Yakkha 2023 WBT/NEBS  (NT) Drama

येसुङा फेरि लुचि, “थाङ्‌थाङ् वायानि, न्‍निङ्‌दा याॽमिचि सोॽमेमागा धार्माकार्मा न्‍जोगानिन॥ ङ्‌खाॽला चोगिगाभोङ् न्‍निङ्‌दा वालोकपेॽना निङ्‌वाफुमा पाभाङ् इहाचा इनाम न्‍दोक्‍त्‍वाम्‍गान्‍हा॥
“न्‍हाङामाङ् न्‍निङ्‌दा पिवाम्‍चिम्‍गानिङ् याॽमिचिङा न्‍निसुनि, ङ्‌खेप्‍सुनिभोङ् हाल्‍ला न्‍जोगानिन॥ खाॽला गो किहि काप्‍खुबाचिङा ले याॽमिचिभाङ् निङ्‌ला तोक्‍मागा याहुदि छुम्‍पाङ्‌चि नुङ् लाम्‍बुखाबे न्‍जोङ्‌मे॥ जेप्‍पा का न्‍निङ्‌दा लुमेॽनेनिन, ङ्‌खाचिङा तोक्‍माहा इनाम न्‍दोक्‍तिक्‍सुहा॥ ङ्‌खाॽनिङ्‌गो न्‍निङ्‌दा तुखिसुम्‍बाचि पिवाम्‍चिम्‍गानिङ् न्‍निङ्‌गा छुप्‍ताङ् मुकङा पिम्‍चिम्‍घा फेक्‍साङ् मुकङा था न्‍दोक्‍तुन्‍नि॥ ङ्‌खाॽला न्‍निङ्‌दा पिवाम्‍चिम्‍गानिङ् स्‍वाक पियानुम्‍चिम, न्‍हाङा स्‍वाक चोगाहा घाक थोक निखुबा निङ्‌वाफुमा पाङा न्‍निङ्‌दा इनाम पिइवाघा॥”


“न्‍निङ्‌दा पार्थाना चोगिॽवागानिङ् किहि काप्‍खुबा याॽमिचि लोॽवा न्‍जोगानिन॥ इजाङ्‌बाङ्‌निङ् ङ्‌खाचि गो याॽमिचिङा निनिभोङ् छुम्‍पाङ् नुङ् लाम्‍बुखाबे येप्‍माहोङ् पार्थाना चोक्‍मा प्‍याक उङ्‌चि साप न्‍थाक्‍त्‍वा॥ जेप्‍पा का न्‍निङ्‌दा लुमेॽनेनिन, ङ्‌खाचिङा तोक्‍माहा इनाम न्‍दोक्‍तिक्‍सुहा॥ ङ्‌खाॽनिङ्‌गो न्‍निङ्‌दा च्‍हेन पार्थाना चोगिगानिङ् कोठाबे उइघोङ् वालाम्‍बुङ् छेक्‍तानुम, न्‍हाङ् निमा मेयामाना निङ्‌वाफुमा पानुङ् पार्थाना चोगानि॥ न्‍हाङा स्‍वाक चोगाहा घाक थोक निखुबा निङ्‌वाफुमा पाङा न्‍निङ्‌दा इनाम पिइवाघा॥
“पार्थाना चोगिगानिङ् हेकोहा जातिगा याॽमिचि लोॽवा बित्‍थाबे बारबारे न्‍जोगानिन, इजाङ्‌बाङ्‌निङ् ङ्‌खाचिङा गो केङ्‌गेॽहा पार्थाना चोक्‍मानिङ् से उङ्‌चिगा च्‍याङ्‌कुलुङ्‌चिङा ङ्‌खेप्‍स्‍वाहा भोङ् म्‍मिमे॥ न्‍हाङामाङ् न्‍निङ्‌दा ङ्‌खाचि लोॽवा न्‍लेक्‍सानिन॥ इजाङ्‌बाङ्‌निङ् न्‍निङ्‌दा नाक्‍मा हाक्‍निङ् ओन्‍दाङ्‌माङ् न्‍निङ्‌दाबे इहा चेॽयागा खाचोहा, ङ्‌खा न्‍निङ्‌गा निङ्‌वाफुमा पाङा था वेॽना॥ ङ्‌खाॽनिङ्‌गो न्‍निङ्‌दा च्‍हेन खाॽला पार्थाना चोगानि–
‘ओ वालोकपे वाखुबा आप्‍पा,
ङ्‌गा निङ् पाबित्‍तारा लेङ्‌नि॥
ङ्‌गा राज्‍या तानि,
ङ्‌गा न्‍निङ्‌वा वालोकपे लोॽवा, ना ताम्‍दाङ्‌फुमाबे चा पुरा लेङ्‌नि॥
कानिङ् हेन आनिङ्‌गा लेन-लेनगा चाम्‍योङ्‌बा पिया॥
आनिङ्‌गा पाप छेमा चोक्‍ताब्‍या,
ङ्‌खाॽलामाङ् आनिङ्‌गा बिरुद्‌दाबे पाप चोक्‍खुबाचि छेमा चोगुक्‍सुम्‍चिम्‍ङा॥
कानिङ् जाचपे आमेॽमा म्‍बियान,
ङ्‌खाॽनिङ्‌गो साइतानभाङ् फोक्‍सा॥
(इजाङ्‌बाङ्‌निङ् राज्‍या, साक्‍ति नुङ् माहिमा साधाइ ङ्‌गामाङ् ओम, आमेन॥)’
“न्‍निङ्‌गा बिरुद्‌दाबे इसिॽहा काम चोक्‍खुबाचि छेमा पिम्‍चिम्‍गाभोङ्, वालोकपे वाखुबा न्‍निङ्‌गा निङ्‌वाफुमा पाङा चा न्‍निङ्‌दा छेमा पिइवाघा॥ ङ्‌खाॽनिङ्‌गो न्‍निङ्‌गा बिरुद्‌दाबे इसिॽहा काम चोक्‍खुबाचि छेमा म्‍बिम्‍चिम्‍गानभोङ्, न्‍निङ्‌गा निङ्‌वाफुमा पाङा चा न्‍निङ्‌दा छेमा म्‍बिइवागान्‍हा॥”

“न्‍निङ्‌दा उपाबास युङिगानिङ् किहि काप्‍खुबाचि लोॽवा नाचिक कुइम न्‍जोगानुम्‍चिम्‍निन॥ इजाङ्‌बाङ्‌निङ् उङ्‌चिङा न्‍जोगुहा धार्माकार्मा याॽमिचिङा न्‍निसुनिभोङ् उङ्‌चि नाचिक कुइम न्‍जोग्‍वाचि॥ जेप्‍पा का न्‍निङ्‌दा लुमेॽनेनिन, ङ्‌खाचिङा तोक्‍माहा उङ्‌चिगा इनाम न्‍दोक्‍तिक्‍सुहा॥ ङ्‌खाॽनिङ्‌गो न्‍दा च्‍हेन उपाबास युङ्‌गानिङ् न्‍नाचिक वासि न्‍हाङ् टुखुरुकपे किवा नेक्‍तु॥ ङ्‌खाॽला न्‍दा उपाबास युङागाना याॽमिचिङा मेन्‍ना, ङ्‌खाॽनिङ्‌गो निमा मेयामाना निङ्‌वाफुमा पाङा से निगानि, न्‍हाङ् स्‍वाक चोगाहा घाक थोक निखुबा निङ्‌वाफुमा पाङा न्‍दा इनाम पिमेकाहा॥


“न्‍निङ्‌गा लागि ताम्‍दाङ्‌फुमाबे याङ्‌सा न्‍छुप्‍सानुम्‍निन॥ नाबे उमाङा च्‍वा, खियाङा आप्‍तिॽवा न्‍हाङ् खुसुबाङ्‌चिङा चा ङ्‌खुसेत्‍वा॥ ङ्‌खाॽनिङ्‌गो न्‍निङ्‌गा लागि वालोकपे याङ्‌सा छुप्‍सानुम॥ न्‍नाबे उमाङा चा न्‍ज्‍वान, खियाङा चा ङ्‌ङाप्‍त्‍वान न्‍हाङा खुसुबाङ्‌चिङा चा ङ्‌खुस्‍वानिन॥ इजाङ्‌बाङ्‌निङ् हेॽने न्‍निङ्‌गा याङ्‌सा वान्‍ने, न्‍नाबेॽमाङ् न्‍निङ्‌गा निङ्‌वा चा वामेॽना॥
“मिकचि सालुङ्‌गा लागि बात्‍ति लोॽवा ओम्‍चि॥ न्‍हाङामाङ् ङ्‌गा म्‍मिक उचुन्‍हाचिभोङ्, ङ्‌गा घाक सालुङ् ओम लेङ्‌मे, ङ्‌खाॽनिङ्‌गो म्‍मिक धोमिलोहाचिभोङ्, ङ्‌गा घाक सालुङ्‌माङ् कुइम लेङ्‌मेॽना॥ ङ्‌खाॽलामाङ् न्‍दाहोङ्‌बे वान्‍नेॽना ओम्‍ना च्‍हेन कुइम लेक्‍साभोङ्, न्‍ना झान इखिङ् तुक्‍नुङ् कुइम लेङ्‌मेॽना!
“इसाङा चा इमाङा हिप्‍पाङ् मालिक्‍का सेवा चोक्‍मा ङ्‌यास्‍वान्‍चिन्‍हा॥ इजाङ्‌बाङ्‌निङ् उङा एको इसित्‍वा न्‍हाङ् हेकोना उलुङ्‌मा तुक्‍त्‍वा॥ मानुङ् एको आदार चोग्‍वा न्‍हाङ् हेकोना आदार न्‍जोग्‍वान॥ ङ्‌खाॽलामाङ् न्‍निङ्‌दा चा निङ्‌वाफुमा नुङ् याङ्‌सा हिचिचिगा सेवा चोक्‍मा ङ्‌यास्‍वाम्‍चिम्‍गान्‍हा॥


“न्‍हाङामाङ् का न्‍निङ्‌दा लुमेॽनेनिन, ना हिङ्‌लुङ्‌बे ‘इहा चाम्‍ङा, इहा उङुम्‍ङा न्‍हाङ् इहा वाम्‍ङा’ भोङ् चिन्‍ता न्‍जोगानिन॥ इना चाम्‍योङ्‌बा हाक्‍निङ् हिङ्‌लुङ् न्‍हाङ् वाॽमाहा हाक्‍निङ् सालुङ् माडा मेन्‍नायि? ताङ्‌खेङ्‌बे पेखुबा न्‍वाकुच्‍याकचि सोयानुम्‍चिम, ङ्‌खाचिङा खेति न्‍जोग्‍वानिन, चाचिॽया ङ्‌हेत्‍वानिन न्‍हाङा चाचिॽयादाङ्‌बे चा न्‍छुप्‍स्‍वानिन ङ्‌खोङ्‌चा वालोकपे वाखुबा न्‍निङ्‌गा निङ्‌वाफुमा पाङा ङ्‌खाचि चामेत्‍वाचि॥ न्‍हाङामाङ् इना न्‍निङ्‌दा ङ्‌खाचि हाक्‍निङ् प्‍याक ओमेन आखुबा म्‍मेतिसिगान्‍हायि? न्‍निङ्‌दा इसाङा चिन्‍ता चोगिॽवागाहोङ् न्‍निङ्‌गा मिॽयाङ् आयु पुमा यास्‍वाम्‍गाना?
“न्‍हाङामाङ् न्‍निङ्‌दा ‘इहा वाम्‍ङा’ भोङ् इजाङ् चिन्‍ता चोगिॽवाघा? पुङ्‌दाबेॽहा लिलिफुङ् सोयानुम, ङ्‌खा इमिन पुमेहा? ङ्‌खाचिङा काम चा न्‍जोग्‍वानिन, वाॽमागा तेक चा ङ्‌ङाग्‍वानिन॥ ङ्‌खाॽनिङ्‌गो का न्‍निङ्‌दा लुमेॽनेनिन, हाङ् सोलोमानगा ङ्‌खिङाहा याङ्‌सा वायाहोङ्‌चा, उङ् ङ्‌खा फुङ्‌चिबे एको हिङ्‌गा चा उचुन सिङ्‌रा न्‍जोगामासान॥ खाॽला हेन पोङ्‌मे न्‍हाङ् वान्‍दिक्‍ङा चोम्‍दिमेहोङ् मिबे लेम्‍नाहाङ्‌माहा याक्‍साङ् गो निङ्‌वाफुमाङा खिङ् उचुन सिङ्‌रा चोग्‍वाहाभोङ्, न्‍निङ्‌दा गो झान उङा वाॽमाहा तेक म्‍बिइवागान्‍हायि? हेॽनाइ न्‍निङ्‌गा बिस्‍वास?
“न्‍हाङामाङ् ‘इहा चाम्‍ङा?’ ‘इहा वाम्‍ङा?’ न्‍हाङ् ‘इहा उङुम्‍ङा?’ भोङ् चिन्‍ता न्‍जोगानिन॥ खा घाक चेॽयागा चिन्‍ता गो हेकोहा जातिचिले न्‍जोङ्‌मे॥ इजाङ्‌बाङ्‌निङ् खा घाक चेॽया न्‍निङ्‌दा चाहाचोगिॽवाघा बाङ्‌ना चेॽया न्‍निङ्‌गा वालोकपे वाखुबा निङ्‌वाफुमा पाङा था वेॽना॥ ङ्‌खाॽनिङ्‌गो घाक हाक्‍निङ् ओन्‍दाङ् निङ्‌वाफुमा न्‍निङ्‌गा न्‍निङ्‌वाबे राज्‍या चोक्‍मा पियानुम न्‍हाङ् उका आग्‍गे येनानुम, न्‍हाङा खा घाक थोक उङा न्‍निङ्‌दा पिइवाघा॥ न्‍हाङामाङ् वान्‍दिक्‍का लागि चिन्‍ता न्‍जोगानिन, इजाङ्‌बाङ्‌निङ् वान्‍दिक्‍का चिन्‍ता वान्‍दिकङामाङ् लेङ्‌मेहा॥ हेनगा लागि हेन्‍हा तुखि माङ् ठिक लेङ्‌मेहा॥”

Escucha a मात्‍ति 6