Matiu 10
10
Li nalogena kiena ne Yesu lala
Mak 3:13-19; Luk 6:12-16
1Ana Yesu pio kiena nalogena la lualima taaga pa lua pisape aimi puna. Ana la apimi, ana naga pisi ruru pan la p̃isi, a naga mligan plan la apano vena akilia am̃ene plan ninuna viowa e yeririna lala, a vena akilia akila ruru namaiena lala a nainanena viowa tap̃ena lala. 2Ana kia kiena ne li nalologena ne la nanini narui:
nasumo, Saemon, nap̃a apio asape Pita, nap̃a naga pe kiela yerkawa, amio wenla, nap̃a Antru,
Semes, nap̃a narina ne Sepeti, amio wenla nap̃a Yoane,
3Pilip,
P̃atalomiu,
Tom̃as,
inu Matiu, in na nepe yaru na waren takis,
Semes, nap̃a naga narina ne Alpeas,
Tateas,
4Saemon, nap̃a naga kila manene politik sape kuan plan le Rom lala,
a Sutas nae Kariot, nap̃a siraunia, naga pielua Yesu.
Yesu mligan plan kiena li nalologena lala
Mak 6:7-13; Luk 9:1-6
5Ana Yesu pisi ruru pa la lualima taaga pa lua nene, a siraunia naga mligan plan la apano. Visena wo la nene nap̃a naga pisa pan la nanini, nap̃a naga pisape “Amiu na ve ava re puna ne la nap̃a pe ape le Yu re la poli, a amiu ve ava re e pulkumali nae Samaria lala wa. 6Amiu na avanon ga sipsip nae Israel la nap̃a akilalu mrapa. 7Ana pogos nap̃a avanon la nene, ana monar alologon, avisave ‘!Nasup̃enena kiena ne Ntewa pimi ke pun ita narui!’ 8Ana amiu monar akila ruru namaiena lala, a monar akila namarena lala aimi amal sina. A la nap̃a leperosi sike e yepela, monar akila yepela la imi ikiki sina, a amiu monar am̃ene plan yermare e yaru lala. Ana yum̃aena la nene, p̃isi na ayum̃aen e nam̃areraena tai nap̃a amla korenan ga, ana amiu monar ala korenan lein ga va yaru lala. 9A amiu na ve awar re kiamiu kilavaru lap̃asia e kiamiu pultaga lala, 10#1Kor 9:14; 1Tim 5:18a ve awar re m̃ena kiamiu karo tai, nap̃a akon m̃amiu kulsota tap̃ena lala, a kiamiu kulus nen lamiu tap̃ena lala se ea, a ve awar re m̃ena kiamiu plasgai vano. Yaru la nap̃a akila yum̃aena wo la ne sane amiu, p̃isi yaru tap̃ena la nap̃a la amiyum̃ae pan la, monar avisuar ruru la vanonia.”
11Ana Yesu pisa m̃ena ga, pisape “Pogos nap̃a amiu avano-o atol pulkumali tai, ana monar akale yaru tai nap̃a kekaran nap̃a were amiu ava m̃ana, ana asum̃a ga m̃ana, vano vano-o tol pogos nap̃a amiu avatani si pulkumali nap̃ani. 12Ana pogos nap̃a avano asike mratava m̃ana yaru nene, ana monar atalopan ruru la, avisavenua ‘Sum̃are sike amio amiu.’ 13A visae mratava nene kila wo van amiu, ana sum̃are nap̃a apisa ana p̃isi na sike amio la, a visae la akila viowa ga van amiu, p̃isi na sum̃are nene wasup̃e ke sina ga, vim van amiu. 14#Yum̃aena 13:51Ana visae yaru lap̃asia yepela mavin were amiuena ava m̃ala um̃a, pona yepela mavin loge amiuena, ana popon aligan ruru mratava nene pona pulkumali nene m̃eke na. Ana pogos nap̃a amolue e yo nene, amiu atanvan puluyavi nae e yo nene nap̃a sike e lamiu, sane kiamiu visena m̃arera tai ne pan la ne, pisape p̃isi na la akus nakoaena nap̃a mesmesun ga kiela p̃elaga viowa la nene. 15#Mat 11:24#Luk 10:4-12Lelaga nap̃a nevisa meraravan van amiu, e legiena na lip̃ereena, ana la nene na m̃arera la van la, taulu nap̃a Ntewa mlip̃ere le Sotom amio le Komora lala nanua sumo.”
P̃isi na yaru la am̃ene nalogena kiena ne Yesu lala
Mak 13:9-13; Luk 21:12-17
16 #
Luk 10:3
Ana Yesu pisa pan la, pisape “Amiu asitom ruru wo. Inu neligan plan amiu avano, a amiu ala limamiu ga ava sanene, amiu na sa ga sipsip la nap̃a asike likan p̃egas nen lokul tetan lala. Visae sanene, ana monar ave manmarua ruru wo, a amiu monar amom̃au ruruia. 17#Mak 13:9-11; Luk 12:11,12, 21:12-15Ana monar avisuar ruru amiu, vanon nap̃a sap̃isi yaru lala aure amiu ava kiela kumali, a e kiela yum̃a na leniena lala, vena avis van amiu, ana p̃isi na ala nakoaena van amiu, a avisuaria sap̃isi awe amiu. 18Ana p̃isi na aligan amiu ava asum̃alu ase marana ne yerkawa na purvanua vanon ga nap̃a amiu ape kiau nalogena lala, a e pogos nene amiu akilia avisawal kiamiu nalelagaena e inu e maran la nene a e marana ne la nap̃a pe amlelaga re e Ntewa poli. 19Ana pogos nap̃a la nene aimi aure amiu, ana amiu na ve asitom manene re avisave ‘?P̃isi na nevisa sanape ne, a nevisa ya ne van la ne?’ vanon nap̃a p̃isi na Ninuna Wa naga la visena na visawalena van amiu nap̃a avisa, mesmesun e pogos na visena. 20A pogos nap̃a amiu avis, ana pe kiamiu visena re nene poli, ana visena kiena ne Ninuna ne Arimamiu nap̃a naga visi e amiu.
21 #
Mak 13:12; Luk 21:16 “E pogos m̃arera nene, p̃isi na yaru kilia tam̃an yaru viowa tap̃ena la nene la aimi aurelua wenla ruru naapo pona narina ruru naapo, vena awe mom̃ar la amarmare, nanene komin nap̃a la nene amlelaga e inu. A nisisi lala la m̃ena ga akilia asum̃alu avisawal anela lala a arimala lala nap̃a la amlelaga e inu, vena la m̃ena ga amare sanene. 22#Mat 24:9; Mak 13:13; Luk 21:17, Mat 24:13; Mak 13:13Ana p̃isi na yaru lala ve sinelan amiu re sina, akawe kiamiu visena silaga, vanon kiau kia teke e amiu, a yaru nap̃a sum̃alar m̃arera sum̃a ga vano-o pog m̃arera nene p̃isi, p̃isi na Ntewa tamalia naga. 23Ana pogos nap̃a la asum̃a am̃ene manene amiu la e pulkumali tai, amiu monar aure ava e pulkumali tap̃ena, a visae am̃ene amiu ke sina ga e yo nene, amiu monar aure sina. Ana nevisa ruru van amiu, nesape kiamiu yum̃aena nene e pulkumali nae Israel lala, p̃isi na ve p̃isi ruru re wa ana Narina ne Yeririna vim warpoyo ke sina ga.”
24 #
Luk 6:40,
Yoan 13:16, 15:20 Ana Yesu pisa, pisape “Naloge-na, naga pe to re metavan kiena navianena poli, a yaru na yum̃aena, naga pe to re m̃ena metavan kiena sup̃e poli. Ve sanene, amiu na ve asitom re avisave p̃isi na tap̃atete m̃arera van amiu pogos tai, 25#Mat 9:34, 12:24; Mak 3:22; Luk 11:15komin p̃elaga m̃arera nap̃a la akila va navianena, p̃isi na la akila ke m̃ena ga va nalogena, a suri m̃arera la nap̃a sup̃e naga kusia, p̃isi na kiena yeririna naga m̃ena ga monar tolia. Sa nap̃a yaru la apio kare inu, nap̃a in na nepe yerkawa e m̃au mratava, apisape in na Pielsipel, nap̃a naga pe sup̃e kiena ne yermare lala, p̃isi na la akilia avio kare amiu la sane na wa, amiu la nap̃a ape kiau e mratava taaga.”
Nalogena kiena ne Yesu tap̃atete maraun yaru lala
Luk 12:2-7
26 #
Mak 4:22; Luk 8:17 Ana Yesu pisape “Vanon nap̃a p̃isi na avis viowa van amiu ve sa ke ga nap̃a apisi piowa pan inu, ana amiu ve amaraun la re. Suri viowa la punu ga nap̃a yaru lala akila vinaunia, pona apisawaniga, p̃isi na vim kakate e yometava na wa, vena yaru la punu ga akilia. 27A amiu m̃ena ga, suri wo la nap̃a nesum̃a nepisa ke pan amiu e yemalolo, amiu monar avisawal ke sina ga e yomerarava, a suri la nap̃a nesum̃a nepragogon ke ga e kiligamiu, amiu na monar avion manene va metava e maran yeririna lala, vena yar punu ga akilia aloge.
28“Ana amiu na ve amaraun re yaru la nap̃a akilia awem̃ar tasnemiu mare, komin nap̃a la tap̃atete awem̃ar ninumiu mare. Ana amiu na monar amaraun ga Ntewa, nap̃a naga kilia kilalele kare tasnemiu amio ninumiu luwoka e lele naloge viowaena. 29Amiu asitom̃alia. Ninlaea la ne akaka ke la ne, la moki pap̃isi, sa ga kororaki ga, a la asum̃a ap̃iliwilin ke lua e narin kilavaru ga tai, ana visae tai loru vitove tano e porotano, ana Arimamiu naga kilia m̃a ga. 30A vilp̃arimiu m̃ena ga moki pap̃isi, ana Ntewa naga poloar make ga peve taaga, naga kilia la m̃aga. 31Sanene, ana amiu ve amarau re, vanon nap̃a Ntewa pisu amiu na po manenea taulu ninlaea la nene, ana p̃isi na naga kilia visuar ruru amiu e suri punu ga e kiamiu malena.”
Yaru nap̃a naga pisawal pisape naga pe kiena ne Yesu
Luk 12:8-9
32Ana Yesu pisa pisape “Yaru nap̃a naga visawal e marana ne yaru lala visave naga pe kiau yeririna tai, p̃isi na inu m̃ena ga, nevisawal naga e marana ne Ata nap̃a ma e peni, nevisave yaru nene pe kiau. 33#2Tim 2:12Ana yaru nap̃a visawal e marana ne yaru lala visave naga pe pe kiau yeririna re poli, ana inu m̃ena ga nevisawal e marana ne Ata nap̃a ma e peni, nevisave yaru nene naga pe pe kiau yeririna re poli.”
Yesu naga pe purp̃es nen kaween visena
Luk 12:51-53
34Ana Yesu pisape “Amiu na ve asitom re avisave inu nepimin nap̃a nekila sane pupia sum̃are pimi sike e yomarava nini. Peraga, inu pe nepimin re ga neligan sum̃are e poli, ana inu nepimi nemio playu na kilaen mara tai, nap̃a p̃isi na yaru la aveveyu la, a akila mara van la vanon inu. 35In na nepimin nesape nekila sane p̃isi na yaru m̃ee lala akawe visena kiena ne arimala lala, a sira m̃ee lala akawe visena kiena ne anela lala, a sira la nap̃a atalopa ga na wa, p̃isi na akawe visena kiena ne anela simem lala. 36P̃isi na la nap̃a sinela kari manene kiau nalogena lala, naga pe yaru tap̃ena re la poli, yaru na mratava ga m̃ala lala.”
Yesu naga sumo e malena kiena ne kiena nalogena lala
Luk 14:26-27
37Ana Yesu pisa, pisape “Yaru nap̃a sitom manene la arimana, pona anena, pona narina, taulu nap̃a naga sitom inu, yaru nene naga mesmesun re imi sane ve kiau nalogena poli. 38#Mat 16:24; Mak 8:34; Luk 9:23Ana visae yaru tai nap̃a ve kus re kiena laktorovia taveve inu, sane naga pe tam̃an re naga loge viowa vanon inu poli, yaru nene tap̃atete imi ve kiau nalogena. 39#Mat 16:25; Mak 8:35; Luk 9:24, 17:33; Yoan 12:25Visae yaru tai nap̃a naga sitom manene la kiena malena, yaru nene naga p̃isi na kilalu kiena malena nene. A visae kiau nalogena tai naga kilalu kiena malena vanon inu, p̃isi na naga tol malena nap̃a tap̃atete p̃isi.”
La nap̃a avisuar ruru nalogena lala, p̃isi na la atol kiela nalaena
Mak 9:41
40 #
Luk 10:16; Yoan 13:20,
Mak 9:37; Luk 9:48 A Yesu pisa, pisape “Visae yaru tai nap̃a were amiu ava m̃ana loyum̃a, nanene sa ga nap̃a p̃ere inu ke ga nepa m̃ana loyum̃a ne. A visae yaru tai were inu neva m̃ana loyum̃a, ana nanene sa ga nap̃a pere ke ga naga nap̃a naga mligan inu nepimi, pa ke m̃ana loyum̃a. 41Visae yaru tai were navisawalena tai pona yaru mesmesu tai ne sanene va m̃ana loyum̃a, komin naga kilia ke sape yerkawa nene naga pe yaru wa nayum̃aena kiena ne Ntewa, yoko naga kus ke ga nalaena torokin nap̃a yoko Ntewa la va kiena yerkawa la nene. 42A inu nevisa ruru van amiu sanini, visae yaru tai naga la piala na wii manini ve taaga va kiau nalogena tai, nap̃a naga pe sitom re pisape nalogena nene naga pe yerkawa tai poli, pona yaru tai nap̃a naga to ga tano, p̃isi na yaru nene la kiena nalaena tai komin suri wo nene nap̃a naga kila pa kiau yeririna tai.”
Actualmente seleccionado:
Matiu 10: lww
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016, Wycliffe Bible Translators, Inc. All rights reserved.