เตเฮ๊เบ่ เหร่อ เด๊อเง
เด๊อ ลีเทส่อพ๊า เออ ต๊าบ่า อากูเนอ, ลี เห่ขุทวาลู่เออ หม่า ลี เด๊อ อาเหร่อเล๊อ ต๊าบ่า เฮ๊อ. เด๊อ ฮีบรูโหง่ เร๊อ ลี เออต๊าบ่าเนอ, อู เอ๊ ลู เน๊อ บ่าแรซิ, เร๊อ บ่าแรซิ อาโหง่แลช๊า หม่า อาแก่ช๊าแกแร. เบ๊อะ เป แด๊ ลี เห่ขุทวาลู่เออ เป ซิเง เน๊อ ม๊อขุ เบ่เบ่, เห่ขุ เบ่เบ่, แกแยเห่ขุพู๊ เบ่เบ่, จอแปแหร่ แบ๊แล ลอปลี เต ปว๋า เต๊อเจ่อ. จอแปแหร่ นว๊าแถ่หนิ เพอับราฮัม, เพอิสอัค เน๊อ เพยาโคบ เร๊อ อา อ๊อแลหนิ เหย่ซี เน๊อ อากลุยอาลุ๊ย ตากาแล เต๊เห่ เน๊อ อาเก่ เด๊อะบุ๊ยเด๊อะเตอเรอ เหย่ซี ปา. เหย่ซี อากลุยอาลุ๊ย ตากาแล เต๊เห่ หม่า หม่าเฮ๊อ อิสราเอลพู๊ ซีเต๊เห่เฮ๊อ. ลี เออต๊าบ่า หม่า อา เฮ๊โลโปลเพ๊ เป่ลอ ล๋อ เต โอ่ เด๊อ เห่ขุ เออเต๊เห่ เน๊อ อิสราเอล เมวเจ่อพู๊ เออเต๊อเจ่อ ทวาแถ่ อาแก่ช๊าแกแร อาหรี่อาแก เต๊เห่ เฮ๊อ.
ลี เห่ขุทวาลู่ อาเหร่อเล๊อ โต๊โก่, อามาดุ (๑-๑๑) อากูเนอ, อา เฮ๊โฉ่โด่แน โลเน๊อ เตเบ่แบ๊ อาหรี่อาแก เน๊อ แกแยเห่ขุพู๊ เมวเจ่อ อาหรี่อาแก โต่ แฮ เด๊อ เพอับราฮัม ทือเค. จอแปแหร่ อาเตเบ่แบ๊ ปว๋า เต๊อเจ่อ หม่า อาแร๊ ลอปลี เจ๊อ, หม่าแน๊เรอ แกแยเห่ขุพู๊ กูลู่เล๊อ ซิเนอ เด๊อ อาหม่า เฮ๊อ เพอาดาม เน๊อ โหมะเอวา เออ อา หนิดา จอแปแหร่ อาโหง่ โต่ เร๊อ อา นอ โอ่ทวาแถ่แก เตซื๊อเตปล๊า เด๊อ เห่ขุเออ. แกแยเห่ขุพู๊ ปว๋า เตเพร ทวาแถ่ลอ เตซื๊อเตปล๊าพู๊ เร๊อ จอแปแหร่ เมจากาคยาลอ แกแยเห่ขุพู๊ ปว๋า เตเพร อาเตซื๊อ เต๊เห่. เด๊อ เหย่ซี เมซื๊อ เต อาขว่าอาคยา, กู๊แหน่เออ แกแย ปว๋า เตเพร ข่าเบ่ลอ เตซื๊อ เร๊อ เบ่ จว๊าเปแก เน๊อ จอแปแหร่ เฮ๊อ. เด๊อคยาเร๊อ เบ๊อะ แกแยเห่ขุพู๊ ซีเต๊เห่ อาจาอาจือ อามู๊แหม่รีแจ่ แฮเฮ๊อ เบ๊อะเนอ, จอแปแหร่ แด่แลเฮ๊อ อาซิปล่อ เด๊อ อา เก่ นอดุแถ่เซอลอ อู ปว๋า เตเพร เน๊อ เทอ, อา แลเปล๊แก แพ๊ ตื๋อ แกแยมูย เน๊อ เพโนอาห์ เน๊อ อาหี่พู๊แพพู๊ เต๊เห่ แพ๊. เหย่ซี จ๊อเบ จอแปแหร่, เร๊อ แซ่ฮู๊ เหย่ซี เหน่เร๊อดื่อ เก่ แลเปล๊ อาเง, โท๊โต่ เตมีเตดอ ถู่พู๊โหย่พู๊ เต๊เห่ เก่ แลเปล๊ เกอดื่อ อาเงเนอ, จอแปแหร่ นอ เมแถ่ เหย่ซี ส่อเกลอดู๋ เต๊เบ่, เทอดุ โทเร๊อ แกแย เต๊เห่ โอ่ปีชีจว๊าลอ เด๊อ เห่ขุ ต๊าบ่าลอ, เร๊อ แกแย ปว๊าเพร จ๊อเบ ปา แลแค จอแปแหร่ โต่ เฮ๊อ.
ลีบ่า อามาดุ เด๊อ (๑๒-๕๐) อากูเออ เต๊เห่เนอ, อา เฮ๊โฉ่โด่แน เป่ เพอับราฮัม เน๊อ อาหี่พู๊แพพู๊ เต๊เห่ อาหรี่อาแก. จอแปแหร่ นว๊าแถ่ หนิ เหย่ซี เด๊อ อา เก่ ทวาแถ่ อาแกแย เด๊อ อาโค๊ดื่อ เน๊อ อู เด๊อ อาแก่ช๊าแกแร ตู๊หมู่ เฮ๊อ. เพอับราฮัม เร๊อ อาเม โหมะซาราย เออเนอ อาพู๊ โอ่เกอ อู โต่, หม่าแน๊เรอ จอแปแหร่ อ๊อแล โทเฮ๊อ เหย่ซี เน๊อ เหย่ซี เก่ พู๊โอ่ เตเพร ปา. โท๊โต่ อา อ๊อแลหนิ เหย่ซี เน๊อ เด๊อเหย่ซี อาขว่าอาคยา เร๊อ อากลูยอาแล ตากาแล เต๊เห่เนอ, เตอเนอปา อา เก่ โอ่ เร๊อดื่อ เน๊อ อาเทออาเก่, เร๊อ ล๋อ เมวเจ่อ เต๊เห่ เก่ พย๊าหนิ ลอดื่อ เตบุ๊ยเตเตอเรอ ปาฮู๊เนอ. เพอับราฮัม หยื่อเอ่ชอ หนิ จอแปแหร่ เตอ๊อแลหนิ ลู เออ เร๊อ อา จูเอ่ หนิ จอแปแหร่ อาโหง่.
เพอับราฮัม เน๊อ โหมะซาราย แกล่จว๊าโอ่ เด๊อ คานาเก่ หม่าเฮ๊อ เก่ เด๊อ จอแปแหร่ อ๊อแล โทเฮ๊อ เน๊อ อา เก่ เด๊อะ เน๊อ เหย่ซี อากลุยอาแล ตากาแก เด๊อคยา เต๊เห่ ปา เนอเต๊เก่ อากู. เบ๊อะ เพอับราฮัม เน๊อ โหมะซาราย โหมะเผระ ลาเฮ๊อ เบ๊อะเนอ, อาพู๊ โอ่ หนิ พู๊เพรคู เตเพร เร๊อ อามุย เน๊อ คูอิสอัค. เด๊อคยาเร๊อ คูอิสอัค พู๊โอ่ หนิ อาพู๊เพรคู ซิเนอ เร๊อ อามุย เน๊อ คูเอซวา เน๊อ คูยาโคบ. เบ๊อะ ลี เห่ขุทวาลู่ เกเร ตื๊อดื่อเฮ๊อ เบ๊อะเนอ, เพยาโคบ อาพู๊คู เช๊อซิเนอ เน๊อ อาตี๊หี่แตแพ เต๊เห่ จว๊าโอ่ แลแค เด๊อ อียิปต์เก่. เทอเก่ เด๊อ จอแปแหร่ อ๊อแลหนิ เด๊อ อา เก่ เด๊อะ เน๊อ เหย่ซี ปา เออเต๊เก่เนอ, เหย่ซี โอ่ หนิแต่ล๋ายโต่. เด๊อ จอแปแหร่ ยอแม๊ยอตู่ แร๊หนิ อาแกแย เต๊เห่ อาขว่าอาคยา, เด๊อ เหย่ซี โป่แหว่ เกล เตเพร ทวาหนิ อียิปต์เก่คุ๊ย เร๊อ อามุย เน๊อ คูโยเซฟ คูโยเซฟ เร๊อ อาเตหยื่อ ฉว่าชอ แหน่เจ๊อ เร๊อ อา ซิเง เน๊อ เตอเนอ ปา จอแปแหร่ เก่ จ๊อ เน๊อ อาเตอ๊อแล เน๊อ อาแกแย ซีเต๊เห่ ปา, อา หยื่อเอ่ ฮู๊เนอ.
เบ๊อะ คูโยเซฟ เซอ แต่ล๋ายโต่ เบ๊อะเนอ, อา เฮ๊ เน๊อ, “แว โอ่เซอเพร งยา ปาโต่ เฮ๊อ, จอแปแหร่ดุ เก่ แฮแล่ เมจว่า หม่าแหน่ เจ๊อ ซี ปา เร๊อ อา เก่ เอ๊เถ่แก ซี เน๊อ เก่ เบ๊อะเออ เต๊เก่ เร๊อ อา เก่ ซูกา ซี เก่ เด๊อ อา แบแล โทเฮ๊อ อาโหง่ เน๊อ เพอับราฮัม, เพอิสอัค, เพยาโคบ เนอเต๊เก่ ปา.” (๕๐:๒๔)
ลี เห่ขุทวาลู่เออ อา เด๊อะโล เป่ เป เน๊อ จอแปแหร่ เออเตเพรหม่า จอแปแหร่ เด๊อ อาจ๊ออาเต, อา โมเร๊อ อู. อา เมจากาคยาหนิ แกแย เด๊อ อา หยื่อเอ่ ลู โต่ เนอเต๊เห่ เร๊อ อา เมจว่า เป่แฮ เป่โป่ อาแกแย เด๊อ อา หยื่อเอ่หนิ ลู เนอเต๊เห่ อาแกแย เต๊เห่ อาเล๊ออาบา เน๊อโต่ ตื๊อดื่อเรอ จอแปแหร่ แม๊ตู่ หนิ เหย่ซี, อา ซูกาหนิ เหย่ซี เร๊อ อา เม เป่ เหย่ซี ฮู๊ อา อ๊อแล หนิ โทเฮ๊อ เหย่ซี เนอ.
เด๊อ ฮีบรูโหง่เนอ, มุย เต๊เห่ อาโหง่แลช๊า หม่า อาโหล่ดุ แหน่เจ๊อ. ฮู๊เนอเร๊อ ลีเห่ขุทวาลู่ เด๊อ แกแยโหง่เออ อู เบ่ ราโป่เถ่ โปลแร๊ เป่ ลูมุย อาโหง่แลช๊า. โตโพ๊แต๊แข่เร๊อ จอแปแหร่ ถู่แหล่โค๊แก อาแกแย เต๊เห่ อามุย. เพอับราม อามุย เร๊อ จอแปแหร่ ถู่แหล่โค๊แก เน๊อ เพอับราฮัม. โหมะซาราย เร๊อ อา ถู่แหล่โค๊แก ลูมุย เน๊อ โหมะซาราห์, เพยาโคบ เร๊อ อา ถู่แหล่โค๊แก ลูมุย เน๊อ เพอิสราเอล. เพยาโคบ อากลุยอาลุ๊ย เต๊เห่ ทวาแถ่ เมวเจ่อดู๋ เต๊อเจ่อ อาขว่าอาคยา, ลีเทส่อพ๊ากู เอ๊ เหย่ซีเก่ เน๊อ อิสราเอลเก่.
เตเฮ๊เบ่ โต๊โต่ เน๊อ โต๊โต่
- เตแบ๊แลเตแล อาหรี่อาแก ๑:๑-๒:๒๕
- เตซื๊อเตปล๊า เด๊อ อาเหร่อเล๊อ เน๊อ เตเมเซอ แกแย เด๊อ อาเหร่อเล๊อ ๓:๑-๔:๑๖
- เบ๊อะ เทอดุ แต่ล๋ายโต่ เบ๊อะเนอ เพอาดาม อากลุยอาแล เต๊เห่ ๔:๑๗-๕:๓๒
- เพโนอาห์ เน๊อ เทอดุแถ่บี๊ อาหรี่อาแก ๖:๑-๙:๒๘
- เพอาดาม อากลุยอาแล เต๊เห่ เน๊อ บาเบล หี่ทูแถ่โล ๑๐:๑-๑๑:๓๒
- จอแปแหร่ ตูจูเพร นว๊าแถ่ คูอับราม ๑๒:๑-๒๐
- เพอับราม เน๊อ เพโลท ๑๓:๑-๑๔:๒๔
- จอแปแหร่ ตูจูเพร อ๊อแล เพอับราม ๑๕:๑-๒๑
- เพอับราม, โหมะฮาการ์ เน๊อ คูอิชมาเอล ๑๖:๑-๑๖
- คูอับราม อามุย เออเนอ, จอแปแหร่ ถู่แหล่ แต๊แกล่โค๊แก เน๊อ คูอับราฮัม ๑๗:๑-๑๘:๑๕
- เพอับราฮัม, เพโลท, วีโสโดม เน๊อ วีโกโมราห์ ๑๘:๑๖-๑๙:๓๘
- เพอับราฮัม, โหมะซาราห์ เน๊อ คูอิสอัค ๒๐:๑-๒๓:๒๐
- เหมาะเรเบคาห์, เม เด๊อ คูอิสอัค อาเง ๒๔:๑-๖๗
- เพอับราฮัม อาเตเซอ ๒๕:๑-๑๘
- เพอิสอัค เน๊อ อาหี่พู๊แพพู๊ ๒๕:๑๙-๒๘:๙
- เพยาโคบ เน๊อ อาหี่พู๊แพพู๊ ๒๘:๑๐-๓๕:๒๙
- เพเอซาว เน๊อ อาหี่พู๊แพพู๊ ๓๖:๑-๔๓
- คูโยเซฟ อาโป่แหว่ เต๊เห่ อิเชแก ลู ฮู๊ หลู่ เตเพร ๓๗:๑-๓๖
- เพยูดาห์ เน๊อ เหมอะทามาร์ ๓๘:๑-๓๐
- คูโยเซฟ โอ่ เด๊อ อียิปต์เก่ ๓๙:๑-๔๑:๕๗
- คูโยเซฟ เน๊อ อาโป่อาแหว่ เต๊เห่ ๔๒:๑-๔๕:๒๘
- เพยาโคบ เน๊อ อาหี่พู๊แพพู๊ เต๊เห่ แกล่จว๊าโอ่ เด๊อ อียิปต์เก่ ๔๖:๑-๔๗:๓๑
- เพยาโคบ เด๊อะบุ๊ยเด๊อะเตอเรอ อาหี่พู๊แพพู๊ เต๊เห่ เร๊อ อา เซอแก ๔๘:๑-๕๐:๑๔
- เพโยเซฟ เซอแก ๕๐:๑๕-๒๖

Escucha a เห่ขุทวาลู่ เตเฮ๊เบ่ เหร่อ เด๊อเง