Matta 27
27
N Yesu a kakku Bi̱latusang
(Mar 15:1; Luk 23:1-2; Yow 18:28-32)
1Yo ti̱ma kwiyane, wuduwe fansetiye n ti seli̱bu bi̱ni̱mu, a di̱ka yii ko chi chi̱u Yesu. 2N chi a kwau ki̱n, a yikani ki̱n, a ya ni kwabna Bi̱latu.
Bwa Yafuda
(Nfa 1:18-19)
3Yo n Yafuda wu a kwa̱l ki̱ne, a ku ya̱mu a mwatan ni̱bu yaka chi̱u Yesuwe, a ma furi ki̱liki̱li, a ki̱la bwana wuduwe fansetiye n ti seli̱bu, a niti̱ chi ka̱mbi̱r asurfanu wani ti̱tanu we. 4A yi ko, “M ma ki̱le, kangu mang ni wu a mabu ki̱le ke a bwangu.”
Aya n chi a yi ki̱n ko, “Lwangang nang wule we ti̱tu? Ti̱tu lwangang mwang.”
5N ki̱n a kur ka̱mbi̱r asurfanu we Kan Kwamanu, a chir ti̱n. A yikan a ya di̱ku dwaku.
6Aya wuduwe fansetiye a wo Asurfa a yi ko, “A dakabu ka̱mbi̱r di̱du ni yangdu a Kan Kwaman di̱ne ka̱mbi̱r ki̱tumi̱n.” 7N chi a ki̱ka yii, ka tani̱n ku naba kubiye ki̱ni ka̱mbi̱ru ke a nang furen rungko. 8Di̱ne yiko, a yal fiko ko, “Ku ki̱tume.” 9Yiko, a ri chitu fa̱ku Yirmiya a fwa ko, “N chi a da̱u ka̱mbi̱r asurfan wani ti̱ta, chi a kekan ka fedu a dur Yisrelane. 10A ta̱n ku naba kubiye ki̱n, kangu n Tewuduwe a fwangu.”
Bi̱latu a ma Yesu mi̱n ti̱bi̱di̱ri
(Mar 15:1; Luk 23:1-2; Yow 18:33-38)
11N Yesu a ti we kakku kwabnangu, kwabna a bi̱u ki̱n ko, “M mun nang Mai ni̱bu Yafudama?”
N Yesu a yi ki̱n ko, “N fwa tas.”
12Aya yo wuduwe fansetiyeyu n ti Seli̱bu, ki̱fwa ya̱m a dur ki̱ne, a yibu chi ya̱m. 13M Bi̱latu a yi ko, “Mwang nwebu chi ni̱bu ki̱fwadu a dur munita?”
14Aya n Yesu a ki̱l ki̱mi̱nbu di̱kwa̱l, kono we ya̱m bi̱bu ni̱bu a yi ki̱ni̱mu. Ti̱tu a ya̱r kwabna yii.
Ni̱bu a mwata ya̱mu n Yesu ka bwadu
(Mar 15:6-15; Luk 23:13-25; Yow 18:39–19:16)
15We ki̱swi wu a Yiye yabake, n kwabna ki̱mar ni̱bu mi̱n naba ki̱le wiin wu n chi ki̱badde. 16We ki̱swi wuko, wuka nii we wu ni̱bu a yim n ki̱n naba ki̱letiye. Nii wu di̱n ki̱nu m Barabas a di̱bi̱nti̱l. 17Yo ni̱bu Yafudamu a murane, m Bi̱latu a yi chi ko, “Ti̱badu m kwiye wure? M Barabas, ka n Yesu wu ti̱yalu ko Masiya?”
18Di̱ne n Bi̱latu a yim ko, n chi a ko Yesu di̱ne kati̱ne.
19Kangu m Bi̱latu a swe we ki̱di̱ng mwatakangu, naye ko a yi ki̱n ko, “Chirmi̱n we ya̱m naba ni̱ri dini̱mu, di̱ne diwu kumi kwad n nwe riye we dur ki̱nu a dwakam.”
20Tikaketi fansetiyu n ti seli̱bu a kukan ki̱rangu we ni̱bu ko, a mar Barabas, a chi̱u Yesu.
21Kwabna a bi̱u chi ko, “M mar chimi̱ne wure, we ni̱bi burabi̱mu? N chi a yibi kuuu ko ‘Barabas.’ ”
22M Bi̱latu a yi chi ko, “Mang madi yire ki̱ni Yesu wu ti̱yalu ko Masiya?”
N chi a yibi kuuu ko, “Ti̱kukan!”
23M Bi̱latu a yi chi ko, “Di̱ne wule, a ma ti̱ti̱le chi ti̱kwani ti̱tu a lwe bwaatu?”
N chi a su kemiyi kuuu ko, “Ti̱kukan!”
24Kangu m Bi̱latu a ku ya̱mu a la dukan ki̱nangu, yinu kusi̱ru ki̱laan fikongu. A bau mwe a nura fa̱li kiyu we kakki̱ ni̱bangu, a yi ko, “Lwangang mang a newe ki̱tum nii wumu. Lwangang chang, ki̱tum ki̱mu a dur chi̱n.”
25Ni̱bi kwang a ke ko, “Ki̱tum ki̱mu a swe a dutu ni̱n n ti bwesi̱m ni̱m!”
26Yinu a kwi chimi̱ne Barabas. Aya n ki̱n a yi ni̱bu ko, a twala Yesu, yinu n chi a yikani ki̱n a ya kukan.
Ni̱bu ki̱rangmu a ma Yesu mi̱n ki̱fiye
(Mar 15:16-20; Yow 19:2-3)
27We fiko ni̱bu ki̱rangmu a yikani ki̱ni Yesu a lo kwabna, n chi a murti̱ kwa̱l chi̱nu we di̱ki̱ne, 28N chi a suku ki̱mi̱n luke ko, a yau ki̱mi̱n wuka luke wurwur ki̱duum bi̱bu mati̱m ki̱yadi̱mu. 29N chi a ma ki̱mi̱n salasala wa kwa̱da, a do ki̱mi̱n we duru a niti̱ ki̱twalang we kang ki̱yilang kangu, n chi ki̱chungdu we kaki̱ku kangu, ki̱ma ki̱mi̱n ki̱fiye ko, “Ni̱n siinu Mai ni̱bu Yafudam!” 30N chi a ti̱bu ki̱ni ki̱tumu, a yitu ki̱twalang, a twali ki̱n we duru. 31Yo n chi a ri ki̱fiyenge, a suku ki̱mi̱n luke wurwure, a do ki̱mi̱nti̱ lukei kiyu we, a yikan ni ki̱n ko ke chi kuka ki̱n.
Ni̱bu a kuka Yesu
(Mar 15:21-32; Luk 23:26-43; Yow 19:17-27)
32Yo n chi we wa̱re ki̱yikade, n chi a tekan n ti wuka naba Sairin, di̱n ki̱nu n Simun, n chi a yo nii wu ki̱ni dukan ko a da̱u ki̱tiyang bwa Yesungu. 33Yo n chi a lam wuka fi wu ki̱yalu ko, “Kolkota” ka nang chikiye fi wu a kasire. 34N chi a ni wuka mwe yinabi wu a se n ti dwamang ko a no. A ya yo n ki̱n a twaiye a ko a nobu. 35Yo n chi a kuka ki̱ne, a kera ti̱n lukei kiyu we bwiti chiyu. 36A kuteng ki̱ku n chi a swe we fiko ki̱da̱ngdu. 37We fi a dur Yesu ne, n chi a mwal chitu ko, “WU NANG Mai NI̱BU YAFUDAME.” 38N chi a kukan n ti bi̱kam dabi̱kumi burau wuka a kang ki̱yilang, wuka a kwatakwelang. 39Bi̱bu ki̱sudumu, ki̱swa̱ba ki̱nu n kawure ki̱mi̱ki̱tini dur. 40N chi ki̱yidu ko, “Mun wu mwiko mwang wur Kan Kwamanu, mwang muddu a ditiyu yitta, yu yimwiyu, suwe we ki̱tiyang bwangu ke ni̱n yim ko m mun nang Bwe Kwama!”
41Yiko tikaketi fansetiyu n ti ni̱bu yungku yili̱nmu n ti seli̱bu ki̱ma ki̱mi̱n ki̱fiye ko, 42“N ki̱n a yu bi̱kamu, a yimbu yu yikiyu. Ka n ki̱n nang Mai Yisrela, a suwe we ki̱tiyang bwangu, nang ke bi̱yili̱mu we di̱ki̱ne. 43A ki̱na yo ni̱ru we di̱Kwama. Yam n Kwama a yu ki̱n ki̱kangu, ka we ki̱mi̱la ki̱ne, di̱ne a yi ko n ki̱n Bwe Kwama.” 44A fiwine, dabi̱kum bi̱bu a kukan chi waremu, n chi ki̱ti̱buti̱ ya̱m bi̱bwilam bi̱bu.
Bwa Yesuwe
(Mar 15:33-41; Luk 23:44-49; Yow 19:28-30)
45Ki̱ni tibe kuko, ti̱mu a ma ki̱li. 46Yo ki̱swi a fi yitta, n Yesu a bwe wi, a yal chitu ki̱ni dukan ko, “Eli, Eli lama sabatani.” Kanang chikiye “Wa Kwama mi, Kwama mi, a mayire mwang mariye?”
47Bi̱kamu a tiran we fikomu, kanga nwe ya̱m bi̱bangu, n chi a yi ko, “Nii wu ki̱yal Yiliya?”
48Bi̱nabi̱na wuka we bwiti chiyu a wul a da̱a̱ soso, a di̱ka mwe wi bwangbwange, a yab we kwalu a kuku a ni ki̱n ko a no. 49Bi̱kamu a yi ko, “Yam didiin ni da̱ng ka Yiliya we bedu ka yu ki̱ne.”
50N Yesu a ki̱la kiti̱ wii ki̱da, ki̱ni dukan, yinu ti̱kuritu a chir.
51We ki̱dang kangu wule luke wu a yau ki̱swen fi wu wauwade, a ngi̱ran ti̱me yurau, a mwe we dii a fwe ti̱na bale ti̱me. Ti̱mu a mi̱kan, kwantiyu a wulan. 52Futi̱tu a wuden, bi̱bwari̱mu bi̱bi wauwadi̱mu nabwen a kun we futi̱tu ki̱ni ti̱kuritu.
53N chi a chiran we futi̱tu. A kuteng ki̱ku n Yesu a kun we furangu, n chi a le bi̱ni wauwadi̱nu, ni̱bu nabwen a ku chi.
54We ki̱swi wuko, tikake ni̱bu ki̱rang Roma n ti bi̱bu ki̱da̱ng Yesumu, kanga ku mi̱kaku ti̱mu n ti chi a fwetangu, n chi a nwe tayi, a yi ko, “Ki̱kumang wu Bwe Kwama.”
55Nati̱bu nabwen bi̱bu a bunte Yesu we Ka̱lili ke chi ma Yesu mi̱n nangangmu. N chi a ti kutan ki̱dange chi ki̱fweditu. 56We tibe chi, m Maryamu wu a Maka̱dala we n ti Maryamu ne Yakubu n ti Yusufu n ti ne bwesi̱m Sa̱badime.
Furem Yesum
(Mar 15:42-47; Luk 23:50-56; Yow 19:38-42)
57Yo me a lame, wuka naba kuli, wu a be a Arimatiya, di̱n ki̱nu n Yusufu. N ki̱n we Miyari̱m Yesumu.
58A ya bwa di̱Bi̱latu, a bi̱u kwa̱me Yesu we. N Bi̱latu a ni ki̱n kwa̱me. 59N Yusufu a da̱u kwa̱me Yesuwe, a dal ki̱ni luke wu a ne der we. 60A yo a di̱kan fur di̱fwin, di̱du a tu a swa̱ba kwami̱n. A bi̱le wuka kale wuduwe, a yinge furi ki̱n, a yika ti̱n. 61M Maryamu wu a Maka̱dala n ti Maryamu wuka a swetuwe kakku furangu.
Ni̱bu ki̱to furi̱mu
62Bafi̱nenangeko, wu kuteng diwu ni̱bu ki̱do bwi di̱ne di sabwi ni̱bu Yafudamu, tikaketi fansetiyu ti ni̱bu Farisamu, n chi a muran we kakku Bi̱latu.
63N chi a yi ko, “Tewuduwe diti yiya suyu, ni̱n kur chi naba di̱buti̱re wu a fwa yo we ki̱ni ti̱kuriye ko, ‘A kuteng ditiyi yitta ka kunu we furu.’ 64Di̱ne yiko, mwang yo ni̱bu ka to furu ka lanti̱n di wutare, di̱ne ke miyari̱mu a be da̱du kwa̱me ko we ki̱ni kutu, a kuteng ki̱ku beka yi ni̱bu ko a kun we furu. Ki̱ku buti̱ku nang ki̱ku niing nwedi ki̱nangu.”
65M Bi̱latu a yi chi ko, “Ti̱ya ki̱ni ni̱bu ki̱rangmu, yati̱ to tiyangu ta medangu.”
66N chi a yikan yaku to furu, n chi a ma kale mi̱n di̱mwal maiyin we furu, a yo ni̱bu ki̱rangmu ko a nang to furu.
Actualmente seleccionado:
Matta 27: Tula
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2015, The Nigeria Bible Translation Trust and Wycliffe Bible Translators, Inc. All rights reserved.