Matta 16
16
Bakku chi ka̱ta̱ki
(Mar 8:11-13; Luk 12:54-56)
1Ni̱bu Farisamu n ti ni̱bu Sadukiyamu a be ka swe Yesu ki̱ni di̱bi̱du ko, “Yung ni̱n di̱mwal di̱du a chi ka̱ta̱kiin di̱du a chire a bwadi.”
2N Yesu a yi chi ko, “Wuka yo ki̱ni me, dii kwa̱didi, ti̱yidu tiko fi̱nenang ti̱mu ka woradi nga̱ra̱ng. 3Ki̱ni si̱n ka ti̱ku twiye a dili ki̱liye, ti̱yidu ko, ‘Yaka swi mwe.’ Ti̱yim dwadi wu, a chi nui chiyu a kuuwe, aya ta yimbu tiyangu ta fwa chi ki̱fwedu a ki̱dang ki̱kitu. 4Ki̱dang ki̱bwilang ki̱ku ti̱kuli a ni̱bu a yimbu Kwamam, ki̱baddu ka ku chi ka̱ta̱ki, aya a ne chi ka̱ta̱kitu ka yung chi̱nitu we, ka a su ti̱ttu a di̱Yunanatu.” Yinu n Yesu a du chi a yikan.
Yis ni̱bu Farisamu n ti ni̱bu Sadukiyamu
(Mar 8:14-21)
5Yo miyari̱mu a lam wuka bale we nabwe fare, yinu a kur, a tabu a yikabu ki̱ni ki̱danne. 6N Yesu a yi chi ko, “Ti̱ma daandaan ki̱ni yis ni̱bu Farisamu n ti ni̱bu Sadukiyamu.”
7N chi a ta̱l ya̱m bi̱bu we yichiyu a bi̱u ti̱n ko, “Di̱ne niyang bebu ki̱ni ki̱danniya?”
8Di̱ne n Yesu a yim chi n chi ki̱twayadite, a bi̱u chi ko, “N ti̱n bi̱bu keku bi̱yili̱mang changi bayimi̱mu, wureni a yo ti̱twayadu we yichiyu tiko a ne ki̱danne we! 9A lanta ki̱kang ta swaanba? Ti̱tabu kangu mang chabi ki̱ni ni̱bu kuniriti tunu ki̱ni ki̱danniyi yunuya? Ti̱tabu ti̱ti̱ngritu ta ri ki̱ni ti̱bukenita? 10Ka ta tabu ki̱ni ki̱danniyi yi̱di̱bi̱n yiyu ni̱bu kuniriti taana a chabiya? Ti̱tabu ki̱ni ti̱ti̱ngri ti̱bukenitu ta karita? 11Wule a yo ta swaanbu tiko ya̱m mi̱mu n ke bi̱bu a ki̱dannime? Aya ti̱ma yi daan ki̱ni yis ni̱bu Farisamu n ti Sadukiyamu.” 12Yinu miyari̱mu a swaan fal ko, ya̱m yis n Yesu kiyi chidu ko a ma daani̱mu, n ke yis wu a ki̱danne, aya ki̱fwa ya̱m ti̱kwanimu ni̱bu Farisamu n ti ni̱bu Sadukiyamu ki̱miyadi̱mu.
M Biti̱r a yi ko n Yesu nang Masiya
(Mar 8:27-30; Luk 9:18-21)
13Yo n Yesu a lam bale Kaisariya Filibu, a bi̱u Miyari̱m ki̱mu ko, “Ni̱bu ki̱yidu ko Bwe Nii n wure?”
14N chi a ke ko, “Bi̱kamu ki̱yidu ko Yowana naba Batisma, bi̱kamu ko n fa̱ku Yiliya, bi̱kamu ko fa̱ku Yirmiya, ti̱nti̱ne bi̱kamu ko wuka fa̱ku Kwama.”
15Yinu n ki̱n a ki̱la yi chi ko, “N ti̱nde, ti̱yidu ko m mi̱n, n wure?”
16N Simun Biti̱r a ke ki̱mi̱n ko, “M mun nang Masiya, Bwe Kwama wukure.”
17N Yesu a ke ki̱mi̱n a yi ko, “M mun naba delake Simun bwe Yunusa, n Kwama wu a diye nang wu a yungi̱n ya̱m bi̱be, n ke nii wu a ti̱ti̱niye.” 18Aya mi̱n fwa mi̱nu ki̱ka̱ngu m mun Biti̱r, “Kanang chikiye m mun kwam, we kwam wu ni̱bu bunti̱ki̱ mi̱mu ka rudu we yi ki̱ri̱ng. Kasi no bwa a newe ki̱ni dukan ka yingle chi. 19Mang ni̱n mangsoli yaa wu a diye, chitu mwang bwa̱u a ti̱ti̱nitu a bwa̱u we bwa diye aya ti̱tu mwang kwi we ti̱ti̱nitu, ka kwiyadu we bwa diye.” 20Yinu a wu miyari̱m ki̱mu mi̱n ki̱tele yinang ko, a fwadu wuka nii mi̱nu we didiin ko n ki̱n nang Masiya.
N Yesu a fwa ki̱duum bwam ki̱mu
(Mar 8:31; 9:1; Luk 9:22-27)
21A mwetuwe ki̱dang kangu, n Yesu ki̱fwa Miyari̱m ki̱mu mi̱nu ko, a mwintuwe ka ya Wurchalima, ka nwe riye nabwen we fa̱li tikaketi n ti wuduwe fansetiye n ti Ni̱bu yungku yili̱ni̱mu. A yi chi ko ni̱bu ka chi̱u ki̱nu, aya ka kunnu ki̱ni ti̱kuri we wu tare di.
22M Biti̱r a ti ware a ki̱ti̱ku ki̱kwabu ki̱nu ko, “A bwin mun, Tewuduwe!” A yi ko, “Ti̱chitu wu a ne ka fwenduwe!”
23N Yesu a sabran, a yi Biti̱r ko, chimi̱n a fi, m mun Setan! M mun ki̱twakulang we kakku mangu. Ti̱kuran mwitu ti̱tu a nangang ti̱bwiyangi n ke ti̱tu a di̱Kwamai.
24Yinu n Yesu a yi miyari̱mu ko, “Nii a ke ka bumiti̱ne, a kuru yikiyu we, a da̱u ki̱tiyang bwang kangu, a bumiti̱ne ti̱n. 25Nangki̱n, wu ki̱bau ti̱kuri kite, ka kwaladu aya wu a kwalan ti̱kuritu di̱ne mi̱ne ka yadu. 26Ta̱ma̱ng kangu wureni ka n ya ti̱ti̱nitu n kwala ti̱kuri mwite? Ti̱nti̱ne, nii ka ni wureni, wu ka suten ti̱kuri kite? 27Nangki̱n, Bwe Nii ki̱yikadu, ka ki̱ladu ki̱ni dwiyen Te ki̱nitu, ki̱ni ni̱bu ti̱tumbi̱ri ki̱mu, yinu n ki̱n ka ni ka nang wuwule niye ki̱ti̱me ko. Kanang wuwule niye yinang ka n ki̱n a ma nangangu. 28Mi̱n fwa chimi̱n bi̱yili̱mu, bi̱kam chimu we fi a ne ti bwadu ka ku ki̱laku Bwe Nii a mati̱nki.”
Actualmente seleccionado:
Matta 16: Tula
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2015, The Nigeria Bible Translation Trust and Wycliffe Bible Translators, Inc. All rights reserved.