Lucas 14
14
Pepakayap neng Jesus ing Lalaking Mengalbag
1Misan a Aldo ning Sabbath, mekumbira yang makipangan i Jesus king bale na ning metung a pamuntuk da ring Pariseo, at pegumasdan deng masalese ding tau. 2Karin ating lalaking mengalbag a bitis at gamat; linapit ya kang Jesus. 3Inya kitang nang Jesus karing talaturu ning Kautusan#14:3 O kaya: eskriba. at Pariseo, Paintulut na ning Kautusan ing pakayap masakit king Aldo ning Sabbath o ali na?
4Alang mekibat metung man karela. Telanan neng Jesus ing masakit, pepakayap ne at saka ne pepaulian. 5#Mt 12:11.Kaybat na nita, sinabi na karela, Nung ing ninuman kekayu atin yang anak a lalaki o bakang menabu king talaga king Aldo ning Sabbath, nanu ing daptan na? E ne wari isaka agyamang Aldo ning Sabbath?
6E la mekapakibat king kutang a iti.
Ing Kapakumbaban
7Apagumasdan nang Jesus nung makananu lang mamili karing luklukan pandangal ding mapilan a mekumbira. Selita ne karela ngan iting talimhaga. Ngana, 8#Kas 25:6, 7.Nung kimbiran na ka ning ninuman king metung a kasalan, e me pipilinan ing luklukan pandangal. Pota ating mekumbirang mas marangal kesa keka. 9At lapitan na ka ning mengumbira kekayung adua at sabian na keka, Paburen meng lukluk king luklukan mu ing taung ini! Mipakarine ka kanita at king pekamarayung luklukan karin ka lukluk. 10Ing masanting mung daptan neng mekumbira ka ya ing lukluk ka king pekamarayung luklukan. Lapitan na ka kanita ning mengumbira at sabian na keka, Kakaluguran, keni ka king kabisera. Mirangal ka kanita king arapan da ring aliwang bisita. 11#Mt 23:12; Lc 18:14.Uling ing ninumang magmatas mibaba ya, at ing ninumang magpakumbaba mitas ya.
12Sinabi na naman Jesus king mengumbira keya, Neng magtau ka, e mu la kukumbiran ding kekang kakaluguran o ding kekang kapatad o ding kekang kamaganak o ding masalaping siping mung bale, uling kumbiran da ka naman, at kanita miyablasan ka king depat mu karela. 13Neng magtau ka, ding kumbiran mu ila ding pakakalulu, ding lumpu, ding pile, at ding bulag. 14Mibendisyunan ka uling ila e ra ka ayablasan. Ablasan na ka ning Dios keng subli lang mie ding banal.
Ing Talimhaga tungkul king Maragul a Bangketi
(Mateo 22:1-10)
15Dimdam na iti ning metung karing kasulu nang mamangan, at ngana kang Jesus, Kasuerti da ring miyabe-abe king pamangan king Kayarian ning Dios!
16Mekibat ya i Jesus, Ating metung a taung migtaung maragul at dakal la ding kimbiran na. 17Inyang miras na ing oras, inutusan ne ing ipus na at pepasabi na karing mekumbira, Munta na kayu keni; makasadia na ing sabla! 18Oneng ginawa la ngan sangkan. Ngana king ipus ning mumuna, Mekasali kung hasienda at kailangan keng puntalan ban lawan. Ikayu na ing balang magpasensia kanaku. 19Ngana naman ning metung, Mekasali kung limang kaparis a baka at kailangan ku lang subukan. Ikayu na sanang balang magpasensia kanaku. 20Sinabi na naman ning metung pa, Bayu kung kasal; e ku makatagun. 21Mibalik ya ing ipus at belita na iti king panginuan na. Mimua ya iti at sinabi na king ipus na, Munta kang malagua karing dalan at pigulut na ning siudad at idala mu la keti ding kalulu, ding lumpu, ding bulag, at ding pile. 22Kabalik na ning ipus, sinabi na, Agawa ku na pu, ginu, ing inutus yu, oneng malualas ya pa ing lamesa. 23Inya ngana ning panginuan king ipus na, Munta ka pa karing baryu at sitio at pilitan mu lang munta keti ding tau ban kumatmu ya ing bale ku. 24Sasabian ku keka, king ala metung man karing mekumbira ing makatakman king pamangan a sidia ku!
Ing Pakiduang ning Panga-alagad
(Mateo 10:37-38)
25Milalu la karakal ding taung tutuki kang Jesus; inarapan na la at ngana, 26#Mt 10:37.E ya malyaring maging alagad ku ing ninumang lalapit kanaku nung maygit neng kaluguran#14:26 King Griego: e na ne man pikasaman. kesa kanaku i tata na at ima na, ing asawa na at ding anak na, ding kapatad nang lalaki at babai at pati na ing mismung sarili na. 27#Mt 10:38; 16:24; Mc 8:34; Lc 9:23.E ya malyaring maging alagad ku ing ninumang e bisang mamusan king krus na at tuki kanaku. 28Nung magplanu yang patalakad tore ing metung kekayu, e ya pa wari lukluk at balakan na ing gastusan na ban abalu na nung managyu la ding pera na ba yang mayari ing tore? 29Pota mitalakad la ding pundasyun oneng e na ne man apayari, kaylian dia ding sablang manakit. 30Sabian da, Pegumpisan neng telakad ning taung iti at e na ne man pala apayari! 31O ninung ari a makilaban king kalupa nang ari ing e pa mu lukluk at misip nung ding apulu nang libung sundalus agyu da lang labanan ding aduang pulung libung sundalus na ning kalaban na? 32At nung e na agyu, mitubud yang pekakatawan na kabang marayu ya pa ing kalaban na ban makipagkasundu. 33Makanyan munaman e ya malyaring maging alagad ku ing ninuman, nung e na lakuan ing sablang atyu keya.
Ing Asin a Alang Ulaga
(Mateo 5:13; Marcos 9:50)
34Mayap ing asin; nung milako lasa ala nang paralan ban mibalik ing kalat na. 35Ala nang kasilbian iti para king gabun o para king pikukuanan pataba. Iyugse ra na mu. Inya makiramdam kayu nung atin kayung balugbug!
Actualmente seleccionado:
Lucas 14: PmPV
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Philippine Bible Society New Testament © 1981, Bible © 1994