Text: © Wycliffe India Audio: ℗ Hosanna 2024 and WPT

Pangwali 2023 WBT (NT) Drama

तोउं यीशु अपु बाराह चेले भिआई कइ तेन्हि सोबी कें धे दुष्ट आत्मा नशाणे त बीमारी ठीक करणे शक्ति दिती। त तेन से परमेश्वरे राज्य बारे प्रचार करण त बीमारी ठीक करण जे लंघाए। तेन तेन्हि जे बोलु, “बथ जे कुछ न नेण, न लठि, न झोड़ा, न रौठि, न रुपेई, होर न बदलण जे झिणे। जेस केसे गी घियेल त तेस जगाई केआं घेणे तकर तठि बिशे। जे कोई तुसी ना धराल त तेस ग्रां केआं घेन्त पेंत अपु खुरे तड़वाए धूड़ ठुटकी छड़े, ताकि परमेश्वर न्याय करणे वकत से तेन्के खिलाफ उगाह दियेल।” त से चेले ग्रां ग्रां घेई कइ परमेश्वरे राज्य एणे बार खुश खबर शुणाए त मेह्‍णु बीमारी केआं ठीक कते रिहे।


गलील राज्ये राजा हेरोदेस ई सोब बोके शुण कइ परेशान भोई गा। किस कि केनि केनि ई बोलु कि मुओ यूहन्ना दुबारी जी गो असा। त केनि केनि बोलु कि एलिय्याह भविष्य वक्ता काओ असा, त कुछ होर बोतेथ कि पुराणे भविष्य वक्ते बिचा कोउं यक जेईं जीओ असा। पर राजा हेरोदेसे बोलु, “मेईं त यूहन्ने म्युकुड़ कटवाई छो थिउ त अब ए कोउं भो जेस बारे अउं ईं बोक शुणता?” त से यीशु हेरण जे कोशिश कता रिहा।


जपल से प्रतिनिधि वापिस यीशु केईं ए, त तेन्हि अपु कमे बारे बताउ। त से तेन्हि बखरे कर कइ बैतसैदा नओएं यक ग्रां घिन गा। जीं हुसुड़ा पता लगा त से तसे पता पता घेई गे। यीशु तेन्हि जुए खुशी जुए मिआ त परमेश्वरे राज्य बारे बोके की। होर से ठीक किए, जे बीमार थिए। जपल दिस ओलुण लगु त तेन्हि बारोह जेईं यीशु केईं एई कइ बोलु, “जे अत हुसुड़ा असा एन्हि लंघाई छड़े ताकि से नीड़े भेएड़े ग्राईं अन्तर घेई कइ अपु उंघणे त खाणे परबंध करियेल, किस कि इस जगाह कुछ खाण जे ना मेतु।” पर यीशु तेन्हि जे बोलु, “तुस अपफ एन्हि खिलाणे परबंध करे।” त तेन्हि बोलु, “असी केईं त सद पंज रौठि होर दुई मछली असी। त की कइ सकते? पर आं, अगर अस एन्हि सोबी जे खांजे खरीद कइ अण्ह सकियेल त भोई सकतु।” किस कि तठि सद मड़दे लगभग पंज हजार थिए। तोउं तेन अपु चेली जे बोलु, “पंझा पंझा मेह्‍णु बिशाणिण दिए।” तेन्हि तिरुह की त से सोब बिशाई छड़े। तोउं तेन से पंज रौठि त दुई मछली नी, त स्वर्गे धे हेर कइ परमेश्वरे धन्यवाद किआ, त टुकड़ेर कइ अपु चेली कें धे दिती, त बोलु कि मेह्‍णु कें धे दिए। त से सोब खाई-खुई रज्जि गे। त चेली बचो टुकुड़ के बाराह चाउं भरे।


यक लिंग यीशु त तसे चेले अकेले थिए। यीशु बखरे घेई कइ प्रार्थना की। तोउं तेन तेन्हि केईआं पुछु, “मेह्‍णु में बारे की बोते?” तेन्हि बोलु, “केहि बोते कि तु चुसुणे बाड़ा यूहन्ना भो त होरे केहि बोते कि तु एलिय्याह भविष्य वक्ता भो। होरे केहि बोते कि पुराणे जमाने भविष्य वक्ती बुचा कोई यक दुबारी जीओ असा।” तेन तेन्हि केआं पुछु, “पर तुस में बारे की बोते?” पतरसे बोलु “तुस परमेश्वरे मसीह भो।” तपल यीशु तेन्हि जे सक्ति कइ बोलु कि इस बारे केसे जे बि ना बोलुण।


तोउं यीशु तेन्हि जे बोलु, “मनखे कुआ जे अउं असा, ईं जरूरी असु कि अउं सुआ दुख सेहुं, त टजे स्याणे, मुख्य पुजारे त धर्मशास्त्री मोउं ना मानियेल त मोउं मार छड़ियेल, त टेके रोज दुबारी जीन्ता भोई घिउं।”

तोउं यीशु सोबी जे बोलु, “अगर कोई में पता एण चहन्ता, त अपु मने मुताविक जीण छड़ दिए, त हर रोज अपु क्रूस उछिड़ कइ में पता एईए। किस कि जे कोउं अपु प्राण अपफ जे रखुंण चहन्ता, से तस गवाई छता, पर जे कोउं में लिए अपु प्राण देन्ता, से तेस मेई घेन्ते। अगर मेह्‍णु पूरा मतोक बि मेई घियाल, पर अपु प्राण जोखिम अन्तर छड़ाल या गवाल त तसे की फायदा असा? कुछ नेईं! जे कोउं मोउं केआं त में वचनी केआं लजिन्ता, त अउं मनखे कुआ जिखेईं अपु त अपु बोउए शान, होर शुचे स्वर्गेदूती के शान जोई साते दुबारी एन्ता तिखेईं तेस हेर बि लजिन्ता। पर अउं तुसी जे बोता कि इठि खड़ खड़ बिशो मेह्‍णु बिचा केहि ईं असे, जे जपल तकर परमेश्वरे राज्य एणे ना हेरियेल, तपल तकर ना मरते।”


इन्हि बोकी केईआं कोई अठूं रोज बाद, से पतरस, यूहन्ना त याकूब अपफ जोई साते नी कइ प्रार्थना करुं जे यक फाट पुठ गा। त तठि से प्रार्थना करणे टेम तसे रूप बदली गा, त तसे झिणे बि हच्छे भोई कइ चमकुण लगे। त हेरे, मूसा त एलिय्याह ए दुई मेह्‍णु तस जुए बोके करुं लगे। ए बड़े शान जुएई केण लगो थिए। तेन्हि तस जुए तसे मरणे बारे बोके की, जे यरुशलेम शेहर अन्तर भुणे बाड़ा थी। पर पतरस त तसे साथी उंघो थिए। जपल से सुसुर खड़ भुए त तेन्हि यीशु शान काई त साते से दुई मेह्‍णु बि काए, जे तस जोई खड़ खड़ थिए। जपल से दुई जेईं तसे भेएड़ केआं घेण लगे त पतरसे यीशु जे बोलु, “हें इठि भुण खरी बोक असी। त अस इठि टाई डेरा बणान्ते; यक तोउ जे, यक मूसा जे त यक एलिय्याह जे।” तस ई पता नेओथ कि से की बोलुण लगो थिआ। पतरस ईं बोलुण लगो थिआ कि यक बदेए एई कइ से घट छड़े त से डर गे। त तेस बदेए केआं यक अवाज निथि, “ए में कुआ भो, जे मेईं चुणो असा! एसे शुणे।” ईं अवाज एणे पता तठि यीशु अकेले मेईंया। जे कुछ तेन्हि तठि काओ थिउ, तसे बारे तेन्हि रोजी तेन्हि केसे जे किछ बि ना बोलु।


दोका रोज, से फाट केआं एण पता, यक बोडा हुसुड़ा तेस जोई मेई। त हेरे, हुसुड़ा केआं यक मेह्‍णु जोरी जेईं बोलु, “ए गुरु, तुं छने कि में कुआ पुठ दाह करे, किस कि से में इकलौता कुआ असा। बोक ईं असु कि यक दुष्ट आत्मा तस अन्तर एन्ती त से अजगता जोरी जुओई लियार देन्ता। से तस मरोड़ रखती, जपल तकर कि तसे आसी बइ शोफे ना निस्ती, होर से लहुलुहान ना भोई घेन्ता। से तेस सुआ मुश्किल जोई छती। मेईं तुं चेली केईं छनेअरे किउ कि एस ठीक करे। पर तेन्हि से निसाण ना बटी।” यीशु बोलु, “ए अविश्वासी त हठि मेह्‍णुओ, बस करे! अउं कपल तकर तुसी जोई बिश्ता त कपल तकर तुं सेहन्ता? गा, अपु कुआ इएर अण्ह।” से कुआ एण ईं लगो थिआ कि दुष्ट आत्मा तस भीं फटाई कइ मरोड़ुण लगी। पर यीशु तसे अन्तरी जुठी आत्मा जड़कइ त से कुआ ठीक किआ। होर तसे बोउए धे दी छड़ा। तपल सम्हाई मेह्‍णु परमेश्वरे शक्ति हेर कइ हैरान भोई गे।


पर जपल सोब मेह्‍णु त सोबी कमी हेर कइ हैरान भुण लगो थिए, त तेन अपु चेली जे बोलु, “तुस इन्हि बोकी पुठ ध्यान दिए, किस कि मनखे कुआ मनखे हथे टोवेई घेण असा”। पर ए बोक तेन्के समझ अन्तर न आई। त ई बोके तेन्के दिमाख अन्तर ना आई, ताकि से ना समझ बटे। त से इन्हि बोकी के बारे तेस पुछुण हेर बि डरतेथ।

तोउं से चेले ई बोक पुठ अपफ बुच बेहसेईण लगे कि तेन्के बुच बोडा कोउं असा। पर जपल यीशु तेन्के मने भिहो बारे पता लगा त तेन यक गभुर अण्ही कइ अपु भेएड़ रखु। होर तेन तेन्हि जे बोलु, “जे कोई में नउ पुठ इसे ईं मठुड़ गभुर अपणान्ता से मोउं अपणान्ता, होर जे मोउं अपणान्ता से मोउं लंघाणे बाड़े बि अपणान्ता। किस कि तुसी बुच जे सोबी केआं मठुड़ असा, सेईंए परमेश्वरे राज्य अन्तर बोडा असा।”


तिखेईं यीशु चेला यूहन्ने बोलु, “गुरुजी, असी यक मेह्‍णु तुं नओं पुठ दुष्ट आत्मा नशाणते हेरा। त असी से रोक छड़ा, किस कि से असी जुए मी कइ तें पता ना हंटता।” यीशु तस जे बोलु, “तस ना रोके, किस कि जे तुं बैरी नेईं, से तुं कना असा।”



जपल यीशु स्वर्ग घेणे दन पूरे भुणे बाड़े थिए, त तेन यरुशलेम शेहर घेणे जे ठीक किउ। तेन अपु अगर कुछ मेह्‍णु लंघाए। त से सामरिया राज्ये यक ग्रां पूज गे ताकि यीशु अग्रोई जे तेयारी कइ सकियेल। पर तठियाणि मेह्‍णु यीशु तठि एण ना दिता, किस कि से यरुशलेम शेहर जे घेण लगो थिआ। ई हेर कइ तसे चेले याकूब त यूहन्ने बोलु, “ए प्रभु, तुस की चहन्ते ना कि अस परमेश्वर जे ईं प्रार्थना करुं कि अम्बर केआं आग एई कइ एन्हि फुक छड़े?” पर यीशु पतूं जे खिरक कइ से जड़काए त बोलु, “अउं तुसी केसे प्राण नेण जे नियुक्त नेईं किओ। किस कि मनखे कुआ मेह्‍णु के प्राण नेण जे नेईं अओ, बल्कि प्राण बचाण जे अओ असा।” त से केसे होर ग्रां घेई गे।


जपल यीशु त तसे चेले बते बइ घेण लगो थिए त यक मेह्‍णु तस जे बोलु, “ए गुरु! तुस जेठि कोठि बि घेन्ते, अउं तुं पतोती एन्ता।” त यीशु तेस जे बोलु, “सगालि के खोपर त चड़ी चखुरु के गुल्हे असे, पर अउं जे मनखे कुआ भो, मोउं अपु मगिर नियोकाण जे बि जगाह नेईं।” यीशु यक होरे जे बोलु, “में पतोती आई।” पर तेन तस जे बोलु, “ए प्रभु, पेहले मोउं घेण दिए कि अउं अपु बोउए जीण मरुण कइ एऊं।” इस पुठ यीशु तस जे बोलु, “जे मरोरी के ईं असे, तेन्हि अपु मुड़दे पथण दे। पर तु गा त परमेश्वरे राज्ये बारे मेह्‍णु शुणाण दिए।” यक केनि होरी बि बोलु, “ए प्रभु, अउं तें पतोती एन्ता, पर पेहले मोउं अपु गीहे बाड़ी आबिश करण दिए।” यीशु तस जे बोलु, “जे कोउं अपु हथ हिएटुड़ पुठ रख कइ पतूं हेरता से परमेश्वरे राज्ये लेएक नेईं।”

Escucha a लूका 9