Mwanzo 7
7
Mwanalukaya nkulu wakwijaza maji duniya piya
1Sambi Mola kamwámbira Nnu: “Uwe újuzi wingire nsafina pamoja na nkawako, wanawo, na wakwezo. Omi nísaka nukuvusheni, konta ninang'ániza nukuwonérera uwe kuwa na kweli, hapana mwengine tena tarehe-yi. 2Piya manyama wari swafi uwatware walume saba na waka saba na piya manyama sawari swafi uwatware wawiri-wawiri muka na nlume. 3Tena utware nyuni saba nlume na saba nyika, újuzi kutenda javyo kuwavusha wapate mainsha wadudu wa kila namuna wa piya inti. 4Muda wa suku saba nínyesa nvula nduniya, suku arubaini usiku na nsana, na piya ciri hai conse canumbire omi nílayinisa.” 5Nnu katenda piya sawa-sawa kamba Mola wetu vyaantumire kutenda.
6Ákiwa nawo humuri wa myaka miya sita wakati waajire mwanalukaya wa kuzidi kwijaza maji piya duniya. 7Nnu na wanawe na nkawake na wakweze wengira nsafina kuwa wanusurike na mwanalukaya wa kuzidi. 8Wadudu wakuwa swafi na sawari swafi, nyuni na wadudu wakurikweta pansi, 9waja wawiri-wawiri muka na nlume ka Nnu nkati ya safina, kamba Mwenyezimungu vyaamwambire Nnu. 10Upita muda wa suku saba mwanalukaya akanza kwijaza fó maji duniya piya.
11Suku ya kumi na saba ya mwezi wa piri wa mwaka waatimize Nnu myaka miya sita ya humuri wake, kweli-kwelini akanza maji kububuka pansi ka nguvu na miryango piya ya binguni ikifunguka. 12Ikinya nvula duniya piya suku arubaini usiku na nsana. 13Suku noire, Nnu na wanawe, Shemu, Hamu na Yafeti, na nkawake na wakweze watatu wengira wonse nsafina. 14Wengira emo pamoja na kila namuna ya manyama, wadudu wa nnundu, wadudu wakufuwiwa, kila namuna ya wadudu wakurikweta pansi, na kila namuna ya nyuni. 15Kila mwenye mainsha wakupumuzika, wawiri-wawiri, muka na nlume, waja ka Nnu wengira na Nnu nsafina. 16Wengira nlume na muka, kweli-kwelini, kamba Mwenyezimungu mwanyewe vyaantumire Nnu. Nakisa Mola wetu akinfungira nryango Nnu kipanjapanja.
17Kwijala ka maji kukizidi kuka mbere, suku arubaini maji ákengezeka kila wakati na safina ikanza kwerera. 18Maji engezeka tena ka nguvu pakulu akifinika piya ardhi na ire safina ikerera julu ya maji are. 19Azidi kwengezeka pakulu, myango mirefu-mirefu piya ikizama. 20Maji are azidi kwengezeka tena ka nguvu mpaka myango piya ikizama, na akipunda myango ire kiyasi ca pima saba! 21Wákiinshi nduniya piya wakifwa. Manyama, nyuni, wadudu wakurikweta pansi, pamoja na wanadamu piya wakifwa. 22Piya viyumbe wákiinshi na mumu yakupumuzika wakifwa. 23Basi mwanalukaya nkulu kapoteza viyumbe piya nyuni, manyama, wadudu wa kurikweta pansi, na wanadamu piya wakilainika. Akibaki Nnu basi na ware waákiwa nawo nsafina. 24Maji are êjala fó ardhi piya, mpaka muda wa suku miya na amusini.
Actualmente seleccionado:
Mwanzo 7: wmwBI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2013, Wycliffe Bible Translators, Inc. All rights reserved.