Mutendeko 33
33
Yakhobe wakukumana na Esau
1 Yakhobe wakawona Esau wakwiza na ŵanthu 400. Ntheura ŵana ŵakhe ŵara wakaŵagaŵira Leya, Rakelo, ndiposo na ŵateŵeti-kazi ŵakhe ŵaŵiri ŵara. 2Wakadangizga ŵateŵeti-kazi na ŵana ŵawo, Leya na ŵana ŵakhe pamanyuma pawo, ndipo Rakelo na Yosefe ŵakizanga pa kumanyuma. 3Yakhobe wakadangira ndipo wakasindamira pasi kankhonde na kaŵiri wakasuka wakasenderera pafupi na mukuru wakhe.
4Kweni Esau wakachimbira kuya kakumana nayo, wakamuvumbatira, wakamuyagamira na kumufyofyontha. Penepapo wose ŵaŵiri ŵakalira. 5Para Esau wakalaŵiska wakawona ŵanakazi na ŵana ndipo wakamufumba wakati, “Kasi ŵanthu aŵa ŵali na iwe mbanjani?”
Yakhobe wakati, “Aŵa ndi ŵana ŵeneawo Chiuta mu uchizi wakhe wali kundipa nda muteŵeti winu.” 6Ŵateŵeti-kazi na ŵana ŵawo ŵakasenderera pafupi, ndipo ŵakamusindamira. 7Leya nayoso na ŵana ŵakhe, ŵakasenderera pafupi na kumusindamira. Pa umaliro Yosefe na Rakelo ŵakasenderera pafupi na kumulambira.
8Esau wakafumba wakati, “Kasi mskambo wa vyakuŵeta uwo ndakumana nawo ngwa vichi?”
Yakhobe wakazgora wakati, “Ndatenge ndisangirepo uchizi panthazi pinu, sekuru wane.”
9Kweni Esau wakati, “Wa munung'una wane, ndili navyo vyakukwanira. Ivyo uli navyo viŵenge vyako.”
10Yakhobe wakati, “Chara! Nkhumuŵeyani, usange ndasanga uchizi panthazi pinu, pokererani chawanangwa ichi kufuma kwa ine. Para nkhuwona chisko chinu kuli nga ndi para ndawona chisko cha Chiuta, pakuti mwandipokerera mu uchizi wa ntheura uwu. 11Nkhumuŵeyani, pokererani chawanangwa chane icho ndamuyegherani, chifukwa Chiuta waŵa wa uchizi kwa ine ndiposo chifukwa ndili navyo vyakukwanira.” Ntheura wakamukoserezga Esau, ndipo wakachipokera chawanangwa chira.
12Penepapo Esau wakati, “Tiye tirutenge ulendo withu. Ine nditi ndidangire panthazi.”
13Kweni Yakhobe wakati kwa iyo, “Sekuru wane mukumanya kuti ŵana wavuka, na kutiso nkhwenjerwa na mberere na mbuzi ndiposo na ng'ombe zakonkheska. Usange tikuziyendeska mwaluŵiro mu zuŵa limoza, miskambo yose yiti yifwenge. 14Sekuru wane dangiraninge panthazi. Ine muteŵeti winu, nditi ndirondezge mumanyuma pachokopachoko, kwakuyana na kendero ka vyakuŵeta, ndiposo kwakuyana na kendero ka ŵana, ndisuke ndifike ku kwinu ku Edomu.”
15Ntheura Esau wakati, “Reka ndikusidirepo ŵanthu ŵanyakhe aŵa ŵali nane.”
Kweni Yakhobe wakati, “Ichi kuti nchakukhumbikwa viŵi chara. Ine nkhukhumba kuti ndisange uchizi panthazi pinu sekuru wane.” 16Ntheura Esau wakawerera zuŵa lenelira na kuruta ku Edomu. 17Kweni Yakhobe wakaruta ku Sukoti ndipo wakajizengera nyumba, na kuzengaso visakasa vya ng'ombe zakhe. Ndicho chifukwa malo ghara ghakuchemeka Sukoti.#33.17 Sukoti: Mazgu agha ghakung'anamula kuti, “visakasa”.
18Pamanyuma Yakhobe wakafika makora ku msumba wa Shekemu, uwo uli mu charu cha Kanani, para wakafumira ku Padani Aramu. Wakimika hema lakhe pafupi na msumba ura. 19Charu icho wakajinthamo hema lakhe wakachigula ku ŵana ŵa Hamoro, wiske wa Shekemu. Wakagula na ndarama 100 za siliva.#Yos 24.32; Yoh 4.5 20Pa malo gheneghara wakazengaposo jochero, ndipo wakalithya lakuti Fumu, Chiuta wa Israele.
Actualmente seleccionado:
Mutendeko 33: Tumbuka
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Bible Society of Malawi