Chivkeeb 8
8
Dej Nqig
1Vajtswv yeej ncontsoov Nau-as thiab txhua yam tsiaj uas nrog nws nyob hauv lub nkoj, Nws thiaj ua kom cua ntsawj, thiab dej txawm pib nqig zujzus mus. 2Tej qhovdej txhawv hauv ntiajteb txawm txhaws thiab qhovrooj nag saum nruabntug txawm kaw. Nag ciali tu, 3thiab dej pib nqig zujzus tau 150 hnub. 4Ces hnub kaum-xya lub xya hli ntuj, lub nkoj thiaj los txawb rau saum lub hauv roob Alalaj. 5Dej pheej nqig zujzus, ces hnub xiab ib, lub kaum hli ntuj, thiaj pom tej hauv roob tshwm tuaj.
6Tomqab plaubcaug hnub, Nau-as thiaj qhib qhovrais nkoj 7thiab tso ib tug uab-lag ya tawm mus. Tug uab-lag ntawd tsis ya rovqab los, tiamsis nws pheej yuj mus yuj los mus txog thaum dej nqhuab tag. 8Tomqab ntawd, Nau-as thiaj tso ib tug nquab ya mus saib seb dej nqig tag lawm los tsis tau, 9tiamsis vim dej tseem nyab puvnkaus hauv ntiajteb no, tus nquab nrhiav tsis tau chaw tsaws, nws thiaj ya rov los rau ntawm lub nkoj, ces Nau-as thiaj cev tes mus muab nws los rau hauv lub nkoj. 10Nau-as tos xya hnub ntxiv thiab rov tso tus nquab ya tawm mus saib dua. 11Thaum yuav tsausntuj tus nquab thiaj kwv tau ib re nplooj txiv ntoo-roj ntawm nws tus kaus ncauj ya rovqab los. Yogli ntawd, Nau-as thiaj paub tias dej nqig lawm. 12Nws rov tos xya hnub ntxiv thiab tso tus nquab ya mus saib dua ib zaug ntxiv, tiamsis zaumno tus nquab tsis ya rov los lawm.
13Thaum Nau-as muaj hnubnyoog 601 xyoos, lub ib hlis ntuj hnub xiab ib, hnub ntawd dej nqhuab tagnrho huv tibsi lawm. Nau-as rho tej vuas uas vov lub nkoj, tsa qhovmuag saib ibncig ntawd, thiab pom tias av tub pib qhuav lawm. 14Hnubtim neesnkaum-xya, lub ob hlis ntuj, ces lub ntiajteb no qhuav tagnrho.
15Vajtswv hais rau Nau-as hais tias, 16“Ciali coj koj tus pojniam thiab koj cov tub cov nyab tawm hauv lub nkoj mus. 17Coj tagnrho tej tsiaj thiab tej noog huv tibsi nrog koj mus, kom lawv thiaj yuav mus huamvam puv ntiajteb.” 18Yogli ntawd, Nau-as thiaj nrog nws pojniam thiab cov tub cov nyab tawm hauv lub nkoj mus. 19Tagnrho tej tsiaj loj tsiaj me, thiab tej noog uas ya saum nruabntug, nyias ua nyias ib pab rawsli nyias yam tsiaj tawm hauv lub nkoj los rau sabnraud.
Nau-as Fij Khoom Rau Vajtswv
20Nau-as thiaj tsim tau ib lub thaj rau tus TSWV; nws muab tej tsiaj huv thiab tej noog huv ib yam ib tug coj los tua thiab muab hlawv tagnrho fij rau Vajtswv saum lub thaj. 21Tej pa khoom fij ntawd tswqab ntxiag ua rau tus TSWV txaussiab heev, Nws thiaj xav hauv siab tias, “Txawm yog Kuv paub tias tibneeg lub siab yeej ibtxwm xav phem thaum yau-yau los li lawm, los Kuv yuav tsis foom phem rau lub ntiajteb vim tej uas lawv ua ntawd ib zaug ntxiv li lawm. Kuv yuav tsis ua rau txhua yam uas muaj sia kom raug puastsuaj li uas Kuv tau ua tag los no lawm. 22Thaum twg uas lub ntiajteb no tseem muaj nyob, ces yeej yuav muaj caij cog thiab muaj caij sau. Yuav muaj caij ntuj kub thiab ntuj no, muaj caij ntuj qhua thiab ntuj nag, muaj nruabhnub thiab hmontuj tas mus li xwb.”
Actualmente seleccionado:
Chivkeeb 8: MWW2022
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022 United Bible Societies. All rights reserved.