu vooni vano mutangʼhana navo kuuti viise kʉ vʉtolani.’ 10Avavombi vala vakalʉta mʉ masevo na mʉ mapuulo, vakavakemeela na kʉkʉvaleeta avaanhu vooni vano vakava vitangʼhana navo, avanofu na vahosi. Avaanhu vinga vakiisa, vakamema mʉ nyumba ɨja vʉtolani.
11“Neke ʉntwa jʉla ye ikwingila mʉ nyumba jɨla kuuti alole avahesia vaake, akamwagha ʉmuunhu jʉmonga naafwalile ʉmwenda ghʉno ghʉnoghiile mʉ vʉtolani. 12Akamposia akati, ‘Nyalʉkolo, lwandaani ghwingile muno kɨsila kuuva nʉ mwenda ghʉno ghʉnoghiile mʉ vʉtolani?’ Ʉmuunhu jʉla akakunua ɨkya kʉjova. 13Pepano ʉntwa jʉla akavavʉʉla avavombi vaake akati, ‘Nkʉnge ʉmuunhu ʉjʉ amaghʉlʉ na mavoko, mʉntaaghe kʉnji kʉ ngʼhiisi. Ʉkuo kwe ilɨlagha na kugwegwenʉla amiino vwɨmɨla ʉvʉvafi ʉvʉkome vʉno alɨ navwo.’ ” 14ɄYesu pe akavavʉʉla akati, “Vano vakemelilue nʉ Ngʉlʉve kukwingila mʉ Vʉtwa vwake vinga, neke avasalʉlua vadebe.”
Kusonga ɨsongo kwa Kaisali
(Malɨka 12:13-17; Lʉʉka 20:20-26)
15Pambele aVafalisayi vakavʉʉka pala, vakalʉta kupʉlɨngʼhana vwɨmɨla ɨkɨteghe ɨkya kʉnkola ʉYesu mʉ masio ghaake. 16Pe vakasuungʼha kwa Yesu avavʉlanɨsɨvua vaave palɨkɨmo na vavɨngɨlɨli va ntwa ʉHelode.#22:16 Vavɨngɨlɨli va ntwa ʉHelode: Kyale kɨpʉgha kya Vayahudi vano vakatangagha ʉvʉtwa ʉvwa Kɨlooma, kange vaale vamanyaani va ntwa ʉHelode ʉAntipa. Avaanhu ava navalyale vʉmanyaani na Vafalisayi, ʉlwene valyakongʼhanile palɨkɨmo na Vafalisayi mʉ mhola ɨja kʉmʼbuda ʉYesu. Avavʉlanɨsɨvua vala vakamposia vakati, “Ghwe Mʼbʉlanɨsi, tʉkagwile kuuti ʉve ʉlɨ muunhu ghwa kyangʼhaani, ghuvʉlanɨsia mʉ vwakyangʼhaani sino ilonda ʉNgʉlʉve. Kange, naghukwoghopa nambe muunhu vwɨmɨla ʉvʉvaha vwake. 17Lɨno tʉvʉʉle, ghuvona ndaani! Indaghɨlo sa Moose sikwɨtɨkɨsia kusonga ɨsongo kwa Kaisali?”#22:17 Kaisali, alyale ghwe ntwa ʉmʼbaha ʉghwa Valooma. Ɨmba kʉ Vʉghanʉle vwa Masio aMahesia.
18Neke ʉYesu akakagʉla amasaaghe ghaave amaviivi, akavamʉla akati, “Mwe vakedʉsi ʉmue, kɨki mʉkʉngela? 19Mʉhʉfie ɨhela jɨno mwa musonga ɨsongo.” Vakamʉletela ɨdinali jɨmo. 20Akavaposia akati, “Ɨkɨhwani nʉ vʉlembe fino fili mʉ hela ɨjɨ fyani?” 21Vakamwamʉla vakati, “Fya Kaisali!” Pepano ʉYesu akavavʉʉla akati, “Ifya Kaisali, mʉmpelaghe ʉKaisali; ifya Ngʉlʉve, mʉmpelaghe ʉNgʉlʉve.” 22Ye vapʉliike ʉlwamʉlo lwa Yesu, vakadegha kyongo. Vakamʉleka pala, vakavʉʉka vilʉta.
Ɨmhola ɨja lʉsyʉko lwa vafue
(Malɨka 12:18-27; Lʉʉka 20:27-40)
23Ɨkɨghono kɨla kɨla, aVasadukayi vamonga vakalʉta kwa Yesu. AVasadukayi kye kɨpʉgha mʉ lwɨtɨko lwa Kɨyahudi vano viiti nakwelʉle ʉlʉsyʉko lwa vafue. Vakamposia vakati, 24“Ghwe Mʼbʉlanɨsi, ʉMoose alyalembile ʉlʉlaghɨlo kuuti, nave ʉmuunhu afwile kɨsila mwana, ʉnnine anoghiile kuhaala ʉmfwɨle jʉla, kuuti ampapɨle avaana ʉnyakʉsila.#Similisio sa Ndaghɨlo 25:5-6 25Lɨno, kwevalyale avanamuunhu lekelalʉbale. Ʉghwa kwanda akatoola ʉnʼdala, akafua kɨsila kʉleka mwana. Ʉghwa vʉvɨlɨ akamhaala ʉmfwɨle jʉla, 26ghwope akafua kɨsila kʉleka mwana. Ghwope ʉghwa vʉtatu lʉkavombeka vʉle vʉle kuhanga kufika ʉghwa lekelalʉbale. 27Pambele, ghwope ʉnʼdala ʉmfwɨle, akafua. 28Lɨno, ɨkɨghono ɨkya kʉsyʉka avaanhu vooni, ʉmfwɨle jʉla iliiva nʼdala ghwani mʉ vala lekelalʉbale? Ʉlwakʉva vooni valyantolile!”
29ɄYesu akavamʉla akati, “Musova, ʉlwakʉva namʉkagwile aMalembe aMɨmɨke, nambe ingʉfu sa Ngʉlʉve. 30Ʉlwakʉva avafue valaava visyʉka, nakwekʉlaava kutoola nambe kutolua, viliiva ndavʉle avanyamhola ava kʉkyanya. 31Neke vwɨmɨla kusyʉka avafue, namwɨmbile mʉ Malembe aMɨmɨke sino ʉNgʉlʉve alyavavʉlile avakʉʉlʉ viinu kuuti, 32‘Ʉne neene Ngʉlʉve ghwa Abulahamu, Ngʉlʉve ghwa Isaka, Ngʉlʉve ghwa Yakovo.’#Kuhʉma 3:6#22:32 Ʉne neene Ngʉlʉve ghwa Abulahamu, Ngʉlʉve ghwa Isaka, Ngʉlʉve ghwa Yakovo: Avakʉʉlʉ ava mwe kɨvʉmbʉkiile ɨkɨsina ɨkya Vayahudi, napano valyafwile, vajiighe vʉʉmi pamaaso gha Ngʉlʉve. ɄYesu akavavʉʉla kange kuuti, ʉNgʉlʉve naNgʉlʉve ghwa vafue, looli Ngʉlʉve ghwa vʉʉmi!” 33Avaanhu mʉ mapʉgha ghala ye vapʉliike imbʉlanɨsio saake, vakadegha kyongo.
Ʉlʉlaghɨlo ʉlʉvaha
(Malɨka 12:28-34; Lʉʉka 10:25-28)
34AVafalisayi ye vapʉliike kuuti ʉYesu avamwile aVasadukayi kuhanga vakunilue ɨkya kʉjova, vakakongʼhaana palɨkɨmo, vakalʉta kwa Yesu. 35Ʉmʼbʉlanɨsi jʉmonga ʉghwa ndaghɨlo sa Moose mʉ Vafalisayi vala, akamʉghela ʉYesu, akamposia akati, 36“Ghwe Mʼbʉlanɨsi, lʉlaghɨlo lʉlɨku lʉno lʉvaha kukila indaghɨlo sooni?” 37ɄYesu akamwamʉla akati, “ ‘Ʉmʉghanaghe ʉMʉtwa ʉNgʉlʉve ghwako nʉ mwojo ghwako ghwoni, ni ngʉfu saako sooni nʉ lʉhala lwako lwoni!’#Similisio sa Ndaghɨlo 6:5 38Ʉlʉ lwe lʉlaghɨlo ʉlʉvaha, kange lwe lwa kwanda. 39Ʉlʉlaghɨlo ʉlwa vʉvɨlɨ lʉno lʉlɨngʼhiine nʉ lwa kwanda, lwe ʉlʉ, ‘Ʉmʉghanaghe ʉnnino ndavʉle ghukughana jʉʉve.’#Valeevi 19:18 40Indaghɨlo sooni isa Moose ni mbʉlanɨsio isa vavɨli sihʉma mʉ ndaghɨlo isi ivɨlɨ.”
Ʉlʉposio vwɨmɨla ʉKɨlɨsite
(Malɨka 12:35-37; Lʉʉka 20:41-44)
41AVafalisayi ye vajiighe vakongʼhanile palɨkɨmo, ʉYesu akavaposia akati, 42“Asi, mwiti kɨki vwɨmɨla ʉKɨlɨsite? Mwiti mwana ghwani?” Vakamwamʉla vakati, “Mwana ghwa Davɨdi.” 43ɄYesu akavaposia akati, “Nave fye lʉlɨvuo, lwandaani ʉDavɨdi mʉ ngʉfu isa Mhepo ghwa Ngʉlʉve, ɨkʉntambʉla ʉKɨlɨsite, ‘Mʉtwa’? Pano iiti,
44‘ɄMʉtwa ʉNgʉlʉve alyamʼbʉlile ʉMʉtwa ghwango,
“Ʉʉve nʉ vʉtavʉlɨlua palɨkɨmo nuune,#22:44 Ʉʉve nʉ vʉtavʉlɨlua palɨkɨmo nuune: Mʉ Kɨyunaani lɨlembilue, Ghukale kʉ lʉvoko lwango ʉlwa kʉndio.
kuhanga nɨkʉtange ʉvaleme avalʉgʉ vaako,
ʉvateme.” ’#22:44 Kuhanga nɨkʉtange ʉvaleme avalʉgʉ vaako, ʉvateme: Mʉ Kɨyunaani lɨlembilue, kʉkʉvavɨɨka avalʉgʉ vaako paasi pa maghʉlʉ ghaako (Sabuli 110:1).
45“Lɨno, nave ʉDavɨdi ɨkʉntambʉla ʉKɨlɨsite iiti, Mʉtwa, pe ʉKɨlɨsite ivisagha mwanaake ndaani?” 46Nakwealyale ʉmuunhu jʉno akaghela kukwamʉla ɨlɨsio. Kuhʉma ʉnsiki ʉghuo, naalyandiile muunhu kʉkʉmposia kange.
Actualmente seleccionado:
Mataayi 22: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.