Versículos bíblicos populares de Matíó 6

Compartir

Nɔ taŋá ɔ usiə á nɛmanɛna nɛ́ Huɛlɛ́ na taká ɔyɛ́á Huɛlɛ́ a ndɔ bata, nɔ́yɛ́ a ŋɔ bənú bɛ́ɛ́yɛ́ bikimə sukuninə ɔ ɔyáyɛ́na.

Nɔ lɛ bɛkɔa bɛ́ bulílə́ sə́híníə́: Bulílə́ yɛ́ lɛa na bɛ́áyɛ ɔbɛ́á a ŋɔ sə́hə́kiniə. Hinó tɛ́á na yayɛ́á indəkəsə.»

Ɔ́ ɛlɔ́áyɛ́ nɔ́yɛ́ mɛ ndɔ bənú lɛna mɛ sɛ́á: «Ɛlɔ́áyɛ́ búə́núə́ buɔmɔ́, nɔ lɛ sə́híníə́ yatɛ́ ɔyɛ́á nɔ ŋɔ nɛ́áka, mbá ata bɛlɛŋa ɛlɔ́áyɛ́ yə́núə́ mɛɛ́lɔ ɔlɛŋa. Buɔmɔ́ bɔ́ lɛ bá yáyɛ́ná bɛ́labɔ́nɛ́á, ata mɛɛ́lɔ yáyɛ́ná bɛlɛŋa əə́?

Mba ikúílí ɔ ndɔ siə ɔbɛ́kálɛ́na, bíkúíyíníə́ ɔ ɔwáwɔ ituŋí, bɛ́kálákɛ́ná yáwɔ́á Isə́ ɔwá a lɛ́á ɔmɔ́tɔ́yɛ́ ɔ inditiə, yawɔ́á Isə́ ɔwá a ndɔ sinə ɔ inditiə, a ŋɔ aŋɔ́á índiə yatɛ́ ɔyɛ́á ɔ ndɔ wɛɛ́ya bata.

«Nɔ ná hɔ́ánána ɔbɛ́kálɛ́na náana nɔ sɛ́á: “Á yəsúə́ Isə́ ɔwá a lɛ́á ɔ Nɔɔ́mɛná, nɛ́áwɔ́á niínyə nɛ́ báá naŋátɔ. Nɛ́áwɔ́á nɛmanɛna nɛ́ sɔ́nɔ, wə́wúə́ usiə wɔ́ bɛ́kɛ́áka ɔ misí ɛ́sɛ́á wɔ́ lɛ́á ɔ Nɔɔ́mɛná.

Indíə́ bəsú búə́súə́ bɔ́labɔ́nɛ́á bɔ́ niɔfɛ́nɛ.

Niasɛ́ná bəsú mə́súə́ mabɛ́á ɛ́sɛ́á bəsú tɔ́na tɔ ndɔ bááyɛ́ niasɛna ɔbá bá bá ndɔ bəsú liŋgəsiə

ɔ lɛ níása tɔ́ kɔɛ́na ɔ mɔkɔ́lɛna, mba, húlíə́ bəsú ɔ bɔbɛ́á.” [Bɔkɔasɛ́á, nɛmanɛna, injiŋə, na tuúmə bɛ́ lɛa ɛlɔ́áyɛ́ áwɔ ɔ bikúílí bikimə, Amɛna].»

«Ɔ taká, ábá nɔ ndɔ bɛndɔ mə́búə́ mabɛ́á niasɛna, yə́núə́ Isə́ ɔwá a lɛ́á ɔ nɔɔ́mɛná a ŋɔ bənú mə́ə́nu niasakɛna tɔ́na.

Nɔ́ tunoní tɔ́ ɔmbáŋá síə́kínə; abáka tɔ́ lɛ sɛlá ata uhuə, tɔ́ lɛ báá na bɛlɔŋɔ́tɛ́ ɔ mafɛná ata ɔ bɛába. Mba, yə́núə́ Isə́ yɛ Nɔɔ́mɛná a ndɔ tɔɛ́ta lúkə! Nɔ lɛa na mukunə́ yáyɛ́ná tɔɛ́ta.

«Nɔ lɛ mambiaŋɛ bɛ́kɔ́tɛ́ná háha ɔ misí ɔhá nɛsɛ́kɛ́ na maŋgɛ́lɛ́tɛ má ndɔ tɛŋɛna, ɔhá boóbi bá ndɔ ɛmbambala sána ɔ ndoobo. Mba, nɔ́ mambiaŋɛ bɛ́kɔ́tákɛ́na ɔ nɔɔ́mɛná ɔhá nɛsɛ́kɛ́ na maŋgɛ́lɛ́tɛ má sɔ́ ŋɔ tɛŋɛna, ɔhá boóbi bá sɔ́ ŋɔ ɛmbambala sána ɔ ndoobo. Ɔ taká, ɔ ɛbɔ́ka ɔyɛ́á nɛ́áwɔ́á nɛmbiaŋɛ nɛ́ lɛ́á, ɔmɔ́tɔ́yɛ́ wə́wúə́ mɔlɛ́má wɔ́ ŋɔ bámɛnɛna.»

«Ata mɔndɔ a sa ósó ɔnyɛna bisə́lúkú bɛ́fandɛ́; a ŋɔ wɔmɔtɛ́ bányáka, a wə́ə́ní hikəkiə, ataná, a ŋɔ wɔmɔtɛ́ bɛ́ɔ́lɔ́kɔkɛna, a wə́ə́ní yəniə. Nɔ sa ósó ɔnyɛna ikúílí ɛ́mɔtɛ́ Huɛlɛ́ na mɔnɛ́á.»

Ábá Huɛlɛ́ a ndɔ imbuə lɛŋa ɔyɛ́á yɛ́ lɛ́á niɔfɛ́nɛ ɔ bɛtɔbɔtɔ́bɔ́, ɔyɛ́á bulílə́ bá ŋɔ yiítə əmbəkinə ɔ hiwə, a ŋɔ kɛaka tɔ́na muɛsɛ ɛlɔ́áyɛ́ ənú ɔ ɔyáyɛ́na uwənú á bɛndɔ bá ilumininə yɛtɛ́tɛ́á!

Mba ɔwáwɔ, ikúílí ɔ ndɔ nɛhánɛna índiə ɔ hɛtɔyɔ́nɔ́, wə́wúə́ mɔkátá wɔ́ biəní wɔ́ sá hɔ́ánana ɔmanya yatɛ́ ɔyɛ́á wə́wúə́ mɔkátá wɔ́ bɛnɔ́mɛ wɔ́ ndɔ kɛa. Ɔkɛaka ɔwá nɛ́áwɔ́á nɛhánɛna nɛ́ báá ɔ inditiə; nɔ́yɛ́ Huɛlɛ́ ɔ yáwɔ́á Isə́ a ndɔ nɛ́áwɔ́á nɛhánɛna sinə ɔ inditiə, a ŋɔ aŋɔ́á sábɔ́na.»

«Nɔ́ bítə́tə́kə́níə́ ɔ yə́núə́ taká ɔbɛ́kɛna ɔ busíə́ bɔ́ bɛndɔ ɔkɛaka ɔwá mbá bá bənú síə́kínə: Yɛ́ sá báá nɔ́yɛ́, yə́núə́ Isə́ ɔwá a lɛ́á ɔ Nɔɔ́mɛná a sɔ́ ŋɔ bənú wə́núə́ mɔsábɔ́náná índiə.»

«Ikúílí nɔ ndɔ bítə́tə́niə ɔ ɔnɛ́á, nɔ lɛ busíə́ ŋgilítíə́nə́ ɛ́sɛ́á bɛndɔ bá nɛbɛ́nyɔ́nyɔlɔ, ɔ taká, bá ndɔ busíə́ ŋgilitiənə ɔkɛaka ɔwá, bɛndɔ bá siəkínə́ bá sɛ́á bá ndɔ bítə́tə́niə ɔ ɔnɛ́á. Mɛ ndɔ bənú nɔ́yɛ́ lɛna, bá lɛa na wə́búə́ mɔsábɔ́náná. Mba ɔwáwɔ, ikúílí ɔ ndɔ bítə́tə́niə ɔ ɔnɛ́á, bɛ́sɔ́áká busíə́, miəkínə́ bunumbə ɔ ɔwáwɔ mɔlɔ́á, ɔkɛaka ɔwá bɛndɔ bá lɛ manyá bá sɛ́á ɔ ndɔ bítə́tə́niə ɔ ɔnɛ́á, mba, ɔ́maná á yawɔ́á Isə́ ɔwá a lɛ́á ɔ inditiə, yawɔ́á Isə́ ɔwá a lɛ́á ɔ inditiə a ŋɔ aŋɔ́á yɛɛ́ta híə́niniə.»