Yohani 9
9
ɄYesu ɨkʉnsosia ʉmʼbofu amaaso
1Ɨkɨghono kɨmonga, ʉYesu ye ighenda, alɨ na vavʉlanɨsɨvua vaake, akamwagha ʉmuunhu jʉmonga ʉmʼbofu amaaso kuhʉma iholua. 2Avavʉlanɨsɨvua vala vakamposia ʉYesu vakati, “Ghwe Mʼbʉlanɨsi, ʉmuunhu ʉjʉ alyaholilue mʼbofu vwɨmɨla inyɨvi saani? Asi, vwɨmɨla inyɨvi saake, vwɨmɨla inyɨvi isa vapaafi vaake?”#9:2 AVayahudi valyale visaagha kuuti ʉvʉbofu, nʉ vʉlema ʉvʉnge fihʉma kwa Ngʉlʉve vwɨmɨla inyɨvi sa vaanhu, kwekʉti ʉmuunhu jʉjuo ʉnya vʉlema, iiva avombile inyɨvi nambe ʉmuunhu jʉmonga mʉ vakʉʉlʉ vaake alyavombile inyɨvi (Kuhʉma 20:5). 3ɄYesu akavamʉla akati, “Ʉmuunhu ʉjʉ naalyaholilue mʼbofu vwɨmɨla inyɨvi saake, nambe vwɨmɨla inyɨvi isa vapaafi vaake. Ʉlwene alyaholilue mʼbofu, neke ingʉfu sa Ngʉlʉve sivoneke kukilila ʉmwene. 4Tulondua kuvomba ɨmbombo ɨja Ngʉlʉve jʉno asungʼhile, ʉlwakʉva jɨjiighe mwisi. Ɨkɨlo jikwisa pano ʉmuunhu naangavombe ɨmbombo ɨjɨ. 5Pano nɨjiighe mʉ ɨɨsi, nɨlɨ lʉmuli kʉ vaanhu vooni.”
6ɄYesu ye ajovile isio, akafuunya amati paasi, akakanda akatope na mati ghala, akapaka amaaso gha mʼbofu jʉla. 7Akamʼbʉʉla akati, “Lʉtagha ghwoghe kʉ maaso mʉ lɨlamba ɨlya Siloamu.” Ɨlɨtavua ɨlɨ Siloamu kwekʉti jʉno asungʼhilue. Pepano akalʉta kukwogha kʉ maaso, akagomoka kʉ kaaja kwa mwene ilola.
8Avabadɨngʼhani vaake na vange vooni vano valyale vikʉmwagha ʉlʉtasi isʉʉma ifiinu, vakava vikuposania viiti, “Asi, ʉmuunhu ʉjʉ naghwe jʉno ikalagha pamonga isʉʉma ifiinu?” 9Vamonga vakati, “Ghwe mwene.” Avange vakati, “Naghwe mwene, looli ahwaniine fiijo nʉ mwene.” Neke ʉmwene akavavʉʉla akati, “Neene!” 10Pe vakamposia vakati, “Lwava ndaani kuhanga amaaso ghaako ghilola?” 11Ʉmwene akavamʉla akati, “Ʉmuunhu jʉno itambʉlua Yesu, akanda akatope amhaka amaaso, pe ambʉʉla aati, ‘Lʉtagha ghwoghe kʉ maaso mʉ lɨlamba ɨlya Siloamu.’ Nalʉta, noogha, ye navonagha nilola.” 12Avaanhu vala vakamposia vakati, “Ʉmuunhu ʉjuo alɨ kʉʉghi?” Ʉmwene akavamʉla akati, “Nwisi.”
AVafalisayi vikʉmposia ʉmʼbofu jʉno asokile
13Pe avaanhu vala vakantwala kʉ Vafalisayi ʉmuunhu jʉla jʉno alyale mʼbofu. 14Ɨkɨghono kɨno ʉYesu alyakandile akatope na kʉkʉnsosia ʉmʼbofu jʉla, kɨlyale kɨghono kya Sabati. 15Pe aVafalisayi vakamposia ʉmuunhu jʉla vakati, “Asi, ʉsokile ndaani ʉvʉbofu vwako?” Akavamʉla akati, “Ʉmuunhu jʉmonga amhaka akatope amaaso, neke noogha, lɨno nilola.”
16Pepano aVafalisayi vamonga vakati, “Ʉmuunhu jʉno avombile ʉluo naahʉmile kwa Ngʉlʉve, ʉlwakʉva ivomba mʉ kɨghono ɨkya Sabati lʉno nalwɨtɨkɨsivue mʉ ndaghɨlo.” Neke avange vakati, “Ʉmuunhu ʉmhosi naangavombe ifidegho ifi fino fihʉfia ifivalɨlo kʉ vaanhu.” Mʉ ʉluo vakalekengʼhana.
17Pe aVafalisayi vakamposia kange ʉmuunhu jʉla vakati, “Asi, ʉve ghwiti ndaani vwɨmɨla ʉmuunhu jʉno akʉsosisie amaaso?” Ʉmwene akavamʉla akati, “Ʉne niiti ʉmuunhu jʉla mʼbɨli ghwa Ngʉlʉve.” 18Avalongosi va Vayahudi vala navalyɨtiike kuuti ʉmuunhu jʉla alyaholilue mʼbofu, neke lɨno asokile ilola. Pe vakavakemeela avapaafi vaake, 19vakavaposia vakati, “Asi, ʉmuunhu ʉjʉ jʉno mwiti alyaholilue mʼbofu, mwana ghwinu? Asokile ndaani ʉvʉbofu vwake?” 20Avapaafi vaake vakavamʉla vakati, “Ʉsue tʉkagwile kuuti ʉjʉ ghwe mwana ghwitu, alyaholilue mʼbofu. 21Neke natʉkagwile atengwile ndaani kulola. Kange, najʉ muunhu jʉno ansosisie amaaso, natʉmmanyile. Mʉmposie, muunhu nʼgoyo, ɨkʉvavʉʉla jʉjuo.” 22Avapaafi vaake valyajovile ʉluo, ʉlwakʉva valyale vikʉvoghopa avalongosi va Vayahudi. Avalongosi avuo valyɨtɨngʼhiine kuuti, ʉmuunhu jʉno ikwɨtɨka kuuti ʉYesu ghwe Kɨlɨsite, vikʉnʼdaga mʉ masinagogi ghaave. 23Fye nambe avapaafi vala valyatiile, “Ʉmwene muunhu nʼgoyo, mʉmposie jʉjuo.”
24Avalongosi va Vayahudi vakankemeela ʉlwa vʉvɨlɨ ʉmuunhu jʉla jʉno alyale mʼbofu, vakamʼbʉʉla vakati, “Jova isa kyangʼhaani pamaaso gha Ngʉlʉve! Ʉsue tʉkagwile kuuti ʉmuunhu ʉjuo jʉno akʉsosisie, mhosi.” 25Ʉmwene akavamʉla akati, “Kuuti ʉmuunhu ʉjuo mhosi, ʉne nanɨkagwile, looli nɨkagwile ɨkɨɨnu kɨmo kyene, nɨlyale mʼbofu, lɨno nilola.” 26Vakamposia kange vakati, “Asi, ʉmuunhu ʉjuo avombile kɨki kusosia amaaso ghaako?” 27Ʉmwene akavamʉla akati, “Ʉne nɨvavʉlile, ʉmue namulonda kʉkʉmhʉlɨka. Kɨki mulonda nɨvavʉʉle kange? Neke na jʉmue mulonda kuuva vavʉlanɨsɨvua vaake?”
28Pe avalongosi ava Vayahudi vakamʼbenapʉla vakanʼjova vakati, “Ʉve veeve mʼbʉlanɨsɨvua ghwake! Ʉsue tʉlɨ vavʉlanɨsɨvua va Moose. 29Tʉkagwile kuuti ʉNgʉlʉve alyajovile nʉ Moose, neke ʉmuunhu ʉjuo, ʉYesu, natʉnkagwile na kʉno ahʉmile.” 30Ʉmwene akavamʉla akati, “Isi sa kʉdegha! Namʉnkagwile kʉno ahʉmile ʉmuunhu jʉno asosisie amaaso ghango! 31Tʉkagwile kuuti ʉNgʉlʉve naipʉlɨka inyifuunyo isa vahosi,#Sabuli 34:15-16; Mesali 15:29 looli ɨkʉmpʉlɨka ʉmuunhu jʉno ɨkʉmwɨmɨka na kuvomba isa vughane vwake. 32Kuhʉma ʉNgʉlʉve ipela ɨɨsi, natʉghelile kupʉlɨka nambe lʉsiku kuuti ʉmuunhu jʉmonga ansosisie ʉmuunhu jʉno aholilue mʼbofu! 33Ʉmuunhu ʉjuo ale aave naahʉmile kwa Ngʉlʉve, naale ivomba isi.” 34Aveene vakamwamʉla vakati, “Ʉve ʉlyaholilue mʉ vʉhosi, ghulonda pikʉtʉvʉlanɨsia ʉsue?” Pe vakanʼdaga mʉ sinagogi.
Ʉvʉbofu ʉvwa mʉ mwojo
35ɄYesu akapʉlɨka kuuti ʉmuunhu jʉla vanʼdagile mʉ sinagogi. Pe akalondagha kutangʼhana naghwo. Ye amwaghile, akamposia akati, “Ʉve ghʉkʉmwɨtɨka ʉMwana ghwa Muunhu?” 36Ʉmuunhu jʉla akamwamʉla akati, “Ghwe ntwa, ghwe veeni ʉMwana ghwa Muunhu, nɨmwɨtɨke?” 37ɄYesu akamwamʉla akati, “Ʉmwaghile, ʉmuunhu ʉjuo ghwe jʉno ijova nuuve lɨno.” 38Ʉmuunhu jʉla akati, “Nikwɨtɨka, Mʉtwa!” Pe akamwɨmɨka ʉYesu.
39ɄYesu akati, “Ʉne nisile mʉ ɨɨsi kuhɨgha avaanhu, kuuti avabofu amaaso, valolaghe; vano vikuvona vilola, vaave vabofu amaaso.” 40AVafalisayi vamonga vano pwevalyale pala, ye vapʉliike imhola isio, vakamposia vakati, “Asi, kwekʉti ʉsue tʉlɨ vabofu?” 41ɄYesu akavamʉla akati, “Mwale mʉʉve vabofu, namwale muuva vahosi. Neke ʉlwakʉva mwiti mulola, mujigha nʉ vʉhosi vwinu.”
Actualmente seleccionado:
Yohani 9: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.