San Mateo 2
2
Ka nu tee elha rieni gekaniha ugíakana gwalannikana Jesús‑ni
1Atti rinnabia Herodes‑ni, la'ania uli Jesús‑ni lhe'esi Belén. Belén‑ni rena daka lo yu ge Judea. La'ania bisin ttu chupa ka nu tee elha rieni gekani, dákana daka ta riria ubisa nna bisinkana lhe'esi Jerusalén‑ni, 2rinnaba tisakana, rákana:
―¿Gon‑ni tee binto si uli, delába bi'ini akabi nu innabiabi ka benne Israel‑ni? Kumu chi bilentu ttu beli runna liina gebi, biriana dana daka ta riria ubisa‑na. De nuha nna datu kini udú xibitu arlobi.
3Atti biyienin Herodes‑ni lhe iyába ka benne ge Jerusalén‑ni nu ra ka nuha, nianna bechacha ikikani nna bedúna kana. 4Nianna tti bottupa Herodes‑ni ka nu loni ge ka bixxudiha lhe ka nu rule'ekinna ka nu Israel‑ni nu ra lo bia bennabi bodha'an Moisés‑ni, nianna tti unnaba tisana ka nuha, rana kana:
―¿Gá daka gali benne anke Cristuha?
5Ka nuha nna bekabikana geni, rákana:
―Daka lhe'esi Belén ge Judea‑ni, niha teeki gali benneha kumu aníha ra lo ka yetsi ben profeta ge Tata Do Yebáha, 6tti ree:
Lu, lhe'esi Belén relu daka lo yu ge Judá,
delo adí ka yiesi elha se'e daka Judá‑ni abittu akinlu deki lu ankalu ttu yiesi xka'aru.
Kumu lagwi gelu iria ttu benne ake nu innabia.
Benneha ku'e ka benne kiaha neda, delába ka benne Israel‑ni.
7Herodes‑ni nna ttúbana uxina ka nu tee elha rieni gekaniha, kini bina tsena nukaxattiga biria beliha. 8Nianna udhelha ttebana ka nuha diakana Belén nna rana kana:
―Gwaltsia nna gwalinnaba tisa tsitsi ge nutoha. Ganna chi gwaxxakale bi nna etetixxi'enle neti kini anágaba neti nna tsiagabaa sadú xibia arlobi.
9Ka nuha nna iki de chi biyienkinna nu ra Herodes‑ni, nianna ulu'u ttebakana neda diakana nna beli bilákinna biria daka ta riria ubisaha, daneruba nuha lokani. Bisinliba nuha ttu lii iki yo'o ata tee bintoha, la'anialiba nna gwalhedana. 10Tti bilákin nu tee elha rieni gekaniha beliha, nianna yalhá itta bedúna lekani 11nna tti uta'akana lhe'e yo'oha nna bilákinna bintoha len nan gebi María‑ni. Nianna bedú xibikani arlobi nna udhali ttebakana ro'o ka nu denkanaha nna begwekana bi oru lhe yala lhe seti nu rure ixixxi nu tee láni mirra lhe. 12Tti chi beyeki ka nu tee elha rieni gekaniha deyyakana nna botseaba neda gekani kumu de lhe'e ela bitsiakinnaha ra Tata Do Yebáha kana:
―Bitturu eyekile etele ata do Herodes‑ni.
Ka tata nan ge Jesús‑ni bexunni lenke bi bisinke Egipto
13Iki de chi bedá ka nu tee elha rieni gekaniha, nianna bedetsiani José‑ni ela. Lhe'e elaha nna bela'anie ttu anjeli ge Tata Xisiha nna ree bie:
―Ugwadha nna uche binto‑na lhe nan gebi‑na lhe, bexunni lenke nna ugía lenke daka Egipto. Niha‑ba tse'ele axtaliba ganna chi utixxi'ania lu, kumu Herodes‑ni idhelhana egilakana binto‑ni ki uttikana bi.
14Aníha uka nna ugwadha tteba José‑ni lo relaha, chebie bintoha lhe nan gebiha nna ulu'u ttebake neda diake daka Egipto. 15Niha‑ba use'eke axtaliba atti chi utti Herodes‑ni. Aníha uka ki gwado tisa ge nu ra Tata Xisiha, tti benie ki unne benne uke profeta geeha, ree: “Egipto re Xi'iniaha, beyaxie.”
16Herodes‑ni nna tti ute denna deki benba le ka nu tee elha rieni gekaniha, labí liikinna eyekikana ki sattixxi'akinna na. Nianna bisa'a xxattinna nna benna mandadu kini gwettikana iyába ka nuto biyú to se'e lhe'esi Belén‑ni lhe ka nuto se'e lhe'e ka yiesi se'e abi'iba niha: iyába ka nuto ankakinna chupa ida lhe ka nu gwexxaru lhe. Aníha benna kumu bedaxxu ni'ani nu utixxi'a ka nu tee elha rieni gekaniha. 17Aníha uka ki gwado tisa ge nu unne Jeremías benne uke profeta ge Tata Do Yebáha, tti ree:
18Lhe'esi Ramá biyien tsi'i ttu benne,
rinnee lhe ribesi xxatte de releninie.
Raquel‑niba nuha ribesina ge ka xi'inniha,
labí rebe xen leni kumu de utti ka nuha.
Ka tata nan ge Jesús‑ni besinke lenbi lhe'esi Nazaret
19Iki de tti chi utti Herodes‑ni nna bedetsien José‑ni attu ela tti doe Egipto‑ni. Lhe'e elaha nna bodola'anie ttu anjeli ge Tata Xisiha. 20Anjeliha nna ree bie:
―Beyadha nna beche nuto‑na lhe nan gebi‑na lhe, nna beyya lo yu ge ka nu Israel‑ni kumu chiba utti ka nu ruinkana uttikana nuto‑na.
21Aníha uka nna beyadha ttebe nna dechebie nutoha lhe nan gebiha nna deyyake besinke lo yu ge ka benne Israel‑ni.
22Ttaka tti bina José‑ni deki Arquelao‑niba redennabiana itúba Judea, kumu bedína ladi tata geni Herodes, de nuha nna usibin José‑ni eyye daka Judea‑ni. Nianna tti bedetsianie attu ela. Lhe'e elaha nna utixxi'ani Tata Do Yebáha bie bixa anka nu unie. Aníha uka nna daka Galilea‑nila deyya ka José‑ni. 23Tti besinke daka niha, nna gwatse'eke lhe'esi Nazaret. Aníha uka ki gwado tisa ge nu ra ka benne ukake profeta ge Tata Do Yebáha, tti ráke: “Benne anke Cristuha gatta lábie nazareno.”
Actualmente seleccionado:
San Mateo 2: zae
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2014, Wycliffe Bible Translators, Inc. All rights reserved.