Joyn 1
1
Ntɨm yi a ghə̀ ku ə bwòŋ
1Andiʼ no mibu mbyi zìtə̀, mu Ntɨm ə Nyìngòŋ sə diʼ. Ghə̀ ndiʼ wenə Nyìngòŋ, ghə̀ diʼ nkàyntə Nyìngòŋ. 2Ghə̀ ndiʼ wen nə̀ Nyìngòŋ no fa kənzìtə. 3Nyìngòŋ ə shɨtə ə fo ə tsèm ə chò fa wen, mu à mbwen fa wen mu və ko nshɨtə no tèbe ghò yi a və ndiʼ mù və shɨtə li. 4Ghə̀ ə nkiʼi ntsìnə̀, ntsìnə̀ ayi ku əbayn a viʼi. 5Ə bayn na ghèn ə baynə a ntìntìn kəbəŋ kə fenəkə, ali kəbəŋ kə fenəkə na kènkə nzizi ko kə lu lemsə.
6Nyìngòŋ ə ntɨm li wìʼ, a və toŋtə nə̀ Joyn, 7la ghə̀ nvi ə ndiʼ nchwò nsòʼ kumə əbayn na ghèn nə̀ ndi viʼi zhʉ̀ nyʉ̀ vyi a ghə̀ gaʼa ə byɨmə. 8Joyn ə nko ə ndiʼ əbayn na ghenə no fa wen a ngeŋ. Ghə̀ ə vi to nə̀ nchwò nsòʼ kumə əbayn na ghenə. 9Əbayn na ghenə ndiʼ əbayn nəmwèʼè a ghə̀ ə vi a mbi ə nku əbayn a viʼi və tsèm.
10Ntɨm ə Nyìngòŋ ə nvi li a mbi, ali viʼi mbyi mo wen no tèbe ando mbi ayi ndiʼ mu à shɨtə wen. 11Ghə̀ nvi li ə zàʼa to no a vəwenə a loʼ, viʼi wen tyen la və ko a shisə ə wen. 12Alì, viʼi vətsenvə shisə wen ə byɨmə a wen, ghə̀ kù kədyòʼ la vəwenə ndiʼ vunə Nyìngòŋ. 13Vəwenə ko ə kaʼkə a vunə Nyìngòŋ a ji yi a wìʼ nə̀ kòŋ ə bwi vunə fa tsu, a ndiʼ to əghʉ̀nə̀ Nyìngòŋ la vəwenə ndiʼ vunə wen.
14Ntɨm Nyìngòŋ na ghèn ə kaʼkə li sə diʼ wìʼ, ə vi tsitə a vəghəŋ a ntìntìn. Yès ə yen li kədyòʼ kə kaynəkə ə wen, kədyòʼ a ghə̀ kiʼi to nə̀ wàyn Nyìngòŋ a ghə̀ diʼ to əmùʼ li. Ghə̀ nlù fa ben ə Bobo ə vi kiʼi kusə nshinsə no mwènmwèn nə̀ no tèbe a ghò yi a ghə̀ diʼ nəmwèʼè kumə Nyìngòŋ.
15A diʼi wen yi a Joyn ə gaʼa kumə a ghə̀ ə dzàŋ gàʼ la, “Ghèn diʼi wen yi a ma ə gaʼa a ghə̀ŋ la, ‘Ghə̀ vi fa mo abàm, chò mò byìʼì ando və ə sə bwi mo, mu ghə̀ ə sə diʼ.’”
16A diʼ fa kusə shinsə wen a ghə̀ diʼ no ghoʼ ə ghoʼ, a ghə̀ ne la vəghəŋ sə kiʼi ə mbwaʼməsə to ghayn a ghayn. 17Nyìngòŋ bè ə ku Əsoʼ, ghə̀ chò fa kəvu ə Mosìs. Ə kusə shinsə tə sə vi, no tèbe nə̀ ghoʼ yi a ghə̀ diʼi nəmwèʼè, chò ji fa kəvu ə Yesò Klistò. 18Wìʼ ə ko tɨmə yen Nyìngòŋ. A diʼ to wàyn Nyìngòŋ yì əmùʼ a ghə̀ diʼi nkàyntə̀ Nyìngòŋ, mu nyʉ̀ʼ to a ben nə̀ Bobo, a ghə̀ diʼi li to ando Nyìngòŋ diʼ a viʼi.
Joyn wù ku a Mù tensə la à ko diʼ wen diʼ Mbwòŋsə̀
(Mat 3.1-12; Mak 1.1-8; Luk 3.1-18)
19Viʼi Jus vyi a və ndiʼ a Jelusalèm ə ntɨm li vəpfèm və ngə̀ŋ Nyìngòŋ nə̀ viʼi ngwaʼ ə ngə̀ŋ ə Levì la və dyʉ̀ ə bèm a Joyn ə ku a Mù la, ghə̀ diʼ ndò lo.
20Vəwenə dyʉ̀ ə sə bèmə, Joyn ə shə̀ʼtə̀ mwetə to mwetə la, “A ko diʼ mo a və Ntsuʼ li.”
21Vəwenə be bèm kwʉ̀ʼsə a wen la, “Wù ə diʼ no ndò? A diʼ wu Ilajà mu?”
Joyn gàʼ la ghə̀ ko diʼ Ilajà.
Vəwenə be mù bèm la ghə̀ diʼ Nshə̀ʼtə̀ ə ghoʼo yì a və ə kəʼtə li mu?
Joyn ə bè tensə tò tensə.
22Vəwenə gàʼ a wen la, “shə̀ʼtə̀ li a yès la wù diʼ ndò lo. Yès ə kəŋ ə zhʉ fa wù a chʉ̀ ndi yès bwenə dyʉ̀ ə shə̀ʼtə̀ a viʼi vyi a və ə tɨmə yès.”
23Joyn ə bwensə gaʼa to ando nshə̀ʼtə̀ Isayà ə gàʼ la,
“Ma diʼ wìʼ yi a ghə̀ dzàŋ gàʼ a nse zɨm la,
‘Ghə̀ŋ shɨtə jì Bobo ghə̀ nayn, ghə̀ sə vi ə chò fa tsu.’”
24A ndiʼ ali mu a ntɨm viʼi Falàsi ətɨm viʼi a venə a Joyn. 25Vəwenə ə bèm mwètə̀ a wen la, “Wu ə ko diʼ wìʼ a və tsuʼ li, ko ndiʼ la wu diʼ Ilajà, ko Nshə̀ʼtə̀ ə ghoʼo yì a və ə kə̀ʼtə̀, ə sə kù mu mə ghò?”
26-27Joyn gàʼ la, “Ma ku mu a ghə̀ŋ to no nə̀ mu mə fwàyn, ali wìʼ diʼ a ghə̀ ti to no a ghə̀ŋ a ntìntìn luwen, ko ghə̀ŋ kɨ wen, no tèbe mò ə ko kwʉ̀ʼ ə shwèʼ to ne kəkòs kə a kə zatə mpfʉ̀sə gwʉsə a ghʉ ə wen.”
28Nò nyʉ̀ a venə no ə tsèm ə fʉ̀ a ntə̀ʼ Betanì, a dzen mu mə Jodàn yi a Joyn ə kù mu tsu.
Joyn ə diʼ Yesò a viʼi
29Ətʉ̀ʼ ə nlayn li, Joyn yen Yesò ando ghə̀ ə vi, ghə̀ diʼi wen a viʼi ə gàʼ la, “Ghèn diʼ wàyn BYI Njɨ̀ Nyìngòŋ yi a ghə̀ ne shi mbyɨsə viʼi mbyi! 30A diʼi wen yi a ma tə̀ shə̀ʼtə̀ a ghə̀ŋ li la, ‘Wìʼ ə vi fa mò a bàm, chò mò, byìʼì ando və ə sə bwi mo, mu ghə̀ se diʼ.’ 31Ma nko tə kɨ wen, ali tə vi sə ku mu nə̀ mu mə fwàyn baʼtə̀ tətyɨm ə təŋtə ndi ghə̀ sə vi, viʼi Islel yenə kɨ wen.”
32Joyn mu gaʼa la, “Ma tə yen to ando kəzhwì kə Ŋwoʼkə shiʼi vi fa kàŋ to nə̀ kəlàto kə, ə vi nyʉ̀ʼmə faŋ a wen a kətʉ. 33Ma ko tə ndiʼ kɨ wen. Ma tə sə kɨ wen mu ma kɨ to byìʼì kənyʉ̀ ki a Nyìngòŋ tə sə tɨm mo la ma vi əku mu nə̀ mu mə fwàyn ə gàʼ la, ‘Wù lù yen no ndò to ando kəzhwì kə Ŋwoʼkə shiʼi vi nyʉ̀ʼmə faŋ a wen a kətʉ, wù mu kɨ la à diʼ wen yi a ghə̀ vi ə ku mu nə̀ Kəzhwì kə Ŋwoʼkə a viʼi.’ 34Ma diʼ mu ma yen li kənyʉ̀ na kènkə ando kə fʉ, ə sə shə̀ʼtə̀ a ghə̀ŋ la wìʼ na ghèn diʼ wàyn Nyìngòŋ.”
Yesò ə lyɨ̀ mbìsə ndzɨ̀mtə̀sə bàm ə wen
35Ətʉʼ ə be layn, Joyn wenə ndzɨ̀mtə̀sə bàm nə̀ wen sə bò ə be dyʉ̀ ə tɨmə akəshi yi a vəwenə tə zhʉsə tsu li, 36ghə̀ nyen li Yesò ando ghə̀ chò ə gàʼ a vəwenə la, “A chò wàyn BYI Njɨ̀ Nyìngòŋ le!”
37Ndzɨ̀mtə̀sə bàm ə wen na shìsə zhʉ̀ ali ə lu ə sə dyʉ̀ fa bàm ə Yesò. 38Yesò ə kaʼsə ki, ə yen vəwenə to ando və vi fa a wen abàm ə bèm a vəwenə la, “Ghə̀ŋ kəŋ ghoʼ?”
Vəwenə bèm la, “Wù tsi fe a Labày?” Labày na ghèn diʼi gàʼ lòʼ la “Ndìʼsə̀”.
39Ghə̀ gàʼ a vəwenə la, “Ghə̀ŋ vi li yen a.” Vəwenə dyʉ̀ yen kəshi kì a ghə̀ ntsi tsu, a ndiʼ ali mu à sə diʼ a bwaʼa kəbəŋ. Vəwenə ŋwʉʼmə to tsu zaʼa fa mpfwòmə.
40Wìʼ ə mùʼ fa ntìntìn ə viʼi na vi və bò a və zhʉ̀ to ando Joyn ə gàʼa ə lu dyʉ̀ wenə Yesò li, ndiʼ Andɨ̀lò, ə lèmə̀ Simon Bità. 41To a zhʉ a yi ghə̀ kəŋ li dyʉ̀ to nə̀ lèmə̀ wen ə Simon ə gàʼ a wen la, “yès ə yen li wìʼ yi a və tsuʼ li a diʼ ‘Klistò.’” 42Ghə̀ gàʼ ali ə lyɨ̀ Simon ə dyʉ̀ nə̀ wen a Yesò.
Yesò ə yenə wen ə gaʼa a wen la “A diʼ wù Simon ə wàyn Joyn, ali və a toŋtə wù luwen la Sefàs.” Sefàs nə̀ Bità diʼ to zhiʼ ə mùʼ, ghə̀ diʼ la, “əghu.”
Yesò lyɨ̀ Filib wenə Nàtanyèl a ndzɨ̀mtə̀sə bàm ə wen
43A sə diʼ a kənkùmtə̀ kə kətsi, Yesò ə lù ə sə dyʉ̀ a Galìlì ə yen Filib ə gàʼ a wen la ghə̀ dzɨ̀mtə̀ wen. 44A ndiʼ ali, mu Filib fʉ vi to fa ntə̀ʼ Bèsaydà tanə Andɨ̀lò wenə Bità. 45Filib ə kəŋ dyʉ̀ nə̀ Nàtanyèl ə gàʼ a wen la, “Yes yen li wìʼ yi a Mosìs ə nyoʼo kumə wen a ŋwàʼlə̀ Əsoʼ li, nshə̀ʼtə̀ sə ghoʼsə ə be boŋ nyòʼ. Ghə̀ diʼ Yesò ə wu Nazalèt, ə wàyn Josèf”.
46Nàtanyèl mu bèm la, “A jùŋ zizi ghə̀ fʉ fa Nazalèt a?”
Filib ə bwensə la, ghə̀ vi to vi ə yen.
47Yesò yen to ando Nàtanyèl ə vi ə gàʼ la, “A diʼ to no nkàyntə mbwìnə̀ Islel a ghə̀ vi lə. Ghə̀ gàʼa to nəmwèʼè.”
48Nàtanyèl ə bèm a wen la, “Wù jèʼ ale mu kɨ mo a?”
Yesò ə gàʼ la, “Mà yi yen wù azhʉ̀ yi a wù yi nyʉ̀ʼ a tsi ə fəkoʼ fə fig mibu Filib ə vi ə ndzàŋ wù.”
49Nàtanyèl ə mu gàʼ la, “ndìʼsə̀ wu diʼ wàyn Nyìngòŋ, wù diʼ Fòyn a viʼi Islel!”
50Yesò mu bè gàʼ la, “Wù byɨmə to byìʼì ando mà gàʼ la ma yi yen wù azhʉ̀ yi a wù yi ŋwʉʼ a tsi ə fəkoʼ fə fig li mu? Alì, wu be ne yen nyʉ̀ ə tsenəvə, və chò na ki.” 51Ghə̀ gàʼ ali ə be gàʼ kwʉ̀ʼsə la, “Ma gaʼa a ghə̀ŋ to no nəmwèʼè la, Ghə̀ŋ lu yen to ando əkaŋ ə boʼmə̀, ətsɨŋsə ngə̀ŋ Nyìngòŋ sə chwòmə̀ kuʼ be shiʼi, jèʼè to a ntɨm ə Wàyn Wìʼ”
Actualmente seleccionado:
Joyn 1: bbkDBLnt
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión