Mazatec Ixcatlán - 2013 SBM (NT+Gen,Exd) Non Drama

Traducción Bíblica: Mazateco de San Pedro Ixcatlán, 2013© Sociedad Bíblica de México, A.C.,2013www.sbm.org.mx Grabación: Mazateco de San Pedro Ixcatlán ℗ Hosanna, 2021

Ni̱xtjin nga Néná ítsꞌi̱yanii̱ nga katsꞌénda nkꞌa jàn ko̱jo nga̱sondiee̱,
ta̱xkiya kisꞌijña kuí nga̱sondiee̱,
kó jmí ni kisꞌiejiín xi kisꞌińdo tikón.
Jñó kisꞌijña ndáfoa xi kisꞌie nga̱són tꞌanangii̱,
ta̱nga A̱si̱énni̱xtjii̱n Néná
ki̱a̱ kistsoꞌbásón nga̱són ndáfoaa̱.

Kó bi̱ katsó Néná:

«¡Mejénna nga ka̱matsijen!»

¡Kó ti̱ kjiꞌa kamátsijen!
Kó nga kamábe Néná nga tsjachon kamá ngije kamátsijee̱n,
xín íjñá nga tsijee̱n, kó xín íjñá nga jñoó,
kó Néná «ni̱xtjin» katsoó nga tsijee̱n.
Kó nga jñoó «ni̱xtji̱e̱n» katsoó.
Kó bo̱a̱ tsꞌén kamájñó, kó jaskan kisisie̱èn.
Kuí boá xi̱ꞌba̱ ni̱xtjin xi tjoón.

Kósꞌe̱ bi̱ katsó Néná:

«Mejénna nga kꞌuijñá ngi̱jinꞌa̱sièn ngamasiee̱n ndáfoaa̱,
kó kui ngi̱jinꞌa̱sie̱èn xi ngatꞌaxiékjo ndáfoaa̱».

¡Kó ti̱ kjiꞌa bo̱a̱ kamá!
Kó Néná katsꞌénda ngo ngi̱jinꞌa̱sièn ngamasiee̱n ndáfoaa̱,
kó masien kui ndáfoaa̱ kisꞌijña ngindie jàn,
kó xi ngi masiee̱n nkꞌa jàn kisꞌijña.
Kó nga kamábe Néná nga tsjá kisꞌie ngi̱jinꞌa̱sie̱èn,
«nkꞌa jàn» katsoó.
Kó bo̱a̱ tsꞌén kamájñó,
kó jaskan kisisie̱èn.
Kuí boá xi̱ꞌba̱ ni̱xtjin xi ma joó.

Kósꞌe̱ bi̱ katsó Néná:

«Mejénna nga ngo ngi̱ndie ngatamatikó ndáfoa
xi tikón ngindiee̱ nkꞌa jàn,
kó ngatjatjokjaní ngi̱ndie nínga kixí».

¡Kó ti̱ kjiꞌa bo̱a̱ kamá!
Kó Néná «tꞌanangi» katsoó ngi̱ndie nínga kixií,
kó nínga kamátikó ndáfoaa̱ «ndáchíkón» katsoó.

Kó nga kamábe Néná nga tsjakon kamá kui nii̱, bi̱ katsó:

«Mejénna nga kꞌuié ngi̱jin tꞌanangii̱
kꞌijñá xkjuién ko̱jo yá xí nga tsjá to ko̱jo xojmá».

¡Kó ti̱ kjiꞌa bo̱a̱ kamá!
Kó ngi̱jin tꞌanangii̱ kisꞌie yá ko̱jo kꞌijñá xkjuién,
yá xí kisꞌiee̱ to,
ko̱jo kꞌijñá xkjuién xí kisꞌiee̱ xojmá.

Kó tji̱e̱nga Néná askotsijee̱n nga tsja kisꞌie kui nii̱,
kamájñó, sꞌe̱ jaskan kisisie̱èn.
Kuí boá xi̱ꞌba̱ ni̱xtjin xi ma jaán.

Kósꞌe̱ bi̱ katsó Néná:

«Mejénna nga ngasꞌie ndiꞌí ngi̱jinꞌa̱sie̱èn,
tsi̱ꞌe̱ nga kja̱xín kja̱xín ngasꞌijña ni̱xtjii̱n ko̱jo ni̱xtji̱e̱e̱n,
kó kuí ndiꞌií xi ngatakó cha̱a̱n,
ko̱jo ni̱xtjii̱n ko̱jo noó,
kó kuí xí ngatsꞌéntsíjen ngi̱jinꞌa̱sie̱èn
tsi̱ꞌe̱ nga ka̱matsijen nga̱sondiee̱».

¡Kó ti̱ kjiꞌa bo̱a̱ kamá!
Kó Néná katsꞌénda jó ndiꞌí xí yiꞌi:
Ngo ndiꞌí xí je, kui xi tsꞌueé, tsi̱ꞌe̱ nga ko̱tíxoma nga ni̱xtjii̱n,
ko̱jo ngo ndiꞌí xi chichí, kui xi saá, tsi̱ꞌe̱ nga ko̱tíxoma nga jñoó.
Kó ti̱ katsꞌénda ńñoo nga.
Kó Néná índo kui ndiꞌií ngi̱jinꞌa̱sie̱èn,
tsi̱ꞌe̱ nga sa̱ꞌíntsijen nga̱sondiee̱,
ko̱jo tsi̱ꞌe̱ nga ko̱tíxoma nga ni̱xtjii̱n ko̱jo nga ni̱xtji̱e̱e̱n,
ko̱jo tsi̱ꞌe̱ nga kja̱xín kja̱xín kꞌuijñá nga tsijee̱n ko̱jo nga jñoó.

Kó tji̱e̱nga Néná askotsijee̱n nga tsjakon kamá kui nii̱,
kamájñó, sꞌe̱ jaskan kisisie̱èn.
Kuí boá xi̱ꞌba̱ ni̱xtjin xi ma nijoón.

Kósꞌe̱ bi̱ katsó Néná:

«Mejénna nga ngi̱jin ndáchíkoón
ngasꞌikitsie ngayeje to̱ko̱ya xi síndo.
Mejénna nga kꞌuié cho̱ xi fítji̱e̱n nga̱són nga̱sondiee̱,
kó ngatꞌítso̱ma xikó kjiꞌi nga tiyá nkꞌa jàn».

Kó bo̱a̱ tsꞌén katsꞌénda Néná
cho̱ xi yiꞌi ngi̱jin ndáchíkoón.
Ko̱jo ngayeje to̱ko̱ya cho̱ xi síndo xi tsꞌéntíyà,
kui xi kamáxchá ngi̱jin ndáfoaa̱,
ko̱jo ngayeje cho̱ xi fítji̱e̱n nkꞌa jàn.

Kó nga kamábe Néná nga tsjakon kamá kui nii̱,
bi̱ katsoó nga katsꞌénchikonñé:

«Mejénna nga ngayeje cho̱ xi tjín ngi̱jin ndáchíkoón,
ngatamatji̱e̱, kó ngatamakjín, ngasꞌikitsieni ngi̱jin ndáfoaa̱ ndáchíkoón,
kó mejénna nga ni̱siee̱
ka̱makjín kui nga̱sondiee̱».

Kó kamájñó, sꞌe̱ jaskan kisisie̱èn.
Kuí boá xi̱ꞌba̱ ni̱xtjin xi ma uún.

Kósꞌe̱ bi̱ katsó Néná:

«Mejénna nga ka̱maxchá ki̱a̱ tꞌanangii̱
ngayeje to̱ko̱ya cho̱ xi síndo,
cho̱ xi ma ꞌbítji̱e̱,
cho̱ kꞌijñá,
cho̱ xi ꞌbifé yojoo̱ ko̱jo ndí cho̱ xi ꞌniú xi̱xi̱i̱».

¡Kó ti̱ kjiꞌa bo̱a̱ kamá!
Kó Néná katsꞌénda cho̱ kꞌijñá,
cho̱ xi ma ꞌbítji̱e̱,
cho̱ xi ꞌbifé yojoo̱ ko̱jo ndí cho̱ xi ꞌniú xi̱xi̱i̱.

Kó nga kamábe Néná nga tsjakon kamá kui nii̱, bi̱ katsó:

«Si̱ꞌanda xotaa̱ ꞌne̱, xikó má kjiꞌi a̱si̱énná,
ko̱jo xikó má kón ñá, bo̱a̱ má tsꞌén si̱ꞌanda.
Kó kuí ngatatixómaá cho̱ xi tjín ngi̱jin ndáchíkoón,
ko̱jo ni̱sie xi tjín nkꞌa jàn, ko̱jo ngayeje cho̱ xi tjín tꞌanangii̱,
ko̱jo ngayeje cho̱ xi ꞌbifé yojoo̱, ko̱jo ngayeje ndí cho̱ xi ꞌniú xi̱xi̱i̱».

Kó bo̱a̱ tsꞌén katsꞌénda Néná xota̱ nga̱sondiee̱,
xikó kjiꞌi a̱sie̱én ko̱jo xikó kjiꞌi kui,
bo̱a̱ má tsꞌén katsꞌénda,
xi xi̱ꞌin ko̱jo xi chjo̱on katsꞌénda.
Kó Néná bi̱ katsoó nga katsꞌénchikonñé:

«Mejénna nga kꞌuiéjnú ndí,
kó ngatamakjínjnú,
mejénna nga jún xi kꞌuikítsienijnú nga̱sondiee̱,
kó ni̱ꞌantꞌiéjnú ko̱jo tatíxomájnúu̱
cho̱ xi tjín ngi̱jin ndáchíkoón,
ni̱sie xi tjín nkꞌa jàn,
ko̱jo ngayeje cho̱ xi síndo,
ko̱jo ngayeje cho̱ xi ꞌbifé yojoo̱ nga̱són tꞌanangii̱».

Kó Néná ti̱ bi̱ ti̱ katsó ngasee̱:

«Ngotꞌe̱ ꞌne̱ kꞌi̱e̱ tjítsꞌenkꞌasꞌiénjnúꞌun jún,
ngayeje to̱ko̱ya kꞌijñá xi tsjá xojmá,
ko̱jo ngayeje yá xí tsjá to,
kuí boá xí ka̱ma xi̱ni̱e̱jnú jún.
Ta̱nga ngayeje cho̱o̱ kꞌijñá xkjuieén
boá xi ka̱ma skji̱ni̱e̱ kui».

¡Kó ti̱ kjiꞌa bo̱a̱ kamá!
Kó tji̱e̱nga Néná askotsijee̱n nga tsjakon kamá ni xi katsꞌéndaa̱,
kamájñó, sꞌe̱ jaskan kisisie̱èn.
Kuí boá xi̱ꞌba̱ ni̱xtjin xi ma juu̱n.

Escucha a Jenesii̱s 1