Génesis 3
3
Adán jare Eva uyapo’ä Tumpa jei wae
1Mboi iyarakuaa katuete opaete ïru mbaemɨmba reta Tumpa ikoño mái wae uyapo wae wi. Jare mboi upɨrandu kuña pe: “¿Añetete yerá Tumpa jei pewe awɨye peu waerä pëti awe ɨwɨra reta ía kua mbaewɨyerenda pewa?” jei chupe.
2Jayawe kuña jei chupe: “Opaete ɨwɨra ía mbaewɨyerenda pewa orepuere ndou. 3Erëi pëtiño ɨwɨra ía mbaewɨyerenda mbɨte pe oï wae orepuere’ä ndou. Echa’ä Tumpa jei orewe: ‘Jokua ɨwɨra ía awɨye peu. Awɨye awe pipɨsɨ awɨye pemano waerä,’ jei Tumpa orewe.” Jukuärái jei kuña mboi pe.
4Jayawe mboi jei kuña pe: “Pe reta ndarau pemano,” jei. 5“Tumpa jei pewe, ‘Awɨye peu,’ echa’ä jae uikuaa jokua ara peu yawe, pikota Tumpa rami, echa’ä pikuaata ikawi wae jare ikawi mbae wi,” jei mboi kuña pe.
6Jayawe kuña umae yawe ɨwɨra ía re, uecha maepöra jare ikawi echa jou waerä. Jare uecha wi ipuere umee chupe arakuaa. Jayawe ueki ɨwɨra ía jare jou. Umee wi ime pe, jare jae jou wi. 7Jayawe aramoiño uikuaa reta nani etei ñonoï wae. Jáeramo umbɨwɨwɨ reta ɨwa#3.7 Ɨwa ko jee “higo” karái ñee pe. jokɨ uñeñowa waerä pɨpe.
8Joko wi kaaru yawe, uyandu reta Tumpa mbaewɨyerenda rupi uwata iko. Jayawe Adán jare jembireko uñemi tëi reta Tumpa wi ɨwɨra reta mbaewɨyerenda pewa ipɨte rupi. 9Jayawe Tumpa ueni Adán jare jei chupe: “¿Kiape pa neï?” jei.
10Jare Adán jei Tumpa pe: “Ayandu nde chereni neï mbaewɨyerenda rupi, jare chemara a ndekotɨ waerä chenani aï ramo. Jáeramo añemi tëi ndewi,” jei.
11Jayawe Tumpa upɨrandu chupe: “¿Kía pa jei ndewe nenani neï wae? ¿Ndeu pa jokua ɨwɨra ía che jae ndewe awɨyeta tëi ndeu wae?” jei.
12Jare Adán jei chupe: “Kuña nde nemee cheïrurä wae umee chewe jare che jau jokua ɨwɨra ía,” jei.
13Jáeramo Tumpa upɨrandu kuña pe: “¿Mbae pa ndiyapo?” jei.
Jare kuña jei chupe: “Mboi chembɨtawɨ; jáeramo che jau,” jei.
14Jayawe Tumpa jei mboi pe: “Kua ndiyapo jeko pewa che ayepɨpeyu aï nderé opaete mbaemɨmba reta ipɨte wi – jae ko ñana rupiwa jare tëta rupiwa reta,” jei. “Ndepɨtía re ndiyewichɨta ndewata, jare ndeuta ɨwɨkuí nderekowe opa rewa. 15Jare ayapota nde jare kuña piyembowaicho waerä, jare jae iñemoñaa jare nde niñemoñaa wi. Jokua kuña iñemoñaa uyapasota näka, jare nde nembɨpereta ipɨtäsa pe,” jei Tumpa mboi pe.
16Jare Tumpa jei kuña pe: “Kua wiwe jasɨta ndewe ndepurúa neï yawe, jare amɨïru yeta ndewe nemembɨrasɨ neï yawe. Jare ndipotata tëi nenoi mbaepuere neme re, erëi neme onoita mbaepuere nderé,” jei chupe.
17Jare Tumpa jei Adán pe: “Nembireko jei wae ndiyapo ramo, jare ndeu jokua ɨwɨra ía che jae ndewe awɨyeta tëi ndeu wae ramo, añawe ayepɨpeyuta ɨwɨ re ndereko pewa,” jei. “Añawe wiwe jeta yembɨawái rewe ndeparawɨkɨta ime waerä nderembiurä nderekowe opa rewa. 18Ndeko pe jeñɨta ñuräti jare ñana ikawi mbae wae reta. Jare mbaewɨye ñana rupiwa reta ikota nderembiurä. 19Jeta ndepireita, echa’ä ndeparawɨkɨta ko täta ime waerä nderembiurä nemano rewa jare nderete oo ye rewa uyea ɨwɨ ndiwe. Ɨwɨkuí wi ayapo nderete, jare ɨwɨkuí ko nde, jare ɨwɨkuirä ndeo yeta,” jei Tumpa Adán pe.
20Adán umbɨjee jembireko Eva,#3.20 Tee Eva uipota jei “opaete wae reta iyɨpɨ” hebreo ñee pe. echa’ä jae ko opaete wae reta iyɨpɨ ramo. 21Jare Tumpa uyapo Adán jare jembireko jemimonderä mbaemɨmba ipirekue pewa, jare omondeka chupe reta.
22Joko wi Tumpa jei: “Mase, añawe kua kuimbae uikuaa oï ikawi wae jare ikawi mbae wae re yande rami. Erëi añawe, awɨye tueki tou wi jokua ɨwɨra ía tekowe umee wae. Echa’ä jou yawe, jekowe iyapɨta’ä,” jei. 23Jáeramo Tumpa omoë mbaewɨyerenda Edén wi kuimbae, joko wiwe iko waerä maetɨ re. Tumpa uyapo jokua kuimbae ɨwɨ wi etei jare añawe jae imeta ko umaetɨ ɨwɨ pe onoi waerä jembiurä. 24Jare omoë ma yawe kuimbae mbaewɨyerenda wi, Tumpa oñono araɨwa reta, kerubín jei chupe reta wae, mbaewɨyerenda warasɨ oë wae kotɨ. Jare oñono wi kɨsepuku jendɨ wae uyembɨwawa oï awɨye waerä kiawe oya ɨwɨra ía tekowe umee wae re.
Actualmente seleccionado:
Génesis 3: gnwPB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2017, Ethnos360 (New Tribes Mission). All rights reserved.