Génesis 4
4
Adán, Eva ome warrarã oodapꞌedaa
1Adán chi wẽra ome pꞌaneedakꞌãri, chi wẽra biakꞌoo beeji mãikꞌaapa ɨmɨkꞌĩra warra tꞌoji. Tꞌɨ̃ bɨjida Caín.
Ma warra tꞌokꞌãri, Evapa mãgaji:
—Ɨmɨkꞌĩra warra iru bɨda aji, Tachi Akꞌõrepa teeda.
2Maapꞌeda awaraa warra tꞌoji. Tꞌɨ̃ bɨjida Abel. Abelpa ovejaarã waripachi. Jõdee Caín ne–uupachi.
3Ma tꞌẽepai, ewari aba Cainpa Tachi Akꞌõremaa primicia teeji ichi ne–uu badadepema. 4Ichiaba Abelpa primicia teeji. Ichi ovejaarã warrarã naapɨara tꞌodadepema peepꞌeda, chi traa teeji Tachi Akꞌõremaa. Tachi Akꞌõrepa pia akꞌɨji Abel irua teeda ome. 5Mamĩda pia akꞌɨ–e paji Caín irua teeda ome. Maperã Caín kꞌĩraudachi mãikꞌaapa kꞌĩra pia–ee beeji.
6Mãpai Tachi Akꞌõrepa mãgaji:
—¿Sãapꞌeda pɨ jãgá kꞌĩrau bɨma? aji. 7Pɨ tꞌãride kꞌĩsia pia iru bada paara, kꞌĩra pia bakꞌaji. Mamĩda mãga oo–e bairã, pɨ kꞌachiade baaita bɨda aji. Mamĩda pɨa pꞌoyaayada aji, waa mãga ba–e paitꞌee.
8Maapꞌeda, ewari aba Cainpa mãgaji Abelmaa:
—Mẽe wãdáma aji.
Mamĩda mẽe panadakꞌãri, Cainpa chi ɨ̃pema pee atapëiji.
9Mãpai Tachi Akꞌõrepa Cainmaa iidiji:
—¿Sãma bɨma aji, pɨ ɨ̃pema Abel?
Cainpa pꞌanauji:
—Kꞌawa–e bɨda aji. ¿Mɨ, mɨ ɨ̃pema akꞌɨparikꞌã? aji.
10Mãpai Tachi Akꞌõrepa mãgaji:
—¿Sãapꞌeda mãga oojima? aji. Pɨ ɨ̃pema waapa eujãdeepa mɨmaa bia pɨkꞌa nɨ̃bɨ, mɨa pɨ miapimerã ma kꞌachia ooda kꞌaurepa. 11Pɨ ɨ̃pema mãgá peeda perã, mɨa pɨ kꞌachia ooitꞌee. Pɨ jëretꞌaaitꞌee na eujãdeepa, pɨa kꞌachia oodamãiipa. 12Mãgá pɨ ɨ̃pema waa eujãde beeda kꞌaurepa, audú mimiaru pɨjida, ne–inaa uukꞌãri, pia chau–e paitꞌee naawedapemakꞌa. Na pꞌekꞌau eujãde ɨ̃i–ee nipapariitꞌeeda aji.
13Mãpai Cainpa pꞌanauji:
—Mɨa pꞌoyaa choo–eda aji, pɨa jarada. 14Idi mɨ na eujãdeepa jëre bɨ. Pɨa jaradakꞌa ɨ̃i–ee nipapariitꞌeeda aji. Pɨa mɨ waa akꞌɨ–eda aji. Mɨ unurutamãi eperãarãpa mɨ peetꞌaadayada aji.
15Mãpai Tachi Akꞌõrepa mãgaji:
—Mãga–epɨ. Apidaapa pɨ peeruta pɨrã, mɨa mãgɨ́ eperã miapida siete miapiitꞌeeda aji.
Mãpai Tachi Akꞌõrepa Caín tauchaa paraa bɨji iru unurutaarãpa peenaadamerã. 16Caín wãji Tachi Akꞌõre ome pedee badamãiipa mãikꞌaapa banaji Nod eujãde; Edendeepa oriente eere.
Caindeepa uchiadapꞌedaarã
17Cainpa wẽra atakꞌãri, chi wẽra biakꞌoo beeji mãikꞌaapa ɨmɨkꞌĩra warra tꞌoji. Tꞌɨ̃ bɨjida Enoc. Maapꞌeda Cainpa pꞌuuru ooji mãikꞌaapa ma pꞌuuru ichiaba tꞌɨ̃ bɨji Enoc. 18Enocdeepa uchiaji Irad. Iraddeepa uchiaji Mejuyael. Mejuyaeldeepa uchiaji Metusael. Metusaeldeepa uchiaji Lamec. 19Lamecpa wẽraarã omé ataji. Aba tꞌɨ̃jarapachida Ada; chi apema Zila. 20Adapa ɨmɨkꞌĩra warra tꞌoji. Tꞌɨ̃ bɨjida Jabal. Irudeepa uchiajida te ne–animal edee oodade pꞌanapataarã mãikꞌaapa pꞌakꞌa waripataarã. 21Jabalpa ɨ̃pema iru baji; tꞌɨ̃jarapachida Jubal. Mãgɨdeepa uchiajida arpa mãikꞌaapa pꞌipꞌana chaapataarã. 22Zilapa ichiaba ɨmɨkꞌĩra warra tꞌoji. Tꞌɨ̃ bɨjida Tubal Caín. Mãgɨpa ne–inaa hierrodee, broncedee oopachi. Tubal Cainpa ɨ̃pewẽra iru baji. Tꞌɨ̃jarapachida Noamá.
23Ewari aba Caindeepa uchiada Lamecpa chi wẽraarãmaa nãgɨ́ audua pedee jaraji:
—Pia ũrítɨ mɨa jararu. Mɨa eperã peeji irua mɨ suda perã; kꞌũtrãa peeji irua mɨ pꞌua ooda perã. 24Apidaapa Caín peeda paara, Tachi Akꞌõrepa mãgɨ́ eperã miapida siete miapikꞌajida aji. Mamĩda ma kꞌũtrãa peeda kꞌaurepa apidaapa mɨ peeruta pɨrã, Tachi Akꞌõrepa mãgɨ́ eperã setenta y siete miapida miapiipia bɨ.
Adán warra Set tꞌoda
25Cainpa Abel peeda tꞌẽepai, Evapa waya warra tꞌoji. Tꞌɨ̃ bɨjida Set.
Evapa warra tꞌokꞌãri, mãgaji:
—Tachi Akꞌõrepa warra awaraa teejida aji, Abel kꞌapꞌɨa, Cainpa peetꞌaada pari.
26Taarã pakꞌãri, Setpa wẽra ataji mãikꞌaapa warra ooji. Tꞌɨ̃ bɨjida Enós. Set bapariikꞌãri, eperãarãpa Tachi Akꞌõre Waibɨamaa ɨtꞌaa tꞌɨ̃maa pꞌaneejida.
Actualmente seleccionado:
Génesis 4: sjaB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
©2005, 2010, 2015 Wycliffe Bible Translators, Inc. All rights reserved.