Matta 7
7
Ti̱yo nii mi̱nu ki̱lewe
(Luk 6:37-38,41-42)
1“Ti̱nidu ka wuwule niye ki̱lewe, ke a ni ti̱nu chi̱n ki̱lewe. 2Nangki̱n, tiyangu ti̱mwata ni̱bu mi̱n ya̱ma̱ngu, ka mwata chimi̱n ti̱ni yiko. Kwele mun swende, nang wu ka swemi̱n ti̱ni ki̱ne. 3Wule yo mun da̱ng be di̱fi̱li̱n ki̱tinu a nu ke monu, mwang kurbu ki̱takulangu a numonge? 4Mwang medi yire, mwang chaku ke mo mi̱n di̱fi̱li̱n we nuko, yo ki̱takulang we wumo nuwe. 5Naba di̱bebeline, mwe n chaku ki̱takulangu we nu mo, yinu mwang chaku ki̱yilang swa̱ka̱n a nu ke monu.
6“Ti̱nidu kadatiyu ti̱yili Kwamatu we, yinu ti̱nidu sulti̱kumiyu kali ka̱mbi̱riyi wuli̱bi̱wuli̱biyu we, ke ki̱la nwe chimi̱n burang.
Ti̱bi̱u, ti̱bau, ti̱bu kwa̱ru
(Luk 11:9-13)
7“Ti̱bi̱u ka nii chi̱nu, ti̱bau ta yadu, ti̱bu kwa̱ru ka wudu chimi̱nu. 8Kanang wuwule niye wu ki̱bi̱de, ki̱yiddu, wu ki̱badde ki̱yadu yinu n ki̱n wu ki̱bu kware, ka wudu ki̱mi̱nu. 9N wure we tibe chi̱n wu bwe ko ka bi̱u ki̱danne n ki̱n ka nii kale? 10Ka a bi̱u chi̱nge, ka nii so? 11Ka n ti̱n, n ti̱n bi̱bwilamu, ti̱yim ti̱ni bwesi̱m chimu chi ti̱yiliye, kano Te chi̱n wu a diye a ne ni bwesi̱m ki̱mu ki̱li̱mangu we bi̱bu a bi̱u ki̱ni̱ma?
12“Kanang ti̱ti̱le chiye, ma ni̱bumi̱n ti̱n yinangu no mun baddu n chi ka mami̱ndangu. Ti̱tu a dal yili̱ntu n ti chi fa̱kubu a fwaatu di̱mbi̱ri̱m.
Kwa̱rri kuddi̱n n ti di̱di wuti̱li̱n
(Luk 13:24)
13“Lenga kwa̱ri kuddi̱nu, di̱ne wa̱re wuti̱le ka yo nii a twiyaku, nang wa̱re lantange. Ni̱bu nabwen ki̱tau wa̱re wuko. 14Aya kwa̱ri kuddu, nang wa̱re burinching wu a ti̱kuriye, ni̱bi bayim bi̱bu ki̱yaduwemu.
Tiyang n ti ti̱kulan kii
(Luk 6:43-44)
15“Ti̱ma daandaan ki̱ni fa̱kubu ti̱kwanimu. Bi̱bu ki̱be fi a di̱chi̱ne ki̱ni di̱ba̱l kwamin we bwi chiyinu, aya n chi bawuti, chun a lwe bwi chiyu. 16Ni swaan chidu we a nangari chitu, ni ya ti̱kulan sinangitu we kwa̱da? Ka ti̱tu a ki̱selangitu we siinanga? 17Di̱ne yiko, ka ki̱ki̱le tiyang ki̱yilange ki̱ tu ti̱kulan ti̱yili aya tiyang ki̱bwilangu ki̱tu ti̱kulan ti̱bwilai.
18“Tiyang ki̱yilangu a ne tu ti̱kulan ti̱bwilai, tiyang ki̱bwilangu a ne tu ti̱kulan ti̱yili. 19Kanang ki̱ki̱le tiyang ki̱ku a tubu ti̱kulan ti̱yiliyange, ni̱bu ka swidu ka maru a ki̱rang. 20Yiko, we nangi̱n chitu ta swaan chidu.
Mang yimi̱nbu chi̱n we
(Luk 13:25-27)
21“N ke ka nang wuwule niye wu ki̱yalu ko ‘Tewuduwe, Tewuduwenge we!’ Ka le Yaa Kwama ka n ke wu ki̱tum ki̱ke Temi wu a diye. 22Nibu nabwen we diko beka fwadu ko, Tewuduwe, Tewuduwe, mare ni̱n ma fa̱kui ki̱ni di̱n mun, we di̱n munu ti̱nti̱n ni̱n chaka ki̱fi̱bti ni̱n mati̱ chi ka̱ta̱kitu nabwen. 23Mi̱n fal mang yi chidi tas mi, ‘Mang yinchi̱nbu. Ti̱yika mi̱n a fi ni̱bu bi̱bwilam!’
Ni̱bu Muku Lomi Burau
(Luk 6:47-49)
24“Nii wu a nwe ker mi̱nu, yinu a ma nangang ki̱ne, ka kadu yinang naba yingku wu a mu loko a kwame. 25Yo mwe a swi, latiyu a riye, ki̱fi̱be a kune a ngau lo, lo wu a yarbu, di̱ne a mu lo a kwam. 26Yinu wu a nwe ya̱m mi̱mu, a mabu nangang ki̱ne, ka kadu nang di̱r di̱du a mu loko a yane. 27Yo mwe benge, latiyu a ri, ki̱fi̱be a kun a ngau lo, lo a yar ki̱ni keru dukan ko, kuuum!”
Dukan Yesun
28Yo n Yesu a ri fwaku ya̱m bi̱be, tayi a tau ni̱bu a muran we fikomu. 29Di̱ne ki̱n ki̱miya chimi̱nu tiyang nii wu ki̱ni dukane a newe tiyang ni̱bu yungku yili̱n chimu.
Actualmente seleccionado:
Matta 7: Tula
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2015, The Nigeria Bible Translation Trust and Wycliffe Bible Translators, Inc. All rights reserved.