Mataayi 15
15
ɄYesu ikaana imbʉlanɨsio vwɨmɨla inyiiho isa vakʉʉlʉ
(Malɨka 7:1-13)
1AVafalisayi vamonga na vavʉlanɨsi va ndaghɨlo kuhʉma kʉ Yelusalemu, vakalʉta kwa Yesu, vakamposia vakati, 2“Kɨki avavʉlanɨsɨvua vaako navivɨngɨlɨla inyiiho isa vakʉʉlʉ viitu? Ʉlwakʉva vilia ɨkyakʉlia kɨsila kwogha amavoko ndavʉle lʉnoghiile!” 3ɄYesu akavamʉla akati, “Kɨki na jʉmue mudeenya indaghɨlo sa Ngʉlʉve vwɨmɨla kuvɨngɨlɨla inyiiho siinu? 4ɄNgʉlʉve alyatiile, ‘Ʉmwoghopaghe ʉvaaso nʉ mamaajo.’#Kuhʉma 20:12; Similisio sa Ndaghɨlo 5:16 Kange alyatiile, ‘Ʉmuunhu jʉno ɨkʉmʉligha ʉviise nambe ʉngʼina, anoghiile kubudua.’#Kuhʉma 21:17; Valeevi 20:9 5Neke ʉmue muvʉlanɨsia kuuti, ʉmuunhu ndepoonu ɨkʉmʼbʉʉla ʉviise nambe ʉngʼina kuuti, ‘Kɨno nɨveele nɨnoghiile kʉkʉkʉtanga, nɨhʉmisie lɨtekelo kwa Ngʉlʉve.’ 6Mʉ ʉluo, muuva mwiti, ʉmuunhu naangamwoghopaghe ʉviise nambe ʉngʼina. Ʉkuo kwe kʉbenapʉla ɨlɨsio lya Ngʉlʉve vwɨmɨla kuvɨngɨlɨla inyiiho siinu. 7Mwe vakedʉsi ʉmue! ɄYesaya alyavɨlile se seene vwɨmɨla ʉmue kuuti,
8‘Avaanhu ava vikʉnginia pa mʉlomo,
neke amoojo ghaave ghalɨ kʉtali nuune.
9Vikʉnyɨmɨka, neke ʉlwɨmɨko lwave lʉsila lʉvʉmbʉlɨlo,
ʉlwakʉva vivʉlanɨsia indaghɨlo sa vaanhu.’ ”#Yesaya 29:13
Lʉno lʉkʉmʼbɨɨka ʉmuunhu kuuva mʉlamafu
(Malɨka 7:14-23)
10Pepano ʉYesu akalɨkemeela ɨlɨpʉgha lya vaanhu, akavavʉʉla akati, “Mʉpʉlɨkɨsie vʉnofu, mʉlʉtangʼhanie! 11Ifiinu fino ʉmuunhu itwala mʉ mʉlomo, nafye fino fikʉmʼbɨɨka kuuva mʉlamafu. Looli, fino fihʉma mʉ mʉlomo, fye fino fikʉmʼbɨɨka ʉmuunhu kuuva mʉlamafu.”
12Pambele avavʉlanɨsɨvua vaake vakalʉta pa mwene vakamʼbʉʉla vakati, “Ʉkagwile kuuti aVafalisayi ye vapʉliike amasio ghano ʉjovile, vakaliile kyongo?” 13ɄYesu akamʉla akati, “Amamela ghooni ghano ʉNhaata ʉghwa kʉkyanya naalyavyalile ʉmwene, ikulula. 14Mʉvaleke, avuo valongosi vabofu amaaso vilongosia avabofu. Nave ʉmʼbofu ɨkʉmʉlongosia ʉmʼbofu ʉnʼjaake, vooni ve vavɨɨlɨ vighwɨlɨla mʉ liina!”
15Pe ʉPeteli akamʼbʉʉla akati, “Ʉtʉghanʉlɨle ɨkɨhwanɨkɨsio ɨkio.” 16ɄYesu akamʉla akati, “Asi, na jʉmue namʉkʉlʉtangʼhania? 17Namukagʉla kuuti kɨno ʉmuunhu itwala mʉ mʉlomo, kilʉta mʉ lɨleme na kuhʉma kʉnji? 18Looli fino fihʉma pa mʉlomo, fihʉma mʉ mwojo, ifio fye fino fikʉmʼbɨɨka ʉmuunhu kuuva mʉlamafu. 19Nijova enendɨɨkɨ, ʉlwakʉva mʉ mwojo mwe muno ghihʉma amasaaghe amaviivi, ʉvʉbudi, ʉvʉvwafu, ʉvʉghendamwalu, ʉvʉhɨɨji, ʉvwolesi vwa vʉdesi na maligho. 20Isio, se sino sikʉmʼbɨɨka ʉmuunhu kuuva mʉlamafu. Neke kulia kɨsila kwogha amavoko nakʉkʉmʼbɨɨka ʉmuunhu kuuva mʉlamafu.”
Ʉlwɨtɨko ʉlwa mʉkɨjʉʉva ʉNkananayo
(Malɨka 7:24-30)
21Pambele ʉYesu akavʉʉka pala, akalʉta imbale isa lɨkaaja ɨlya Tiilo nɨ lya Sidoni. 22Ʉkuo ʉmʉkɨjʉʉva jʉmonga ʉNkananayo jʉno alyale ikukala imbale isio, akiisa kwa Yesu, akakemeela fiijo akati, “Ghwe Mʉtwa, Mwana ghwa Davɨdi, ʉsʉngʉkɨle! Ʉmwalɨvango ipumuka kyongo nɨ lɨpepo.” 23Neke ʉYesu naakamʉla kɨmonga. Avavʉlanɨsɨvua vaake vakalʉta pa mwene vakamʼbʉʉla vakati, “Ʉmʼbʉʉle alʉtaghe, ʉlwakʉva ɨkʉtʉsingula.” 24ɄYesu akamwamʉla ʉmʉkɨjʉʉva jʉla akati, “ɄNgʉlʉve asungʼhile ʉne kʉkʉvapoka aVaisilaeli vano valɨ ndavʉle ingʼholo sino sisovile.”
25Neke ʉmʉkɨjʉʉva jʉla akaveela pa Yesu, akafughama, akansʉʉma akati, “Ghwe Mʉtwa, nisʉʉma ʉnhange!” 26ɄYesu akamwamʉla akati, “Nalʉnono kutoola ɨkyakʉlia ɨkya vaana na kʉkʉsitosekesia imbua.” 27Ʉmʉkɨjʉʉva jʉla akati, “Se seene Mʉtwa, poope nasi mbua sasilia ifimenyʉkɨla fino fisangʉka paasi pa meesa sa vatwa vaave.” 28ɄYesu akamwamʉla akati, “Ghwe mʉkɨjʉʉva ʉve, ʉlwɨtɨko lwako lʉvaha! Lʉvombeke kʉlyʉve ndavʉle ghulonda.” Ʉnsiki ghʉghuo, ʉmhɨnja jʉla akasooka.
ɄYesu ɨkʉvasosia avatamu vinga
29ɄYesu akavʉʉka pala, akalʉta akakila mʉlʉbale mʉ lɨsʉmbe ɨlya Galilaya. Pe akatogha pa kɨdunda, akikala. 30Amapʉgha gha vaanhu vakalʉta pa mwene, vitwala avalema amaghʉlʉ, avabofu amaaso, avakɨnuunu na vatamu avange vinga, vakavavɨɨka avatamu vala pa maghʉlʉ ghaake, ʉmwene akavasosia. 31Avaanhu mʉ lɨpʉgha lɨla vakadegha kyongo kuvona avakɨnuunu vijova, avalema amaghʉlʉ vighenda, avabofu amaaso vilola na valema avange visooka. Pe vakamʉghinia ʉNgʉlʉve ʉghwa Vaisilaeli.
ɄYesu ilɨsia avaanhu imbilima ine
(Malɨka 8:1-10)
32Pepano ʉYesu akavakemeela avavʉlanɨsɨvua vaake, akavavʉʉla akati, “Nɨkʉvavonela ɨkɨsa avaanhu ava, ʉlwakʉva vikalile nuune ifighono fitatu, lɨno vasila kyakʉlia. Nanilonda pikʉvatavʉla valʉtaghe nɨ njala, ʉlwakʉva kyavitenga mʉ sɨla.”
33Avavʉlanɨsɨvua vaake vakamʼbʉʉla vakati, “Kʉno tʉlɨ kwe lʉnyika, kʉsila kɨmonga, ndepoonu tʉkʉghaagha kʉʉghi amakate agha kʉkwɨla avaanhu vooni ava?” 34ɄYesu akavaposia akati, “Mʉlɨ na makate ghalɨngi?” Vakamwamʉla vakati, “Ghalɨ lekelalʉbale nʉ tʉsamaki tʉdebe.” 35ɄYesu akavavʉʉla avaanhu kuuti vikale paasi. 36Pe akatoola amakate ghala lekelalʉbale nʉ tʉsamaki tʉla, akamhongesia ʉNgʉlʉve, akamenyʉlania, akavapeela avavʉlanɨsɨvua vaake, neke voope vakavaghavɨla avaanhu vala. 37Avaanhu vooni vakalia, vakikuta. Avavʉlanɨsɨvua vakakongʼhania ifisighasi, fikamema indɨɨlo lekelalʉbale. 38Avaanhu vano valyaliile, valyale avakɨnhaata veene imbilima ine, kɨsila kʉvala avakɨjʉʉva na vaana. 39Pepano ʉYesu akavatavʉla avaanhu vala kuuti valʉtaghe, ʉmwene akapanda ɨngalava, akalʉta imbale isa lɨkaaja ɨlya Magadani.
Actualmente seleccionado:
Mataayi 15: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.