Jon 7

Wana ne Jisòs boŋ tunhi hi bimi ha wûn

1À hì mô yi bàm yi gha afân, Jisòs hì gbê chyâ a Galìlî kôŋà wi hi yèn a Jùdiyà beka ghɨt a Jûs ndùku mô afû, khɨŋa hi ywe wûn. 2À ndùku mô ni, ma à faŋ kə tuk mù sek ni shyəma ghɨ yə, yi Yə Mùwi ghɨt a Jûs, 3wana ne Jisòs jis ha wun na, “Wò kəta hi lo afân, hi yèn à Jùdiyà shyəma jùmtìbàm sasu yen gha kanana ghe wò nè. 4Wùt shìki kôŋ na ghɨ hi khə wûn, wù wi hi tè nyamte nè a ghâ. Te wò nè gha ghɨ̂n ni, yi jwôfàlò na wò ni ma mbyi yì jɨ̀m hi khə wò.” 5Ghɨna ndùku jîsà ni beka nâbi ghɨna ndùku bime wi ha wûn.

6Jisòs ki jîs ha ghɨna na, “Yu mu tà kpen jə̂, à mò ha ghàn, ghàn làhi tè yèn a Jèlusalèm nâbi wùni yu. 7Ghɨt a mbye bànà wi ghàn, biyani bânà mu beka mu chwùtè banhe gha ghɨna ghɨ be. 8Ghàn yen wu lùk wu yi yə afû. Mu yènà wijə chîn beka yu mu tà kpên.” 9Wù jis ni faŋ kə a Galìlî.

Jisòs yen wu lùk wu yi yə

10Nâbi te wù jìsa nâbi ni, wana ne wuna lo yen wu lùk wu yi yə afû, wù boŋ yên, biyani nyamte yênà yi yên. 11Chichàsu ghɨt a Jûs hì khɨŋa wûn afû bufa na, “Wùt mu wunâ lâ?”

12À ndùku mô ni ghɨta afû nâ hidù nyamte jîsà kum wûn. Ghɨ le jîsà na, “Wù mò kə nâ wut wù jùŋ.” Ghɨ le jîsà na, “À mò kə yi fə̂m. Wù gbè lehe kə à ghɨ̂t.” 13Ghɨ ndùku jîsà kəbi ni wùt bu hi jìs yi gha a ndan beka ghɨna ndùku fânà chichàsu ghɨna su.

14Te yə təmne ye ni, Jisòs kwok yen a ndâ Fùyèn yì chìk hì yike ghɨta afû. 15Chichàsu ghɨt a Jûs yu yikî wuni hì mô nì kani bufa nâ, “Wù gbi yàni hi tè khə gha ghɨ̂n ni teka wù timè yen a ndâ ŋwàklù agha?”

16Jisòs jis na, “Mu yike wi ghàn nì gha ma ghɨ ngɨŋa. À mò gha Fùyèn fe fu tuma mu. 17À shìki khɨŋa nâbi nde hi tè nì te Yènfù khɨŋa, ma wù nê yen à khɨli na yikî mi lo ha Yènfù ma mu yike kə gha mi agha? 18À shìki yike nâbi nde yikî wun yi ngɨŋi ma wù hi khɨŋa kə hi tè kokhe ngɨŋ à wûn, biyani we wù fètà hi kokhe we wù tuma wûn yè jîsà kə hamok wama wi nâ hakoh. 19Ba Musìs tî fo saktu ha ghàn biyani nâ wùt wù mòk lêmà wi saktu tɨntu. Ghàn khɨŋa hi ywe mu njwô ghə?”

20Ghɨt atɨna fîsì kə na, “Wò mò ni kəta a yohnà be. À khɨŋa nde hi ywe wò?”

21Jisòs jis ha ghɨna na, “Mu ti nî kə yi gha yi kanani yì mòk jwo ti yim ghàn à jɨ̀m. 22Biyani Musìs tì fo saki na ghɨ bwɨ wan wù lɨmà ghɨ fati nama wuna nâbi te à ndùku wijə sak yi Musìs. À ndùku mô sak yi be be ghàhnà. Ghàn fate nama wana wù tuk wu laku. 23Ghɨ hì mô hi lunhe sak yi Musìs, ghàn hi fê bâŋhè wu lâ na mu ti chwuk wùt wu tuk wu laku wù ti tâ njwô ghə? 24Kə ghàn hi saka kə wùt yi gha afa ghàn yena. Ghàn hi saka hamok.”

Ghɨta buf na Jisòs mò we ghɨ chwoka lema

25Te Jisòs jìsa ni nâbi wùnu yu ghɨt a Jèlusalèm ale hì bufa nâ, “Ba wùna mò wut we ghɨ khɨŋa hi ywî agha? 26Wùt wunâ jìsà a ghɨta ashyə̂ wùt jîsà wi gha ha wûn. A chichàsu tà lyi kə na à mò wûn we a ghɨ chwoka lema agha? 27Ghàhnà khəlò luk we wùt wuna lo bena atɨ̂n biyani we ghɨ chwoka lema shìki mô hi bèn ma wùt hi khə wi luk we wu lo bena atɨ̂n.”

28Ghɨ ndùku jîsà ni Jisòs baha yike kə à ghɨ̂t a ndâ Fùyèn. Jisòs njaŋ yen kə haŋaŋ jis na, “Ghàn kwàktè na ghàn khəlò mu khə luk we mu lo bena atɨ̂n agha? Mu tà ben jə afân a mu ngɨŋ. À tum wùt mu, jîsà kə hamok, ghàn khə wi wûn, 29biyani mu khə wûn beka mu lo ben a wun a ngwùŋ ma à tum wun mu.”

30Wù jis ni, ghɨ hì khɨŋa hi kwo wûn, biyani wùt tê mòm beka yu we Yènfù tì lèma na ghɨ bè kwolò wûn atɨ̂n ndùku mô teka wu kpen. 31Nâbi ya ni ghɨta fî bimi ha wûn dô kə ni beka ghɨna tì yên na wùt lè bè fê bê wi te ghɨ chwoka lema hi bè nè chwesu gha kanasu lesu, su chyâ se wùt wuna nè.

Ghɨ tum sojàsù na su yê kwo Jisòs

32Ghɨt a Falàsî tî yû te ghɨta nyamte jîsà gha ghɨ̂n kum Jisòs, ghê ngàŋsù ndâ Fùyènsu chiksu ki tuma sojàsu na su yê kwo wûn. 33Ghɨna yên, Jisòs jis ha ghɨna na, “Mu nè hì mô kə nì ghàn kə fu yulâ ni ma mu kahà yen ha we wù tuma mu. 34Ma ghàn nê hi khɨŋa mu bu hi fê yen beka mu nè hì mô wù lùk ghàn bu hi bèn afû.”

35Ghɨt a Jûs ale hì bufa na, “Wùt wuna khɨŋa hi yèn afa na ghàhnà nê hi fê yena wi wûn agha? Wù boŋa khɨŋa hi yèn a yi lak yi tumi ye ghɨta ghàhnà teta yênà afû hi tè yike ghɨta tumu ghe ma? 36Ba wù jis na ghàhnà nè hì khɨŋa wûn yena wi beka wù jis na yi yènà wù lùk wùt bu hi yèn afû. Wu ni jìsà ni yi chwûtè na ghə?”

Jisòs jis na yi fo mòlû mu fo yi chyə̂ ha ghɨta

37À ndùku mô wu tuk wu yə wu gokhenu a mô nâ tuk wu yə wu chiku Jisòs toŋa jis a jyə̂ yì tâ na, “Kuŋ à mòlû shìki yim nâbi nde wu ben ha mu, ma mu fo mòlû ma wù nyu.” 38‘À bimi nâbi nde ha mu ma jwò hi fwo a wûn a yi təm kə yi ghəl te ŋwàklù Fùyèn jìsà.’ 39Jisòs ndùku jîsà kum nì Yohnà ghe ghɨ ndùku mô hi fo ha ghɨt ghe ghɨ bime ha wûn. À ndùku mô ni, Yènfù baha mô teka wù fo yohnà à wun mu ghê beka wù ndùku baha mô teka wù lohê kwok Jisòs a nyə̂ hi fo a jyak ha wûn.

Jyàhè wùna lôtì kum Jisòs

40Ghɨt ale atɨ̂n à ghɨta dona afû tì yu gha ye Jisòs ndùku jîsà, hì jîsà na, “Wùt wuna mò kə nâ fòktì wù chìk hamok.”

41Ghɨ le jìsà na, “Wù mò Klistù.”

Ale fê bufa kəbi na, “Ma Klistù gbi yàni hi fwu a Galìlî agha? 42Ba ŋwàklù Fùyèn jis na Klistù bè fwo a fə̀n Defìt yi sah yi nda, ma ghɨ bwɨ wûn a Betùlùhêm a Defìt yì tèk agha?” 43Te ghɨ jìsa afû ni, jyàhè wùna lôtì kum Jisòs. 44Ghɨt ale hì khɨŋa hi kwo Jisòs biyani wùt tê mòm.

Ghɨt a tihena ghɨt a Jûs tunhi hi bimi ha Jisòs

45Sojà sê kaha yen, ngàŋsu ndâ Fùyènsu chiksu nì ghɨt a Falàsî buf ha ghɨna na, “Ghàn ye faŋ hi kwo bèn nì wûn njwô ghə?”

46Sojàsu tɨnsu fîsì na, “Wùt tà timi hì jîsà wu lum afa wùt wuna jìsà atɨ̂n.”

47Ghɨt a Falàsî njaŋ yên kə ashyə̂ buf nâ, “Ba yi ni mò na wùt wuna ti boŋ lehi kəbi ghàn agha? 48Ghàn ti timi yu na wùt tihena makə wùt à Falàsî wùlè ti bimi ha wûn agha? 49Biyani njwo Fùyèn kwo ghɨt ghe ghɨ khə wi saktu Musìs tù.” 50Biyani Nìkòdemùs kəbi wùt à Falàsî wùlè a we wù tì ye yena Jisòs ntuksu jis ha ghɨna na, 51“Sak yi ghàhnà jìsà na, a wi hi jìs na wùt ti fen sak teka ghɨ yu jîs yì wuni.”

52Ghɨna jis ha wûn na, “Wò mò ma wò boŋ fwu kəbi a Galìlî ma, tòkâ kina a ŋwàklù Fùyèn ma wò yen na fòktì wù chìk wi hi fwo jə̀ afû.”

Ghɨ kwo bên nì wùt ywên wù gbèna ha Jisòs

53Ghɨta jyâhì hì kolê.

Actualmente seleccionado:

Jon 7: bmv

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre Ŋwàklù Fùyèn Kàn Mù Fê (Cameron)

Jon 7

Versículos bíblicos populares de
Jon 7

Escucha a Jon 7

Biblia:

Bum

Versión: Ŋwàklù Fùyèn Kàn Mù Fê (Cameron) - bmv

Jon 7

Jon 7

Versículos bíblicos populares de Jon 7

Escucha a Jon 7

Biblia:

Bum

Versión: Ŋwàklù Fùyèn Kàn Mù Fê (Cameron) - bmv

Jon 7

Versículos bíblicos populares de
Jon 7