Kosarek 2023 WBT Non-drama NT

Kosarek 2023 WBT Dramatized NT

Nimi maikno longolaeka taneko Yesusti kembahiogti, el yimag waelbaogti pulingkiog. Pulingkiogpa eldi yubu ka'ero neleplamek nimi elag yalamek.


Yalamekpa yubu alniro amolamsiogti, “Sin wanaag, ‘Teko ulamnelba, Imagneri yepnoho,’ aro seneragtop nimi sembe Imagne ponekori sin paiamsildi, saelba ulamsil ane sembe, awi uro wali wamukang.
Sin mantuk-tuka engerop nimi sembe wana aingnibahilul ane sembe, awi uro wali wamukang.
Sin wanaag mombolag nenep tangto win-win aro urop nimi sembe mog so'o ene sindi saeag tatsilul ane sembe, awi uro wali wamukang.
Nimi nhondi kwaneng yo mag yori, ‘Tehene,’ senelamloa saog uro sin nimiri wanaag, ‘Porogne agha ulamsebe,’ senerop nimi sembe teko uropne teknero tatsilul ane sembe, awi uro wali wamukang.
Sin yareag senehirop nimi sembe yareag sembamsilul ane sembe, awi uro wali wamukang.
Sindi wanaag sembenga wa'ebi agha seneragtop nimi sembe, Allah sinag lag nenep taleba ibukang ane sembe, awi uro wali wamukang.
Sin nimiri, ‘Nimiap-nimiap aingniro ma'abahisebe,’ aro urop nimi sembe Allah ponekori, ‘Naba namabo,’ sehilul ane sembe, awi uro wali wamukang.
Sin nimiri, ‘Wana porogne agha ulamsene,’ aro ulamangne sembe ora nimiri, ‘Seklebaik,’ aro ulamsiang tanena, Imagne ponekori wana porog nimi taneko paiamsildi, saelba ulamsil ane sembe, awi uro wali wamukang.
A'undi nanag nelepto yubu ka'elamlomne sembe ora nimiri a'un san tiliplamsiikti, ‘Seklebaik,’ aro ulamsiikti, a'un sembe mali aro miniro lelamsiik tanena, awi uro wali wamlulom. Samenag babe a'un anam wamna komag nimi tanekori Allah yubu silimu tiptop nimi tanekoag undo, ‘Seklebaik,’ aro malia ulamsiek. Ane sembe a'undi nanag neleplamnelomne sembe nimiri undo malia ulamsiik tanena, awi senelapmundi, ‘Nuringe kamna imag wamlange nubu uro tatsilul,’ aro yeng uro lolo'oplamlulom,” aro ambatsiog.


Eldi yubu ka'ero neleptop nimiag nen yubu lelamogti, “A'un wamlomne mog so'oag nimi sembe garam emem aropne a'un wamlom. Ot garam aneko, emem arop kom tale tanena, nimiri sa'a agha nen samoro garam sao wali nembanep komdi, teba'en sembanep. Emem aropne neneko kom tan tanena, nimiri tobogsiro ingisaplopnepne mo wamla.
A'un wamlomne mog so'o tibin wareropne a'un wamlom. As yimag soro kalurop as nhon liliro tognobanep kom. Whea babe, nimiri timbi agha kau agha niknilamang kom. Nimiri whea timbi agha whea tinina yan iktoba nhonag melamang andarina, nimi ni ae lomag wamang nimiri tibin aneko imnep. Ane saog uro tibin a'unag wamlange neneko nikniban koma, ‘Nimi ni whingag warelamlul,’ aro wali-walia ulamlulom. Walia ulapmunne kembahiikti, A'uni Allah imag wamlange omeklamukang,” aro ambatsiog.

Tipto yubu ambarelamsiogti, “A'undi na yahinge sembe senelamnep nena, ‘Samenag Allah Yubu mome toro pibek yubu eneko elna, “Kom nembahane,” aro yaog,’ sembaneheng kom. ‘Kom nembanun,’ aro yahi kom aghana, Allahri Musa pere agha aruksirop yubu enekoap, Allah yubu silimu tiptop nangdi mome toro pibek yubu enekoap, ‘Sunup tangto uro yabilul,’ aro yahi. Tam nene sembe nari yubu sikne agha ambarelamsin nena, imap so'oap anam kom tan komag, aruksirop yubu Musari mome toro pibogne aneko kom talul kom. Mome neneag wamlange ni anam uro yabin komag, Allahri aruksiropne mome toro pibog yubu neneag agha mome ologha nhon babe kom tanep komdi, yubu lilim nhon babe a'ero tanep kom. Ane sembe Allahri aruksirop yubu Musari mome toro pibogne nene agha nimi etneri yubu kiki ologne abolag nenelamleri, ora nimiag undo yubu amolamsile tanena, Imagne ponekori saelba ulamsil nimi anabiag agha nimi eneko sembe nimi olog sirikne engero yabilul. Apna nimi etneri Allahri aruksirop yubu sunsunum uro ulamleri, yubu amolamsile tanena, Imagne ponekori saelba ulamsil nimi anabiag agha nimi eneko sembe nubu nimi engero yabilul. Tam nene sembe a'unag yubu lelamnange, a'undi Farisi nimiap Musari yubu amohirop nangapti ulamangne phelekto wana porogne agha ulapmun kom tanena, a'undam nimi Imagne ponekori saelba ulamsil nimi tanep ina wa'ina wamnep kom,” seog.


Nen tipto yubu ambarelamsiogti, “Nunisa yaboag samenag arukto ambatsiogne a'undi babe ka'ebaomdi, el wamlom. ‘Nimi ya'ag opsiseng kom. Nimi etneri nimi ya'ag ople tanena, nimi eneko tam kemero karebatsinep nimi saeag nembanepneog wamla,’ aro arukahiog. Aghana wene nari a'unag lelamnangena, nimi etneri elkaeag wana yo senelamle tanena, wana yo senerop nimi ni taneko tam kemero kareptopne ponekori saeag tanep. Nen nhon lelamnangena, nimi etneri elkae san tilipto wabale tanena, nu Yahudi nimi sembe tam kareptop nimi Mahkamah Agama whingag lag talul. Apna nimi etneri elkaeag, ‘Limitukne,’ sele tanena, nimi eneko teptop nimi auk nubungeag seklebanebag tanep.
Ane sembe a'un wamlom nimi nhondi Allah sembe pimnepne nhon weroba wamlenge, ‘Tatnun,’ aro poa pinep. Allah sembe pimneba poa palapmenag wapmen aghana, ankae nhon wana mali anag tam nhon wamlea el tamen tanena, Allah sembe pimnepne neneko anam pimna koma ankae sam el pululam. Ankae ipmendi, elap sam ma'ap turumun taneogna, amikag nen samoro pina Allah sembe pimnepne neneko, ‘Tatnun,’ aro pail pululam.
A'un nimi nhonap yubu toraptangtop nimi nhondi yubu poa lepleri, tam kemero kareptop nangag poa pinep. Poa pinep tanena, anam an salero tam kareptop nangag poa piken komag andi eldi wana keyagman nembanepne nimi enekoap saekag nembarurom. Kom pagha tanena nimi enekori sae salero poa lepkeleri, tam kemero kareptop nimi whingag pabikelul. Poa pikeleba, tam kareptopne ponekori eldi yubu eptopne saeag nembagheleba, haing sae kaupto kop aeag tobongkipkelul. Nari yubu sikne agha ambatnuaghen. An kop aeag tobongkipkele tanena, tam kemero kareptopne ponekori, ‘Kamna abene topmendi lumbalulam,’ selenge sunsunum uro ni tatna komag, lambanep komdi, ya'ag haing sae kaupto wamlulam,” aro Yesusti ambatsiog.

Nen tipto yubu ambarelamsiogti, “Samenag ambatsiogne a'undi babe ka'ebaomdi, el wamlom. ‘Ora nimiri nengabo kelabo haogha topsiseng kom,’ aro ambatsiog. Aghana wene nari yubu lelamnangena, nengabo nhondi kel nhon haingdi kembi agha, ‘Saelbahane,’ aro wanari seneragtop tanena, eldi wanaag ora nimiri kelabo haogha tohiropne wamla. Walinge ul palapmenag sae sirik sip haing eneri kemelapmenne agha, malingeag phukul ingkinep tanena, ‘Malia uaneag,’ aro haing wana neneko kwhero tobogloplulam. Andamne nongag wamlange nhon mo kom taho tanena, andamne hae wamnep. Aghana an nong ningki nimi teptoba urobag toboglopkelenge nene mo ikin sirik wamla. Walinge ul palapmenag sae sirikneri uanepne agha malingeag phukul ingkinep tanena, ‘Malia uaneag,’ aro sae aneko karepto tobogloplulam. Andamne nongag wamlange nhon mo kom taho tanena, andamne hae wamnep. Aghana an nong ningki nimi teptoba urobag wa'imunne nene mo ikin sirik wamla,” seog.


Yesusti nen tipto yubu lelamogti, “Samenag yubu ambarelamsiogti, ‘Nengabo nhondi kelabo toamna agha eldi, “Kel eneko limnun,” sembale tanena, kel enekoag keknep mome nhon, “Nari kel ene limna,” aro toro pairop mome tatnepneog wamla,’ seog. Wene seog aghana, nari wene a'unag yubu ambarelamsin nena, nengabo nhondi kel nhon tomnep. Kel eneko yog nengaboap walep tangtopne orog aghana, ela'ange ponekori kel eneko limnep tanena, eldi kel eneko haogha torop kel nenelopso. Apna nimi etneri ela'angeri laplomna kel eneko tomnep tanena, nimi enekona kelabo haogha tohiropne tanep,” aro Yesusti ambatsiog.

Nen yubu ambarelamsiogti, “Nunisa yaboag samenag arukto ambatsiog yubu nen nhon a'undi babe ka'ebaomdi, el wamlom. ‘A'undi yubu so'opto salag paliropne orolenange agha lepseng kom aghana, a'undi nu Saelba Uhiropneag yubu so'opto salag pipmunne ul palamlulom,’ aro ambatsiog. Aghana wene nari a'unag yubu ambarelamsin nena, nhonag babe yubu so'opto salag pipseng kom. Im anikona, Allah saelba uhiropne poneko puka uroba wamla ane sembe, im anikoag yubu so'opto salag pipseng kom. Mog so'o ene babe, Allahri yan pimnebag wamla ane sembe, mog so'o eneag yubu so'opto salag pipseng kom. As Yerusalem babe, yubu sia lenne nubunge ua urop as wamla ane sembe, as anekoag babe yubu so'opto salag pipseng kom. A'undam nimiri usoghag babe hong kiki nhon piri, nhon kul nembanep kom. Ane sembe, a'undam nimiri usoghag yubu so'opto salag pipseng kom. Ot a'undi wanaag, ‘Yo sik,’ senelapmun nena, ‘Yo sik,’ sululom. A'undi wanaag, ‘Kom,’ senelapmun nena, ‘Kom,’ sululom. Nimiri nen phelekto lerop tanena, malingeag agha lelamla,” aro ambatsiog.


Nen yubu ambarelamsiogti, “Nunisa yaboag samenag arukto ambatsiog yubu nen nhon a'undi babe ka'ebaomdi, el wamlom. ‘Haing kwhelopkelenge lunuro haing kwheloplulam. Si koroglopkelenge lunuro si korogloplulam,’ aro ambatsiog. Aghana wene nari a'unag yubu ambarelamsin nena, a'unag malia uahiik nimi irikahiseng kom. Nimiri an sirik sip abom opkele tanena, andi whing tangoro, ‘Waneng sip abom babe omnelul,’ aro aombalulam. Nimiri anag, ‘Tam pimnun,’ aro tam kareptop nangag pabikeleri, ag nongag enekapmenne sembe, ‘Lunuro tatnululam,’ aro molbaghele tanena, andi ag siliro pelengerop ag wangkapmenne babe, ‘Ni phende tople,’ aro sae liloplulam. Yin salerop nang nhondi anag yubu ambarelangkeleri, ‘Naringe aba popmendi, ina ko'o nhon poa pululam,’ aro arukaghele tanena, nen ma'aro ina ko'o nhon babe, ‘Ko'o phende pabinun,’ aro poro paibarel palamlulam. Nimi nhondi anag mololangkeleba tatlulam. Nimi nhondi anag moloro, ‘Na kwema wamnelba, andinge tatnemenba, nen lumbaghenun,’ alamle nimi sembe wail ibarelamsiseng kom,” aro ambatsiog.


Nen yubu ambarelamsiogti, “Samenag ambatsiek yubu a'undi babe ka'ebaomdi, el wamlom. ‘Andi mog so'oag nimi o'ona senelamsimendi, an aisa nenekerop nimi hausag senelamsululam,’ alameka ka'elamom. Aghana wene nari a'unag yubu ambarelamsin nena, aisa nimi sembe o'ona senelamsululom. Sindi a'un, ‘Seklebaik,’ aro ulamsiik nimi sembe Allahag molona molbarelamsululom. Allahri wali nimi sembe babe, yonge urop nimi sembe babe heng tingkarelamsil. Wana porog nimi sembe babe, wana sengkwanektop nimi sembe babe eldi mag pelengkarelamsil. Ane sembe sin sembe Allahag molbarelamsimun andarina, A'uni Allah imag wamlange saog tamundi, eldi mabo wamlulom. Roma nimi sembe kamna polorop nimiri babe sin o'ona senehirop nimi aghabog o'ona senelamsiang. Undop pagha tanena a'undina, ‘Ot na sembe o'ona senerop nimi aghabog samoro o'ona senelamsinun,’ aro ulapmun tanena, kamna tatsiroba a'unag loloro tahinep te? Apna a'undi a'unkabo mo sae tiptangto kiplamsimun tanena, ora nimiri a'un sembe, ‘Wali phelektopne ulamang,’ sembanep te? Nene saog uro sin Allah ekon nimiri babe sikinkaboap mo sae tiptangto kibil dalamang. Ane sembe a'undina, A'uni Imagne ponekori nimi ni sembe walia ulamsil saog uro a'undi babe ulapmundi, nimi ni sembe walia ulamsululom,” aro ambatsiog.

Escucha a Matius 5