Zlr 12
12
Hgaŋta Lazglafta ta Abram
1Ka Yawe nda Abram mantsa: « Sliʼaf sliʼa ka zlaŋta ka ta haɗika gha, nda la ghuni, nda la ga da gha, ka dzaʼa ka ta haɗik ya dzaʼa maraghaŋta yu.
2Dzaʼa yagap ya yu ta ndəghata mndəra mndu ma kagha,
dzaʼa tfaghagha tfa yu ta wi,
dzaʼa ŋlanaf ŋla yu ta hga gha.
Nda ma kagha dzaʼa mutsa sanlaha ta tfa wi.
3Dzaʼa tfanagha tfa yu ta wi ta gwal dzaʼa tfa wi ŋa gha.
Dzaʼa ksiʼaf ksiʼa yu ta gwal dzaʼa ksiʼa kagha.
Nda ma kagha dzaʼa mutsa inda mndəra mndu ta haɗik ta tfa wi, » kaʼa.
4Manda snaŋta Abram ta tsa gwaɗa ya, ka sliʼaftá tsi ma luwa Haraŋ ka laghwi manda ya mnana Yawe, ka laghu Lut kawadaga nda tsi. Ma tsa fitik ya ndəfáŋ mbsak hutaf mida ima ni. 5Ma tsa sliʼa Abram ya, ka klíŋtá tsi ta markwa taŋ Saray, nda Lut zwaŋa zwaŋama ni. Ka klíŋtá həŋ nda inda gadghəlha taŋ tskaf həŋ hada, nda kwalvaha taŋ si dzawa həŋ ma Haraŋ ya. Ka laghu həŋ ta haɗika Kanʼana. Manda lagha taŋ ta haɗika Kanʼana, 6ka tadaptá Abram ta tsa haɗik ya, ka ɓhadaghatá tsi da sana vli ta hgə lu ka Səkem, ha ma vla sana halalaya fu ma Mure. Ta tsa fitik ya, la Kanʼana ta nzakw ta tsa haɗik ya. 7Ka maravatá Yawe ta kəma Abram, kaʼa nda tsi mantsa: « Dzaʼa vlaŋtá zivira gha yu ta na haɗik na, » kaʼa. Ka dzihwaftá Abram ta gwir ŋa Yawe ta zlagapta da tsi ya. 8Daga hada, ka sliʼaftá tsi ka laghu nda ta ghwá nda ga silwa ma luwa Betel. Ka dzagwatá tsi ta tumpulha ni ma takataka nzakwa i Betel nda ga mazu, nda Ghay nda ga silwa. Ka dzihuglaftá tsi hada ta gwir ŋa Yawe, ka hgə tsi ta hga Yawe nda ma duʼa. 9Ka kəɗ Abram ta mbaɗa ni nzaha ma ya vli nzaha ma ya vli, ka gavadatá tsi nda ma Negev.
Sliʼa Abram da Masar
10Ka slatá maya ta tsa haɗik ya, kəl Abram ka sliʼafta ka laghu da nzəɗavata ma haɗika Masar, kabga furtu furta tsa maya ya katakata. 11Ndusa həŋ ka lami da haɗika Masar, kaʼa nda markwa taŋ Saray mantsa: « Sna ɓa! Nda sna yu kazlay ɗinu ɗina ka katakata kəʼa, 12ka pghaf pgha ira la Masar ta kagha: “Markwa taŋ ya,” ka həŋ dzaʼazlay. Dzaʼa dziha dza həŋ, ka zlagha ta kagha nda hafu. 13Wya dzvu: “Makuma ni yu,” ka ka dzaʼazlay nda həŋ. Mantsa, dzaʼa nghap ngha həŋ ɗina ka iʼi dabga kagha. Tsaya tama ná, əŋkaʼ a ka kagha dzaʼa kəl yu ka nzata nda hafu, » kaʼa.
14Na va gi ɓhadaghata Abram da Masar, kəʼa ka la Masar na, ɗinu ɗina tsa marakw ya katakata. 15Manda nghaŋta gwal dagala dagala ga Firʼawna guli, ka laghu həŋ da ghubay ta kəma Firʼawna. Mantsa tama, ka kladaghatá həŋ ta tsa marakw ya da həga ga Firʼawna. 16Dabga tsa marakw ya, ka maganatá Firʼawna ta zɗaku ta Abram. Ka hlanaftá tsi ta rina fisik, nda slaha, nda zəʼala kəɗihha, nda kwalvaha, nda kurɗuha, nda markwa kəɗihha, nda ŋalibwaha. 17Ama ka ghuyanaptá Yawe ta ɗaŋwa ta Firʼawna nda la ga taŋ tani, nda zləmnda katakata, dabga Saray, markwa Abram. 18Ka hgadaghatá Firʼawna ta Abram da taŋ. Kaʼa nda tsi mantsa: « Nahgani na magiha ka? Si nu kul mniɗiŋtá ka kazlay markwa ini ya kəʼa? 19Kabgawu kəl ka ka thay kazlay makuma ɗa ya kəʼa nda iʼi, kəl yu ka klafta ŋa markwa ini? Kabga mantsa, wya markwa ghuni, kla ta skwa gha, sliʼa! » kaʼa. 20Ka mnanaftá Firʼawna ta mnduha ni, ŋa ghuniŋtá həŋ, tsatsi nda markwa taŋ, nda inda tsa skwiha ni ya tani.
Actualmente seleccionado:
Zlr 12: xed
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Wycliffe Bible Translators, Inc. All rights reserved.