Lûk 24

Jisòs lôtì a yi kpû

(Mat 28.1-10; Mâk 16.1-8; Jon 20.1-10)

1Te tuku ndùku yula bênà wu tuk wu shyə a ngâm, ywena yen yi jwô yì sì nì Làmindâ yì jûŋ te ghɨna fate 2yen ti ye ghɨ tì baŋa yi jwô yì sì yâ, ma ghɨ ti bɨŋhi chyâkhì. 3Ghɨna lyi yi sì te yena jə̀ gun yi Bâba Jisòs 4time afû hì kante gha ye yi gana. Ghɨt a lɨmànà ale à bà bûŋhì timi bakha a ghɨna ngwùŋ ma ghɨna ti mak njusu fufasu fê njêntè. 5Fânì kwo ghɨna, ghɨna tuŋhi tu ghɨna a chyə̂. Ghɨt atɨna buf ha ghɨna na, “Njwô ghə te ghàn khɨŋa wùt wù tâ atɨ̂n à ghɨt a kpona? 6Wù wijə afân, wù ti lôtì a yi kpû. Ghàn yɨŋti te wù tì jìsà ha ghàn baha mô a yi lak yi Galìlî 7na ghɨ kəta hi fo Wâ Wùt ha ghɨt a be wô na ghɨ banti wûn a kàkfùtàfù, ma à hi mô yi bàm yi tuk mù tât ma wù loti a yi kpû.”

8Kə wu yu ghɨna kaha yɨ̂ŋtì jîs yi wuni. 9Ghɨna kaha kolo yi sì fôktì gha ghɨ̂n à jɨ̀m ha jùmtìbàmsù Jisòs sù njwò yì mòk bakhi nâbi nì nde afû. 10Gha ghɨ̂n ha jùmtìbàmsù Jisòs sù tì fòkti Mèli wù Màtalà nì Juwanà nì Mèli nè Jêms nì ywen ale. 11Biyani ghɨna tê bimî jə̀, beka gha tɨna ndùku fune gha fəma ha ghɨna. 12Biyani Bità nyɨŋ yen tɨ̂ŋtì ki lihi yi sì, yen kə a gûm, lo hì kolê kante kwâktè yênà gha ye yi gana.

Jisòs kwoti ghɨta à bà a lum wu Èmayùs

(Mâk 16.12-13)

13À ndùku mô kəbi wu tuk afû jùmtìbàmsù Jisòs su lesu, sùbà lo hì yênà a yi tèk yile, ghɨ toŋte na Èmayùs, yi mô mâl sàmba hi lò a Jèlusalèm. 14Ghɨna hì gbê jîsà bitè yênà nì gha ghe a ghɨ kwuka gana. 15Te ghɨna ndùku jîsà bitè kwoka yênà nì gha, nâ Jisòs nì ngɨŋ à wûn yen bakha hì gbê yênà ghê ghɨna. 16Biyani gha tàhì ghɨna hi yen a khɨle wûn. 17Jisòs buf ha ghɨna na, “À mô ghə ghàn gbê jîsà yênà kum ghɨna ni agha?”

Kə wu yu, ghɨna wuhâ tuŋhi kə̂ktù ghɨna tu a chyə̂ hì jyê wu wun. 18Wùt lè a ghɨna fùtɨ̂n ghɨ toŋte na Kèlobàs, kaha buf ha wun na, “À mò kə wò we wò lo be a Jèlusalèm hì khə wi gha ghe a ghɨ che gana a mu tuk afân agha?”

19Wù buf na, “À mô ghɨ̀ni gha?”

Ghɨna fîsì na, “À mò kə ghe a ghɨ gana ha Jisòs wù Nasalì. Wù chehì mô fòktì wù chìk, jîsà gha kanana, nê ghɨ le. Mô wùt wù tâ a Yènfù ashyə̂ nì a ghɨta ashyə̂. 20Ngàŋsù ndâ Fùyènsu chiksu nì tu we wu tihe gha che fo wûn na ghɨ ywi, ghɨ lyi wûn yen banti a kàkfùtàfù, 21ma ghàh chehì kwâktè na à mò wun we wù bè yuna tu ghɨt a Isalì a sù ngə̂k. Nâbi yâ, lân mò tuk mù tât te gha tɨni gàna. 22Fê bakhe na ywen ale a ghàh a nôn te fî nî na ghàh hi mô nì kani te ghɨna bɨsa yena yi jwô yì sì lân, 23tè yena jə̀ gun yi wuni afû, kaha ben jis na anjèlsù Fùyènsu lesu te fwu a ghɨna ashyə̂ afû, te su fwo a jem jis ha ghɨna na wù mò wu tâ. 24Ghɨt ale a ghàh a fùtɨ̂n ti fî lo yen a jwô yì sì afû, yen kə yi sî yimi, kə yi ghəl te ywen ghe ye be jisa, biyani te yena jə̀ Jisòs.”

25Wù ki jîs ha ghɨna na, “Ghàn mò kə nâ wù ngwò, jɨ̂ŋtè ghaka nâ hi bime gha à jɨ̀m ghe fòktì sù chiksu tì jìsa! 26Klistù we, yê hì kəta wi hi yen a ngə̂k ni, shyəma wù lye a wun a wù lùk wu koknenu agha?” 27Wù jis yâ fî jis banhi gha ghe ghɨ tì jìsa a ŋwàklù Fùyèn kum wûn, hi yìmì a ŋwàklù Musìs hi yè tàn a fòktìsu chiksu. 28À hì mô te ghɨna ndùku bakhe yênà yi tèk afa ghɨna ndùku yênà, Jisòs ni te wù khɨŋa hi chyà yèn ashyə̂. 29Ghɨna chyati wûn na wù chyə ghê ghɨna beka yu ndùku mô ma wu ti chyâ, ma tuku ti fî jyə̂. Wù lyi yen hi chyə̂ ghê ghɨna. 30À hì mô wu yu yənu wù lyi a bân bonhilò jyâtì ha ghɨna. 31Se ghɨna yâhì ghɨna yen khɨli wûn kə wu yu, wù ləhà a ghɨna fùtɨ̂n. 32Ghɨna hì bufa ha ngɨŋsu ghɨna su nâ, “Ba à ye hì mô a wu yu afa wù yê hì jîsà ha ghàhnà wu lûm, hi jìsà banhe gha Fùyènì ha ghàhnà yâ, təm a ghàhnà tê hì lumà agha?”

33Kə wu yu ghɨna lôtì kaha yen a Jèlusalèm yen yen jùmtìbàmsù Jisòs sù ìwûm njwò yì mòk nì ghɨt ale ni te ghɨ ndùku mô afû. 34Ghɨna jis na, “Hamok Bâba ti lôtì a yi kpû. Wù ti chwûtì ngɨŋ à wûn ha Samùn!”

35Afû, ghɨt ghe à bà ki fòktì te yi ye gana ha ghɨna a wu lûm, fî fôktì te ghɨna ye yena khɨle Jisòs a yu afa wù ye beka bana fo ha ghɨna.

Jisòs chwûtì ngɨŋ à wûn ha jùmtìbàmsu wunsu

(Mat 28.16-20; Mâk 16.14-18; Jon 20.19-23; Fêt 1.6-8)

36Te ghɨna ndùku baha jîsà gha ghɨ̂n, Jisòs nì ngɨŋ à wûn bûŋhì timi a ghɨna fùtɨ̂n jis na, “Yutìnì mò ha ghàn.”#24.36 Hi jìs na, Yutìnì mò ha ghàn. Ŋwàklù su mwu su dosu kəta wi luk wûn.

37Lɨmalɨma bâh ghɨna, ghɨna fân, kwâktè na ghɨna ti yen wùt à chyə̂. 38Jisòs buf ha ghɨna na, “Njwô ghə te gha ghɨ̂n fo ngə̂k ha ghàn, fê nê na ghàn hi kwâktè chyâhè agha? 39Ghàn yen wo mu nì wulu mu. À mò mu ni. Ghàn kum mu ma ghàn yen hamok, ma ghàn yen beka wùt à chyə̂ kəta wi jyà wùn nì wuf wu wùnu ni te mu kəta.”

40Wù jis ni ki chwûtè wo wunu nì wulu wunu ha ghɨna. 41Ghɨna hì saŋle nâ jûŋ, yi ghak ghɨna hi bimî, ghɨna hi kante kə yi kantî. Wù buf ha ghɨna na, “Ghàn kətalò shyə yəna afan agha?” 42Ghɨna fo kôm à yila nyokana ha wûn. 43Wù fyi kut kə ghɨna ashyə̂.

44Yi bàm yi tɨ̂n, wù jis ha ghɨna na, “Gha ghɨna ghàn yena ni, à mò gha ghe mu ndùku fôktè ha ghàn te ghàhnà ndùku baha mô amok na, nâbi ghə te ghɨ nyàka kum mu a Musìs ŋwàklù wu làŋ nì ŋwàklù fòktìsù chiksu nì ŋwàklù Sù njàŋ kəta hi bè kpên nâ à jɨ̀m.”

45Te wù tì jìsa ni, banhi mihì tu ghɨna shyəma ghɨna ywo khɨli gha ghe a ghɨ mô a ŋwàklù Fùyèn, 46Wù fî jis ha ghɨna na, “Ghɨ ti nyak na, Wù chwoka lemana kəta hi yen a ngə̂k hi kpû, ma à nê hi mô yi bàm mu tuk mù tât, ma wù kahà loti a yi kpû, 47ma ghɨ nê hi fê kəta hi yìmì a Jèlusalèm hi fòktì gha Fùyèn lak tù jɨ̀m a wun a yi yet, na ghɨta kahi təm a ghɨna ma Bâba Yènfù lehèfo besu ghɨna su. 48Ghàn mô su bɨn à sak hi fòktì a gha ghɨ̂n. 49Ghàn hi khə na, mu nè tuma bè lò we a Bom chwùne ha ghàn. Biyani ghàn faŋ à kə a yi lak afân hi tàn wu tuk afa jyaka bè lô a nyə̂ ma ghɨ chwo a ghàn a tû.”

Jisòs kwok a nyə̂

(Mâk 16.19-20; Fêt 1.9-11)

50Wu jis ni, lyi ghɨna fwu yi lak afû yen bakha yi tèk yi Betanì lôhì wo wunu a nyə̂ hi bonhi ghɨna. 51Ni te wù ndùku baha bonhi kə yi bonhî ghɨna, ghɨ lyi kwok nì wûn a nyə̂. Wù lo de ghɨna. 52Ghɨna kokhi wûn lo kaha kolo yen a Jèlusalèm nì saŋlî chiki 53ghɨna yen faŋ hì yênà a ndâ Fùyèn kə yû mù jɨ̀m kokhe Yènfù.

Actualmente seleccionado:

Lûk 24: bmv

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre Ŋwàklù Fùyèn Kàn Mù Fê (Cameron)

Lûk 24

Versículos bíblicos populares de
Lûk 24

Escucha a Lûk 24

Biblia:

Bum

Versión: Ŋwàklù Fùyèn Kàn Mù Fê (Cameron) - bmv

Lûk 24

Lûk 24

Versículos bíblicos populares de Lûk 24

Escucha a Lûk 24

Biblia:

Bum

Versión: Ŋwàklù Fùyèn Kàn Mù Fê (Cameron) - bmv

Lûk 24

Versículos bíblicos populares de
Lûk 24