Luk 2
2
Mariya atehei Jises eme len
(Metiu 1:18-25)
1Na len doh Sisa, ndramak ta atondrok nyaran Akustus, suni sahou i tiri lau mari badu bahandra tondrok ta Rom katorou nyara iri, ma kondrek kane iri lau. 2Lahou doh ma mwena handru barasahan ai, ta ondrek kane lau na len, Kuriniyus atondrok kon Siriya. 3Eme iri lau mari ala kon tinan ta tubu iri ari ari, adeu nyara iri.
4Eme Josep badeh, udu kon tinan Nasaret. Kon doh udu bolo Galili, eme Josep ili. Ano, iy ili loboho Judiya ma ili kon tinan Betlehem. Kon doh mene adeu Debit udu aliy. Eme Josep ili doh, tasah iy badu boho kamen ta Debit. 5Iy mene, iri amekes san ta Mariya i tan. Eme uru ala doh ta adeu nyara uru. Arile Mariya badeh, nah udu tan. 6Eme uru ado Betlehem are gwek le badeh, ben asahan ta Mariya anya kedeu nadun. 7Eme uru ala, iy atehei nadun udu bolo asiu tiri bulumakau. Iy mwan, su-i iy na kolau, ma nyahani iy udu bolo bwekei ta ndrahu nyamon tiri bulumakau, tasah oro badeh, ari asiu ta ala aliy bwe.
Iri lau ta atondrok sipsip hawe iri angelo
8Ya eme, oro lau rayah ta atondrok iri sipsip badu kon doh, atondrok iri sipsip an lobwidiu na ben. 9Eme angelo ari ta Laban badu loken eme asahan hawe oro, ma lomadan ta Laban lomatani oro. Eme ya oro anoh andra-i labai. 10Arile angelo dah, tiye i toro, “Ado sanoh! Ado kanuhun! Jo eme dah ta tiye nyala ado ta sahou mwasin, ma hawe idah kameh amekes lau mari kameh sekesek tinan labai. 11Na len dah, udu kon tinan ta Debit, nah ari ta seben ado ndrasahan. Iy badeh, Laban Krais!#(2:11) Krais badeh, moson Kindrei suni iy 12Kalem ta aliy kameh ado atanan iy handru i buku doh: Idah kameh ado atou nah doh kameh su-i iy na kolau, ma nyahani iy, udu bolo bwekei ta ndrahu nyamon ta bulumakau.”
13Eme nawin bwe, iri angelo solo-an labai badu loken ame hawe angelo ari nane dah, ma iri ayah wari ta atudun nyara Kindrei i buku doh,
14“Lomadan ki ta Kindrei, udu loken labai bwele-e kandrah,
Ma mondrei udu bwele-e munyak i toro are iy aseken oro labai, ado mwasin ta madan.”
15Ano iri angelo au a len ta mada oro, ma iri au ala kandrah. Eme ya oro lau ta atondrok sipsip ame, ndremenya oro ari ari anya, “To ka-au kala Betlehem, kanyolom lakou nane Laban asehek ta to.”
16Eme ya oro suri oro suwi suwi, ma oro ala takaleh, ma atou Mariya uru Josep, ma anyolom nah nane dah, amadin udu bolo bwekei ta ndrahu nyamon ta bulumakau. 17Eme oro lau ta atondrok iri sipsip anyolom iy. Ano oro asehek i tiri ta nyala nah nane dah mene angelo asehek i toro. 18Ya eme iri lau anuhun sahou nane oro asehek dah, ma iri abudon solo-an labai ta aliy. 19Eme bale Mariya bamaniy bwe, iy lomondra boto-on labai ta aliy kahis le. 20Ano oro lau ta atondrok sipsip au ala hamon ja, ma ayah wari ta atudun Kindrei ta lakou mari oro anuhun, ma lakou mari oro anyolom, asahan i buku le angelo mene ndrasihidi toro ndra-au.
Tondrohani nyaran i Jises
21Eme ya len tan asahan ndru la-uh, idoh len ta asan ku-in. Ano uru tondrohani nyaran i Jises, nyaran mene le, angelo tiye, na len doh mene, nah bare ta Mariya bwe le.
Jises ili asiu tinan ta Kindrei
22Ano, len asahan ta Josep uru Mariya kamekes kandriyen malen ta Moses mene batanau ta sikine uru. Eme uru tiyani nah dah, ili Jerusalem ta leheya iy ki mada Laban, 23i buku none ndratorowenei udu bolo sahou batanau malen ta Laban,
“Ta nah kadok mari badeh, kadeu iri ka mine Laban.” Eksodus 13:2,12
24Eme uru ale ala adeu
“la-uh ban, ya i buku ban bwe, na la-uh ku, i mine iri pris ta asun” Lebitikus 12:8
i nyara salom in hamon ta batanau ta Laban.
25Eme ndramak ari badu Jerusalem nyaran Simiyon badeh, udu aliy. Iy badeh, mwasin handru ta mada Kindrei ma iy inoh Kindrei labai. Ya iy badeh, Malawin Ndrabun udu tan, ma iy abe-en len ta seben ta lau badu Isra-el kameh asahan. 26Ma Malawin Ndrabun ndratiye tan, ta iy kameh winiyan bamak bwe, winiya iy udu atou tandrakan ta Laban, Krais. 27Eme Malawin Ndrabun tiye Simiyon ili bolo asiu tinan ta Kindrei. Ano Josep uru Mariya ala atiye nah dah, ili bolo asiu tinan ta Kindrei in hamon le ta batanau mene ndratiye. 28Eme Simiyon bwese-ei nah dah udu bohan, ma iy edeu wurah i ta Kindrei:
29“Kabwai Laban, ou bamani tandrakan tam i ta lohowan tam bwe,
kabwe, ou anya jo kimek, jo kimek ai ma sekesek.
30Tasah, udu madak amwenen jo ndranyolom seben tam ai,
31Ou mene lowosani udu mada lau mari anyolom:
32Anya ma lomadan eme len, ta leheya ou ame len mada iri lau badu leheleh,
ma lomadan anya i tiri lau tam, Isra-el.”
33Eme tama Jises uru tinen badeh, boho uru asak ta sahou nane Simiyon asehek nyala Jises dah. 34Ano, Simiyon atehei nyosowan i la-u oro, ano iy tiye i ta Mariya, “Iy nah le doh, Kindrei le edeu iy, ma idah kameh iy aseben iri lau badu Isra-el rayah, ya iri rayah kameh bwale iri iy. Ma idah kameh, iy i kalem ta lau kameh asehek sahou nyarahan i tan, 35ma idah kameh, iy leheya budon ndra-in tiri kameh eme lewan. Ma idah kameh ou tikisiy handru, i buku none samen madan, mesekei ndrinem tikisiy tinan labai.”
36Eme ya propet badih ari nyaran Ana nadu Panuwel udu aliy. Iy badu boho kamen ta Aser. Iy udu ta udun jaha ma ndro taloh le, ano udun imek. Iy i nyau udu udu, iy i alon, ma jaha tan asahan ndru lunoh hahuw (84). 37Ya ben len, ben len, iy abeles iy ta nyamon, ma iy baruwani ta ili asiu tinan ta Kindrei ta amekes solom, ma ta atudun Kindrei, bwe. 38Eme iy eme isos hawe oro na len doh, ma iy edeu wurah i ta Kindrei, hawe iy asehek nyala nah doh, i tiri lau heh mari abe-en bohon ili bwena, ta ndramak ta akunoh iri Jerusalem.
39Eme uru mesekei lahou mari in hamon ta batanau mari ta Laban. Ano uru ala hamon ja, ala Galili ma ala kon turu Nasaret. 40Eme nah dah i tinan i boto-on; ma iy idih ta tanan badu loken, hawe nyosowan ta Kindrei udu tan.
Jises udu bolo asiu tinan ta Kindrei
41Jaha mari ndra-au, tine Jises uru badeh, ala Jerusalem na len ta nyamon tinan tiri Juwis mene ado Ijip ame len, aloh Pasoba. 42Ano, jaha ta Jises asahan ronoh la-uh, oro ala ta nyamon i le buku bwena. 43Eme len ta nyamon ano, oro adek ala hamon ala kon, arile Jises badeh, udu ndra Jerusalem udu gwek. Taman uru tinen tana uru bwe; 44uru anya deh, iy deh udu bolo oro le. Eme oro adek ala len ari buruwen ano badeh, bale uru bwetenei iy. Eme uru takalahei bolo ndrokowa lowa uru, ma kawas turu nane dah, 45arile uru batakalahei iy bwe. Eme uru adek ja, ala hamon ala Jerusalem takaleh iy. 46Ya eme i bada len taloh badeh, uru takalahei iy manyah udu bolo iri lau ta leheya kandriyen tiri Juwis. Iy udu asiu tinan ta Kindrei, anuhun iri ma lelen ndremenya i tiri. 47Eme iri mari anuhun tanan ta sahou iy akeh, i hamon i tiri, ma boho iri asak tan. 48Eme ya taman uru tinen atou, boho uru asak. Eme tinen tiye i tan, “Naduk, ou amekes saba kandriyen eme taru dah? Aru tamam badeh, bale aru asin ou, ya eme aru ame takaleh ou dah.”
49Eme iy anya, “I buku sah ah anya kame katakaleh jo? Ah badeh, bala tana ah, ta jo dah udu asiu ta tama bwe nadeh?” 50Arile uru bakohok bolo sahou tan nane iy asehek i turu dah, bwe.
51Eme ya, i buku none kandriyen tan ta anuhun sahou badeh, iy i hawe uru, ma oro au ala andri ala Nasaret. Ya eme tinen tone tanan mari doh udu le ndrinen. 52Eme Jises badeh, salin i tinan ma hawe tanan tan ale i tinan. Ma Kindrei sekesek tan labai, hawe iri lau ale sekesek tan.
Kundruh tiri lakou mene asahan ta adik san ta Jises eme amekes gok tan
(Kalan 3:1–4:13)
Actualmente seleccionado:
Luk 2: lidNTpo
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2001, Wycliffe Bible Translators, Inc. All rights reserved.