Yohani 7
7
ɄYesu ilʉta kʉ kɨkulukulu ɨkya fyeve kʉ Yelusalemu
1Pambele ʉYesu akalʉta mʉ fikaaja ifya mʉ kɨghavo ɨkya Galilaya. Naakalondagha kulʉta kʉ kɨghavo ɨkya Yudea, ʉlwakʉva avalongosi va Vayahudi vakalondagha kʉkʉmʼbuda. 2Ʉnsiki ʉghwa kɨkulukulu ɨkya Vayahudi, ɨkɨkulukulu ɨkya fyeve#7:2 Ɨkɨkulukulu ɨkya fyeve: Kyale kɨkulukulu vwɨmɨla ʉmpeto ʉghwa sabibu ni seituni, na kusʉʉma ɨfula ɨja mwaka ghʉno ghukwisa. Pano vakɨmɨkagha ɨkɨkulukulu ɨkio, vakikalagha mʉ fyeve fino fijengilue na matʉndʉ agha mapiki, kukʉmbʉka vʉle avakʉʉlʉ vaave valyaghendile kʉ lʉkʉve amaaka fijigho fine (Valeevi 23:33-36, 39-43; Similisio sa Ndaghɨlo 16:13-16). ghʉlyale piipi kufika. 3Avanuuna va Yesu vakamʼbʉʉla ʉYesu vakati, “Lɨno, ʉvʉʉke apa, ʉlʉte kʉ kɨghavo ɨkya Yudea kuuti avavɨngɨlɨli vaako vafyaghe ifidegho fino ghuvomba. 4Ʉmuunhu jʉno ilonda kukagʉlɨka, naivomba imbombo saake kʉ vʉsyefu. Lɨno, ʉlwakʉva ghuvomba isi sooni, ghuhʉfie kʉ vaanhu vooni.” 5Avanuuna valyajovile enendɨɨkɨ, ʉlwakʉva voope navalyamwɨtiike kuuti ghwe Kɨlɨsite.
6Pe ʉYesu akavavʉʉla akati, “Ʉnsiki ghwango ʉghwa kʉlʉta kʉ Yudea ghʉkyale pifika, looli ʉmue ndepoonu mulʉta amasiki ghooni. 7Avaanhu va mʉ ɨɨsi muno navangavakalalɨle ʉmue, looli vikʉngʼhalalɨla ʉne, ʉlwakʉva nɨkʉvavʉʉla kuuti, sino vivomba mbiivi. 8Ʉmue lʉtaghi kʉ kɨkulukulu ɨkio. Ʉne nanilʉta kʉ kɨkulukulu, ʉlwakʉva ʉnsiki ghwango ghʉkyale pifika.” 9ɄYesu ye ajovile isio, akajigha mʉ kɨghavo ɨkya Galilaya.
10Neke avanuuna ye valʉtile kʉ Yelusalemu kʉ kɨkulukulu, ghwope ʉYesu akalʉta, neke akalʉta kɨsyefu, kɨsila kukuhʉfia kʉ vaanhu. 11Kʉ kɨkulukulu ʉkuo, avalongosi va Vayahudi vakava vikʉmʉlonda ʉYesu, viposia kʉ vaanhu viiti, “Alɨ kʉʉghi ʉmuunhu jʉla?” 12Avaanhu vinga mʉ lɨpʉgha lɨla, vakava vikujovasia, vamo viiti, “Ʉmuunhu ʉjuo nnofu,” avange viiti, “Ndali! Ʉmuunhu ʉjuo isofia avaanhu.” 13Neke nakwealyale ʉmuunhu jʉno alyale ijova imhola sa Yesu pa vʉvalafu, ʉlwakʉva vakoghopagha avalongosi va Vayahudi.
ɄYesu ivʉlanɨsia avaanhu mʉ nyumba ɨnyɨmɨke ɨja kufunyila
14Pakate pa fighono ifya kɨkulukulu, ʉYesu akingila mʉ lʉvɨɨka ʉlwa nyumba ɨnyɨmɨke ɨja kufunyila, akatengʉla kuvʉlanɨsia avaanhu. 15Avalongosi va Vayahudi vakava videgha, viiti, “Ʉmuunhu ʉjʉ akagwile ndaani isi, kɨsila kwɨmba?” 16Pepano ʉYesu akavavʉʉla akati, “Imbʉlanɨsio sino nivʉlanɨsia nasango, looli sihʉmile kwa jʉno asungʼhile. 17Ʉmuunhu jʉno ilonda kuvomba isa vughane vwa Ngʉlʉve, ikagʉla kuuti imbʉlanɨsio isi sihʉmile kwa Ngʉlʉve au nijova mʉ vʉtavʉlɨlua vwango jʉʉne. 18Ʉmuunhu jʉno ijova mʉ vʉtavʉlɨlua vwake jʉjuo, ilonda avaanhu vamʉghiniaghe. Neke ʉmuunhu jʉno ilonda avaanhu vamʉghiniaghe jʉno ansungʼhile, ʉjuo ijova isa kyangʼhaani, naijova isa vʉdesi.”
19ɄYesu akafijovagha iiti, “Mʉkagwile kuuti ʉMoose alyavapeliile indaghɨlo avakʉʉlʉ viinu. Neke nakwale nambe jʉmo pakate palyʉmue jʉno ivɨngɨlɨla indaghɨlo isio. Lɨno, kɨki mulonda pikʉmbuda?” 20Avaanhu mʉ lɨpʉgha lɨla vakamwamʉla vakati, “Ʉlɨ nɨ lɨpepo ʉve! Ghwe veeni jʉno ilonda pikʉkʉbuda?” 21ɄYesu akavamʉla akati, “Ʉne nɨkavombile ɨkɨdegho mʉ kɨghono ɨkya Sabati,#7:21 Ʉne nɨkavombile ɨkɨdegho mʉ kɨghono ɨkya Sabati: ɄYesu ijova ɨmhola ɨja kʉnsosia ʉntamu kʉ lɨlamba ɨlya Betisaida, mʉ kɨghono ɨkya Sabati (Yohani 5:1-15). ʉmue mweni mʉkakenyemʉka. 22ɄMoose alyalaghiile kuvomba ɨkɨvʉngo ɨkya kʉdumula ɨngola ɨja kɨdɨɨmi#7:22 Ɨkɨvʉngo ɨkya kʉdumula ɨngola ɨja kɨdɨɨmi: Ɨmba ɨlɨsio Kɨvʉngo ɨkya kʉdumula ɨngola ɨja kɨdɨɨmi kʉ Vʉghanʉle vwa Masio aMahesia. avaana viinu. Ʉlʉlaghɨlo ʉluo nalʉlyahʉmile kwa Moose, looli lʉlyahʉmile kʉ vakʉʉlʉ viinu. Ʉmue muvomba ʉluo nambe kɨɨve kɨghono kya Sabati. 23Lɨno, nave lukwɨtɨkɨsɨvua ʉmwana kuvombelua ɨkɨvʉngo ɨkio mʉ kɨghono ɨkya Sabati, kuuti mʉleke kudeenya ʉlʉlaghɨlo lwa Moose, kɨki mʉkʉngʼhalalɨla ʉne kʉkʉnsosia ʉmuunhu mʉ kɨghono ɨkya Sabati? 24Mʉlekaghe kuhɨgha ʉmuunhu mʉlwa kʉlola pamaaso, looli mʉhɨghaghe mʉ vwakyangʼhaani.”
Avaanhu viposania kuuti ʉYesu ghwe veeni
25Avaanhu vamonga ava mʉ lɨkaaja lya Yelusalemu vakava viposania viiti, “Asi, ʉmuunhu ʉjʉ naghwe jʉno avalongosi va Vayahudi vilonda kʉkʉmʼbuda? 26Lolagha, ijova pa vʉvalafu, neke aveene navijova kɨmonga! Pamo aveene avalongosi viiti ʉmuunhu ʉjʉ ghwe Kɨlɨsite! 27ɄKɨlɨsite iliiva ikwisa nakwale nambe muunhu jʉno ilikagʉla kʉno ihʉmɨla! Ʉsue tʉkagwile ʉmuunhu ʉjʉ kʉno ihʉma!”
28ɄYesu ye ajiighe ivʉlanɨsia mʉ lʉvɨɨka ʉlwa nyumba ɨnyɨmɨke ɨja kufunyila, akajova fiijo akati, “Lweli mʉngʼhagwile ʉne, kange mʉkagwile kʉno nihʉma. Nambe mwiti mʉkagwile ʉluo, ʉne nanɨlisile mʉ vʉtavʉlɨlua vwango. ɄNgʉlʉve jʉno asungʼhile ghwa kyangʼhaani, ʉmue namʉnkagwile. 29Ʉne nɨnkagwile, ʉlwakʉva nɨhʉmile kwa mwene, kange ghwe jʉno asungʼhile.” 30Pepano avalongosi va Vayahudi vakava vilonda kʉkʉnkola, neke nakwealyale ʉmuunhu jʉno akaghela kʉkʉnkola, ʉlwakʉva ʉnsiki ghwake ʉghwa kʉkolua ghʉlyakyale kufika. 31Avaanhu vinga mʉ lɨpʉgha lɨla vakamwɨtɨka ʉYesu, vakava vijova viiti, “Asi, iliiva ikwisa ʉKɨlɨsite ilivomba ifidegho finga fino fihʉfia ifivalɨlo kʉ vaanhu kukila fino avombile ʉjʉ?”
Avasikali visungʼhua kʉkʉnkola ʉYesu
32AVafalisayi vakapʉlɨka ɨlɨpʉgha lya vaanhu vipwepa vwɨmɨla imhola sa Yesu, pe avavaha va vatekesi na Vafalisayi vakasuungʼha avasikali avaloleleli#7:32 Vasikali avaloleleli: Ava vaale valoleleli va nyumba ɨnyɨmɨke ɨja kufunyila jɨno jaale kʉ Yelusalemu. Ɨmba kʉ Vʉghanʉle vwa Masio aMahesia. kuuti vankole. 33ɄYesu akavavʉʉla avaanhu vala akati, “Niiva numue ʉnsiki nʼdebe vʉvʉle, neke pambele nigomoka kwa jʉno asungʼhile. 34Mulikʉndonda, neke namulikʉnyaagha; kange kʉno niliiva, ʉmue namʉngafike.” 35Pe aVayahudi vakava viposania viiti, “Ʉmuunhu ʉjʉ ilʉta kʉʉghi kʉno ʉsue natʉngamwaghe? Asi, ilʉta kʉ Vayahudi vano vapalasiine vano vikukala mʉ ɨɨsi isingi, kuuti avavʉlanɨsie avaanhu vano naVayahudi? 36Asi, kwekʉti kɨki pano iiti, ‘Mulikʉndonda, neke namulikʉnyaagha, kange kʉno niliiva, ʉmue namʉngafike’?”
ɄYesu ijova ɨmhola ɨja Mhepo ʉMwɨmɨke
37Ɨkɨghono ɨkya vʉsililo ɨkya kɨkulukulu kya fyeve, kɨno kyale kɨghono kɨvaha, ʉYesu akɨɨma pa nyumba ɨnyɨmɨke ɨja kufunyila, akajova fiijo akati, “Ʉmuunhu nave alɨ nɨ kyʉmɨlua, iise kʉlyʉne anyue.#7:37 Mʉ fighono ifya kɨkulukulu ɨkya mpeto, ʉntekesi ʉmʼbaha akamisagha amalenga pa kɨtekelelo kʉkʉnsʉʉma ʉNgʉlʉve ɨfula, na kukʉmbʉka kuuti ʉNgʉlʉve alyavapeliile avakʉʉlʉ vaave amalenga kʉ lʉkʉve (Kuhʉma 17:1-16; Mbalɨlo 20:1-11). ɄYesu isimilisia kuuti ʉmwene ghwe kɨnʼdwivu ɨkya malenga agha kyangʼhaani. 38Ʉmuunhu jʉno ɨkʉnyɨtɨka ʉne, iiva ndavʉle ghijova aMalembe aMɨmɨke kuuti, ‘Isaasa isa malenga amanya vwʉmi sidwivuka mʉ mwojo ghwake.’ ”#Yesaya 44:3; 55:1; 58:11 39ɄYesu alyajovile ʉluo mʉ mhola ɨja Mhepo ʉMwɨmɨke, jʉno avaanhu vano vikʉmwɨtɨka ʉYesu, vilikʉmwʉpɨla pambele. Ʉnsiki ʉghuo, ʉNgʉlʉve alyakyale kʉkʉnsuungʼha ʉMhepo ghwake, ʉlwakʉva alyakyale kʉkʉvahʉfia avaanhu ʉvʉvaha vwa Yesu.
Avaanhu vilekengʼhana vwɨmɨla ʉYesu
40Avaanhu vamonga mʉ lɨpʉgha lɨla ye vapʉliike amasio aghuo, vakati, “Kyangʼhaani, ʉmuunhu ʉjʉ ghwe mʼbɨli jʉno twamʉghulilagha kuhʉma kwa Ngʉlʉve.”#Similisio sa Ndaghɨlo 18:15-22 41Vamonga vakati, “Ʉmuunhu ʉjʉ ghwe Kɨlɨsite.” Neke avange vakati, “Ndali, ʉKɨlɨsite naangahʉme mʉ ɨɨsi ɨja Galilaya. 42Asi, aMalembe aMɨmɨke naghiiti, ‘ɄKɨlɨsite ilihʉma mʉ kɨkolo ɨkya ntwa ʉDavɨdi,#7:42 ɄDavɨdi: Ɨmba ɨlɨsio Davɨdi kʉ Vʉghanʉle vwa Masio aMahesia. iliholua mʉ kɨkaaja ɨkya Betelehemu, ɨkɨkaaja kɨno alyale ikukala ʉntwa ʉDavɨdi’?”#2 Samueli 7:12-16; Mika 5:2 43Pepano avaanhu vakalekengʼhana vwɨmɨla ʉYesu. 44Avaanhu vamonga mʉ lɨpʉgha lɨla vakava vilonda kʉkʉnkola, neke nakwealyale ʉmuunhu jʉno akaghela kʉkʉnkola.
Avalongosi va Vayahudi navikʉmwɨtɨka ʉYesu
45Pepano avasikali avaloleleli vala vakagomoka kʉ vavaha va vatekesi na kʉ Vafalisayi, kɨsila kʉnkola ʉYesu. Avavaha vala vakavaposia vakati, “Kɨki namʉnkolile na kʉkʉmʉleeta?” 46Avasikali avaloleleli vala vakamʉla vakati, “Naaghelile kuhʉmɨla ʉmuunhu jʉno ijova ndavʉle ʉmuunhu jʉla.” 47AVafalisayi vakavaposia vakati, “Kwekʉti na jʉmue mʉsyangilue? 48Asi, ghwe veeni mʉ valongosi viitu, nambe mʉ Vafalisayi jʉno amwɨtiike? 49Avaanhu avuo vikʉmwɨtɨka, ʉlwakʉva navasikagwile indaghɨlo sa Moose, avuo vaghunilue!”
50Pepano ʉNikodemu, ʉmo mʉ valongosi va Vafalisayi, jʉno ɨkɨghono kɨmonga alyalʉtile kwa Yesu pakɨlo,#Yohani 3:1-2 akavaposia avajaake akati, 51“Asi, indaghɨlo siitu sikwɨtɨkɨsia kʉkʉmhɨgha ʉmuunhu kɨsila kʉmpʉlɨkɨsia na kʉkʉsitangʼhania sino avombile?” 52Aveene vakamwamʉla vakati, “Neke na jʉʉve ʉhʉmile kʉ Galilaya! Lʉtagha ʉkɨmbe vʉnofu aMalembe aMɨmɨke, pe kyaghukagʉla kuuti, nakwale ʉmʼbɨli jʉno ndepoonu ihʉma kʉ Galilaya!” 53Pambele avaanhu vooni vakalʉta mʉ makaaja ghaave.#7:53 Akadebe aka vamonga vavɨkile mʉ vwandʉlɨlo ʉvwa lekelakwoni. Kange, akadebe aka namwekale mʉ fitabu fimonga ifikʉʉlʉ.
Actualmente seleccionado:
Yohani 7: wbi
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© (Active), Wycliffe Bible Translators, Inc. All rights reserved.