Jon 3

Jisòs fôktì lum we Nìkòdemùs mò hi bòn atɨ̂n

1Wùt wù tihena ghɨt a Jûs wùlè ndùku lâwû, yet yi wuni mô Nìkòdemùs, a mô wut a yi chìnte ghɨt a Falàsî. 2Tuku jyə̂ tuk wule, wù yen yen Jisòs toŋti wun jis na, “Chichà ghàh khə kə nâ na à tum Fùyèn nì wò na wò bê hi yike ghɨta. Wùt wijə a wù mò hi tè nè chwènasu gha kanana sina a wò nè ni a bu kə na Yènfù mò ghê wûn.”

3Jisòs jis ha wûn na, “Mu jìsà ha wò hamok na, wùt wi hi lye lùk wu fə̀n wù Fùyènù a bu kə na ghɨ kaha bwɨ wûn ha fê.”

4Nìkòdemùs buf ha wun na, “Ghɨ ni mò yàni hi bwə wùt a fê ma wù ti ləma ni? Ba mu khə na wùt ləmâ wi hi kaha lye a nè wûn wu là na ghɨ bwɨ wûn agha?”

5Jisòs fîsì na, “Mu jìsà ha wò kə nâ hamok na, wùt wi hi lye a wu lùk wu fə̀n wù Fùyènù, a bu kə na ghɨ bwɨ wun te ghɨ bwə ghɨta, fî kaha bwɨ wun a Yòhnà. 6Wùt bwə kə a chyak a wùna biyani, Yènfù fo a Yohnà. 7Kə wò hi mô nì kani te mu jìsa ha wò na ghɨ kəta hi kaha bwə ghàn à jɨ̀m a fê. 8Wùt wi hi khɨle lum we Yènfù fo Yohnà ha ghɨta. Yi mô kəbi yi ghəl te fufa shihi chyà wo hi ywo te ghɨ kwô, khə wi na ghɨ lo afa, yênà afa agha? Kə te yi mô nì bwɨ Yòhnà.” 9Nìkòdemùs jis ha wun na, “Mu tà yu khɨli gha mi yîn.”

10Jisòs buf ha wun na, “A ni jìsà nâ wò mô nâ fòktì wù chìk yi lak yi Isalì ni, ywo khɨle wi gha ghɨ̂n?” 11Mu jìsà ha wò kə nâ hamok na ghàh jìsà a ghâ khə, ma ghàh ti yên biyani ghàn bime wi. 12Mu shìki jîs ha ghàn fə̂knà nì gha a chyə̂ afân, ghàn bime wi ma mu nê jis gha nyə ha ghàn ma ghàn bimi yàni? 13Nâ wùt wù mòk tà timi lyi jə̂ a nyə̂ hi tè khə gha ghe ghɨ mô afû, a bu kə mu Wâ Wùt te mu lo a nyə̂ ben a chyə̂.

14Ghɨ kəta hi ghaŋhe Wâ Wùt a tô fùkàk, kəbi yi ghəl te Musìs tì ghaŋhe funà ywô ghe ghɨ fate nì chani a yi lak yi sùsi, 15shyəma nâbi nde we wù bime ha wûn ma wù khɨti chyənà ye yì bè mê wi, 16beka Yènfù tî koŋ ghɨta mbye nâ haŋaŋ tum Wâ wûn wù mòk we wù ndùku kəta na à bimi nâbi nde ha wûn, ma wù nê tè kpû biyani ma wù bê hi kəta chyəna ghe ghɨ bè mê wi. 17Yènfù tà tì tum jə Wâ wûn a mbyî na wù bê bobhi ghɨta kum besu ghɨna su. Wù tì tum na wù bê bonhi ghɨta. 18“À bimi nâbi nde ha Wâ Fùyèn, ma Yènfù nê tê bobhe jə̀ wûn, à faŋ nâbi nde hi bimî ma à hi mô na Yènfù ti bobhi wûn beka wù ti tunhi na yi bime wijə a yi yet yi wan wù mòk we Yènfù kəta. 19Yènfù bè saka à ghɨ̂t kum na bani che ben a mbyî ghɨta hì kôŋà wi, biyani kôŋà kə a bɨn a finana beka ghɨna nè be. 20Nâ kəbi nde we wù nè gha be kòŋà wi bani, kôŋà wi hi fwo atɨ̂n na kə gha wuna ghɨ be ban a ndan. 21Nâ kəbi nde we wù chyə chyəna chilichili fwo bè lò yi bân shyəma ghɨta hi yena hamok na wù nè a gha wu lum afa Yènfù khɨŋa.”

Jon jis kum Jisòs

22Te Jisòs jìsa mihe ghê jùmtìbàmsu wunsu, lô lyi yen atɨ̂n à yi lak yi Jùdiyà chyəti kwok ghê ghɨna, fo mòlû ha ghɨta. 23À mô yâ Jon fo kəbi mòlû yi tèk yi Enòn a dâfà wi hi yè tàn a Salèm beka mòlû ndùku dô afû, ghɨta motè kə ni bê yena wûn wù fo mòlû ha ghɨna. 24À ndùku mô yâ teka ghɨ lem Jon a chyâk.

25Tuku yû tuk wule jùmtìbàmsù Jon su yîmì a gùfna ale ghê wùt à Jûs wùlè, kum lum we ghɨt a Jûs sò wunu atɨ̂n a ghɨna chyəna laka hi tè mò na ghɨna yule kpenalò a Yènfù ashyə̂. 26Jùmtìsù Jon mi sê yen yen wûn, jis ha wûn na, “Chichà, wò ti yen wùt we ghàn à wûn chehì mô yi jin yi Jodàn yâ a we wò tì jìsa na à mò wûn we ghɨ chwoka lema yâ agha? Wù hì fo mòlû ha ghɨta chîn ghɨ yênà kə wun à jɨ̀m.”

27Jon jis ha ghɨna na, “Nâbi nde nè kə gha ye Yènfù fo jyaka na wù hi nê.” 28Nâ ghàn khəlò hamok te mu tì jìsa na à wijə mu we ghɨ chwoka lema. Yènfù tum mu ashyə̂ na mu bê fati lum wu wunu. 29À ywê lɨm yè kəta kə lɨm à wùt ywên. Sô lɨm à wùt ywên we wù yè gâmtè wûn yè gbê kə wun a tum. Saŋle nâ haŋaŋ a yu afa wù ywo te lɨm à wùt ywên jìsà. À mò kəbi wu lum we a mu saŋle atɨ̂n ni. Saŋli mi mò chîn, ma yi ti lun kpên. 30Wùt mu wunâ kəta hi tè ngaŋte yèn kə ashyə̂ mu chwote yênà kə a chyə̂.

We wù lo bena a nyə̂ chyàlò ghɨt à jɨ̀m

31We wù lo bena a nyə̂ kokne chyâlò nâbi nde, we wù mò kə wùt à chyə̂, jîsà kum kə a gha chyə. We wù lo bena a nyə̂ ngaŋte chyâlò nâbi nde, 32fôktè kə ye wù yena fî yu lò biyani ghɨta ywo bime wi. 33À ki bime nâbi nde gha ye wù jìsà, ma à hi mô na wù ti chwûtì na Yènfù jîsà kə nâ hamok. 34Wùt mu wuna Yènfù tuma ni fòktè kə gha Fùyènì beka fu ti fo Yohnà wuna ha wûn fo mihì kə yi mihì. 35Bì kôŋàlò Wâ wûn ma wù ti fo jyaka ha wûn na wù hi saka kə mwə̀ mù jɨ̀m a mbyî. 36“À bimi nâbi nde ha Wâ Fùyèn, ma wù khɨti chyənà ye yì bè mê wi, ma à faŋ nâbi nde hi bimî ha Wâ Fùyèn, ma wù bê kpu beka lòn à Fùyèn ti faŋ a wun a tû.”

Actualmente seleccionado:

Jon 3: bmv

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre Ŋwàklù Fùyèn Kàn Mù Fê (Cameron)

Jon 3

Versículos bíblicos populares de
Jon 3

Escucha a Jon 3

Biblia:

Bum

Versión: Ŋwàklù Fùyèn Kàn Mù Fê (Cameron) - bmv

Jon 3

Jon 3

Versículos bíblicos populares de Jon 3

Escucha a Jon 3

Biblia:

Bum

Versión: Ŋwàklù Fùyèn Kàn Mù Fê (Cameron) - bmv

Jon 3

Versículos bíblicos populares de
Jon 3