San Juan 11
11
Te ndixiꞌi ra Lázaro
1Ra ñuu Betania ndixiyo iin tiaa ra xinani Lázaro ra kiꞌin kueꞌe ra, ra kuꞌva ña María, xiꞌin ña Marta kuvi ra. 2Ra ña María, kuvi ña kosondiee ndutia xaꞌan tami xaꞌa Jesús, ra ndakuꞌva ña ña xiꞌin ixi xini ña. 3Ra saa tiꞌvi na siꞌi kuꞌva ra Lázaro kan, chiñu kuaꞌan ña nuu Jesús, ra kachi na saa:
―Tata, ndiee na kuii ndoꞌo ra itaꞌan xiꞌin kun, ra nani Lázaro ―kachi na. 4Ra saa te xini soꞌo Jesús tuꞌun yoꞌo, ra saa ndikaꞌan ra kachi ra saa:
―Ña ndiee ndoꞌo ra Lázaro, ra süvi ra kuvi vi kuvi ra, chi ña vaꞌa na kundaa ini yuvi ña kaꞌnu ni Ndioxi va kuvi ña, ra ndasakaꞌnu tu na yuꞌu, ra kuu seꞌe va ra ―kachi ra xiꞌin na. 5Ra vaꞌa ni kuꞌvi ni va ini Jesús xini ra ña Marta, xiꞌin ña María, xiꞌin ra Lázaro, 6ra te kundaa ini ra ña ndiee ndoꞌo ra Lázaro, ra kuëe ndikun ndixaꞌan ra nuu iyoo ra Lázaro, chi kuachi ka va ra uvi kii ñuu nuu íin ra. 7Te ndiꞌi saa vi ndikaꞌan ra xiꞌin ndia itaꞌan xiꞌin ra kachi ra saa:
―Naꞌa ndo na kuꞌun tuku yo chi Judea ―kachi ra.
8Ra saa ndikaꞌan ndia xiꞌin ra kachi ndia saa:
―Tata Maestro, sakan ndiaꞌvi kii va ke kuni na judío na ndee kan kaꞌni na yoꞌo xiꞌin yuu, ¿ra a tuku va ichi kuni kuꞌun kun? ―kachi ndia.
9Ra saa ndakuiin Jesús, kachi ra saa xiꞌin ndia:
―¿A kundäa ini ndo iin kii, ra uxi uvi hora kuvi ña? Ra ña kan ke na xika kaꞌñu ra kakïꞌi vi na, saa chi tuun va ñùꞌù ña iyoo nuu ña yuuvi yoꞌo nuu na. 10Ndi su yuvi na xika ñuu, ra kakiꞌi va na kan, saa chi köo ñùꞌù tuun nuu na ―kachi Jesús xiꞌin ndia.
11Te ndiꞌi saa ndikaꞌan ka Jesús kachi ra saa xiꞌin ndia:
―Xa ndikixi va ra itaꞌan xiꞌin yo, ra nani Lázaro; ra ña kan ke kuꞌun yu sandoto yu ra ―kachi ra.
12Ra saa ndikaꞌan ndia itaꞌan xiꞌin ra, kachi ndia saa xiꞌin ra:
―Tata, tu ra ndikixi va kuvi ra, saa ra ndoto va ra ―kachi ndia.
13Ra ña kachi Jesús ña ndikixi ra Lázaro, ra ra ndixiꞌi va kuvi ra, kachi ra xiꞌin ndia itaꞌan xiꞌin ra, ndi su ndia kan ra ndikundäa ini vi ndia, chi vaꞌa ra kixi ku ndixa va ra káꞌán ndia. 14Ra saa vi ke ndikaꞌan tieꞌe vaꞌa Jesús, xiꞌin ndia kachi ra saa:
―Xa ndixiꞌi va ra Lázaro. 15Ra kusii ni ini yu ña ndixïyo yu xiꞌin ra, ra saa ke vaꞌa na kuni ndoꞌo, ra kandixa vaꞌa ka ndo yuꞌu, ra naꞌa ndo, ra na kuꞌun yo kuni yo ra ―kachi Jesús xiꞌin ndia.
16Ra saa ndikaꞌan iin ra nani Tomás, ra kaꞌan na kuu kuati kachi ra saa, xiꞌin ndia sava ndia itaꞌan xiꞌin Jesús:
―Naꞌa ndo, ra na kuꞌun yo kuvi yo xiꞌin va ra ―*kachi ra.
Jesús ku ra ku mii ndiayu ña sandatiaku ra yuvi ra taxi tu ra ña kutiaku va na
17Ra saa te ndixaa Jesús ñuu kan, ra saa kundaa ini ra ra xa kumi va kii ke ndikaa ra Lázaro tixi ñuꞌu. 18Ra ñuu Betania kan, ra yachin va ndikaa ña xiꞌin ñuu Jerusalén, saa chi kuꞌva uvi kilómetro sava va ke kindoo ñuu Betania xiꞌin ñuu Jerusalén. 19Ra ña kan ke vaꞌa kuaꞌa ni na judío ndixaꞌan ixtoꞌni ña Marta xiꞌin ña María, ña ^taxi na tuꞌun ndiee ini ndaꞌa na, xaꞌa ña ndixiꞌi ra Lázaro kuꞌva na. 20Ra saa te kundaa ini ña Marta ña kuyachin Jesús xaa ra, ra saa kanata ña ndakiꞌin ña ra; ra ña María, nindoo chi ini veꞌe va. 21Ra saa ndikaꞌan ña Marta xiꞌin Jesús, kachi ña saa:
―Tata, tu ndixiin kun yoꞌo, saa ra küvi vi kuꞌva yu. 22Ndi su kandixa va yu chi tu na nduku kun iin ñaꞌa nuu Ndioxi ra taxi va ra ña ndaꞌa kun ―kachi ña.
23Ra saa ndikaꞌan Jesús xiꞌin ña kachi ra saa:
―Ra kuꞌva kun, ra ndatiaku tuku va ra ―kachi ra.
24Ra saa ndakuiin ña Marta kachi ña saa:
―Xa kundaa va ini yu, chi ndatiaku va ra te na xaa kii ña ndatiaku na ndii kii ña vaxi ―kachi ña xiꞌin Jesús.
25Saa ndikaꞌan Jesús xiꞌin ña kachi ra saa:
―Yuꞌu kuvi ra sandatiaku yuvi, ra taxi tu yu ña kutiaku va na. Ra na kandixa yuꞌu, ra vaꞌa ni xa ndixiꞌi va na, ndi su kutiaku va na. 26Ra takundiꞌi yuvi na tiaku, ra kandixa na yuꞌu, ra ndia nii kii küvi na. ¿A kandixa kun ña yoꞌo? ―kachi Jesús xiꞌin ña.
27Ra saa ndakuiin ña kachi ña saa:
―Kandixa va yu, Tata, ra kandixa tu yu, ña kuu kun Seꞌe Ndioxi va, ra ndikaxin tu ra yoꞌo ña sakaku kun na yuuvi yoꞌo va, ra xa iyoo tu tuꞌun xaꞌa kun ña kixi kun nuu ña yuuvi yoꞌo va ―kachi ña xiꞌin Jesús.
^Xáku Jesús yuꞌu yavi nuu ninduxin na ra Lázaro
28Ra saa ta ndiꞌi ndikaꞌan ña Marta tuꞌun yoꞌo, ra saa ndixaꞌan ña ndikaꞌan seꞌe ña xiꞌin ña María kuꞌvi ña, kachi ña saa:
―Tata yo Maestro, ra yoꞌo va íin ra, ra kana ra yoꞌo ―kachi ña xiꞌin ña.
29Ra saa te kundaa ini ña María tuꞌun yoꞌo, saa ra ndikun ndakundichi ña, ra ndixaa ña nuu íin Jesús va. 30Ra Jesús ra täan kiꞌvi vi ra ñuu, saa chi sakan nuu ndixaa ña Marta niniꞌi taꞌan ña xiꞌin va ra ke íin ra. 31Ra saa te xini na judío na ndixaa ndee kiꞌin kuenda xiꞌin ña Maria, ña kama ni ndakundichi ña kuaꞌan ña, ra saa taxi ndikun na kuaꞌan na sata va ña, saa chi vaꞌa yuꞌu yavi nuu ndikaa kuꞌva va ña kuaꞌan ña kunduꞌu ña kuaku ña, káꞌán na.
32Ra saa te ndixaa ña María nuu íin Jesús, ra saa ndakutoꞌni ña nuu ra, ra ndakusiti ña xaꞌa ra, ra ndikaꞌan ña xiꞌin ra kachi ña saa:
―Tata, tu yoꞌo ndixiin kun, saa ra küvi vi kuꞌva yu ―kachi ña.
33Ra saa te xini Jesús ña ^xaku ña Maria, ra xaku tu na judío na ndixaa xiꞌin va ña, saa ra kusuchi ni tu ini Jesús va xiꞌin ña. 34Ra saa ndikaꞌan ra xiꞌin na kachi ra saa:
―¿Ndia mii ninduxin ndo ra? ―kachi ra xiꞌin na.
Ra saa ndakuiin na kachi na saa:
―Tata, naꞌa, ra koꞌo xiꞌin ndi ra kuni kun nuu ninduxin ndi ra ―kachi na xiꞌin ra.
35Saa ra xaku va Jesús. 36Ra saa ndikaꞌan na judío kan, kachi na saa:
―Kutoꞌni ndo, chi tiaa ni kuꞌvi ini ra xini ra ra ―kachi na.
37Ra sava tu na kaꞌan kachi saa:
―Ra yoꞌo, ra vaꞌa va sandaꞌa ra nuu na kuaa, ¿ra a väꞌa saa ndixa ra, ña täxi kuvi ra Lázaro? ―kachi na.
^Ndatiaku ra Lázaro
38Saa kundaꞌvi tuku va ini Jesús xini ra na, saa ndixaa ra yuꞌu yavi nuu ndikaa ra Lázaro, ra ndika kava va ku nuu íin yavi kan, ra ndasi iin yuu chee yuꞌu ña. 39Saa ndikaꞌan Jesús xiꞌin na kachi ra saa:
―Sakutiaꞌa ndo yuu yuꞌu yavi ―kachi ra xiꞌin na. Ra saa ndikaꞌan ña Marta kuꞌva ra Lázaro kachi ña saa:
―Küvi sakutiaꞌa ndi ña, Tata, saa chi xa kumi vi kii ke ndixiꞌi ra, ra xa xaꞌan ni va ra ―kachi ña xiꞌin Jesús.
40Ra saa ndikaꞌan Jesús xiꞌin ña kachi ra saa:
―¿A ndakäꞌan kun ña ndikaꞌan yu xiꞌin kun, tu kandixa kun yuꞌu, saa ra kuni va kun ña xituꞌun ^xa Ndioxi? ―kachi ra xiꞌin ña.
41Ra saa sakutiaꞌa na yuu ña ndasi yuꞌu yavi nuu ndikaa iki kuñu ra Lázaro, ra saa ndoniꞌi Jesús nuu ra chi ndivi, ra ndikaꞌan ra kachi ra saa:
―Tata, ndataxi yu tixaꞌvi ndaꞌa kun, saa chi xa xini va soꞌo kun ña ndikaꞌan yu xiꞌin kun. 42Ra xa kundaa va ini yu, saa chi takundiꞌi tuꞌun ña kaꞌan yu xiꞌin kun ra ^xini va soꞌo kun ña Tata, ndi su xaꞌa yuvi yoꞌo va ke ndikaꞌan yu xiꞌin kun, ña vaꞌa na kundaa ini na, ra kandixa na ña yoꞌo kuvi ra tiꞌvi yuꞌu vaxi yu ―kachi ra.
43Ra te ndiꞌi ndikaꞌan ra tuꞌun yoꞌo, ra saa ndiee ka vi ndikaꞌan ra kachi ra saa:
―¡Lázaro, kita keꞌe! ―kachi ra.
44Ra saa kita ra Lázaro kan, ra nuꞌni ndaꞌa ra, xiꞌin xaꞌa ra, xiꞌin tikoto ña nii, ra isuvi tu ña nuu va ra. Ra saa ndikaꞌan Jesús xiꞌin na, kachi ra saa:
―Ndaxi ndo ra, ra saña ndo ra na kuꞌun ra ―kachi ra xiꞌin na.
^Kataꞌan seꞌe na ña kaꞌni na Jesús
45Ra ña kuu ña yoꞌo, ra kuaꞌa ni na judío na ndixaꞌan kiꞌin kuenda xiꞌin ña María ra kandixa va na, ña xini na xa Jesús. 46Ndi su sava tu na kee, ra ndixaꞌan na ndatuꞌun na xiꞌin ndia fariseo, xaꞌa ña xini na xa Jesús va. 47Ra saa ndakutaꞌan ndia fariseo xiꞌin ndia xikuaꞌa nuu na sutu, xiꞌin ndia xikuaꞌa xaꞌndia chiñu, ra ndikaꞌan ndia xiꞌin taꞌan ndia kachi ndia saa:
―¿Ni ke sa yo? Chi tiaa yoꞌo, ra kuaꞌa ni ña xituꞌun ^xa ra. 48Ra tu na taxi yo ña sa ka ra saa, saa ra kandixa ndiꞌi va na ra, ra iyo ni kixi na chiñu ñuu Roma, ra sandiꞌi na xaꞌa veꞌe ñuꞌu kaꞌnu yo, ra sandiꞌi tu na xaꞌa ñuu va yo ―kachi ndia.
49Ra saa ndikaꞌan iin ra sutu ra nani Caifás, ra kuchee nuu takundiꞌi ndia sutu mii kuiya kan, kachi ra saa xiꞌin ndia:
―Ndoꞌo, ra xïni vaꞌa vi ndo. 50¿A kïꞌin xini ndo, ña vaꞌa ka va ke na kuvi iin tiaa xaꞌa takundiꞌi yuvi, nuu ña kuvi takundiꞌi na ―kachi ra xiꞌin ndia.
51Ra ña ndikaꞌan ra Caifás tuꞌun yoꞌo, ra süvi xini mii ra ke ndikaku ña, chi xaꞌa ña kuu ra sutu, ra kuchee nuu takundiꞌi sutu kuiya kan va ke taxi Ndioxi tuꞌun yoꞌo ndaꞌa ra, ña vaꞌa ndikaꞌan ra, ña kuvi Jesús xaꞌa takundiꞌi na ñuu kan; 52ra süvi takua xaꞌa na ñuu Israel ke kuvi ra, chi kuvi tu ra xaꞌa na kuu seꞌe Ndioxi na ndee takundiꞌi ñuu va, ña ndachutaꞌan ra na, ra nduu na iin. 53Ra mii kii kan ke, kindoo na ña kaꞌni na Jesús va.
54Ra xaꞌa ña kan ke ndiküvi ka kaka tuvi Jesús tiañu na judío, ra saa kita ra Judea kan, ra ndixaꞌan ra iin ñuu ña nani Efraín ña ndikaa yachin xiꞌin iin iku yuu. Ra ikan ndixiyo ra xiꞌin ndia itaꞌan xiꞌin ra.
55Ra suvi mii yoo kan ke, xa kuyachin ni tu ndatava na judío viko pascua va, ra ña kan ke kuaꞌa ni na kuaꞌan ñuu Jerusalén, ña xa sanduvi na xiꞌin mii na ña vaꞌa ndasakaꞌnu na viko kan. 56Ra ndanduku tu na Jesús va, ra ta ndixaa na veꞌe ñuꞌu kaꞌnu kan, ra saa ^ndakatuꞌun taꞌan na kachi na saa:
―¿Ndixa tuvi ndo, a kixi ra viko yoꞌo a kïxi ra? ―kachi na xiꞌin taꞌan na. 57Ra ndia sutu ndia kunaꞌnu nuu ndia sutu xiꞌin ndia fariseo, ra xa xaꞌndia va ndia chiñu nuu yuvi, ña tu ndia iin na na kundaa ini nuu iyoo Jesús, ra ndikun na ndatuꞌun na xiꞌin ndia, ra vaꞌa tiin ndia ra.
Actualmente seleccionado:
San Juan 11: mxvNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2017, Wycliffe Bible Translators, Inc. All rights reserved