Matta 10
10
N Yesu a yal miyari̱mi kub chiri burau
(Mar 3:13-19; Luk 6:12-16)
1N Yesu a yal miyari̱mi kub chiri burabi̱mu a ni chi dukanu ka chaku ki̱fi̱bti, ka beti̱ buri̱ntu.
2Ti̱tu nang di̱mbi fandubi̱bu kubchiri burab, n Simun wu ki̱yalu ko Biti̱r n ti Andi̱riya keko n ti Yakubu bwe Sa̱badi n ti Yowana ke ko. 3N Filibu n ti Bartolomi n ti Toma n ti Matta wu ki̱yiu Sangkale n ti Yakubu bwe Alfiyus n ti Tadiyu. 4N ti Simun naba Kanana, yinu n ti Yafuda Yiskariyoti wu n ki̱n a kwa̱l Yesuwe.
N Yesu a tum Miyari̱m ki̱mu
(Luk 9:16)
5N Yesu a tum Miyari̱m ki̱mi kub chiri burabi̱mu a ngau chimi̱nti̱ ki̱kure ko, “Ti̱yaduwe ni̱bu a yikayu kuuti. Ti̱nti̱ne ti̱ledu di̱kan bi̱n we Samariya. 6Ti̱tibe bwa kwanti yi lairi ni̱bu Yisrelame. 7Yati̱ mwa chi tiko, Yaa Kwama a mwatawe.” 8Ti̱be bi̱bu a bubuwemu, ti̱kuku bi̱bu a bwarani̱mu, ti̱swar ni̱bu mwa̱limu, ti̱chaki̱ti̱ ki̱fi̱bti. Ta ta̱nbu ta̱ne, ti̱ ni ti̱miduwe miye. 9Ti̱da̱du ti̱kan chi we yinang ka̱mbi̱r di̱du ta tani̱n chiin. 10Ti̱da̱du wuka swe we n ti luke yurau n ti ka ki̱wamiye ka dwamenge, naba nanga a dakan ka ya chabtu kitu.
11Kanang di̱di̱le bi̱n di̱du ta ledi̱ne, ta bau nii ki̱nwe tai Kwamaye, ti̱swe we lo wuko a lami̱nti̱ yo ta du fiko. 12Ka yata le lo niye, ti̱si chi. 13Lo a yiu chi̱ne, ti̱yo chimi̱n delaku, wu a ko chi̱ne, ti̱chir ti̱n ki̱ni li̱mang changu. 14Lo a ne yiu chi̱ne ka, ka siti̱bu ki̱tele we ya̱m chime, Ti̱bu kuru we nani chiyu yo kano ti̱chiru, ti̱du lo wukonge. 15Mi̱n fwa chimi̱n bi̱yili̱m, n Kwama ka nwe ki̱bune bi̱n Sodom n ti Komara we di kabaku Kwama ka la bi̱nti̱ ti̱tu a ko chinitu.
Riye wu a bwa kake
(Mar 13:9-13; Luk 21:12-17)
16Da̱ng, mi̱n tumchi̱nu yinang kwanti a tibe bawutiye, di̱ne yiko, ti̱kasan yinang soti, ti̱tau bwanu yinang ki̱kubti. 17Ti̱ma daandaang, di̱ne ni̱bu ka le kan kabaki̱nu ki̱ni chi̱n, ka twalachi̱nu we kambi muraku ni̱bu Yafudamitu. 18Di̱ne mi̱ne, ni̱bu ka yadi ki̱ni chi̱n a kakku bi̱duum n ti mati̱m, di̱ne di̱mwar di̱yili̱nu ta ma a kakku chiyanu n ti yikayu kuuti ti̱n. 19Yo ka yadu ki̱ni chi̱n a kakke, ni̱tu chi̱ntu a kaiyaduwe chi ta fwaditu, di̱ne n ki̱n ka ni chi̱n chi ta fwaditu we ki̱swi wuko. 20Di̱ne nii ka fwa ya̱me n ke chi̱n, Fi̱ki̱m Te chi̱n wu a diye ka fwa chimi̱n ya̱mu.
21Ke ka ni keko ko ni̱bu a chi̱u, te ti̱n ka ni bweko, bwesi̱mu ka yaradu n ti bi̱bu a bi̱u chimu, ka yodu ni̱bu ka chi̱u tebu chimu. 22Ni̱bu a yimbu Kwamamu ka ko chi̱nu di̱ne di̱n mi̱ne. Aya wu ka tidi ki̱ri̱ng ka lami̱nti̱ di swan kute, ka swidu. 23Ka n chi a ni chi̱n riye we di̱kanu bi̱nne, ti̱wulti̱ di̱kan bi̱n. Bi̱yili̱m mi̱n fwa chimi̱nu, a ne ta ri kanaku kuti Yisrela, Bwe Nii ka bedu.
24Miyare a labu naba yungke ko, ka̱be a labu naba loko. 25Miyare ka nwe ta̱ma̱ng ka ka kadu yinang naba yungke ko, yinu ka̱be yinang naba loko ti̱n. Ka a yal teloko Bayalsebul we, yinu ka yal ni̱bu lomu ko wule?
Wu ta nwe tayi kiye
(Luk 12:2-7)
26Nangki̱n, ti̱wulu tayi chiyu we. A ne chi ti̱yingeri ti̱tu a ne wudeditu we. A ne ti̱lairi ti̱tu a ne kwa̱ladituwe. 27Chitu mang fwa chimi̱n a bura tu, ti̱fwa yi kwa̱rikwa̱ri, ti̱lairitu mang fwaatu, ti̱fwa a fi̱lang yinang yilang. 28Ti̱wulu bi̱bu ki̱chi̱u bwiyumu we, aya a ne chi̱u ti̱kuritu. Aya ka la chi ta wul Kwama ka chi̱u bwiyu n ti ti̱kuritu a far ki̱rane. 29Ni̱bu ka medu ka ta̱n kwa̱la ki̱ni kobo wiina? A bwin yiko a ne wuka wu ka swidu we ti̱mu n Te chi̱n a yimbe we. 30Kasi no nang ritu a duriti kwang n Kwama a yim. 31Di̱ne yiko, ti̱nwedu tayi we di̱ne n ti̱n ti̱la kwa̱la ki̱ni ki̱siyangu nabwen.
Wu ka yung yikiye we kakku ni̱bange
(Luk 12:8-9)
32Kanang wuwule niye wu ka yung yikiyu ko n ki̱n wu mi̱n we kakku ni̱bange, mang yungti̱ ki̱nu we kakku Temi wu a diyengu. 33Aya wu ka koyu we kakku ni̱bangi kwa̱rikwa̱riye, mang koti̱ ki̱nu we kakku Temi wu a diye.
Mang bebu ki̱ni li̱me, kana bi̱ngai
(Luk 12:51-53; 14:26-27)
34Ti̱kamaduwe ti kanodu m be ti̱ti̱nitu mi̱ne ki̱ni li̱mang. Mang bebu di̱ne li̱mange aya di̱ne bi̱ngai. 35Aya m be di̱ne, ke n yo di̱kulan we tibe te n ti bweko fwa̱n n ti neki̱n, yinu yire n ti nelaki̱n, 36Fakware kawure ka kadu ni̱bu lokom. 37Wu ka mi̱la teki̱n, ka n neki̱ne, ka la mi̱ne a lwebu ka kau miyare mi. Bi̱bu a mi̱la bwesi̱m bi̱bari̱m chimu, ka bi̱wuti̱m chimu a la chiye, a lwebu ka kau miyare mi. 38Aya wu a ne da̱u ki̱tiyang bwang kangu ka bumiti̱ne, a lwebu ka kau miyare mi. 39Wu ka mi̱la ti̱kuri kite, ka kwaladu. Wu ka kwala ti̱kuri kitu di̱ne mi̱ne, ka yadu.
Sure
(Mar 9:41)
40“Wu ka yiu chi̱ne, a yiu mi̱n, aya wu a yiu mi̱ne, a yiu wu a tum mi̱ne. 41Wu a yiu fa̱ku di̱ne n ki̱n fa̱kuwe, ka yiu sure fa̱kuwe. Yinu wu ka yiu naba yile di̱n n ki̱n naba yile, ka ya sure naba ni̱ri diine. 42Aya wu ka nii wuka win we bi̱ti̱ri̱m bi̱bu, kasi no be kwa̱se wiin wu a mwe wu ki̱ri̱me, di̱ne n ki̱n miyare miye, bi̱yili̱m mi̱n fwa chimi̱nu a ne kwala ki̱ti̱me ko.”
Actualmente seleccionado:
Matta 10: Tula
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2015, The Nigeria Bible Translation Trust and Wycliffe Bible Translators, Inc. All rights reserved.